Pregunta di Lektor

Deuteronomio 14:21 ta bisa: “No kome nada ku muri di su mes.” Akaso esaki ta kontradisí Levítiko 11:40 ku ta bisa: “Esun ku kome un pida di su kadaver mester laba su pañanan i keda impuru te ora nochi sera”?

E dos versíkulonan aki no ta kontradisí otro. E teksto di Deuteronomio 14:21 ta ripití e prohibishon di kome un bestia ku un hende a haña morto, kisas unu ku otro bestia a habraká. (Eksodo 22:31; Levítiko 22:8) E teksto di Levítiko 11:40 ta splika kiko un israelita lo por a hasi den kaso ku el a violá e prohibishon ei, kisas aksidentalmente.

E echo ku e Lei a prohibí un kos no a nifiká ku nunka hende lo a ignorá e prohibishon. Por ehèmpel, tabatin lei ku a prohibí hòrtamentu, matamentu, dunamentu di testimonio falsu, etcetera. Pero a la bes tabatin kastigu pa esnan ku a kibra e leinan ei ku Dios a duna. E kastigu a duna forsa na e leinan i a mustra kon serio nan tabata.

Un persona ku a faya kontra e prohibishon di kome e karni di un bestia ku nan a haña morto lo tabata impuru den bista di Yehova i e mester a sigui e prosedura korekto pa purifiká su mes. Si e no a purifiká su mes korektamente, lo e tabatin ku “karga su kulpa.”—Levítiko 17:15, 16.