Yehova Ta Protehá Hende Ku Ta Spera den Dje

“Bo miserikòrdia i bo bèrdat lo warda mi kontinuamente.” —Salmo 40:11.

1. Kiko Rei David a pidi Yehova, i kon Yehova ta kumpliendo aktualmente ku e petishon ei?

REI DAVID di Israel di antigwedat “a spera ku pasenshi” den Yehova i a ser konmoví pa bisa ku Yehova “a inkliná su mes na [dje] i a skucha [su] sklamashon.” (Salmo 40:1) Bes tras bes David a mira personalmente kon Yehova a protehá hende ku a stim’é. P’esei David por a pidi Yehova pa ward’é òf proteh’é kontinuamente. (Salmo 40:11) Siendo ku David ta ser kontá entre e hòmber- i muhénan fiel ku tabatin e promesa di “un mihó resurekshon,” aktualmente e ta safe den Yehova su memoria komo un di esnan ku lo risibí e rekompensa ei. (Hebreonan 11:32-35) Pues, su futuro ta sigurá den e mihó manera posibel. Su nòmber ta skirbí den Yehova su “buki di memoria.”—Malakias 3:16.

2. Kon e Skritura ta yuda nos komprondé kiko ke men ser protehá dor di Yehova?

² Ounke e sirbidónan fiel menshoná na Hebreonan kapítulo 11 a biba promé ku Hesukristu su estadia riba tera, tòg nan a biba na armonia ku loke Hesus a siña ora el a bisa: “Esun ku stima su bida ta pèrd’é, i esun ku odia su bida den e mundu aki lo ward’é pa bida eterno.” (Juan 12:25) Pues, ta bisto ku ser protehá dor di Yehova no ta nifiká ku un persona lo no sufri òf hañ’é ku persekushon. Loke sí e ta nifiká ta ku un persona ta ser protehá den un sentido spiritual pa asina e por mantené un posishon aprobá dilanti di Dios.

3. Ki evidensia nos tin ku Yehova a protehá Kristu Hesus, i kiko tabata e resultado?

³ Hesus mes tabata víktima di persekushon kruel i reproche, i su enemigunan finalmente a logra mat’é na un manera sumamente bergonsoso i doloroso. Sin embargo, esaki no ta nifiká ku Dios a kibra su promesa di protehá e Mesias. (Isaias 42:1-6) Hesus su resurekshon riba e di tres dia despues di su morto bergonsoso ta proba ku Yehova a tende su sklamashon pa ousilio, meskos ku Yehova a tende e sklamashon di David. Anto komo kontesta, Yehova a duna Hesus e fortalesa pa mantené integridat. (Mateo 26:39) Siendo protehá di e manera aki, Hesus a optené inmortalidat den shelu, i miónes di hende ku a ehersé fe den e reskate ta bin na remarke pa haña bida eterno.

4. Ki siguransa Beibel ta duna kristiannan ungí i e “otro karnénan”?

 ⁴ Nos por tin e konfiansa ku Yehova ta mesun dispuesto i kapasitá pa protehá su sirbidónan awe ku e tabata den tempu di David i di Hesus. (Santiago 1:17) E kantidat relativamente chikí di rumannan ungí di Hesus ku ainda ta riba tera por konfia den e promesa aki di Yehova: “Un herensia ku ta inkoruptibel i sin mancha i ku lo no marchitá . . . ta reservá den shelu pa boso, kendenan ta protehá dor di e poder di Dios pa medio di fe, pa un salbashon ku ta kla pa wòrdu revelá den e último tempu.” (1 Pedro 1:4, 5) E “otro karnénan,” kendenan tin e speransa di biba riba tera, tambe por pone nan konfiansa den Dios i den su promesa hasí mediante e salmista: “Stima SEÑOR, boso tur, su santunan! SEÑOR ta preservá e fielnan.”—Juan 10:16; Salmo 31:23.

Protehá Spiritualmente

5, 6. (a) Kon Dios su pueblo a ser protehá den tempu moderno? (b) Ki relashon e ungínan tin ku Yehova, i ki relashon esnan ku e speransa di biba riba tera tin kuné?

⁵ Den tempu moderno, Yehova a hasi areglo pa protehá su pueblo den un sentido spiritual. Ounke e no ta protehá nan di persekushon òf di difikultat- i tragedianan komun den bida, lealmente el a duna nan e yudansa i motivashon nesesario pa protehá nan relashon íntimo kuné. E fundeshi riba kua nan a edifiká e relashon aki ta nan fe den Dios su amoroso perkurashon di e reskate. Dios a ungi algun di e fiel kristiannan aki pa medio di su spiritu pa nan bira ko-heredero ku Kristu den shelu. Dios a deklará nan hustu komo su yunan spiritual, i ta na nan e palabranan aki ta apliká: “El a libra nos di e poder di skuridat, i a trasladá nos pa e reino di su Yu stimá, den kende nos tin redenshon [òf, “liberashon mediante e reskate,” NW], e pordon di pikánan.”—Kolosensenan 1:13, 14.

⁶ Miónes di otro kristian fiel ta haña e siguransa ku nan tambe por benefisiá di Dios su perkurashon di e reskate. Nos ta lesa: “E Yu di hende no a bin pa wòrdu sirbí, ma pa sirbi, i pa duna su bida komo preis di reskate pa hopi.” (Marko 10:45) E kristiannan ei ta antisipá ku na e debido tempu nan lo disfrutá di “e libertat glorioso di e yunan di Dios.” (Romanonan 8:21) Miéntras tantu, nan ta duna gran balor na nan amistat personal ku Dios i sinseramente ta hasi esfuerso pa fortalesé e relashon ei.

7. Ki medionan Yehova ta usa awe pa protehá e bienestar spiritual di su pueblo?

⁷ Un manera den kua Yehova ta protehá e bienestar spiritual di su pueblo ta dor di perkurá un programa di edukashon progresivo. Esaki ta duna nan e chèns di optené un konosementu kada bes mas eksakto di e bèrdat. Tambe Yehova ta perkurá guia kontinuo pa  medio di su Palabra, su organisashon i su spiritu santu. Bou di guia di “e esklabo fiel i prudente,” Dios su pueblo rònt mundu ta manera un famia internashonal. E esklabo ta atendé e nesesidatnan spiritual i ora ta nesesario asta e nesesidatnan material di e famia di sirbidónan di Yehova, anto sin importá nan orígen nashonal òf posishon sosial.—Mateo 24:45.

8. Ki konfiansa Yehova tin den su lealnan, i ki siguransa esei ta duna nan?

⁸ Meskos ku Yehova no a protehá Hesus físikamente di e atakenan di su enemigunan, E no ta protehá kristiannan tampoko den e manera ei awe. Pero esaki no ta nifiká ku Dios ta malkontentu ku nan. Al kontrario! Esei ta enfatisá mas bien Yehova su konfiansa ku nan lo apoyá su banda den e gran kuestion universal. (Jòb 1:8-12; Proverbionan 27:11) Nunka Yehova lo bandoná hende leal na dje, “pasobra SEÑOR ta stima hustisia i no ta bandoná su santunan [òf, “lealnan,” NW]. Nan ta keda preservá pa semper.”—Salmo 37:28.

Protehá dor di Bondat Amoroso i Bèrdat

9, 10. (a) Kon Yehova su apego na bèrdat ta protehá su pueblo? (b) Kon Beibel ta mustra ku Yehova ta protehá su lealnan pa medio di su bondat amoroso?

⁹ Den David su orashon ku ta pará skirbí na Salmo 40, el a pidi pa Yehova su miserikòrdia [òf, “bondat amoroso,” NW] i bèrdat ward’é. Yehova su apego na bèrdat i su amor pa hustisia ta rekerí pa e deklará bon kla kiko su normanan ta. Hende ku ta biba segun e normanan aki pa gran parti ta ser protehá di e angustia-, temor- i problemanan ku otronan ku ta ignorá e normanan ei ta eksperensiá. Por ehèmpel, nos por protehá nos mes i nos sernan kerí di hopi problema ku ta kousa doló di kurason si nos evitá droga, mal uso di alkohòl, relashon seksual parotin i un estilo di bida violento. Anto asta hende ku dual for di Yehova su kaminda di bèrdat—manera a pasa ku David algun biaha—tin e siguransa ku Dios ta keda un “lugá di skonde” pa malechornan arepentí. E personanan ei por deklará ku goso: “Bo ta warda mi di angustia.” (Salmo 32:7) Ki un gran ekspreshon di Dios su bondat amoroso!

¹⁰ Un otro ehèmpel di Dios su bondat amoroso ta ku e ta spièrta su sirbidónan pa keda separá for di e mundu malbado ku pronto lo e bai destruí. Nos ta lesa: “No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje. Pasobra tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu.” Dor di hasi kaso di e spièrtamentu aki i aktua di akuerdo kuné, nos por protehá nos bida literalmente pa henter eternidat, pasobra e teksto ta sigui bisa: “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.”—1 Juan 2:15-17.

 Protehá dor di Kapasidat di Pensa, Komprondementu i Sabiduria

11, 12. Splika kon kapasidat di pensa, komprondementu i sabiduria ta protehá nos.

¹¹ Salomon, yu di David, a skirbi bou di inspirashon na hende ku tin e speransa di gana Dios su aprobashon: “Diskreshon lo warda bo; komprondementu lo kuida bo.” Tambe el a urgi: “Atkerí sabiduria! . . . No bandoná sabiduria, i é lo warda bo; stim’é, i é lo kuida bo.”—Proverbionan 2:11; 4:5, 6.

¹² Nos ta usa diskreshon òf e kapasidat di pensa, si nos ta meditá riba loke nos ta siña for di e Palabra di Dios. Esei ta yuda nos desaroyá mas komprondementu di manera ku nos por fiha e prioridatnan korekto. Esaki ta masha importante, ya ku mayoria di nos sa—podisé via eksperensia personal—ku problemanan ta surgi ora ku hende sea intenshonalmente òf nò ta fiha prioridatnan ku no ta sabí. E metanan ku e mundu di Satanas ta pone nos dilanti ta rikesa material, prominensia i poder, miéntras ku Yehova ta enkurashá nos pa enfoká riba metanan spiritual ku ta mas importante. Ora un persona keda sin duna prioridat na metanan spiritual sino ta dun’é mas bien na metanan material, esei por pone famianan habri for di otro, amistatnan kibra i metanan spiritual disparsé. Komo resultado, un persona por kosechá solamente e realidat tristu indiká dor di e palabranan di Hesus: “Ki probecho un hende tin si e gana henter mundu i pèrdè su alma?” (Marko 8:36) Sabiduria ta preskribí pa nos hasi kaso di e konseho di Hesus: “Ma buska promé e reino di Dios i su hustisia, i tur e kosnan aki lo wòrdu añadí na boso.”—Mateo 6:33.

E Peliger di Bira Egoista

13, 14. Kiko ke men ser egoista, i dikon no ta sabí pa bira asina?

¹³ Hende di naturalesa ta interesá den nan mes. Sin embargo, ora ku deseo- i interesnan personal bira lo mas importante den bida, esei ta resultá den problema. P’esei, pa protehá nos amistat ku Yehova, e ta instruí nos pa evitá di ta egoista. Ser egoista ta nifiká ser interesá solamente den bo propio deseonan, nesesidatnan òf interesnan. Esei ta un bon deskripshon di hopi hende awe, no ta bèrdat? Ta bon pa tuma nota ku Beibel ta predisí ku “den e último dianan” di Satanas su sistema malbado, “hende lo ta stimadó di nan mes,” es desir, nan lo bira egoista.—2 Timoteo 3:1, 2.

¹⁴ Kristiannan ta mira ku ta sabí pa kumpli ku e mandamentu bíbliko di mustra interes  den otro hende, i stima nan manera bo mes. (Lukas 10:27; Filipensenan 2:4) Hende en general kisas ta konsiderá esaki komo algu ku no ta práktiko, sin embargo e ta masha importante si nos ke disfrutá di matrimonionan eksitoso, relashonnan familiar felis i amistatnan ku ta duna satisfakshon. Pues, un berdadero sirbidó di Yehova no mester permití nunka pa e interes natural ku hende tin den su mes, dominá su bida di tal manera ku e ta ekskluí otro aktividatnan mas importante. Mas ku tur kos, e trabou relashoná ku e adorashon di su Dios, Yehova.

15, 16. (a) Na kiko un aktitut egoista por hiba, i ken su ehèmpel ta demostrá esei? (b) Bon mirá, kiko un persona ta hasi ora e ta kla pa husga otro hende?

¹⁵ Un aktitut egoista por pone un hende bira hustu den su propio bista, lokual na su turno, por pone un persona bira mente será, arogante. Beibel ta bisa aptamente: “Bo no tin èksküs, kada un di boso ku ta husga otro, pasobra den loke bo ta husga un otro, bo ta kondená bo mes; pasobra abo ku ta husga ta praktiká e mesun kosnan.” (Romanonan 2:1; 14:4, 10) E lidernan religioso den tempu di Hesus tabata asina konvensí di nan propio hustisia ku nan a sinti nan mes kualifiká pa sensurá Hesus i su siguidónan. Dor di hasi esei, nan a pone nan mes den posishon di hues. Bon mirá, nan a kondená nan mes dor ku nan no por a mira nan propio faltanan.

¹⁶ Hudas, e siguidó di Hesus ku a traishon’é, a permití su mes bira un persona ku ta husga otro hende. Na e okashon na Betania ora ku Maria, ruman muhé di Lázaro, a ungí Hesus ku zeta perfumá, Hudas a protestá fuertemente. El a ekspresá su indignashon dor di argumentá: “Pakiko e perfume aki no a wòrdu bendí pa treshen denario i duná na hende pober?” Pero e relato bíbliko ta sigui splika: “El a bisa esaki, no pasobra hende pober tabata import’é, ma pasobra e tabata un ladron, i komo ku e tabatin e kaha di plaka, e tabatin kustumber di kohe di loke tabata wòrdu tirá aden.” (Juan 12:1-6) Laga nos nunka bira manera Hudas òf e lidernan religioso, kendenan tabata kla pa husga otro hende, loke solamente a resultá den kondenashon di mes.

17. Ilustrá e peliger ku tin den ser bromadó òf den haña demasiado konfiansa den bo mes.

¹⁷ Lamentablemente, algun kristian di promé siglo, ounke nan no tabata ladron manera Hudas, tòg a bira víktima di orguyo, dor di bira bromadó arogante. Santiago a skirbi relashoná ku nan: “Den boso arogansia boso ta gaba.” Anto el a agregá: “Tur sorto di gabamentu asina ta malu.” (Santiago 4:16) Gaba òf broma tokante loke nos a hasi òf tokante nos privilegionan den Yehova su sirbishi lo kousa nos problema en bes di duna bon resultado. (Proverbionan 14:16) Nos ta kòrda loke a pasa ku apòstel Pedro, kende den un momentu di demasiado konfiansa den su mes a broma: “Maske tur trompeká pa bo motibu, ami nunka lo no trompeká. . . . Asta si mi tin ku muri huntu ku bo, lo mi no nenga bo.” Bon mirá, nos no tin nada di gaba tokante nos mes. Tur loke nos tin ta únikamente debí na Yehova su bondat amoroso. Si nos kòrda esaki, nos lo evitá di bira bromadó.—Mateo 26:33-35, 69-75.

18. Kiko Yehova ta pensa di orguyo?

¹⁸ “Orguyo ta bin promé ku destrukshon, i un spiritu arogante promé ku kaida,” Beibel ta bisa nos. Dikon? Yehova ta kontestá: “Orguyo [i] arogansia . . . mi ta odia.” (Proverbionan 8:13; 16:18) Ta p’esei Yehova tabata furioso riba “e kurason arogante di rei di Asiria i e mirada orguyoso di su wowonan”! (Isaias 10:12)  Yehova a regla kuenta kuné. Pronto Yehova lo regla kuenta tambe ku henter e mundu di Satanas, huntu ku su lidernan orguyoso i importante den nan mes bista, tantu esnan visibel komo esnan invisibel. Laga nos nunka reflehá e aktitut terko di Yehova su atversarionan!

19. Den ki aspekto e pueblo di Dios ta orguyoso i tòg humilde?

¹⁹ Kristiannan berdadero tin tur motibu pa ta orguyoso di ta sirbidónan di Yehova. (Jeremias 9:24) Pero a la bes nan tin tur motibu pa keda humilde. Dikon? Pasobra “tur a peka i ta falta e gloria di Dios.” (Romanonan 3:23) Pues pa protehá nos posishon komo sirbidónan di Yehova, nos mester tin e aktitut di apòstel Pablo, kende a bisa ku “Kristu Hesus a bin na mundu pa salba pekadó,” anto kaba el a agregá: “Entre kendenan ami ta esun di promé.”—1 Timoteo 1:15.

20. Kon Yehova ta protehá su pueblo awor, i kon lo e protehá nan den futuro?

²⁰ Siendo ku Yehova su pueblo gustosamente ta pone nan interesnan personal na di dos lugá afin di duna prioridat na e interesnan di Dios, nos por tin sigur ku Yehova lo sigui protehá nan spiritualmente. Tambe nos por tin sigur ku ora e gran tribulashon dal aden, Yehova lo protehá su pueblo no solamente den sentido spiritual sino tambe físikamente. Ora nan drenta den Dios su mundu nobo, nan lo por grita: “Mira, esaki ta nos Dios, riba kende nos a spera pa e salba nos. Esaki ta e SEÑOR [Yehova], riba kende nos a spera; laga nos regosihá i sea kontentu den su salbashon.”—Isaias 25:9.

Bo Ta Kòrda?

• Kon Dios a protehá Rei David i Hesukristu?

• Kon Yehova su pueblo ta ser protehá awe?

• Dikon nos mester evitá di ta egoista?

• Dikon nos por ta orguyoso i a la bes humilde?

[Preguntanan di Estudio]

[Plachinan na página 9]

Kon Yehova a protehá David i Hesus?

[Plachinan na página 10, 11]

Den ki maneranan Dios su pueblo ta ser protehá spiritualmente awe?

[Plachinan na página 12]

Ounke nos ta orguyoso di ta sirbi Yehova, semper nos mester keda humilde