Mayornan, Proveé pa e Nesesidatnan di Boso Famia
Mayornan, Proveé pa e Nesesidatnan di Boso Famia
“Si un hende no proveé pa su mes hendenan, . . . el a nenga e fe.”—1 TIMOTEO 5:8.
1, 2. (a) Dikon ta un animashon pa mira famianan asistí na reunionnan kristian huntu? (b) Kiko ta algun situashon difísil ku famianan ta konfrontá pa por yega reunion na tempu?
ORA bo wak rònt den e kongregashon kristian promé ku un reunion kuminsá, lo bo por mira muchanan limpi i bon bistí ta kai sinta na nan lugá banda di nan mayornan. No ta un plaser pa mira e amor ku ta bisto den famianan asina, amor tantu pa Yehova komo pa otro? Pero ta fásil pa lubidá kuantu esfuerso un famia tin ku hasi pa yega reunion na tempu.
2 Den mayoria kaso, mayornan ta hopi okupá henter dia, i e anochinan ku tin reunion, e bida di famia ta bira mas drùk ainda. Mester prepará kuminda, hasi trabou di kas i kaba ku hùiswèrk. Mayornan tin e trabou di mas pisá, pasobra nan tin ku hasi sigur ku tur hende a kome, ku nan paña ta limpi i ku nan ta kla na tempu. Klaru ku ora tin mucha, kos inesperá por sosodé na e momentunan di mas inoportuno. Esun mayó ta sker su karson den hungamentu, esun mas chikí ta plama su kuminda, i ata awor nan ta kuminsá pleita ku otro pa ko’i kèns. (Proverbionan 22:15) Ku ki resultado? Maske e mayornan a plania tur kos kuidadosamente, tòg kos no ta bai manera nan a plania. Sin embargo, kasi semper e famia ta yega Salòn di Reino basta ratu promé ku reunion kuminsá. Ta un gran animashon pa mira nan na salòn siman aden siman afó, aña den aña afó, segun ku e muchanan ta krese bira grandi i sirbi Yehova.
3. Kon nos por sa ku Yehova ta duna gran balor na famia?
3 Pero apesar ku bo trabou komo mayor tin biaha ta difísil, i asta agotador, bo por ta sigur ku Yehova ta duna gran balor na bo esfuersonan. Yehova ta e Originadó di e areglo di famia. P’esei su Palabra ta bisa ku tur famia “debe nan nòmber”—sí, nan eksistensia—na Yehova. (Efesionan 3:14, 15, NW) Pues ora boso komo mayor ta hasi esfuerso pa kumpli na e manera korekto ku boso papel den e areglo di famia, boso ta onra e Señor Soberano di universo. (1 Korintionan 10:31) Esei no ta un gran privilegio? P’esei ta na su lugá pa nos analisá e asignashon ku Yehova a duna mayornan. Den e artíkulo aki, nos lo konsiderá un aspekto di e asignashon ei: esun di proveé òf perkurá pa e famia. Laga nos repasá tres manera den kua Dios ta ferwagt pa mayornan proveé pa nan famia.
Proveé Materialmente
4. Den famia, ki areglonan Yehova a hasi pa satisfasé nesesidat di e yunan?
4 Apòstel Pablo a skirbi: “Ma si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.” (1 Timoteo 5:8) Akinan ora ku Pablo a menshoná “un hende,” ta ken e tabatin na mente? Tabata e kabes di famia, normalmente e tata. Dios a duna e hende muhé tambe un papel digno komo ayudante di su esposo. (Génesis 2:18) Hende muhé den tempu bíbliko hopi bes a yuda nan esposo proveé pa e famia. (Proverbionan 31:13, 14, 16) Awendia famianan di un solo mayor ta birando mas i mas komun. Hopi mayor kristian soltero ta hasiendo un trabou masha atmirabel di perkurá pa nan famia. Klaru ku lo ideal ta pa un famia tin ámbos mayor, ku e tata hibando delantera.
5, 6. (a) Menshoná algun difikultat ku esnan ku ta purba proveé materialmente pa nan hendenan ta konfrontá. (b) Kua punto di bista pa ku trabou lo yuda mayornan kristian perseverá?
5 Na 1 Timoteo 5:8, ki klase di perkurashon Pablo tabatin na mente? E konteksto ta duna e idea ku e tabata papia direktamente tokante nesesidat material di e famia. Den e mundu djawe, kisas tin hopi opstákulo ku un kabes di famia ta konfrontá pa e por optené e kosnan material ku su famia tin mester. Difikultatnan ekonómiko ta komun rònt mundu, i tambe hopi negoshi ta manda hende kas, tin un porsentahe haltu di desempleo i un oumento kontinuo den kosto di bida. Kiko por yuda un mayor perseverá apesar di situashonnan difísil asina?
6 Un mayor ku ta proveé pa su famia mester kòrda ku e ta kumpliendo ku un asignashon di Yehova. Pablo su palabranan inspirá ta mustra ku un hende ku por obedesé e mandamentu aki i tòg ta nenga di hasié, ta meskos ku un persona ku “a nenga e fe.” Un kristian lo hasi tur su esfuerso pa evitá di ta den tal posishon dilanti di su Dios. Pero lamentablemente, hopi hende den e mundu djawe ta “sin amor.” (2 Timoteo 3:1, 3) De echo, tin masha hopi tata ta bula pipa pa nan responsabilidat i ta laga nan famia desampará. Esposonan kristian no tin e punto di bista sin heful i negligente ei den e asuntu di proveé pa nan mes hendenan. Distinto for di hopi di nan koleganan, mayornan kristian ta konsiderá asta e trabou di mas humilde komo un trabou digno i importante, un medio pa agradá Yehova Dios, ya ku e trabou ei ta hasi posibel ku nan por perkurá pa nan sernan kerí.
7. Dikon ta bon pa mayornan meditá riba Hesus su ehèmpel?
7 Un kos ku tambe por yuda kabesnan di famia ta di meditá riba Hesus su ehèmpel perfekto. No lubidá ku Beibel profétikamente ta referí na Hesus komo nos “Tata Eterno.” (Isaias 9:6, 7) Siendo “e último Adam,” Hesus de echo ta remplasá “e promé hende, Adam” komo tata di tur ku ehersé fe. (1 Korintionan 15:45) Distinto for di Adam, kende a resultá di ta un tata egoista ku a buska su propio interes, Hesus ta e tata ideal. Beibel ta bisa di Hesus: “Na esaki nos konosé amor, ku el a entregá su bida pa nos.” (1 Juan 3:16) Sí, Hesus boluntariamente a entregá su propio bida pa otro hende. Sin embargo, riba un base diario tambe el a pone e nesesidatnan di otro hende promé ku esnan di su mes den asuntunan ménos krusial. Mayornan, boso lo hasi bon di imitá e spiritu di sakrifisio propio ei.
8, 9. (a) Kiko mayornan por siña for di e manera ku para ta perkurá inegoistamente pa nan yunan? (b) Kon hopi mayor kristian ta demostrá un spiritu di sakrifisio propio?
8 E palabranan ku Hesus a dirigí na Dios su pueblo rebelde por siña mayornan hopi kos tokante amor apnegá: “Kuantu biaha mi no tabata kier a hunta bo yunan, manera un galiña ta hunta su puitunan bou di su alanan”! (Mateo 23:37) Aki Hesus a deskribí na un manera bibu kon un galiña ta protehá su yunan ku su alanan. Mayornan realmente por siña hopi for di e instinto di para ku ta kla pa protehá su puitunan, asta riskando su bida. Pero loke paranan ku tin yu ta hasi riba un base diario tambe ta remarkabel pa mira. Nan ta bula bai-bin nònstòp en buska di kuminda. Asta ora nan ta morto kansá, nan ta sigui hinka kuminda den boka di nan puitunan, ku ta guli e kuminda i por lo general ta keda sklama pa mas. Hopi kriatura di Yehova ta “sabí” di instinto den e manera ku nan ta atendé nesesidat di nan yunan.—Proverbionan 30:24.
9 Den un manera similar, mayornan kristian rònt mundu ta demostrá un spiritu atmirabel di sakrifisio propio. Boso ta preferá di perhudiká boso mes ku permití boso yunan sufri kualke daño. Ademas, tur dia boso ta hasi sakrifisio boluntariamente pa por perkurá pa boso yunan. Hopi di boso ta lanta mainta trempan pa bai un trabou ku ta sea masha laf òf ku ta kousa hopi kansansio. Boso ta traha duru pa pone kuminda nutritivo riba mesa. Boso ta lucha pa hasi sigur ku boso yunan tin paña limpi, lugá apropiá pa biba i un edukashon adekuá. Anto boso ta sigui hasi esei dia tras dia, aña tras aña. Tal sakrifisio propio i perseveransia sigur-sigur ta agradá Yehova! (Hebreonan 13:16) Pero a la bes boso ta kòrda ku tin maneranan mas importante den kua boso mester proveé pa boso famia.
Proveé Spiritualmente
10, 11. Kua ta e nesesidat humano di mas importante, i kiko mayornan kristian tin ku hasi promé pa por satisfasé e nesesidat aki den nan yunan?
10 Asta mas importante ku hasi perkurashon material ta pa hasi perkurashon spiritual. Hesus a bisa: “Hende lo no biba di pan so, ma di tur palabra ku ta sali for di boka di Dios.” (Mateo 4:4; 5:3, NW) Kiko boso komo mayor por hasi pa proveé spiritualmente pa boso famia?
11 Kisas no tin ningun otro pasashi di e Skritura ku mas ta ser sitá riba e tópiko aki ku Deuteronomio 6:5-7. Sea asina bon di habri bo Beibel i lesa e versíkulonan ei. Tuma nota ku Dios ta bisa mayornan ku na promé lugá nan tin ku kultivá nan propio spiritualidat dor di edifiká amor pa Yehova i tuma su palabranan na pechu. Sí, komo mayor bo mester ta un studiante serio di e Palabra di Dios. Bo mester lesa Beibel ku regularidat i meditá riba dje di manera ku bo por desaroyá un berdadero komprondementu i amor pa Yehova su kaminda-, prinsipio- i leinan. Esei lo yena bo kurason ku bèrdatnan fasinante ku lo motivá bo pa sinti goso, rèspèt profundo i amor pa Yehova. Lo bo tin un abundansia di kos bon pa kompartí ku bo yunan.—Lukas 6:45.
12. Kon mayornan por imitá Hesus su ehèmpel den e asuntu di inkulká bèrdatnan bíbliko den nan yunan?
12 Mayornan spiritualmente fuerte ta prepará pa apliká e konseho ku tin na Deuteronomio 6:7, esta, pa siña nan yunan ku tur diligensia òf “inkulká” [NW] e palabranan di Yehova den nan ki ora ku nan haña un chèns. “Inkulká” ta nifiká siña i enfatisá dor di ripitishon. Yehova sa bon ku nos tur—pero foral mucha—tin mester di ripitishon pa nos siña. Pues, Hesus a usa ripitishon den su sirbishi. Por ehèmpel, ora el a siña su disipelnan pa nan ta humilde en bes di orguyoso i kompetitivo, el a usa vários manera pa ripití e prinsipio ei. El a siña nan dor di rasoná, dor di bin ku komparashon i asta dor di demostrá nan esei. (Mateo 18:1-4; 20:25-27; Juan 13:12-15) Pero remarkablemente, Hesus nunka a pèrdè pasenshi ku nan. Asina tambe mayornan tin ku buska maneranan pa siña nan yunan bèrdatnan básiko, i ripití Yehova su prinsipionan ku pasenshi te ora ku e muchanan kapta nan i apliká nan.
13, 14. Kua ta algun okashon ku mayornan por inkulká bèrdatnan bíbliko den nan yunan, hasiendo uso di ki material?
13 Estudio di famia ta okashonnan ideal pa duna tal siñansa. De echo, un estudio di Beibel regular i edifikante komo famia ta un faktor klave pa spiritualidat di e famia. Famianan kristian rònt mundu tin goso den estudionan asina. Nan ta hasi uso di literatura ku Yehova su organisashon ta perkurá i ta adaptá e estudio na e nesesidatnan di e muchanan. E buki Siña for di e Gran Maestro a resultá un bendishon ekstraordinario den e aspekto aki, i tambe e buki Loke hovenan sa puntra—Contesta práctica. * Sin embargo, e estudio di famia no ta e úniko okashon pa siña yunan.
14 Manera Deuteronomio 6:7 ta mustra, tin hopi okashon ku boso komo mayor por kòmbersá tokante kosnan spiritual ku boso yunan. Sea ku boso ta riba kaminda huntu, ta hasi trabou huntu òf ta rilèks huntu, boso por haña chèns pa proveé pa boso yunan su nesesidat spiritual. Klaru ku no ta nònstòp boso tin ku duna boso yunan un “sermon” tokante bèrdatnan bíbliko. Mas bien, purba mantené e kòmbersashon di famia riba un nivel edifikante i spiritual. Por ehèmpel, e revista Spièrta! tin hopi artíkulo riba un gran variedat di tópiko. E tipo di artíkulonan ei por habri kaminda pa boso kòmbersá tokante Yehova su kreashon animal, lugánan di beyesa natural ku tin rònt mundu i e maravioso variedat ku tin den kultura humano i estilo di bida. Tal kòmbersashon por motivá hóbennan pa bai lesa mas literatura ku e esklabo fiel i prudente ta perkurá.—Mateo 24:45-47.
15. Kon mayornan por yuda nan yunan mira e sirbishi kristian komo un aktividat interesante i rekompensador?
15 Kòmbersashonnan edifikante ku bo yunan lo yuda bo satisfasé un otro nesesidat spiritual. Muchanan kristian tin ku siña kompartí nan fe na un manera efektivo ku otro hende. Segun ku boso ta papia tokante un òf otro punto interesante ku tin den E Toren di Vigilansia òf Spièrta!, lo bo por buska chèns di konektá e informashon ku sirbishi di vèlt. Por ehèmpel, lo bo por puntra: “Lo no ta great si mas hende tabata sa e punto aki tokante Yehova? Kon bo ta kere ku nos lo por lanta un hende su interes den e tópiko aki?” Kòmbersashonnan asina lo yuda hóbennan desaroyá mas smak pa kompartí ku otro hende loke nan ta siña. Anto despues ora bo yunan ta kompañá bo den sirbishi, nan ta mira un ehèmpel bibu di pone tal kòmbersashon na práktika. Tambe esaki por siña nan ku sirbishi di vèlt ta un trabou interesante i dushi, ku e ta produsí gran satisfakshon i goso.—Echonan 20:35.
16. Kiko yunan por siña dor di skucha nan mayornan su orashon?
16 Mayornan ta proveé tambe pa nan yunan su nesesidat spiritual ora nan ta hasi orashon. Hesus a siña su disipelnan kon pa hasi orashon, i el a hasi orashon ku nan na hopi okashon. (Lukas 11:1-13) Djis pensa kuantu kos nan a siña dor di hasi orashon huntu ku e Yu di Yehova! Asina tambe bo yunan por siña hopi kos for di bo orashonnan. Por ehèmpel, nan por siña ku Yehova ke pa nos papia kuné libremente di kurason, i akudí na dje ku kualke preokupashon ku nos lo por tin. Sí, nos orashonnan por yuda nos yunan siña un bèrdat spiritual masha importante: Nan por tin un amistat ku nan Tata selestial.—1 Pedro 5:7.
Proveé Emoshonalmente
17, 18. (a) Kon Beibel ta revelá e importansia di mustra amor na yu? (b) Kon tatanan mester imitá Yehova den ekspresá amor na nan yunan?
17 Klaru ku yunan tin tambe nesesidat emoshonal ku ta rekerí atenshon serio. E Palabra di Dios ta bisa mayornan kon importante ta pa satisfasé e nesesidat aki. Por ehèmpel, Beibel ta animá muhénan hóben pa “stima nan yunan.” (Tito 2:4) Esaki en bèrdat ta un manera sabí pa aktua. Pasobra esei ta siña un mucha kon pa stima i ta trese benefisionan pa restu di su bida. Di otro banda, ta un bobedat pa keda sin mustra amor na un yu. Esei ta kousa hopi doló i ta indiká ku nos no ta imitá Yehova, kende ta demostrá gran amor na nos apesar di nos imperfekshonnan.—Salmo 103:8-14.
18 Yehova asta ta tuma e inisiativa pa stima su yunan riba tera. Manera 1 Juan 4:19 ta bisa, “el a stima nos promé.” Foral boso, tatanan, mester imitá Yehova su ehèmpel i tuma e inisiativa pa forma un laso amoroso ku boso yunan. Beibel ta urgi tatanan pa no provoká òf iritá nan yunan “pa nan no pèrdè ánimo.” (Kolosensenan 3:21) Un di e kosnan ku mas ta provoká yunan ta e impreshon ku un mayor no ta stima nan òf balorá nan. Ta bon pa tatanan ku no ta gusta ekspresá nan sintimentu kòrda riba Yehova su ehèmpel. Yehova a papia asta for di shelu pa ekspresá su aprobashon i amor pa su Yu. (Mateo 3:17; 17:5) Ki un gran animashon esei lo mester tabata pa Hesus! Asina tambe mayornan su ekspreshonnan onesto di amor i aprobashon ta duna yunan hopi forsa i kurashi.
19. Dikon disiplina ta importante, i ki balansa mayornan kristian ta purba haña?
19 Klaru ku e amor ku mayornan tin pa nan yunan ta mas ku palabra so. Amor ta ser ekspresá prinsipalmente ku akshon. Proveé materialmente i spiritualmente pa yu por ta un ekspreshon di mayornan su amor, foral ora nan ta hasié den un manera ku ta laga yunan komprondé ku ta amor ta nan motivashon prinsipal. Fuera di esei, disiplina tambe ta un ekspreshon importante di mayornan su amor. De echo, “esnan ku SEÑOR ta stima, e ta disipliná.” (Hebreonan 12:6) Di otro banda, mayornan ku no ta duna disiplina ta demostrá ku en realidat nan ta odia nan yunan! (Proverbionan 13:24) Yehova semper ta mantené e balansa korekto i ta disipliná “manera mester ta,” esta, na e midí apropiá. (Jeremias 46:28) No ta semper fásil pa mayornan imperfekto haña e balansa ei. Pero tòg ta bale la pena pa boso hasi tur esfuerso pa alkansá e balansa ei. Disiplina firme i amoroso ta yuda un yu hiba un bida felis i produktivo ora e bira grandi. (Proverbionan 22:6) Akaso esei no ta loke tur mayor kristian ke pa nan yu?
20. Kon mayornan por duna nan yunan e mihó oportunidat ku tin pa “skohe bida”?
20 Ora ku boso komo mayor ta hasi e trabou importante ku Yehova a asigná na boso—esta, proveé pa boso yunan su nesesidatnan material, spiritual i emoshonal—e rekompensanan ta grandi. Boso ta duna boso yunan e mihó oportunidat ku tin pa “skohe bida” i pa despues sigui “biba.” (Deuteronomio 30:19) E yunan ku skohe pa sirbi Yehova i keda riba e kaminda pa bida segun ku nan ta madurá ta duna nan mayornan tremendo goso. (Salmo 127:3-5) E goso ei lo dura pa semper! Pero kon hóbennan por alabá Yehova awor? E siguiente artíkulo lo trata e tema ei.
[Nota]
^ par. 13 Publiká dor di Testigunan di Yehova.
Kon Lo Bo Kontestá?
Kiko mayornan por hasi afin di proveé pa nan yunan
• materialmente?
• spiritualmente?
• emoshonalmente?
[Preguntanan di Estudio]
[Plachi na página 18]
Hopi para ta traha inkansablemente pa proveé pa nan yunan
[Plachi na página 20]
Mayornan mester kultivá nan propio spiritualidat promé
[Plachi na página 20, 21]
Tin hopi okashon ku mayornan por siña nan yunan tokante e Kreadó
[Plachi na página 22]
E aprobashon di un mayor ta duna yu forsa i kurashi