En Buska di Pas Mental

ALBERT tabata un hòmber felismente kasá i tabatin dos yu presioso. Pero el a sinti ku su bida tabata falta algu. Tempu ku e tabatin ku lucha pa haña trabou, el drenta polítika i a kuminsá sigui sosialismo. Asta el a bira un miembro aktivo di e partido komunista.

Pero masha lihé Albert a keda desilushoná ku komunismo. El a bandoná polítika i a dediká su mes kompletamente na su famia. Awor su meta den bida tabata pa su famia ta felis. No opstante, ainda Albert tabata sinti un bashí ku tabata molesti’é; ainda e no a logra haña un berdadero pas mental.

E eksperensia di Albert aki sigur no ta algu úniko. Pa por haña berdadero propósito den bida, miónes di hende a purba ku vários ideologia, filosofia i religion. Den e mundu oksidental, e movementu hippie di e dékada di 1960 tabata un rebelion kontra balornan moral i sosial tradishonal. Hóbennan en partikular a buska felisidat i propósito den bida den droga ku ta alterá mente i den filosofia di e asina yamá guru- i lidernan spiritual di e movementu aki. Ma e movementu hippie no a trese berdadero felisidat. Al kontrali, el a yuda produsí hóbennan inmoral i adikto na droga, lokual a aselerá e degenerashon moral di sosiedat.

Pa siglonan, hopi hende a buska felisidat den rikesa, poder òf edukashon. Pero finalmente tur e empeñonan aki ta hiba na  desepshon. Hesus a bisa ku “bida di hende no ta konsistí di e abundansia di e kosnan ku e tin.” (Lukas 12:15) Mas bien, e korementu loko tras di rikesa por lo general ta trese infelisidat. Beibel ta bisa: “Esnan ku kier bira riku ta kai den tentashon i den trampa i den hopi deseonan loko i dañino, kuanan ta hundi hende den ruina i destrukshon. Pasobra amor pa plaka ta rais di tur sorto di maldat, i algun hende, dor di deseá esaki . . . a traspasá nan mes ku hopi doló.”—1 Timoteo 6:9, 10.

Awor kon un persona por haña pas mental i propósito den bida? Akaso esei ta un asuntu di eksperimentu, manera tira un flecha den skuridat i spera ku e ta alkansá un blanko? Ta bon ku no ta asina. Manera nos lo mira den e siguiente artíkulo, e solushon ta sinta den satisfasé un nesesidat masha importante i ku hende so tin.

[Plachi na página 3]

Korementu tras di rikesa, poder òf edukashon por yuda bo haña pas mental?