“Felis Ta Esnan Ku Ta Konsiente di Nan Nesesidat Spiritual”

ORA para lanta mainta, hopi bes nan ta chip un ratu pa despues bula bai buska kuminda. Atardi, nan ta bai bèk na nan lugá di sosegá, chip un tiki mas i bai drumi. Den sierto temporada, nan ta par, pone webu i kria nan yunan. Otro bestia tambe ta sigui e mesun patronchi di bida.

Nos komo hende sí ta diferente. Ta bèrdat ku nos tambe ta kome, drumi i haña yu, pero mayoria di nos no ta kontentá nos ku e kosnan ei so. Nos ke sa pakiko nos ta eksistí. Nos ta buska propósito den bida. Tambe nos ke tin un speransa pa futuro. E nesesidatnan mas profundo aki ta indiká ku hende tin algu úniko. Esei ta spiritualidat, òf e nesesidat i kapasidat pa eksplorá interesnan mas ayá di kosnan físiko.

Kreá den Imágen di Dios

Beibel ta splika kon bin hende tin un nesesidat spiritual. E ta bisa: “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.” (Génesis 1:27) E echo ku nos a ser kreá den “imágen di Dios” ta nifiká ku ounke nos a haña e mancha di piká i imperfekshon, nos tin e kapasidat pa reflehá sierto kualidatnan di Dios. (Romanonan 5:12) Por ehèmpel, nos por ta kreativo. Tambe nos tin sierto sabiduria, un sentido di hustisia i e kapasidat pa mustra amor inegoista pa otro. Ademas, nos por meditá riba pasado i plania pa futuro.—Proverbionan 4:7; Eklesiastés 3:1, 11; Mikeas 6:8; Juan 13:34; 1 Juan 4:8.

E loke mas ta demostrá nos kapasidat spiritual ta nos deseo natural pa adorá Dios. Si nos no satisfasé den un forma korekto e nesesidat pa ta den kontakto ku nos Kreadó, nos no por haña felisidat berdadero i duradero. Hesus a bisa: “Felis ta esnan ku ta konsiente di nan  nesesidat spiritual.” (Mateo 5:3, NW) Pero un kos sí, nos mester buska pa satisfasé e nesesidat ei ku bèrdat spiritual—bèrdatnan tokante Dios, su normanan i su propósito pa humanidat. Unda nos por haña e bèrdatnan ei? Den Beibel.

“Bo Palabra Ta Bèrdat”

Apòstel Pablo a skirbi: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Pablo su palabranan ta kuadra ku esnan di Hesus, kende a bisa den orashon na Dios: “Bo palabra ta bèrdat.” Awe, nos konosé e Palabra ei komo e Skritura Santu, i ta sabí pa nos averiguá si nos kreensia- i normanan ta kuadra kuné.—Juan 17:17.

Dor di kompará nos kreensianan ku e Palabra di Dios, nos ta imitá e hendenan di Berea di antigwedat, kendenan a hasi sigur ku e siñansanan di Pablo a kuadra ku e Skritura. En bes di kritiká e bereanonan, e eskritor di Beibel, Lukas, a elogiá nan pa nan aktitut. El a skirbi: “Nan a risibí e palabra ku bon boluntat i tabata skudriñá e Skrituranan tur dia, pa mira si e kosnan aki tabata asina.” (Echonan 17:11) En bista di e siñansanan religioso i moral kontradiktorio ku ta reina awe, ta importante pa nos imitá e ehèmpel di e bereanonan ku tabatin un mentalidat noble.

Un otro manera ku nos por identifiká bèrdat spiritual ta dor di opservá ki influensia e tin den bida di hende. (Mateo 7:17) Por ehèmpel, un hende ku ta biba segun e bèrdat di Beibel mester bira un mihó esposo, un mihó tata, un mihó esposa, òf un mihó mama, i esei ta kontribuí na felisidat den famia i satisfakshon personal. Hesus a bisa: “Bendishoná ta esnan ku ta tende e palabra di Dios, i ta ward’é.”—Lukas 11:28.

E palabranan di Hesus ta pone nos kòrda riba e palabranan di su Tata selestial, kende a bisa e israelitanan di pasado: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana. Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.” (Isaias 48:17, 18) Un ekshortashon tierno asina sigur lo konmové tur hende ku ta stima bondat i hustisia!

Algun Hende Ta Preferá pa Laga ‘Kishikí Nan Orea’

Dios a hasi e apelashon sinsero ei n’e israelitanan pasobra nan a laga mentira religioso engañá nan. (Salmo 106:35-40) Nos tambe mester tene kuidou ku engaño. Pablo a skirbi enkuanto hende ku ta bisa ku nan ta kristian: “E tempu lo bin ku nan lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende, i lo bira nan orea for di e bèrdat.”—2 Timoteo 4:3, 4.

Lidernan religioso ta kishikí orea di hende dor di tolerá práktikanan ku ta satisfasé mal deseo, manera relashon seksual pafó di matrimonio, homoseksualidat i buracheria. Beibel ta bisa bon kla ku  esnan ku ta aprobá e kosnan ei i esnan ku ta praktiká nan “lo no heredá e reino di Dios.”—1 Korintionan 6:9, 10; Romanonan 1:24-32.

No tin duda, pa un hende biba segun normanan di Beibel, foral ora hende ta hasi mofa di dje, e mester tin kurashi. Pero e por logra. Den Testigunan di Yehova tin hopi ku tabata adikto na droga, buraché, fornikadó, gèngster, ladron i gañadó. Pero nan a tuma e Palabra di Dios na pechu i ku yudansa di spiritu santu nan a hasi kambio den nan bida pa asina nan por “kana na un manera digno di Señor.” (Kolosensenan 1:9, 10; 1 Korintionan 6:11) Despues ku nan a hasi pas ku Dios, nan a haña un pas interno tambe i, manera nos lo mira, un berdadero speransa pa futuro.

E Speransa di Reino

E speransa bíbliko di pas duradero pa hende obediente lo kumpli pa medio di e Reino di Dios. Hesus a bisa den su orashon modelo: “Ku bo reino bin. Ku bo boluntat sosodé na tera meskos ku den shelu.” (Mateo 6:10) Sí, ta e Reino di Dios so por garantisá ku e boluntat di Dios ta tuma lugá riba tera. Pakiko? Pasobra e Reino selestial ei—un gobièrnu den man di Hesukristu—ta e medio ku Dios lo usa pa mustra ku E ta e Soberano legítimo riba tera.—Salmo 2:7-12; Daniel 7:13, 14.

Komo Rei di e Reino selestial ei, Hesukristu lo libra hende obediente for di tur forma di sklabitut, inkluso di e gara firme ku e piká di Adam i su herensia di enfermedat i morto tin riba nan. Revelashon 21:3 i 4 ta bisa: “Mira, e tabernakel di Dios ta meimei di hende . . . i e [Yehova Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”

Tera kompletu lo tin un pas duradero. Pakiko nos por ta sigur di esei? Isaias 11:9 ta duna e motibu pa esei. E ta bisa: “Nan [e súpditonan di e Reino] lo no kousa daño ni destrukshon den henter mi seru santu, pasobra tera lo ta yen di e konosementu di SEÑOR, manera awa ta tapa laman.” Sí, tur hende riba tera lo tin konosementu eksakto di Dios i lo ta obediente na dje. E perspektiva ei no ta lanta bo ánimo? Si ta asina, awor ta  tempu pa kuminsá gana e presioso “konosementu di SEÑOR.”

Lo Bo Skucha e Mensahe di Reino?

Dios lo usa e Reino pa deshasí di tur e obranan di Satanas i eduká hende den Su kamindanan hustu. P’esei, no ta nada straño ku e siñansa di Hesus a enfoká riba e Reino. El a bisa: “Mi mester prediká e reino di Dios na e otro statnan tambe, pasobra ta pa e propósito aki mi a wòrdu mandá.” (Lukas 4:43) Kristu a manda su disipelnan kompartí e mesun mensahe ei ku nan próhimo. (Mateo 28:19, 20) El a profetisá: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mateo 24:14) E fin ei ta yegando rápidamente. P’esei ta masha importante pa hende sinsero skucha e bon notisia ei. Esei por skapa nan bida!

Albert, ku a ser menshoná den e artíkulo anterior, a tende e mensahe di Reino ora su kasá i yu a kuminsá studia Beibel ku Testigunan di Yehova. Na promé instante, Albert tabatin su dudanan. Asta el a pidi un lider religioso bishitá su kasá i yu pa por a desenmaskará e Testigunan. Pero e lider religioso no kier a mete den e asuntu. Albert a disidí e ora ei pa sinta skucha durante un estudio di Beibel pa wak si e por a topa kualke fayo den e siñansanan di e Testigunan. Despues di apénas un seshon, el a disidí na sigui partisipá den e estudio, ansioso pa siña mas. Despues di tempu el a splika pakiko su aktitut a kambia. El a bisa: “Ta esaki ta loke semper mi tabata buska.”

Por fin Albert a kuminsá satisfasé su nesesidat spiritual, i esei no a duel e nunka. E bèrdat di Beibel a dun’é loke e tabata buska henter su bida: solushon pa e inhustisia i degenerashon ku a korumpí henter sosiedat, i tambe un speransa pa futuro. E bèrdat di Beibel a dun’é pas mental. Abo ta satisfasiendo bo nesesidat spiritual? Pakiko bo no ta pasa dor di e preguntanan den e kuadro na página 6? Si bo ta deseá mas informashon, Testigunan di Yehova lo ta kontentu pa yuda bo.

[Kuadro/Plachinan na página 6]

BO TA SATISFASIENDO BO NESESIDAT SPIRITUAL?

Bo ta satisfecho ku e alimento spiritual ku bo ta risibiendo? Nos ta invitá bo pa lesa e siguiente preguntanan i marka esnan ku bo por kontestá korektamente.

□ Ken Dios ta, i kon su nòmber ta?

□ Ken Hesukristu ta? Pakiko e mester a muri? Kon su morto por benefisiá bo?

□ Ta eksistí un Diabel? Si ta asina, di unda el a bini?

□ Kiko ta sosodé ku nos ora nos muri?

□ Kiko ta Dios su propósito pa e tera i pa humanidat?

□ Kiko ta e Reino di Dios?

□ Kiko ta Dios su normanan di moralidat?

□ Ki papel Dios a duna esposo i esposa den famia? Kua ta algun prinsipio di Beibel ku ta kontribuí na felisidat den famia?

Si bo no ta sigur di e kontestanan riba kualke un di e preguntanan aki, bo por pidi un foyeto Kico Dios Ta Rekerí di Nos?, publiká dor di Testigunan di Yehova na kasi 300 idioma. E foyeto aki ta trata 16 tema básiko di Beibel i ta kontestá tur e preguntanan sitá ariba ku tekstonan di Beibel.

[Plachinan na página 4]

Distinto di bestia, hende tin un nesesidat spiritual

[Plachi na página 5]

“Nan lo akumulá pa nan mes siñadónan pa bisa nan loke nan orea ku ta kishikí kier tende.”—2 Timoteo 4:3

[Plachi na página 7]

E Reino Mesiániko di Dios lo trese pas duradero