Filo di Alexandria A Meskla Skritura ku Spekulashon

NA AÑA 332 promé ku nos era, Alexander e Grandi a drenta Egipto ku su ehérsito. Promé ku el a sigui den direkshon ost rumbo pa su konkista mundial, el a funda un stat ku el a yama Alexandria. E stat ei a bira un sentro di kultura griego. Einan, rònt di aña 20 promé ku nos era, un otro konkistadó a nase. Su armanan no tabata spada ku lansa, sino rasonamentunan filosófiko. E ta konosí komo Filo di Alexandria, òf Filo Judaeus debí na su antesedente hudiu.

Debí na e Diáspora ku a tuma lugá despues di e destrukshon di Yerusalèm na aña 607 promé ku nos era, tabatin hopi hudiu ta biba na Egipto. Míles di nan tabata biba na Alexandria. Sin embargo, tabatin problema entre e hudiunan i e griegonan. E hudiunan a nenga di adorá e diosnan griego, miéntras ku e griegonan a hasi bofon di e Skritura Hebreo. Filo, ku su edukashon griego i su kriansa hudiu, tabata bon na haltura di e kontroversia. P’e, ta hudaismo tabata e religion berdadero. Pero distinto for di hopi hende, Filo a buska un manera pasífiko pa dirigí hende no-hudiu na Dios. E kier a hasi hudaismo aseptabel pa nan.

Nifikashon Nobo na Skrituranan Bieu

Filo su idioma materno tabata griego, meskos ku tabata e kaso ku hopi hudiu na Alexandria. P’esei e base di su estudio di e Skritura Hebreo tabata e vershon griego di Septuaginta. Segun ku el a eksaminá e teksto di e Septuaginta, el a bira konvensí ku e teksto tabatin elementonan filosófiko i ku Moisés tabatin “e genio di un filósofo.”

Siglonan promé ku Filo, intelektualnan griego tabatin problema pa aseptá e kuentanan di diosnan i diosanan, kuentanan ku a trata tokante gigante i demoño di nan antiguo mitologia griego. E intelektualnan a kuminsá duna e kuentanan bieu ei un otro interpretashon. James Drummond, eksperto riba tereno di e mundu griego i romano di antigwedat, a bisa lo siguiente tokante nan métodonan: “E filósofo tabata kuminsá buska nifikashonnan skondí i kasi innotabel den e kuentanan mitológiko, i a dedusí for di nan kontenido repugnante i ridíkulo ku e intenshon di nan outornan lo mester tabata pa eksibí mediante nan lenguahe figurativo sensual un òf otro bèrdat profundo i edifikante.” E proseso aki yama interpretashon alegóriko, i Filo a purba us’é pa splika e Skritura.

Komo ehèmpel, wak kiko Génesis 3:22 ta bisa den e vershon di Bagster di Septuaginta: “Señor Dios a traha bistí di kueru pa Adam i su esposa, i a bisti nan.” Na opinion di e griegonan, e Dios Supremo tabata muchu elevá pa e bai traha bistí. Pues Filo a haña ku e versíkulo ei tabata den un sentido simbóliko i el a deklará: “E bistí di kueru ta un ekspreshon figurativo pa e kueru natural, es desir, nos kurpa; pasobra Dios, ora ku promé ku tur kos el a traha intelekto, el a yam’é Adam; despues di esei el a  krea e sentido eksterior, na kua el a duna e nòmber Bida. Na di tres lugá, pa nesesidat el a traha tambe un kurpa i a usa un ekspreshon figurativo pa yam’é un bistí di kueru.” Pues Filo a purba hasi Dios su akto di bisti Adam ku Eva paña un punto filosófiko pa meditá ariba.

Konsiderá tambe Génesis 2:10-14, ku ta deskribí e fuente di awa di e hòfi di Edén i ta menshoná kuater riu ku tabata kore for di e hòfi. Filo a purba deskubrí ki nifikashon tabatin tras di e palabranan ku a deskribí e paisahe di e hòfi di Edén. Despues di komentá riba e tereno mes, el a bisa: “Podisé e pasashi aki tambe ta kontené un nifikashon alegóriko; pasobra e kuater riunan ta e señalnan di kuater birtut.” El a spekulá ku e riu Pison ta representá prudensia, e riu Gihon ta e símbolo di seriedat, Tigris ta simbolisá fortalesa, i Eufrates ta indiká hustisia. Pues simbolismo ta tuma e lugá di geografia.

Filo a usa interpretashon alegóriko pa analisá e relato di kreashon, e registro kon Kain a mata Abel, e Diluvio di tempu di Noe, e konfushon di idioma na Babel i hopi prinsipio di e Lei di Moisés. Manera e ehèmpel den e paragraf anterior ta mustra, hopi bes el a rekonosé e punto literal di un versíkulo di Beibel anto kaba a introdusí su komprondementu simbóliko ku palabranan manera: “Podisé nos mester konsiderá e kosnan aki komo si fuera nan a ser papiá den un sentido alegóriko.” Loke a resaltá den e obranan di Filo ta simbolismo, miéntras ku lamentablemente e nifikashon opvio di e Skritura a disparsé.

 Ken Dios Ta?

Filo a defendé eksistensia di Dios ku un ilustrashon penetrante. Despues di a deskribí e tera, riunan, planetanan i streanan, el a konkluí: “Mundu ta e obra di mas ingenioso i bon trahá di tur kreashon; ta komo si fuera un persona hopi ábil i ku konosementu sumamente perfekto a hink’é den otro. Ta den e manera aki nos a haña un idea di e eksistensia di Dios.” Esaki tabata un rasonamentu lógiko.—Romanonan 1:20.

Pero ora Filo a amplia riba e naturalesa di Dios Todopoderoso sí el a desviá masha leu for di e bèrdat. Filo a pretendé ku Dios “no tin kualidatnan distintivo” i ku ta ‘imposibel pa komprondé’ Dios. Filo a desanimá hende pa hasi esfuerso pa siña konosé Dios, bisando ku “ta un gran bobedat pa purba sigui bai mas leu, pa investigá e naturalesa òf kualidatnan distintivo di Dios.” E manera di pensa aki no a bin for di Beibel, sino for di e filósofo pagano Plato.

Filo a bisa ku Dios ta asina fuera di nos alkanse pa komprondé ku ta imposibel pa yam’é na un nòmber personal. Segun Filo: “P’esei tabata hopi rasonabel ku no por a duna esun ku en bèrdat ta e Dios bibu ningun nòmber personal ku ta kuadra kuné.” Esaki definitivamente no ta bèrdat!

Beibel ta deklará bon kla ku Dios tin un nòmber personal. Salmo 83:18 [NW] ta bisa: “Abo, kende su nòmber ta Yehova, abo so ta e Haltísimo riba henter tera.” Isaias 42:8 [NW] ta sita Dios bisando: “Ami ta Yehova. Esei ta mi nòmber.” Dikon Filo, siendo un hudiu ku a konosé e tekstonan bíbliko aki, a siña hende ku Dios no tin nòmber? Pasobra e tabata deskribí no e Dios personal di Beibel, sino un dios sin nòmber i inaksesibel di filosofia griego.

Hende Tin un Parti Invisibel i Inmortal?

Filo a siña hende ku tin un parti invisibel i inmortal ku ta separá for di e kurpa. El a bisa ku hende ta “konsistí di kurpa i alma.” E alma por muri? Tuma nota di Filo su splikashon: “Ora nos ta na bida, nos kurpa ta na bida maske nos alma ta morto i derá den nos kurpa, komo si fuera den un tumba. Pero si e [kurpa] muri, e ora ei nos alma lo biba su propio bida, siendo librá di e kurpa malbado i morto na kua e tabata mará.” Pa Filo, morto di e alma tabata simbóliko. E alma no ta muri nunka, e ta inmortal.

Sin embargo, kiko Beibel ta siña tokante e kondishon di e mortonan? E salmista a konsehá nos pa no pone nos konfiansa ni sikiera den hende poderoso. Pakiko nò? “Su spiritu ta sali, e ta bolbe na tera; e mes dia ei su pensamentunan ta peresé.” (Salmo 146:3, 4) Ora un hende su pensamentunan peresé, e no ta konsiente mas di ningun felisidat ni sufrimentu.

Bou di inspirashon di Dios, Salomon a splika bon kla kiko morto ta nifiká, bisando: “E bibunan sa ku nan lo muri, ma e mortonan no sa nada.” En bista di esei, Salomon a urgi: “Tur loke bo man haña pa hasi, hasié ku tur bo forsa; pasobra no tin ni aktividat ni planifikashon ni sabiduria den Seol, kaminda bo ta bai.” (Eklesiastés 9:5, 10) Pues ta bisto anto ku e mortonan no ta konsiente di nada. Nan no sa mes kiko e bibunan ta hasi pa nan. *

Despues ku Filo a muri, e hudiunan no a wòri masha kuné. Sin embargo, kristiandat sí a asept’é. Eusebio i otro lidernan di iglesia tabata konvensí ku Filo a kombertí na kristianismo. Jerónimo a menshon’é komo un di e Tatanan di Iglesia. Ta kristiannan apóstata, i no e hudiunan, a konserbá e obranan skirbí di Filo.

E obranan ku Filo a skirbi a hiba na un  revolushon religioso. Su influensia a pone hende ku tabata kristian pa nòmber adoptá e doktrina no-bíbliko di alma inmortal. Anto Filo su siñansa tokante e Lógos (òf, Palabra) a kontribuí na e desaroyo di Trinidat, un doktrina no-bíbliko di kristianismo apóstata.

No Sea Engañá

Den Filo su estudio di e Skritura Hebreo, el a hasi sigur ku e no a “laga afó ningun nifikashon alegóriko ku pa kasualidat lo por ta skondí bou di e lenguahe sensio.” Sin embargo, manera tin pará na Deuteronomio 4:2, Moisés a bisa relashoná ku e Lei di Dios: “No añadí na e palabra ku mi ta ordená boso, ni kita for di dje, pa boso warda e mandamentunan di SEÑOR boso Dios ku mi ta ordená boso.” Filo, ku tur e bon intenshon ku aparentemente e tabatin, a agregá vários kapa di spekulashon ku meskos ku un neblina diki, a tapa e instrukshon kla di Dios su Palabra inspirá.

Apòstel Pedro a bisa: “Nos no a sigui fábulanan trahá ku astusia ora nos a hasi konosí na boso e poder i binida di nos Señor Hesukristu.” (2 Pedro 1:16) Distinto for di e obranan ku Filo a skirbi, Pedro su instrukshon na e kongregashon kristian di promé tabata basá riba echo i riba guia di e spiritu di Dios, “e spiritu di bèrdat,” ku a guia nan den tur bèrdat.—Juan 16:13.

Si bo ta interesá pa adorá e Dios di Beibel, bo mester di guia basá riba bèrdat, no interpretashonnan basá riba pensamentu humano. Bo mester di konosementu eksakto di Yehova i di su boluntat, i bo mester di e humildat pa ta un studiante sinsero. Si bo studia Beibel ku un aktitut sano, lo bo siña konosé “e skrituranan santu, kuanan por duna bo e sabiduria ku ta hiba na salbashon pa medio di fe, ku ta den Kristu Hesus.” Lo bo mira ku e Palabra di Dios por hasi bo plenamente kompetente, kompletamente “ekipá pa tur bon obra.”—2 Timoteo 3:15-17.

[Nota]

[Kuadro/Plachi na página 10]

E STAT DI FILO

Filo a biba i traha na Alexandria di Egipto. Pa siglonan, e stat ei tabata e kapital mundial di buki i di diskushonnan na nivel akadémiko.

Studiantenan a siña for di intelektualnan famoso ku a duna lès den e skolnan di e stat. E biblioteka di Alexandria a gana renombre mundial. Su kolekshon a oumentá te na sientos di míles di artíkulo, segun ku e bibliotekarionan tabata purba optené kopia di tur dokumento skirbí.

Mas despues, e rèspèt mundial pa Alexandria i su gran kolekshon di konosementu a mengua pokopoko. Emperadornan romano a duna mayor importansia na nan propio stat, Roma, lokual a pone ku Europa a bira e sentro di kultura. E deterioro di Alexandria a kulminá den siglo 7 di nos era, ora ku invasornan a konkistá e stat. Te awe historiadónan ta lamentá e pèrdida di e famoso biblioteka ku, segun algun hende, a pone sivilisashon bai atras ku 1.000 aña.

[Rekonosementu]

L. Chapons/Illustrirte Familien-Bibel nach der deutschen Uebersetzung Dr. Martin Luthers

[Kuadro na página 12]

INTERPRETASHON ALEGÓRIKO AWE

Por lo general alegoria ta e manera di ekspresá bèrdatnan i puntonan general di e eksistensia humano mediante personahenan i akshonnan simbóliko fiktisio. Relatonan ku ta usa alegoria supuestamente ta kontené simbolismo di kosnan mas importante ku ta skondí. Meskos ku Filo di Alexandria, tin algun guia religioso di tempu moderno ku ta usa interpretashon alegóriko pa splika Beibel.

Konsiderá Génesis kapítulo 1 pa 11, ku ta relatá e historia di humanidat for di kreashon te na e plamamentu di hende na e toren di Babel. The New American Bible, un tradukshon katóliko, ta bisa relashoná ku e parti ei di Beibel: “Pa hasi e bèrdatnan ku tin den e kapítulonan aki mas komprendibel pa e pueblo israelita ku mester a konserbá nan, e bèrdatnan mester a ser ekspresá mediante konseptonan generalmente konosí entre e pueblo ei na e tempu ei. Pa e motibu aki, mester distinguí bon kla e bèrdatnan mes for di nan bistí literario.” E sita aki ta bisando ku nos no mester tuma Génesis kapítulo 1 pa 11 literalmente. Mas bien, meskos ku un bistí ta tapa e kurpa, asina e palabranan ta tapa un nifikashon mas profundo.

Sin embargo, Hesus a siña hende ku e promé kapítulonan ei di Génesis tabata literalmente bèrdat. (Mateo 19:4-6; 24:37-39) Apòstel Pablo i apòstel Pedro tambe a siña hende meskos. (Echonan 17:24-26; 2 Pedro 2:5; 3:6, 7) Studiantenan sinsero di Beibel ta rechasá splikashonnan ku no ta di akuerdo ku henter e Palabra di Dios.

[Plachi na página 9]

E gran vuurtoren di Alexandria

[Rekonosementu]

Archives Charmet/Bridgeman Art Library