“Trese Bon Nobo di Felisidat”

“Ki bunita riba e serunan ta e pianan di esun ku . . . ta trese bon nobo di felisidat.”—ISAIAS 52:7.

1, 2. (a) Ki kosnan teribel ta sosodé tur dia? (b) Kon hopi hende ta reakshoná riba e echo ku konstantemente nan ta tende mal notisia?

AWENDIA, rònt mundu hende ta sinti ku nan ta ser inundá pa mal notisia. Nan ta sende radio i ta informenan spantoso tokante malesanan mortal ku ta menasá e tera nan ta tende. Nan ta bira wak notisia na televishon i ta imágennan teribel di muchanan hambrá ku ta sklama pa yudansa nan ta mira. Nan ta kue un korant i ta tokante bòmnan ku a eksplotá i destruí hopi edifisio, matando kantidat di hende inosente nan ta lesa.

² Sí, tur dia kosnan teribel ta sosodé. Definitivamente e esena di e mundu aki ta kambiando, pero pa mas pió. (1 Korintionan 7:31, NW) Un revista notisiero di Wèst Europa a komentá ku tin biaha ta parse komo si fuera mundu kompletu ta “na punto di kaba na kandela.” P’esei no ta straño ku mas i mas hende ta sinti nan hopi angustiá! Na Merka nan a hasi un sondeo tokante notisia ku ta pasa na televishon, anto e palabranan di un persona ku a partisipá den e sondeo ei, sin duda ta reflehá e sintimentu di miónes di hende. E persona a bisa: ‘Ora mi kaba di wak notisia, mi ta keda tur deprimí. Ta mal notisia so ta pasa. E ta laga bo sinti hopi impotente.’

Notisia Ku Tur Hende Tin Ku Tende

3. (a) Ki bon notisia Beibel ta proklamá? (b) Dikon bo ta haña ku e bon notisia di e Reino ta balioso?

³ Nos por haña mihó notisia den un mundu skur asina? Sí, nos por! Ta un gran konsuelo pa sa ku Beibel ta proklamá bon notisia. Ta e notisia ku e Reino di Dios lo pone fin na malesa, hamber, krímen, guera i tur sorto di opreshon. (Salmo 46:9; 72:12) Esei no ta un notisia ku tur hende tin ku tende? Testigunan di Yehova sigur ta kere ku sí. Ta p’esei nan ta konosí tur kaminda pa nan esfuerso kontinuo pa kompartí e evangelio òf bon notisia di e Reino di Dios ku hende di tur nashon.—Mateo 24:14.

4. Ki aspektonan di nos sirbishi nos lo konsiderá den e artíkulo aki i esun siguiente?

⁴ Pero kiko nos por hasi pa nos por sigui partisipá na un manera signifikativo i ku ta duna satisfakshon den e predikashon di e bon notisia aki, asta kaminda tin ménos reakshon positivo? (Lukas 8:15) Un konsiderashon kòrtiku di tres aspekto importante di nos trabou di prediká sin duda lo yuda nos. Nos por analisá (1) nos motivashon, esta, pakiko nos ta prediká; (2) nos mensahe, esta, kiko nos ta prediká; i (3) nos métodonan, esta, kon nos ta prediká. Dor di perkurá pa nos motivashon keda puru, pa nos mensahe ta bon kla i ku nos métodonan ta efektivo, nos lo duna un variedat grandi di hende e oportunidat di tende e mihó notisia ku tin: e bon nobo di e Reino di Dios. *

 Pakiko Nos Ta Prediká e Bon Nobo

5. (a) Kiko ta nos motivashon prinsipal pa partisipá den e ministerio? (b) Dikon nos por bisa ku nos obedensia na e mandamentu bíbliko pa prediká ta un ekspreshon di amor pa Dios?

⁵ Laga nos konsiderá e promé aspekto: nos motivashon. Pakiko nos ta prediká e bon nobo? Pa e mesun motibu ku Hesus a hasié. El a bisa: “Mi ta stima e Tata.” (Juan 14:31; Salmo 40:8) Amor pa Dios ta loke prinsipalmente ta motivá nos. (Mateo 22:37, 38) Beibel ta liga amor pa Dios ku e ministerio, pasobra e ta deklará: “Esaki ta e amor di Dios, ku nos ta warda su mandamentunan.” (1 Juan 5:3; Juan 14:21) Akaso un di Dios su mandamentunan ta pa ‘bai i hasi disipel’? (Mateo 28:19) Sí. Ta bèrdat ku ta Hesus a papia e palabranan ei, pero bon mirá, nan a originá di Yehova. Kon asina? Hesus a splika: “Ami no ta hasi nada di mi mes, ma . . . mi ta papia e kosnan aki manera e Tata a siña mi.” (Juan 8:28; Mateo 17:5) Pues, dor di kumpli ku e mandamentu pa prediká, nos ta mustra Yehova ku nos ta stim’é.

6. Den ki maneranan amor pa Dios ta motivá nos pa prediká?

⁶ Ademas, amor pa Yehova ta motivá nos pa prediká pasobra nos ke kontrarestá e mentiranan ku Satanas ta fomentá kontra Yehova. (2 Korintionan 4:4) Satanas a pone na duda si Dios su gobernashon ta hustu. (Génesis 3:1-5) Komo Testigunan di Yehova, nos ta anhelá di por yuda desenmaskará Satanas su kalumnianan i santifiká Dios su nòmber dilanti di humanidat. (Isaias 43:10-12) Tambe nos ta partisipá den e ministerio pasobra nos a siña konosé Yehova su kualidatnan i kamindanan. Nos ta sinti un intimidat kuné i tambe nos tin e deseo fuerte di konta otro hende tokante nos Dios. De echo, Yehova su bondat i su kamindanan hustu ta duna nos asina tantu goso ku nos no por stòp di papia tokante dje. (Salmo 145:7-12) Nos ta sinti nos motivá pa proklamá su alabansa i papia tokante su “obranan magnífiko” na hende ku ke skucha.—1 Pedro 2:9, BPK; Isaias 43:21.

7. Fuera di amor pa Dios, pa ki otro motibu importante nos ta partisipá den e trabou di prediká?

⁷ Tin un otro motibu importante pa sigui partisipá den e ministerio: Sinseramente nos ke trese alivio pa personanan aplastá pa e avalancha konstante di mal notisia i pa esnan ku ta sufri pa un òf otro motibu. Den e trabou di duna alivio aki, nos ta hasi esfuerso pa imitá Hesus. Por ehèmpel, wak e relato ku tin na Marko kapítulo 6.

8. Kiko e relato na Marko kapítulo 6 ta mustra tokante Hesus su sintimentu pa hende?

⁸ E apòstelnan a regresá for di un kampaña di predikashon i a konta Hesus tur loke nan a hasi i siña hende. Hesus a ripará ku e apòstelnan tabata kansá, i el a bisa nan pa ban “sosegá un ratu.” Pues nan a subi den un boto i a bai na un lugá trankil. Pero e hendenan a sigui nan, koriendo kantu di kosta, i poko despues a alkansá nan. Kiko Hesus a hasi? Beibel ta bisa: “El a mira un multitut grandi, i el a sinti kompashon pa nan, pasobra nan tabata manera karné sin wardadó; i el a kuminsá siña nan hopi kos.” (Marko 6:31-34) Apesar ku Hesus tabata kansá, kompashon a motiv’é pa sigui kompartí e bon nobo ku e hendenan. Pues  ta bisto ku Hesus realmente a sinti pa e hendenan aki.

9. Kiko nos ta siña for di e relato na Marko kapítulo 6 enkuanto e motivashon korekto pa prediká?

⁹ Kiko nos ta siña for di e relato aki? Komo kristian, nos ta sinti un obligashon pa prediká e bon nobo i hasi disipel. Nos ta rekonosé nos responsabilidat di proklamá e bon nobo, ya ku Dios ta deseá pa ‘tur klase di hende wòrdu salbá.’ (1 Timoteo 2:4) Sin embargo, nos ta kumpli ku nos ministerio no solamente debí na un sentido di deber sino tambe debí na kompashon. Ora ku nos ta sinti kompashon pa hende, meskos ku Hesus a sinti, nos kurason lo motivá nos pa hasi tur loke nos por pa sigui kompartí e bon nobo ku nan. (Mateo 22:39) Si nos tin tal motibunan ekselente pa partisipá den e ministerio, esei lo motivá nos pa prediká e bon nobo sin stòp.

Nos Mensahe: E Bon Nobo di e Reino di Dios

10, 11. (a) Kon Isaias ta deskribí e mensahe ku nos ta prediká? (b) Kon Hesus a trese bon nobo di algu mihó, i kon Dios su sirbidónan den tempu moderno a sigui Hesus su ehèmpel?

¹⁰ Kiko di e di dos aspekto di nos sirbishi, esta, nos mensahe? Kiko nos ta prediká? Profeta Isaias a duna e bunita deskripshon aki di e mensahe ku nos ta anunsiá: “Ki bunita riba e serunan ta e pianan di esun ku ta trese bon nobo, ku ta anunsiá pas i ta trese bon nobo di felisidat, ku ta anunsiá salbashon i ku ta bisa Sion: ‘Bo Dios ta reina!’”—Isaias 52:7.

¹¹ E ekspreshon klave den e teksto aki, “bo Dios ta reina,” ta rekordá nos di e mensahe ku nos tin ku proklamá, esta, e bon nobo di e Reino di Dios. (Marko 13:10) Tuma nota tambe ku e versíkulo aki ta revelá e tono positivo di nos mensahe. Isaias ta usa palabranan manera “salbashon,” “bon nobo,” “pas” i “felisidat.” Siglonan despues di Isaias, den e promé siglo di nos era, Hesukristu a kumpli ku e profesia aki den un manera sobresaliente. El a pone un bon ehèmpel dor di anunsiá ku selo e notisia felis di algu mihó, e binidero Reino di Dios. (Lukas 4:43) Den tempu moderno, spesialmente for di aña 1919, Testigunan di Yehova a sigui Hesus su ehèmpel dor di proklamá ku selo e bon nobo di Dios su Reino establesí i e bendishonnan ku esaki lo trese.

12. Ki efekto e bon nobo di e Reino tin riba esnan ku asept’é?

¹² Ki efekto e bon nobo di e Reino tin riba hende ku asept’é? Awe, meskos ku den tempu di Hesus, e bon nobo ta duna speransa i konsuelo. (Romanonan 12:12; 15:4) E ta duna hende di kurason onrado speransa, pasobra nan ta siña ku tin motibunan sólido pa kere ku un mihó tempu ta spera nan. (Mateo 6:9, 10; 2 Pedro 3:13) E speransa ei ta un gran yudansa pa hende temeroso di Dios por mantené un punto di bista optimista. E  salmista ta deklará ku nan “lo no tin miedu di mal notisia.”—Salmo 112:1, 7.

Un Mensahe Ku Lo “Verbant Hende di Kurason Kibrá”

13. Kon profeta Isaias ta deskribí e bendishonnan inmediato ku esnan ku aseptá e bon nobo ta risibí?

¹³ Ademas e bon nobo ku nos ta prediká ta trese alivio i bendishon inmediato pa esnan ku skuch’é. Kon asina? Profeta Isaias a indiká algun di e bendishonnan ora el a predisí: “E spiritu di Señor Soberano Yehova ta riba mi, pa motibu ku Yehova a ungi mi pa anunsiá bon nobo na mansunan. El a manda mi pa verbant hende di kurason kibrá, pa proklamá libertat na esnan hibá prezu i pa habri hanchu wowo di asta prizoneronan; pa proklamá e aña di bon boluntat di parti di Yehova i e dia di vengansa di parti di nos Dios; pa konsolá tur esnan ku ta ferdrit.”—Isaias 61:1, 2, NW; Lukas 4:16-21.

14. (a) Kiko e ekspreshon “verbant hende di kurason kibrá” ta indiká tokante e mensahe di Reino? (b) Kon nos ta reflehá Yehova su preokupashon i interes pa hende di kurason kibrá?

¹⁴ Segun e profesia aki, dor di prediká e bon nobo Hesus lo a “verbant hende di kurason kibrá.” Isaias a usa un deskripshon hopi ekspresivo! Segun un dikshonario di Beibel, e palabra hebreo tradusí “verbant” “hopi bes ta ser usá relashoná ku ‘mara’ un verbant, i pues, tin di haber ku usa remedi pa trata esnan heridá i kura nan.” Un verplegster bondadoso kisas ta mara un verbant, òf kòmprès, rònt di e parti heridá di e kurpa di un víktima pa asina dun’é sosten. Den mesun manera, ora publikadónan bondadoso ta prediká e mensahe di Reino nan ta duna sosten na tur hende ku reakshoná faborabel i ku ta sufri den un manera òf otro. Anto dor di duna sosten na esnan den nesesidat, nan ta reflehá Yehova su preokupashon i interes. (Ezekiel 34:15, 16) E salmista a deklará relashoná ku Dios: “E ta kura esnan di kurason kibrá, i ta mara nan heridanan.”—Salmo 147:3.

Kon e Mensahe di Reino Ta Hasi un Diferensia

15, 16. Kua eksperensianan di bida real ta ilustrá kon e mensahe di Reino ta duna sosten i fortalesa na hende den nesesidat?

¹⁵ Tin kantidat di ehèmpel di bida real ku ta ilustrá kon e mensahe di Reino en bèrdat ta sostené i fortalesé hende di kurason kibrá. Tuma por ehèmpel Oreanna, un señora di edat avansá na Suramérika, ku a pèrdè tur smak den bida. Un Testigu di Yehova a kuminsá bishitá Oreanna i tabata lesa p’e for di Beibel i e publikashon Mi buki di relato bíblico. * Na prinsipio, e señora deprimí tabata skucha e lesamentu drumí na kama ku su wowonan será, miéntras ku de bes en kuando e tabata dal un suspiro. Pero no a tarda muchu ku el a kuminsá hasi un esfuerso pa lanta sinta riba su kama durante e lesamentu. Poko tempu despues, e tabata sinta warda riba su maestra di Beibel den stul den sala. Despues, e señora a kuminsá asistí na reunionnan kristian na e Salòn di Reino. Enkurashá dor di loke el a siña na e reunionnan ei, el a kuminsá ofresé literatura bíbliko na ken ku pasa banda di su kas. Anto na edat di 93 aña, Oreanna a batisá komo un Testigu di Yehova. E mensahe di Reino a renobá su gana di biba.—Proverbionan 15:30; 16:24.

¹⁶ E mensahe di Reino ta duna sosten krusial asta na personanan ku sa ku nan bida ta serka di yega su fin debí na malesa. Tuma por ehèmpel Maria di Wèst Europa. E tabata sufri di un malesa mortal i a pèrdè tur speransa. E tabata hopi deprimí ora Testigunan di Yehova a bin den kontakto kuné. Sin embargo, ora el a siña tokante e propósitonan di Dios, su bida a bolbe haña sentido. El a batisá i a bira masha aktivo den e trabou di prediká. Durante e último dos añanan di su bida, su wowonan tabata bria yen di speransa i goso. Maria a muri ku un speransa  firme den e resurekshon.—Romanonan 8:38, 39.

17. (a) Kon e mensahe di Reino ta hasi un diferensia den bida di esnan ku asept’é? (b) Den ki maneranan abo personalmente a eksperensiá ku Yehova ta “lanta tur ku ta abatí”?

¹⁷ Informenan asina ta duna testimonio di e diferensia ku e mensahe di Reino por hasi den bida di hende ku ta anhelá bèrdatnan bíbliko. Personanan ku ta ferdrit pa e morto di un ser kerí, ta haña forsa atrobe ora nan siña tokante e speransa di resurekshon. (1 Tesalonisensenan 4:13) Hendenan ku ta biba den pobresa i ku ta lucha pa alimentá nan famia, ta haña un dignidat nobo i kurashi ora nan siña ku Yehova nunka lo no bandoná nan si nan ta fiel na dje. (Salmo 37:28) Ku Yehova su yudansa, hopi hende aplastá pa depreshon pokopoko ta desaroyá e fortalesa nesesario pa trata ku nan malesa i den algun kaso asta ta logra vense e malesa ei. (Salmo 40:1, 2) Aworakí en bèrdat Yehova “ta lanta tur ku ta abatí” pa medio di e poder ku su Palabra ta suministrá. (Salmo 145:14) Dor di opservá kon e bon nobo di e Reino ta trese konsuelo pa hende di kurason kibrá den nos teritorio i den e kongregashon kristian, nos ta ser rekordá bes tras bes ku nos tin e mihó notisia disponibel awe!—Salmo 51:17.

‘Mi Orashon na Dios pa Nan’

18. E echo ku e hudiunan a rechasá e bon nobo tabatin ki efekto riba Pablo, i dikon?

¹⁸ Ounke nos mensahe ta kontené e mihó notisia, hopi hende ta rechas’é. Kon esaki lo por afektá nos? Den e mesun manera ku el a afektá apòstel Pablo. Pablo a prediká hopi biaha na hende hudiu, pero mayoria di nan a rechasá e mensahe di salbashon. Nan rechaso a afektá Pablo profundamente. El a atmití: “Mi tin gran tristesa i un doló kontinuo den mi kurason.” (Romanonan 9:2) Pablo a sinti kompashon pa e hudiunan ku el a prediká na dje. E echo ku nan a rechasá e bon nobo a hasié tristu.

19. (a) Dikon ta di komprondé ku tin biaha nos por sinti nos deskurashá? (b) Kiko a yuda Pablo sigui den su trabou di prediká?

¹⁹ Nos tambe ta prediká e bon nobo motivá pa kompashon. Pues ta di komprondé ku nos por sinti nos deskurashá ora ku hopi hende ta rechasá e mensahe di Reino. Nos reakshon ta demostrá ku nos ta realmente interesá den e bienestar spiritual di e hendenan ku nos ta prediká na dje. Sin embargo, ta bon pa nos kòrda riba e ehèmpel di apòstel Pablo. Kiko a yud’é sigui den su trabou di prediká? Ounke e echo ku e hudiunan a rechasá e bon nobo a kousa Pablo tristesa i doló, e no a pèrdè interes den tur hudiu, pensando ku nan tabata kaso  pèrdí. E tabatin e speransa ku algun hudiu ainda lo a aseptá Kristu. Pues, relashoná ku su sintimentu pa ku hudiunan individual, Pablo a skirbi: “E deseo di mi kurason i mi orashon na Dios pa Israel ta pa salbashon.”—Romanonan 10:1.

20, 21. (a) Relashoná ku nos ministerio, kon nos por imitá Pablo su ehèmpel? (b) Ki aspekto di nos ministerio nos lo konsiderá den e siguiente artíkulo?

²⁰ Tuma nota di dos kos ku Pablo a enfatisá. E deseo di su kurason tabata pa algun hende haña salbashon, i el a hasi orashon na Dios tokante esaki. Awe, nos ta sigui Pablo su ehèmpel. Nos ta mantené un deseo sinsero pa lokalisá ken ku lo por tin e disposishon korekto pa ku e bon nobo. Nos ta sigui pidi Yehova den orashon pa nos por haña e personanan ei di manera ku nos por yuda nan sigui e kaminda ku lo hiba na nan salbashon.—Proverbionan 11:30; Ezekiel 33:11; Juan 6:44.

²¹ Sin embargo, pa alkansá mas tantu hende posibel ku e mensahe di Reino, nos tin ku presta atenshon no solamente na pakiko i kiko nos ta prediká sino tambe kon nos ta prediká. Den e siguiente artíkulo nos lo trata e tópiko aki.

[Nota]

Kiko Bo A Siña?

• Pa ki motibunan nos ta partisipá den e ministerio?

• Kiko ta e mensahe prinsipal ku nos ta prediká?

• Ki bendishon hende ku aseptá e mensahe di Reino ta eksperensiá?

• Kiko lo yuda nos sigui den nos ministerio?

[Preguntanan di Estudio]

[Plachinan na página 18]

E mensahe di Reino ta duna fortalesa na hende di kurason kibrá

[Plachinan na página 20]

Orashon ta yuda nos perseverá den nos ministerio