Trabou Bendishon òf Maldishon?
Trabou Bendishon òf Maldishon?
“Pa loke ta un hende, no tin nada mas mihó ku e . . . mira e bon pa motibu di su trabou duru.”—Eklesiastés 2:24, NW.
“MI TA keda morchá.” Asina 1 di kada 3 trahadó a kontestá den un enkuesta resien kon nan ta sinti hopi biaha na fin di un dia di trabou. Esaki no ta sorprendé nos ya ku ta trata di hendenan den un ambiente di strès; nan ta traha mas largu i ta bai kas ku mas trabou, i tur esei ku hefenan ku rara bes tin un palabra di apresio pa nan.
E binida di fábrikanan di produkshon en masa a pone hopi trahadó sinti komo si fuera nan ta simplemente e djentenan di wil di un mashin inmenso i impersonal. Hopi bes nan trabou ta kaba ku nan inspirashon i kreatividat, loke di mes ta afektá nan aktitut pa ku trabou. Esei fásilmente ta demotivá nan pa mustra un interes personal den nan trabou. Tambe nan ta pèrdè e gana di alkansá kalidat haltu den nan trabou. Tur esei por pone un persona kuminsá traha ku mala gana i haña rabia mes riba su trabou.
Analisá Nos Aktitut
Ta bèrdat ku no ta semper nos por kambia nos sirkunstansianan. Sin embargo, bo no ta di akuerdo ku loke sí nos por kambia ta nos aktitut? Si bo ripará ku bo a adoptá un aktitut un poko negativo pa ku trabou, lo ta bon pa bo konsiderá Dios su punto di bista i su prinsipionan relashoná ku e tópiko aki. (Eklesiastés 5:18) Hopi hende a deskubrí ku dor di konsiderá esakinan nan a haña un sierto grado di felisidat i satisfakshon den nan trabou.
Dios ta e Trahadó Supremo. Dios ta un trahadó. Podisé bo no a yega di pensa riba Dios den e manera aki, pero ta asina e ta introdusí su mes pa promé bes den Beibel. E relato di Génesis ta habri ku Yehova su kreashon di shelu i tera. (Génesis 1:1) Pensa riba e gran variedat di papel ku Dios a asumí ora ku el a kuminsá krea—diseñadó, organisadó, ingeniero, artista, spesialista di material, desaroyadó di proyekto, kímiko, biólogo, eksperto di bida animal, programadó, lingwista, djis pa menshoná algun.—Proverbionan 8:12, 22-31.
Kon e kalidat di Dios su trabou tabata? Beibel ta bisa ku e tabata “bon,” “masha bon.” (Génesis 1:4, 31) Sí, kreashon “ta konta di e gloria di Dios,” i nos tambe lo mester alab’é!—Salmo 19:1; 148:1.
Sin embargo, Dios su trabou no a kaba ku kreashon di e shelunan físiko, e tera i e promé pareha humano. Yehova su Yu, Hesukristu, a bisa: “Mi Tata ta traha te awor.” (Juan 5:17) Sí, Yehova ta sigui traha pa perkurá pa su kriaturanan, pa sostené su kreashon i pa salba su adoradónan fiel. (Nehemias 9:6; Salmo 36:6; 145:15, 16) E ta asta usa hende, “Dios su kolaboradónan,” pa yud’é realisá sierto tareanan.—1 Korintionan 3:9.
Trabou por ta un bendishon. Pero Beibel no ta bisa ku trabou ta un maldishon? Génesis 3:17-19 por parse di ta duna e idea ku Dios a kastigá Adam ku Eva pa nan rebelion dor di pone e karga di trabou riba nan. Ora Dios a kondená e dos promé hendenan ei, el a bisa Adam: “Ku sodó di bo frenta lo bo kome pan, te ora bo bolbe na tera.” Akaso esei a kondená tur trabou?
Nò. Mas bien, debí na Adam ku Eva su infieldat, ekstenshon di e Paradeis di Edén lo no a tuma lugá na e tempu ei mas. E tera a bin kai bou di Dios su maldishon. Pa un persona por a optené e nesesidatnan di bida for di suela e mester a traha duru ku sodó di su frenta.—Romanonan 8:20, 21.
Pero en bes di presentá trabou komo un maldishon, Beibel ta mustra ku e ta un bendishon ku nos mester apresiá. Manera a keda menshoná ariba, Dios mes ta un persona trahadó. Siendo ku Yehova a krea hende den su imágen, el a duna nan e abilidat i e outoridat di manehá su kreashon terenal. (Génesis 1:26, 28; 2:15) Hende a haña e asignashon di trabou ei promé ku Dios a deklará e palabranan ku tin pará skirbí na Génesis 3:19. Si trabou tabata un maldishon i un kos malu, Yehova nunka lo no a animá hende pa traha. Noe ku su famia tabatin hopi trabou di hasi promé i despues di e Diluvio. Den e era kristian, e disipelnan di Hesus tambe a haña e konseho fuerte pa traha.—1 Tesalonisensenan 4:11.
Apesar di esaki, nos tur sa ku awendia trabou por ta un peso. Strès, peliger, monotonia, desepshon, kompetensia, engaño i inhustisia ta djis algun di e ‘matanan di sumpiña i bringamosa’ ligá ku trabou. Pero trabou riba su mes no ta un maldishon. Na Eklesiastés 3:13, Beibel ta deskribí trabou i su fruta komo un regalo di Dios.—Wak e kuadro “Kon pa Dil ku Strès di Trabou.”
Bo por glorifiká Dios ku bo trabou. Semper hende a elogiá kalidat i ekselensia na trabou. Kalidat ta un di e aspektonan importante pa nos tin un punto di bista bíbliko di trabou. Dios mes ta hasi su trabou ku ekselensia. El a Eksodo 31:1-11) Esaki ta mustra ku Dios tabatin un interes spesial den e funshon, artesania, diseño i otro detayenan di nan trabou.
duna nos talentonan i kapasidat, i e ke pa nos usa nan pa un bon meta. Por ehèmpel, durante konstrukshon di e tabernakel den antiguo Israel, Yehova a duna hende manera Bezaleel i Oholiab hopi sabiduria, komprondementu i konosementu. Esei a kapasitá nan pa kumpli ku sierto tareanan artístiko i práktiko. (Esaki tin implikashonnan profundo riba e manera ku nos ta mira nos abilidatnan personal i kustumbernan di trabou. E ta yuda nos mira e kosnan ei den un sentido komo regalo di Dios, ku nos no mester konsiderá komo di poko importansia. P’esei Beibel ta konsehá kristiannan pa hasi nan trabou komo si fuera ta Dios mes lo evaluá nan trabou: “Tur loke boso hasi, hasi boso trabou di kurason, komo pa SEÑOR i no pa hende.” (Kolosensenan 3:23) Beibel ta manda sirbidónan di Dios pa presta bon na trabou, i di e manera ei nan ta hasi e mensahe kristian mas atraktivo pa koleganan i otro hende.—Wak e kuadro “Apliká Prinsipionan Bíbliko na Trabou.”
En bista di e echo ku nos trabou por glorifiká Dios, ta bon pa nos puntra nos mes ki klase di diligensia i kalidat nos ta hinka den nos trabou. Dios lo keda kontentu ku nos prestashon? Nos ta kompletamente satisfecho ku e manera ku nos ta kumpli ku nos tareanan asigná? Si no ta asina, nos tin kos pa drecha.—Proverbionan 10:4; 22:29.
Balansá trabou ku nos relashon ku Dios. Ounke traha duru ta algu digno di elogio, tin un otro faktor klave ku por yuda nos haña satisfakshon den trabou i den bida. Esei ta di duna atenshon na nos relashon ku Dios. Rei Salomon, kende a traha duru i a disfrutá di tur e rikesanan i komodidatnan ku bida tabatin di ofresé, a yega na e konklushon aki: “Teme Dios i warda su mandamentunan, pasobra esaki ta aplikabel na kada persona.”—Eklesiastés 12:13.
Ta bisto anto ku nos tin ku tene kuenta ku Dios su boluntat den tur loke nos ta hasi. Nos
ta traha na armonia ku su boluntat, òf kisas nos ta traha kontra dje? Nos ta hasi esfuerso pa agradá Dios, òf nos ta djis purba agradá nos mes? Si nos no ta hasi e boluntat di Dios, ku tempu nos lo sufri e doló di desesperashon, soledat i un bashí den bida.Steven Berglas a sugerí pa ehekutivonan agotá ‘buska un kousa noble ku ta yena nan ku entusiasmo i hasié un parti di nan bida.’ No tin un kousa mas digno ku sirbi Esun ku a duna nos e talentonan i kapasidat pa hasi trabou signifikativo. Trabou ku ta agradá nos Kreadó lo no laga nos insatisfecho. Pa Hesus, e trabou ku Yehova a asign’é tabata mes nutritivo, satisfasiente i refreskante ku kuminda. (Juan 4:34; 5:36) Anto kòrda ku Dios, e Trahadó Supremo, ta invitá nos pa bira su “kolaboradónan.”—1 Korintionan 3:9.
Adorá Dios i krese den nos relashon kuné ta prepará nos pa trabou i responsabilidat ku ta duna satisfakshon. Siendo ku hopi biaha kaminda nos ta traha ta yen di preshon, konflikto i eksigensia, nos fe profundo i spiritualidat por duna nos e fortalesa tan nesesario segun ku nos ta sigui hasi esfuerso pa ta mihó trahadó òf dunadó di trabou. Di otro banda, e realidatnan di bida den e mundu malbado aki por alertá nos den ki aspektonan nos tin ku krese den fe.—1 Korintionan 16:13, 14.
E Dia Ku Trabou Lo Ta un Bendishon
E hendenan ku ta trahando duru aworakí pa sirbi Dios por antisipá e tempu ku lo e restorá Paradeis i henter e tera lo ta yen di trabou ku ta bale la pena. Isaias, un profeta di Yehova, a papia tokante e futuro bida ei: “Nan lo traha kas i biba den nan; tambe nan lo planta kunukunan di wendrùif i kome nan fruta. Nan lo no traha kas pa otro hende biba aden, ni planta pa otro hende kome . . . Mi skohínan lo disfrutá di e obra di nan mannan pa hopi tempu.”—Isaias 65:21-23.
Ki un gran bendishon trabou lo ta e ora ei! Dor di siña kiko ta Dios su boluntat pa bo i traha na armonia ku esei, bo por ta entre esnan bendishoná pa Yehova i semper ‘mira e bon ku tin den tur bo trabou duru.’—Eklesiastés 3:13.
[Komentario na página 8]
Dios ta e Trahadó Supremo: Génesis 1:1, 4, 31; Juan 5:17
[Komentario na página 8]
Trabou por ta un bendishon: Génesis 1:28; 2:15; 1 Tesalonisensenan 4:11
[Komentario na página 8]
Bo por glorifiká Dios ku bo trabou: Eksodo 31:1-11; Kolosensenan 3:23
[Komentario na página 8]
Balansá trabou ku nos relashon ku Dios: Eklesiastés 12:13; 1 Korintionan 3:9
[Kuadro/Plachi na página 6]
KON PA DIL KU STRÈS DI TRABOU
Profeshonalnan médiko a klasifiká strès di trabou komo un riesgo di bo profeshon. E por kousa úlsera i depreshon i por asta hiba na suisidio. Haponesnan tin un palabra p’e: karoshi, “morto debí na ekseso di trabou.”
Vários faktor ligá ku trabou por kousa strès. Nan ta, entre otro, un kambio di orario òf di kondishon di trabou, problema ku superiornan, un kambio di responsabilidat òf di e klase di trabou, baha ku penshon i retiro. Tin hende ta purba kombatí òf skapa di e strès ei dor di kambia trabou òf ambiente. Otronan ta purba domin’é, pero e ta manifestá su mes den otro área di bida, prinsipalmente den famia. Tin hende ta asta sufri emoshonalmente, i ta bira deprimí i desesperá.
Kristiannan ta bon ekipá pa dil ku strès kousá dor di trabou. Beibel ta duna masha hopi prinsipio fundamental ku por sostené nos atraves di tempu difísil. Esakinan por tin un efekto positivo riba nos bienestar spiritual i emoshonal. Por ehèmpel, Hesus a bisa: “No preokupá boso mes pa e dia di mañan; pasobra e dia di mañan lo perkurá pa su mes. Kada dia tin sufisiente problema di su mes.” E animashon den e teksto aki ta pa konsentrá riba e problemanan di awe, no esnan di mañan. Asina nos ta evitá di eksagerá nos problemanan, lokual lo solamente oumentá e strès ku nos ta sinti.—Mateo 6:25-34.
Ta masha importante pa kristiannan dependé riba Dios su forsa i no riba nan propio forsa. Ora nos ta sinti ku nos no por mas ku e situashon, Dios por duna nos pas i goso den nos kurason i tambe e sabiduria pa trata ku kualke situashon difísil. Apòstel Pablo a skirbi: “Sea fuerte den Señor, i den e forsa di su poder.”—Efesionan 6:10; Filipensenan 4:7.
Por último, asta sirkunstansianan yen di tenshon por hiba na resultadonan positivo. Pruebanan por pone nos akudí na Yehova, buska su guia i konfia den dje. Tambe nan por pone nos sigui kultivá un personalidat kristian i e abilidat di perseverá bou di preshon. Pablo a konsehá: “Laga nos hubilá miéntras ku nos ta den tribulashon, siendo ku nos sa ku tribulashon ta produsí perseveransia; perseveransia, na su turno, un kondishon aprobá; e kondishon aprobá, na su turno, speransa.”—Romanonan 5:3, 4, NW.
Pues, asta strès por bira e chispa pa stimulá kresementu spiritual en bes di un fuente di desesperashon i tristesa.
[Kuadro/Plachi na página 7]
APLIKÁ PRINSIPIONAN BÍBLIKO NA TRABOU
Un kristian su aktitut i komportashon na trabou por atraé kolega i otro hende na e mensahe di Beibel. Den Pablo su karta na Tito, el a konsehá personanan den un situashon similar na esun di empleado pa nan “ta sumiso na nan [supervisornan] den tur kos, pa ta komplasiente, pa no pusta boka, pa no hòrta . . . , ma pa mustra tur buena fe, pa nan por dòrna e doktrina di Dios nos Salbadó den tur kos.”—Tito 2:9, 10.
Por ehèmpel, konsiderá loke un komersiante a skirbi den un karta pa e sede mundial di Testigunan di Yehova: “Mi ta skirbi pa pidi boso pèrmit pa tuma Testigunan di Yehova na trabou. Mi ke tuma nan pasobra mi sa sigur ku nan ta onesto, sinsero i digno di konfiansa, i ku nan lo no hòrta mi. E úniko hendenan ku realmente mi ta konfia ta Testigunan di Yehova. Por fabor yuda mi.”
Kyle ta un kristian ku ta traha komo resepshonista na un skol privá. Debí na un mal komprondementu, un kolega a zundr’é ku palabra malu dilanti di algun alumno. Kyle a bisa: “Mi mester a tene kuidou pa mi no brongosá e nòmber di Yehova.” Durante e siguiente sinku dianan, Kyle a keda pensa kon e por a apliká prinsipionan bíbliko. Un di nan ta na Romanonan 12:18: “Si ta posibel, asina leu ku ta dependé di boso, sea na pas ku tur hende.” El a manda un e-mail pa su kolega i a pidié despensa pa e tenshon ku tin entre nan. Kyle a invitá e kolega pa keda despues di trabou pa nan por a papia i resolvé e asuntu. Ora nan a hasi esei, Kyle su kolega a bira mas amigabel i el a rekonosé ku Kyle su manera di abordá e asuntu tabata sabí. El a bisa Kyle: “Esaki mester tin algu keber ku bo religion,” i el a duna Kyle un abraso kaluroso ora nan a yama otro ayó. Kiko tabata Kyle su konklushon? “Kos no por bai robes nunka si nos apliká prinsipionan di Beibel.”
[Plachi na página 4, 5]
Hopi trahadó ta sinti ku nan ta manera djente di wil di un mashin impersonal
[Rekonosementu]
Japan Information Center, Consulate General of Japan in NY
[Rekonosementu pa Potrèt na página 8]
Planeta Tera: potrèt di NASA