E Dilema di Trabou

“Ban trabou, ban trabou! Ki un inmenso plaser di sa ku ainda nos tin e mihó kosnan di hasi.”—Katherine Mansfield, eskritor (1888-1923).

ABO tambe tin e punto di bista idealista ei di trabou manera esun ekspresá den e deklarashon ariba? Kon abo personalmente ta mira trabou? Bo ta haña podisé ku trabou ta manera un tùnel largu i skur ku bo tin ku pasa aden promé ku bo yega fin di siman pa relahá? Òf bo ta gusta bo trabou asina tantu ku kasi bo ta adikto na dje?

Pa mayoria hende, e mayor parti di nan dia nan ta dediká na trabou. Nos trabou kisas ta determiná unda nos ta biba i ki tipo di bida nos ta hiba. Pa hopi hende, for di ora nan ta hóben adulto te ora nan baha ku penshon, trabou ta é aktividat ku mas ta dominá nan bida. Algun di nos ta saka gran satisfakshon personal for di nos labor. Otro hende ta midi e balor di trabou a base di e kantidat di plaka òf prestigio ku nan por haña for di dje, miéntras ku tin hende ta mira trabou komo simplemente un kos pa yena tempu òf asta komo un pèrdèmentu di tempu.

Tin hende ku ta traha pa biba i tin ku ta biba pa traha; otronan ta muri debí na e kondishonnan ku nan tin ku traha aden. Por ehèmpel, segun un rapòrt resien di Nashonnan Uní, trabou ta kousa mas doló i morto “ku guera òf mal uso di droga i alkohòl huntu.” Komentando riba esaki, e korant The Guardian di Lònden a informá: “Tur aña mas ku dos mion hende ta muri di aksidente òf malesa ligá ku trabou . . . Stòf, kímikonan, bochincha i radiashon [ta] kousando kanser, malesa di kurason i atake selebral.” Mucha chikí den e proseso laboral i trabou fòrsá ta apénas dos otro realidat teribel di kondishonnan di trabou djawe.

Ademas, tin loke sikólogo Steven Berglas a yama “agotamentu katastrófiko.” Segun su deskripshon esaki ta e kaso di e trahadó diligente ku a alkansá e tòp di su karera pero ku awor ta sinti “un miedu króniko, angustia, desesperashon òf depreshon debí ku e ta kere ku e ta atrapá den un trabou—òf ku su karera a kue un rumbo—for di kua e no por skapa ni saka satisfakshon sikológiko.”

Trabou Duru Versus Adikshon na Trabou

Den un mundu kaminda hopi hende ta traha duru pa hopi ora, ta bon pa distinguí entre e trahadó diligente i esun ku ta adikto na trabou. Hopi hende adikto na trabou ta mira nan lugá di empleo komo un refugio den e mundu peligroso i insigur aki; e trahadó diligente ta mira trabou  komo un obligashon ku ta esensial i ku tin biaha ta duna satisfakshon. E adikto na trabou ta permití trabou pusha tur otro aspekto di bida un banda; e trahadó diligente sa ki ora e tin ku paga e kòmpiuter, kita su mente for di trabou i konsentrá riba otro kos, por ehèmpel, sòru pa e ta presente pa selebrá su aña kasá. Ekseso di trabou ta duna esun adikto un satisfakshon emoshonal i ta un estímulo p’e; e trahadó diligente sí no ta sintié asina.

Sosiedat moderno ta pone ku ta difísil pa distinguí entre nan dos komo ku e ta laga parse ku ekseso di trabou ta algu deseabel. Modem, telefon selular i pager ta pone ku ta difísil pa distinguí ki ora un hende ta na trabou òf ki ora el a stòp di traha. Ora ku kualke sitio por ta e lugá di empleo i kualke momentu por ta ora pa traha, tin hende ta laga trabou kaba ku nan.

Kon algun hende ta reakshoná riba un aktitut asina insaludabel? Sosiólogonan a tuma nota ku hende ku ta traha di mas i ku tin demasiado strès tin e tendensia di meskla nan trabou ku asuntunan spiritual i kombiná nan bida religioso ku nan bida profeshonal. E korant San Francisco Examiner ta informá ku “e mesklamentu di spiritualidat ku trabou a bira manera un fenómeno públiko.”

Un informe resien a deklará lo siguiente relashoná ku Silicon Valley (California, Merka) kaminda tin un konsentrashon di industria di alta teknologia: “Segun ku ehekutivonan ta konta e kantidat di lugá di parker bashí ku tin na lugánan di empleo debí na e retironan ku ta sigui kai, no tin sufisiente lugá di parker na sitionan di estudio di Beibel di anochi.” Sea kual sea e importansia di esei, hopi hende rònt mundu a deskubrí ku Beibel tin un influensia positivo riba nan punto di bista di trabou, lokual a resultá den un manera mas balansá di hiba nan bida.

Kon Beibel por yuda nos haña un punto di bista balansá di trabou? Tin prinsipionan bíbliko ku por yuda nos enfrentá e retonan di empleo di bida moderno ku éksito? E siguiente artíkulo lo konsiderá e preguntanan aki.