Ekspanshon Kaminda Kristianismo di Promé Siglo A Floresé

ITALIA, e península ku forma di buts i ku ta ekstendé te den Laman Mediteráneo, ta un lugá kaminda susesonan religioso i kultural a influensiá historia di mundu. Su paisahe bunita i hopi variá, su famoso obranan di arte i su platonan sabroso ta atraé miónes di turista. Ademas, e ta un pais kaminda edukashon bíbliko ta prosperá.

Kisas kristianismo berdadero na promé instante a yega Roma—kapital di e poder mundial di e tempu ei—ora ku hudiu- i prosélitonan ku a bira kristian na Pentekòste di aña 33 di nos era a regresá nan kas for di Yerusalèm. Rònt di aña 59, apòstel Pablo a bishitá Italia pa promé biaha. Na e stat portuario Puteoli, el a “haña algun ruman” den fe.—Echonan 2:5-11; 28:11-16.

E promé siglo no a ni terminá ainda ora ku gruponan di apóstata a kuminsá kai pokopoko for di kristianismo berdadero, nèt manera Hesus i e apòstelnan a predisí. Sin embargo, promé ku fin di e sistema aktual di kosnan, e berdadero disipelnan di Hesus a hiba delantera den predikashon di e bon nobo rònt mundu, inkluso na Italia.—Mateo 13:36-43; Echonan 20:29, 30; 2 Tesalonisensenan 2:3-8; 2 Pedro 2:1-3.

Un Komienso Desepshonante

Na aña 1891, Charles Taze Russell, kende tabata dirigí e obra mundial di predikashon di e Studiantenan di Beibel (manera Testigunan di Yehova tabata konosí e tempu ei), a bishitá algun stat italiano pa promé biaha. E tabatin ku atmití ku e resultado di su ministerio einan no tabata masha prometedor: “Nos no a mira nada pa duna nos e speransa di un kosecha na Italia.” Na lènte di 1910, Ruman Russell a bolbe bishitá Italia i a duna un charla bíbliko den un gimnasio den sentro di Roma. Kiko tabata e resultado? El a raportá: “En general . . . e reunion tabata hopi desepshonante.”

De echo, pa vários dékada predikashon di e bon nobo na Italia no a duna muchu fruta, entre otro pa motibu ku e diktadura fasista a persiguí Testigunan di Yehova. Durante e periodo ei no tabatin mas ku 150 Testigu di Yehova den e pais, i mayoria di nan a siña e bèrdatnan bíbliko for di famia òf amigunan ku tabata biba den eksterior.

Progreso Espektakular

Despues di Segundo Guera Mundial, a manda un kantidat di misionero Italia. Pero manera e korespondensia ku tin den archivonan di Estado ta mustra, personanan di alto rango den e herarkia di Vatikano a pidi gobièrnu pa deportá e misioneronan. Ku algun eksepshon, e misioneronan a haña nan obligá ta bandoná e pais.

Apesar di opstákulo, multitut di hende na Italia a kuminsá basha bai na “e seru” di Yehova su adorashon. (Isaias 2:2-4) E oumento den  e kantidat di Testigu tabata remarkabel. Na aña 2004 tabatin un máksimo di 233.527 publikadó di e bon nobo, 1 pa kada 248 habitante, i 433.242 hende a asistí na Konmemorashon di e morto di Kristu. Tabatin 3.049 kongregashon di Testigunan di Yehova ta reuní den Salònnan di Reino kómodo. Últimamente, foral sierto gruponan di e poblashon a eksperensiá bastante oumento.

Predikando den Hopi Idioma

Hopi imigrante for di Afrika, Asia i Ost Europa ta bin Italia pa buska trabou òf un mihó bida òf, den algun kaso, pa skapa di situashonnan trágiko. Kon lo por yuda e miónes di hendenan aki den sentido spiritual?

Hopi Testigu di Yehova na Italia a aseptá e reto di siña idiomanan difísil, manera albanes, amáriko, arabir, bengali, chines, punjabi, singala i tagalog. Na 2001 a kuminsá tene kursonan di idioma pa siña e Testigunan dispuesto aki kon pa duna testimonio den otro idioma. Durante e último tres añanan, 3.711 Testigu a asistí na 79 kurso ku a ser duná na 17 idioma. Esaki a hasi posibel ku por a forma i fortalesé 146 kongregashon i 274 grupo na 25 idioma. Di e manera aki hopi hende sinsero a logra tende e bon nobo i a kuminsá studia Beibel. Hopi bes e resultadonan ta ekstraordinario.

Un Testigu di Yehova a papia tokante Beibel ku George, un hòmber di India ku ta papia malayalam. Apesar ku George tabatin problema grandi ku trabou, gustosamente el a aseptá un estudio di Beibel. Un par di dia despues, George su amigu Gil, un hòmber di India ku ta papia punjabi, a bai Salòn di Reino, i nan a kuminsá un estudio di Beibel kuné. Gil a introdusí David, tambe di India pero di idioma telugu, na e Testigunan. Poko despues, David a kuminsá studia Beibel. Tabatin dos otro hòmber di India, Sonny ku Shubash, ku tabata biba den e mesun kas ku David. Ámbos a djòin e estudio di Beibel.

Algun siman despues, e Testigunan a haña un yamada telefóniko di Dalip, un hòmber ku ta papia marati. E di: “Mi ta un amigu di George. Boso por siña mi e Beibel?” Despues a bin Sumit, un hòmber ku ta papia tamil. Por último, un otro amigu di George a bèl pidi un estudio di Beibel. Anto George a bin Salòn di Reino ku un otro yònkuman, Max. E tambe a pidi un estudio. Te ku awor, e rumannan ta kondusí seis estudio di Beibel, i tin areglo pa kuater mas. Nan ta tene e estudionan na ingles, maske nan ta usa tambe publikashonnan na hindi, malayalam, marati, punjabi, tamil, telugu i urdu.

E Surdunan Ta “Tende” e Bon Nobo

Tin mas ku 90.000 hende surdu na Italia. Meimei di dékada di 1970, e Testigunan a kuminsá duna atenshon na siña nan bèrdatnan bíbliko. Na prinsipio, algun Testigu surdu a siña e idioma di seña italiano na otro Testigunan ku tabata dispuesto pa yuda den e kampo ei. Despues mas i mas hende surdu a kuminsá mustra interes den Beibel. Awe, mas ku 1.400 persona ku ta usa idioma di seña italiano ta asistí na reunionnan kristian. Tin 15 kongregashon i 52 grupo ku ta tene reunion den idioma di seña italiano.

Na prinsipio, predikashon na hende surdu a dependé prinsipalmente di e inisiativa di Testigunan individual. Pero na 1978, e sukursal di Testigunan di Yehova na Italia a kuminsá  organisá kongreso pa hende surdu. Na mei di e aña ei a anunsiá ku na e próksimo kongreso internashonal na Milan lo bai tin seshon pa hende surdu. Nan a tene e promé asamblea di sirkuito pa hende surdu na e Salòn di Asamblea na Milan na febrüari 1979.

For di e tempu ei padilanti e sukursal a presta bon atenshon na e alimentashon spiritual di hende surdu dor di animá un kresiente kantidat di predikadó di e bon nobo pa mehorá nan abilidat den e idioma aki. Desde 1995, ta manda pioneronan spesial (predikadónan di tempu kompletu) na algun grupo pa entrená Testigunan surdu den sirbishi di vèlt i pa organisá reunionnan kristian. Tin tres Salòn di Asamblea ekipá ku sistema di vidio supermoderno pa asina e surdunan por mira e programa mihó. Ademas tin tambe vidiokasèt di publikashonnan kristian pa perkurá alimento spiritual pa hende surdu.

Opservadónan a ripará ku e Testigunan ta perkurá bon pa e nesesidatnan spiritual di hende surdu. P@role & Segni, un revista publiká dor di e Sosiedat Italiano di Surdunan, a sita un karta ku un monseñor katóliko a manda: “Un persona surdu ta den un situashon difísil pasobra e tin mester di atenshon konstant. Por ehèmpel, e ta yega misa su so sin problema, pero e tin mester di e yudansa di un intérprete pa por sigui tur loke ta ser lesá, deklará òf kantá durante e sirbishi.” E revista a agregá ku e prelado “ta rekonosé ku desafortunadamente, iglesia no ta prepará ainda pa trata ku e desabilidat ei, i ta trese dilanti ku hopi hende surdu ta haña mihó kuido den e Salònnan di Reino di Testigunan di Yehova ku den e misa di parokia.”

Predikashon di e Bon Nobo na Prezunan

Un hende por ta liber i tòg den prizon? Sí, pasobra e Palabra di Dios tin e poder pa ‘libra’  esnan ku asept’é i aplik’é den nan bida. E mensahe ku Hesus a proklamá “na e prezunan” tabata libertat for di piká i religion falsu. (Juan 8:32; Lukas 4:16-19) Na Italia e Testigunan ta kosechá ekselente resultado dor di prediká den prizon. Kasi 400 Testigu di Yehova a haña outorisashon di Estado pa bishitá prezunan afin di duna nan yudansa spiritual. Testigunan di Yehova tabata e promé organisashon no-katóliko ku a pidi i haña e pèrmit ei.

E mensahe di Beibel por plama den maneranan ku nos no ta ferwagt. Prezunan ta papia ku otro prezu tokante e trabou di edukashon bíbliko di Testigunan di Yehova. Tin di e prezunan aki na nan turno a pidi pa haña bishita di un Testigu. Òf miembronan di famia ku a kuminsá studia Beibel ta animá e prezunan pa pidi pa e Testigunan bishitá nan. Algun prezu ku ta sintando kastigu di bida largu pa homisidio òf otro krímennan grave a repentí i a kambia nan bida drástikamente. Esaki ta prepará nan pa hasi un dedikashon na Yehova Dios i pa boutismo.

Den un kantidat di prizon, e Testigunan a hasi areglo pa duna diskursonan públiko riba temanan bíbliko, pa konmemorá e morto di Hesus i pa pasa vidiokasèt di programanan bíbliko produsí dor di Testigunan di Yehova. Hopi bes kantidat grandi di prezu ta asistí na e reunionnan aki.

Pa yuda e poblashon di prizon den maneranan práktiko, e Testigunan a distribuí ampliamente revistanan ku ta trata ku temanan ku e prezunan lo haña útil. Un di e revistanan ei tabata e Spièrta! di 8 di mei 2001, ku a trata e tema “Prizoneronan Por Ser Reformá?” E edishon di 8 di aprel 2003 tabatin e tema “Kiko Bo Por Hasi si Bo Famia Ta Usa Droga?” Nan a laga míles di revista ku prezunan. Komo resultado, nan ta kondusiendo sientos di estudio di Beibel. Algun wardadó di prezu tambe a mustra interes den e mensahe di Beibel.

Despues di a optené un pèrmit spesial for di outoridatnan, un prezu ku yama Costantino a batisá den un Salòn di Reino na San Remo, ku 138 Testigu presente. Costantino, kende despues di su boutismo tabata hopi emoshoná, a bisa: “Mi a sinti ku mi a haña un baño di amor.” Un korant lokal a raportá e palabranan di e direktor di prizon: “Ta ku hopi plaser . . . nos a duna e pèrmit aki. Nos mester konsiderá tur loke por promové e rekuperashon sosial, personal i spiritual di un prezu.” Costantino su kasá i su yu muhé tabata impreshoná ku e manera ku konosementu eksakto di Beibel a influensiá Costantino su bida. Nan a bisa: “Nos ta orguyoso di dje pa e kambionan ku el a hasi. El a bira pasífiko, i e ta mustrando mas i mas interes den nos. Nos a bolbe haña konfiansa den dje i rèspèt p’e.” Nan tambe a kuminsá studia Beibel i asistí na reunionnan kristian.

Sergio, kende a ser kondená pa ladronisia, atrako armá, trafikashon di droga i homisidio, tin ku sinta su kastigu te na aña 2024. Despues di a studia e Skritura pa tres aña i a hasi kambionan grandi den su bida, Sergio a disidí di batisá. E tabata e di 15 prezu den e prizon Porto Azzuro, riba e isla di Elba, ku a batisá komo Testigu di Yehova. Ku vários otro prezu presente, su boutismo a tuma lugá den un pisina portátil ku nan a pone riba e kancha di deporte di e prizon.

 Leonardo, kende ta sintando un kastigu di prizon di 20 aña, a optené pèrmit spesial pa batisá den un Salòn di Reino na Parma. Den un entrevista ku un korant lokal, Leonardo a deklará ku e kier a “mustra bon kla ku el a disidí di bira un Testigu di Yehova, no komo un manera pa sali for di e skuridat di prizon, sino pa satisfasé un nesesidat spiritual profundo.” Leonardo a bisa: “Mi bida tabata un bida di eror, pero mi a lag’é atras. Mi a kambia, pero no di anochi pa mainta. Lo mi tin ku sigui kana den e kaminda korekto.”

Salvatore, kende a ser kondená pa homisidio, ta den e prizon Spoleto, un prizon di máksimo siguridat. Su boutismo ku a tuma lugá paden di e prizon, a impreshoná hopi hende. E direktor di e prizon ei a bisa: “Mester enkurashá e importansia sosial di un eskoho ku ta hiba na mihó komportashon, tantu pa probecho di e komunidat di prizon komo pa henter sosiedat.” Komo resultado di e kambionan ku Salvatore a hasi, su kasá i su yu muhé ta asistí awor na e reunionnan di Testigunan di Yehova. Un prezu ku Salvatore a prediká na dje a batisá komo un sirbidó dediká di Yehova.

Un parti di e ekspanshon i oumento di kristianismo di promé siglo a tuma lugá na Italia. (Echonan 2:10; Romanonan 1:7) Den e tempu aki di kosecha, kresementu spiritual i ekspanshon ta sigui tuma lugá den e mesun áreanan ku Pablo i su kompañeronan kristian a traha duru pa prediká e bon nobo.—Echonan 23:11; 28:14-16.

[Mapa na página 13]

(Pa e teksto den su formato kompleto, wak e publikashon)

ITALIA

Roma

[Plachinan na página 15]

Salòn di Asamblea di Bitonto i un kongregashon di idioma di seña italiano na Roma

[Plachi na página 16]

Bèrdat bíbliko ta hasi prezunan “liber”

[Plachinan na página 17]

Kresementu spiritual ta sigui kaminda kristianismo di promé siglo a floresé