“Persiguí pa Kousa di Su Fe”

E STAT Cernobbio den e parti nort di Italia a establesé un área konmemorativo den un parke lokal pa rekordá personanan ku a bira víktima di violashon di derechonan humano. Un di e plakatnan ku nan a desvelá na e sitio aki ta dediká na Narciso Riet. Su mayornan tabata italiano i el a nase na Alemania i a bira Testigu di Yehova durante e dékada di 1930. Durante e régimen di Hitler, Testigunan di Yehova a ser persiguí pasobra nan a nenga di halsa Hitler riba e Dios berdadero, Yehova.

Ora Gestapo a deskubrí ku Riet tabata yuda pa E Toren di Vigilansia drenta den kamponan di konsentrashon, el a hui bai Cernobbio. Einan nan a pidié pa tradusí E Toren di Vigilansia na italiano i distribuyé entre su kompañeronan di fe den bisindario. Nan a deskubrí su aktividat enérgiko. Un funshonario di SS huntu ku su hòmbernan a hasi un inval den kas di Riet, arest’é i a konfiská e evidensia “kriminal”: dos Beibel i algun karta! Nan a deportá Riet pa Alemania, enkarsel’é den e kampo di konsentrashon Dachau, i a ehekut’é djis promé ku Segundo Guera Mundial a terminá. El a ser “persiguí pa kousa di su fe,” e plakat na Cernobbio ta bisa.

E fe di Narciso Riet i di sentenáres di otro Testigu di Yehova ku a bira víktima di persekushon nazi ta un animashon pa kristiannan djawe keda fiel na Yehova, e úniko Personahe den universo ku ta meresé nan adorashon. (Revelashon 4:11) Hesus a bisa: “Bendishoná ta esnan ku ta wòrdu persiguí pa kousa di hustisia.” Dios lo kòrda nan echonan i rekompensá e kurashi ku nan a demostrá.—Mateo 5:10; Hebreonan 6:10.