Informe di Proklamadónan di Reino

Un Pueblo Onesto Ta Trese Alabansa pa Yehova

RÒNT mundu Testigunan di Yehova—hóben i bieu—ta konosí pa nan onestidat. Konsiderá algun ehèmpel for di tres kontinente.

Olusola di 17 aña ta biba na Nigeria, i un dia ku e tabata bai kas despues di skol el a haña un pòtmòni bentá abou. El a hib’é pa e kabes di skol, i esaki a konta e plaka ku a suma 6.200 naira (mas o ménos 80 florin). E kabes di skol a debolbé e pòtmòni na e dosente ku a pèrd’é. Komo muestra di apresio, e dosente a duna Olusola 1.000 naira (mas o ménos 12 florin) i a bis’é usa e sèn pa paga skol. Ora otro alumnonan a tende loke a pasa, nan a hasi bofon di Olusola. Algun siman despues, un alumno a mèldu ku nan a hòrta su sèn, i p’esei a pidi e dosentenan pa listra tur alumno. E dosente di Olusola a bis’é: “Abo para einan. Mi sa ku komo un Testigu di Yehova, bo no por hòrta.” Nan a haña dos di e mucha hòmbernan ku a hasi bofon di Olusola ku e plaka, i nan a haña straf pisá. Olusola a skirbi: “Mi ta hopi kontentu ku mi ta konosí komo un Testigu di Yehova ku nunka lo hòrta, i esei ta duna gloria na Yehova.”

Un dia ora ku Marcelo, un nativo di Argentina, tabata saliendo for di kas, el a haña un maletin bentá abou un par di meter for di su porta patras di kas. El a bai ku e maletin den kas, i e ku su kasá a habrié ku masha kuidou. Pa nan sorpresa, den e maletin tabatin un suma grandi di plaka kèsh, tarhetanan di krédito i vários chèk firmá, di kua unu tabata di un mion peso. Riba un faktura nan a haña un number di telefon. Nan a bèl e doño i a hasi areglo pa debolbé e maletin ku su kontenido na e lugá kaminda Marcelo ta traha. Ora e doño di e maletin a yega, e tabata parse nervioso. E doño di trabou di Marcelo a bis’é pa keda trankil pasobra Marcelo ta un Testigu di Yehova. Komo rekompensa pasobra Marcelo a haña e maletin, e persona a dun’é 20 peso so (mas o ménos 10 florin). Esaki a pone Marcelo su doño di trabou rabia masha hopi pasobra e tabata hopi impreshoná ku Marcelo su onestidat. Esaki a duna Marcelo e chèns di splik’é ku komo un Testigu di Yehova, e ke ta onesto na tur momentu.

E siguiente eksperensia ta bin for di Kirgizstan. Rinat, un mucha hòmber di seis aña, a haña un pòtmòni ku tabata pertenesé na un señora ku tabata biba djis eibanda. E pòtmòni tabatin 1.100 som (mas o ménos 45 florin). Ora ku Rinat a debolbé e pòtmòni pèrdí na e señora, e señora a konta e plaka i a bisa Rinat su mama ku falta 200 som. Rinat a bisa ku e no a kue e plaka. E ora ei nan tur a sali bai buska e plaka ku tabata falta i nan a hañ’é serka di kaminda Rinat a haña e pòtmòni. E señora a keda babuká. El a gradisí Rinat i su mama, promé pasobra nan a debolbé e plaka pèrdí, i di dos pa e edukashon kristian ku Rinat su mama ta dun’é.