Alabando Yehova na Skol

RÒNT mundu hóbennan Testigu di Yehova ta haña maneranan pa alabá Dios na skol. Nan ta alabá Dios ku nan boka i nan kondukta. Tuma nota di algun eksperensia ku ta ilustrá nan entusiasmo hubenil.

Un hóben Testigu na Gresia a haña e tarea pa skirbi un òpstèl riba e tema di polushon di e atmósfera di tera. El a buska den e Indèks di Publikashonnan Watch Tower, i a haña informashon útil den e revista Spièrta! Na konklushon di su òpstèl el a duna mérito na Spièrta! komo su fuente di informashon. Su maestra a bis’é ku su òpstèl tabata un di e mihónan ku el a yega di lesa. Mas despues e maestra a usa e informashon na un seminario i e tabatin bon resultado. P’esei e ruman muhé hóben aki a disidí di ofresé e maestra mas edishon di Spièrta!, inkluso unu ku a presentá e seri di artíkulo “Kon Nos Lo A Hasi sin Maestro?” Despues e maestra a elogiá e revista Spièrta! den klas, i algun otro studiante a kuminsá pidi pa nan haña e revista. E ruman muhé mester a bin skol ku otro edishonnan di e revista pa nan por a lesa.

Na Benin, Afrika, un tiner kristian a hañ’é ku un tipo di preshon fuera di lo usual. Manera ta e kustumber einan, mayornan di vários studiante na su skol a reuní pa huntu nan paga maestronan privá pa duna e hóbennan beilès den vaknan difísil i asina prepará nan pa eksamen. Sin embargo, e maestronan a skohe djasabra mainta pa nan duna beilès. E hobensita Testigu no a bai di akuerdo ku e ora i a bisa: “Djasabra mainta ta ora ku henter e kongregashon ta sali huntu pa bai prediká. Ta e parti mas dushi di siman pa mi, i lo mi no pèrd’é pa nada di mundu!” Su tata, un Testigu i un mayor soltero, tambe tabata eens kuné i a purba konvensé un grupo di mayor i maestro pa kambia e orario. Pero nan tur a nenga. E hobensita a disidí di keda sin tuma e beilès. En bes di esei el a bai prediká huntu ku su kongregashon. Su kompañeronan di klas a tent’é i a konseh’é pa stòp di prediká i pa e legumai su Dios tambe. Nan a kere ku sigur lo el a drùip pa su eksamen. Sin embargo, na final di kuenta ta e grupo di studiante ku a haña beilès a drùip, miéntras ku nos ruman hobensita sí a slag. No tin nodi bisa mes ku nan a stòp di tent’é. Awor e studiantenan ta bis’é: “Bo tin ku sigui sirbi bo Dios.”

Un hobensita di 12 aña na Repúblika Cheko mester a traha un spreekbeurt riba un buki. Su mama a konseh’é pa usa e buki E homber mas importante cu hamás a biba. El a kuminsá su spreekbeurt ku e pregunta: “Ken boso ta kere ta e hòmber mas importante ku a yega di biba?” El a deskribí Hesus, su bida riba tera i su siñansanan. Despues el a trata e kapítulo ku tin e título: “Un Lès den Dunamentu di Pordon.” Su maestra a bisa emoshoná: “Esei ta e mihó spreekbeurt ku mi a yega di tende di bo!” I ku gratitut el a aseptá un ehemplar di e buki. Algun kompañero studiante tambe tabata ke un ehemplar. E siguiente dia, ku goso e mucha muhé a distribuí 18 ehemplar.

E hóbennan ei ta haña hopi goso den alabá Yehova na skol. Ta bon pa nos tur imitá nan entusiasmo hubenil.