Nan Ta Pone Nan Mes Disponibel

“BO PUEBLO lo pone su mes disponibel.” (Salmo 110:3) E palabranan ei tin un nifikashon spesial pa e 46 studiantenan dje di 118 klas di e Skol Bíbliko di Galaad di Watchtower. Kon nan a prepará nan mes pa asistí na e skol aki ku ta entrená futuro misioneronan pa satisfasé e nesesidatnan spiritual di hende den paisnan stranhero? Mike ku Stacie, miembronan dje di 118 klas, a splika: “Nos desishon pa hiba un bida simpel a yuda nos limitá kosnan ku por a distraé nos i mantené asuntunan spiritual komo nos punto di enfoke. Nos tabata determiná pa no laga nos éksito den e mundu komersial pusha nos metanan spiritual un banda.” Meskos ku Mike ku Stacie, e otro studiantenan di e klas aki boluntariamente a pone nan mes disponibel i awor nan ta sirbi komo proklamadónan di Reino na kuater kontinente.

Djasabra, 12 di mart 2005, un públiko di 6.843 persona ku klaramente tabata kontentu, a skucha e programa di graduashon. Theodore Jaracz, miembro di e Kuerpo Gobernante di Testigunan di Yehova, a fungi komo presidente di e reunion. Despues di a duna un kaluroso bonbiní na e invitadonan, ku a bin for di 28 pais, el a enfoká atenshon riba e balor di edukashon bíbliko. Sitando palabranan di William Lyon Phelps, un edukadó merikano, Ruman Jaracz a deklará: “Nos por konsiderá tur hende ku tin un konosementu profundo di Beibel komo personanan berdaderamente eduká.” Pa útil ku edukashon di mundu por ta, edukashon bíbliko ta superior. E ta yuda hende gana konosementu di Dios, lokual ta hiba na bida eterno. (Juan 17:3) Ruman Jaracz a elogiá e graduadonan p’e echo ku nan tabata dispuesto pa tin un partisipashon mas grandi den e programa mundial di edukashon bíbliko ku ta tumando lugá den mas ku 98.000 kongregashon di Testigunan di Yehova rònt mundu.

Animashon Oportuno pa e Graduadonan

Despues di e palabranan di introdukshon di e presidente, William Samuelson a papia riba e tema “Kon Bo Por Ta Meskos Ku un Palu Bèrdè di Oleifi den e Kas di Dios,” basá riba Salmo 52:8. El a mustra ku Beibel ta usa palu di oleifi figurativamente komo un símbolo di produktividat, beyesa i dignidat. (Jeremias 11:16) Komparando e studiantenan ku palu di oleifi, e oradó a bisa: “Yehova lo konsiderá boso komo personanan bunita i digno segun ku boso ta kumpli fielmente ku boso trabou di prediká e Reino den boso asignashon komo misionero.” Meskos ku e palu di oleifi tin mester di hopi rais pa sobrebibí durante sekura,  asina tambe e studiantenan tin ku fortifiká nan raisnan spiritual pa nan por soportá indiferensia, oposishon òf otro pruebanan ku nan lo por konfrontá den nan sirbishi den estranheria.—Mateo 13:21; Kolosensenan 2:6, 7.

John E. Barr, un di e tres miembronan di Kuerpo Gobernante ku a partisipá den e programa, a papia riba e tema “Boso Ta e Salu di Tera.” (Mateo 5:13) El a señalá ku meskos ku salu literal ta konserbá kuminda pa e no daña òf putri, asina e predikashon di e misioneronan tokante e Reino di Dios lo tin e efekto di salba bida di esnan ku skucha, protehando nan di daño òf putrimentu moral i spiritual. Anto ku un tono bondadoso Ruman Barr a urgi e graduadonan pa “tene pas” ku otro hende. (Marko 9:50) “Kultivá e fruta di spiritu, i hasi sigur ku boso kondukta i abla semper ta agradabel i ku konsiderashon,” e oradó a konsehá.

Wallace Liverance, un di e instruktornan di Galaad, a presentá e tema: “Keda den e Barku den Awa Hundu.” Meskos ku un barku ku ta nabegá den awa hundu por move den e direkshon korekto, asina un komprondementu di “e profundidatnan di Dios”—bèrdatnan relashoná ku Dios su propósito i kon lo e ser efektuá—por yuda un persona hasi progreso spiritual. (1 Korintionan 2:10) Djis keda den awa plat spiritual dor di ta satisfecho ku “e prinsipionan elemental di e palabra di Dios” ta stroba nos di progresá i por asta oumentá e chèns ku nos lo “noufragá enkuanto [nos] fe.” (Hebreonan 5:12, 13; 1 Timoteo 1:19) “Laga e ‘profundidat di e rikesanan, tantu di e sabiduria komo di e konosementu di Dios’ sostené boso den boso asignashon komo misionero,” Ruman Liverance a konkluí.—Romanonan 11:33.

Mark Noumair, un otro instruktor di Galaad, a papia riba e tema “Lo Bo Sirbi Digno di Bo Herensia?” Pa mas ku 60 aña, e Skol Bíbliko di Galaad di Watchtower a atkerí kredibilidat i un ekselente reputashon debí na e ‘monton di bon testimonio’ ku e graduadonan di e skol a duna. (Génesis 31:48) E herensia aki di Galaad a pasa over pa e studiantenan dje di 118 klas. Ruman Noumair a animá e studiantenan pa imitá e antiguo tekoitanan di tempu di Nehemias i koperá humildemente ku e kongregashon lokal i ku otro misionero. Nan a haña e spièrtamentu pa evitá e aktitut di e “noblenan” orguyoso ku Nehemias a papia dje i mas bien sea dispuesto pa traha trankil den background.—Nehemias 3:5.

Eksperensia- i Entrevistanan Instruktivo

E siguiente parti riba programa tabata titulá “E Palabra di Dios A Sigui Plama.” (Echonan 6:7) Bou di guia di e instruktor di Galaad Lawrence Bowen, e studiantenan a tene demostrashon di eksperensianan ku nan tabatin den sirbishi di vèlt durante e skol. E eksperensianan a demostrá ku e studiantenan a proklamá e Palabra di Dios ku selo i ku Yehova a bendishoná nan esfuersonan rikamente.

Richard Ashe a tene vários entrevista ku miembronan di e famia di Bètel ku a traha estrechamente ku e skol. Nan komentarionan a duna un bista mas profundo di e manera ku e famia di Bètel ta koperá pa yuda studiantenan di Galaad saka e máksimo probecho di nan edukashon na e skol. Despues Geoffrey Jackson a papia ku algun eks-graduado di Galaad. Nan a hala atenshon na e kantidat di oportunidatnan ku bida di misionero ta ofresé pa trese alabansa i onor na Yehova. Un di e eks-graduadonan a remarká: “Hende ta opservá tur kos ku bo ta hasi komo misionero. Nan ta skucha, nan ta wak i nan ta kòrda.” P’esei e studiantenan a haña e animashon pa sòru pa nan ta un bon ehèmpel na tur momentu. E konseho práktiko aki sin duda lo resultá masha balioso pa e misioneronan den e dianan binidero.

Stephen Lett, miembro di e Kuerpo Gobernante, a duna e diskurso di konklushon, titulá “Bai Komo Kargadónan di ‘Awa Bibu.’” (Juan 7:38) El a bisa ku durante e último sinku lunanan, e studiantenan a benefisiá masha hopi mes dor di ‘bebe’ profundamente di Dios  su Palabra di e bèrdat. Pero kiko e misioneronan nobo lo hasi ku e informashon ku nan a risibí? Ruman Lett a urgi e graduadonan pa kompartí e awanan spiritual aki generosamente pa asina otro hende por haña “un fuente di awa ku ta brota pa bida eterno” den nan mes. (Juan 4:14) E oradó a agregá: “No lubidá nunka di duna Yehova, ‘e fuente di awa bibu,’ e onor i gloria ku e ta meresé. Tene pasenshi ora boso ta siña e hendenan ku a sali for di Babilonia e Grandi ku ta ser asotá pa sekura.” (Jeremias 2:13) Ruman Lett a konkluí ku un animashon na e graduadonan pa nan imitá ku entusiasmo e spiritu i e brùit i sigui bisa: “‘Bin.’ I laga esun ku tin set, bin; laga esun ku kier, tuma e awa di bida pòrnada.”—Revelashon 22:17.

Na final di e programa, Ruman Jaracz a menshoná e saludonan ku nan a risibí for di vários pais. Despues un miembro di e klas ku a gradua a lesa un karta di gradisimentu.

Abo por pone bo mes disponibel pa sirbi kaminda tin mas nesesidat? Si ta asina, sigui tras di metanan spiritual, meskos ku e studiantenan ku a gradua aki a hasi. Kosechá e goso i satisfakshon ku un persona ta haña ora ku e ofresé su mes boluntariamente i ku goso pa traha den Dios su sirbishi, sea komo misionero den un pais stranhero òf komo un predikadó mas serka di kas.

[Kuadro na página 13]

ESTADÍSTIKANAN DI E KLAS

Kantidat di pais representá: 8

Kantidat di pais na kua a asigná nan: 19

Kantidat di studiante: 46

Promedio di edat: 33,0

Promedio di aña den e bèrdat: 16,5

Promedio di aña den sirbishi di tempu kompletu: 12,9

[Plachi na página 15]

E di 118 Klas di Graduadonan di e Skol Bíbliko di Galaad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.