Bo Ta Fiel den Tur Kos?
Bo Ta Fiel den Tur Kos?
“Esun ku ta fiel den un kos masha chikitu, ta fiel tambe den hopi.”—LUKAS 16:10.
1. Kua ta un di e maneranan ku Yehova ta fiel?
SEGUN ku un dia ta pasa, bo a yega di tuma nota di loke ta sosodé ku e sombra ku un palu ta tira riba suela? Wèl, e sombra konstantemente ta kambia di tamaño i direkshon! Esfuerso- i promesanan humano hopi bes ta mesun instabil ku sombra. Di otro banda, Yehova Dios no ta kambia segun tempu ta pasa. Disipel Santiago a referí na Yehova komo “e Tata di lusnan, serka kende no tin variashon ni sombra di kambio.” (Santiago 1:17) Yehova ta konstante i konfiabel, asta den e detayenan di mas chikitu. E ta “un Dios di fieldat.”—Deuteronomio 32:4.
2. (a) Pakiko nos tin ku saminá nos mes pa determiná si nos ta fiel? (b) Ki preguntanan tokante fieldat nos lo konsiderá?
2 Kon Dios ta konsiderá e konfiabilidat di su adoradónan? Dios tin e mesun punto di bista ku David, kende a bisa di nan: “Mi wowonan lo ta riba e fielnan di e tera, pa nan por biba serka mi; esun ku ta kana den e kaminda di perfekshon lo sirbi mi.” (Salmo 101:6) Sí, Yehova tin delisia den e fieldat di su sirbidónan. Ku bon motibu anto apòstel Pablo a skirbi: “Ta wòrdu rekerí di mayordomo ku kada un ta wòrdu hañá fiel.” (1 Korintionan 4:2) Kiko fieldat ta enserá? Den ki áreanan di bida nos mester aktua ku fieldat? Kiko ta e bendishonnan di “kana den e kaminda di perfekshon,” es desir, di un manera íntegro?
Loke Ta Nifiká Ser Fiel
3. Kiko ta determiná si nos ta fiel?
3 Hebreonan 3:5 ta deklará: “Moisés tabata fiel.” Kiko a hasi profeta Moisés fiel? Ora di konstruí i lanta e tabernakel, Moisés a hasi “konforme tur loke SEÑOR a orden’é, asina el a hasi.” (Eksodo 40:16) Komo adoradó di Yehova, nos ta demostrá fieldat dor di sirbié obedientemente. Esaki sigur ta enserá ku nos ta keda leal na Yehova ora ku nos ta konfrontá pruebanan difísil òf severo. Sin embargo, nos éksito den trata ku pruebanan grandi no ta e úniko faktor ku ta determiná nos fieldat. Hesus a deklará: “Esun ku ta fiel den un kos masha chikitu, ta fiel tambe den hopi; i esun ku ta inhustu den un kos masha chikitu, ta inhustu tambe den hopi.” (Lukas 16:10) Nos mester keda fiel asta den asuntunan ku por parse chikitu.
4, 5. Kiko nos fieldat den “kos masha chikitu” ta revelá?
4 Ser obediente tur dia den “kos masha chikitu” ta importante pa dos motibu. Na promé lugá, e ta revelá kiko nos ta pensa di Yehova su soberania. Pensa un ratu riba e tèst di lealtat ku a ser poné dilanti di e promé pareha humano, Adam ku Eva. Loke Dios a rekerí di nan no tabata un peso pa nan. Nan tabatin akseso na tur sorto di fruta den e hòfi di Edén, ta un palu so nan no tabatin mag di kome di dje, “e palu di konosementu di bon i malu.” (Génesis 2:16, 17) Nan fieldat den obedesé e mandamentu simpel ei lo a demostrá ku e promé pareha humano tabata na fabor di Yehova su gobernashon. Ora nos ta sigui Yehova su instrukshonnan den nos bida di tur dia, nos ta mustra ku nos ta na fabor di Yehova su soberania.
5 Na di dos lugá, nos kondukta den “kos masha chikitu” tin un influensia riba e manera ku nos lo reakshoná “tambe den hopi,” es desir, ora nos ta konfrontá kuestionnan mas grandi den bida. Relashoná ku esaki, konsiderá loke a sosodé ku Daniel i su tres fiel kompañeronan hebreo, Ananias, Misael i Azarias. Nan a ser hibá den eksilio na Babilonia na aña 617 promé ku nos era. Miéntras ku nan tabata hopi yòn ainda, probablemente teenager, e kuater mucha hòmbernan aki a haña nan den e korte real di Rei Nabukodonosor. Tabatin “òrdu pa nan haña un provishon diario di e mihó kuminda di rei i di e biña ku rei tabata bebe, i tambe pa nan haña un edukashon di tres aña, na fin di kual nan mester a drenta e sirbishi personal di rei.”—Daniel 1:3-5.
6. Ki prueba Daniel i su tres kompañeronan hebreo a konfrontá den e korte real di Babilonia?
6 Sin embargo, e provishonnan di e rei di Babilonia a presentá un problema pa e kuater hóbennan hebreo. E mihó kuminda di rei probablemente a inkluí kuminda prohibí pa e Lei di Moisés. (Deuteronomio 14:3-20) E babilonionan kisas no a laga e bestianan matá sangra na e manera apropiá, i si nan a kome di e karni ei nan lo a violá Dios su lei. (Deuteronomio 12:23-25) Podisé tambe e babilonionan, segun nan kustumber religioso, a ofresé e kuminda na ídolo promé ku nan a kome na mesa huntu.
7. Kiko e obedensia di Daniel i su tres amigunan a demostrá?
7 Pa e kas real di rei di Babilonia, restrikshonnan relashoná ku kuminda no tabata un problema grandi. Sin embargo, Daniel i su amigunan tabata desididu den nan kurason pa no kontaminá nan mes dor di kome kuminda prohibí den e Lei ku Dios a duna Israel. Esaki tabata un kuestion ku a enserá nan lealtat i fieldat na Dios. P’esei nan a pidi pa kome bèrdura i bebe awa, i nan a haña pèrmit pa hasi esei. (Daniel 1:9-14) Pa algun hende awe, e loke e kuater hóbennan ei a hasi por parse insignifikante. Sin embargo, nan obedensia na Dios a demostrá unda nan ta pará relashoná ku e kuestion di Yehova su soberania.
8. (a) Ki prueba krusial di lealtat e tres hebreonan a konfrontá? (b) Kiko tabata e resultado di e prueba, i esaki ta un bon ehèmpel di kiko?
8 Dor di demostrá di ta fiel den loke lo por a parse ménos importante a prepará Daniel su tres amigunan pa trata ku un prueba mas grandi. Bai na kapítulo 3 di e buki bíbliko di Daniel, i lesa pa bo mes kon e tres hebreonan a konfrontá pena di morto pasobra nan a nenga di adorá e imágen di oro ku Rei Nabukodonosor a lanta. Ora a hiba nan dilanti di rei, nan a deklará nan determinashon ku konfiansa: “Si t’asina, nos Dios, kende nos ta sirbi, por libra nos for di e fòrnu di kandela kayente-kayente, i e lo libra nos for di bo man, o rei. Ma asta si e no hasi esei, sea sigur, o rei, ku nos no ta bai sirbi bo diosnan, ni adorá e imágen di oro ku bo a lanta.” (Daniel 3:17, 18) Yehova a libra nan? E guardianan ku a tira e hòmbernan hóben den e fòrnu di kandela a muri, pero e tres fiel hebreonan a sali afó bibu, e kayente di e fòrnu no a kima ni un drachi di kabei na nan kurpa! Nan patronchi bon establesí di fieldat a yuda prepará nan pa ta fiel durante e prueba krusial ei. Esaki no ta un bon ehèmpel ku ta mustra kon importante ta pa nos ta fiel den kos chikitu?
Fieldat Relashoná ku “Rikesa Inhustu”
9. Kiko ta e konteksto di Hesus su palabranan na Lukas 16:10?
9 Promé ku Hesus a deklará e prinsipio ku un persona ku ta fiel den kosnan aparentemente chikitu ta fiel tambe den asuntunan importante, el a konsehá su oyentenan: “Gana amigu pa boso mes pa medio di e rikesa di inhustisia, pa ora esei faya, nan risibí boso den e habitashonnan eterno.” Ta despues di e deklarashon ei el a bisa pa ta fiel den kos masha chikitu. I Hesus a sigui bisa: “Si boso anto no tabata fiel den e uso di rikesa inhustu, ken lo konfia boso ku e berdadero rikesa? . . . Ningun sirbidó no por sirbi dos shon; pasobra òf e lo odia esun i stima e otro, òf e lo ta leal na esun i despresiá e otro. Boso no por sirbi Dios i rikesa.”—Lukas 16:9-13.
10. Kon nos por demostrá fieldat den nos uso di “rikesa inhustu”?
10 Segun e konteksto, e aplikashon original di Hesus su palabranan na Lukas 16:10 tin keber ku e uso di “rikesa inhustu,” esta, nos rekursonan òf poseshonnan material. Nan ta ser yamá inhustu pasobra rikesa material—foral plaka—ta bou di kontròl di hende pekaminoso. Ademas, e deseo pa haña rikesa por hiba na aktonan inhustu. Nos ta demostrá fieldat dor di ehersé sabiduria den e manera ku nos ta usa nos poseshonnan material. En bes di usa nan pa propósitonan egoista, nos ke usa nan pa adelanto di interesnan di Reino i pa yuda hende den nesesidat. Dor di ta fiel den e manera aki, nos ta gana amistat ku Yehova Dios i Hesukristu, esnan ku ta doño di “e habitashonnan eterno.” Nan lo risibí nos den e lugánan aki dor di duna nos bida eterno sea den shelu òf den Paradeis riba tera.
11. Pakiko nos no mester keda sin splika doñonan di kas ku nos ta aseptá kontribushon pa e obra mundial ku Testigunan di Yehova ta efektuá?
11 Ademas, pensa ta ki oportunidat nos ta duna hende ku nos ta laga Beibel òf literatura bíbliko kuné ora nos ta proklamá e mensahe di Reino i ta splika nan ku nos ta aseptá kontribushon pa e obra mundial ku e pueblo di Yehova ta efektuá. Akaso nos no ta dunando nan un chèns di hasi bon uso di nan rekursonan material? Ounke e aplikashon original di Lukas 16:10 ta relashoná ku e uso di rekursonan material, e prinsipio ku tin den dje ta apliká tambe den otro área di bida.
Onrades Ta Realmente Importante
12, 13. Den ki área di bida nos por demostrá onrades?
12 Apòstel Pablo a skirbi: “Nos ta sigur ku nos tin un bon konsenshi, ku deseo pa komportá nos mes den tur kos na un manera onorabel [“onradamente,” NW].” (Hebreonan 13:18) “Tur kos” sigur ta inkluí tur asuntu ku ta enserá maneho di plaka. Nos ta paga nos debenan i nos belasting umbes i onradamente. Dikon? Nos ta hasi esei debí na nos konsenshi i prinsipalmente debí na amor pa Dios i komo obedensia na su instrukshonnan. (Romanonan 13:5, 6) Kon nos ta reakshoná ora nos haña algu ku no ta pertenesé na nos? Nos ta trata na debolb’é na su doño legítimo. Esaki ta resultá den un ekselente testimonio ora nos splika ta kiko a motivá nos pa debolbé e persona su poseshon!
13 Ser fiel i onrado den tur kos ta inkluí ser onrado na nos lugá di empleo. Onrades den nos kustumbernan di trabou ta hala atenshon na e klase di Dios ku nos ta representá. Nos no ta “hòrta” tempu dor di hasi ko’i floho. Mas bien nos ta traha duru, manera ta pa Yehova. (Efesionan 4:28; Kolosensenan 3:23) Segun kálkulo den un pais europeo, un tersera parti di e empleadonan ku ta pidi doktersverlof ta hasi esei di un manera froudulento. Berdadero sirbidónan di Dios no ta bin ku èksküs pa evitá di bai traha. Tin biaha Testigunan di Yehova ta haña promoshon pasobra nan doño di trabou ta opservá nan onrades i trabou duru.—Proverbionan 10:4.
Fieldat den Nos Ministerio Kristian
14, 15. Menshoná algun manera ku nos por demostrá ku nos ta fiel den e ministerio kristian.
14 Kon nos ta demostrá fieldat den e ministerio ku a ser konfiá na nos? Beibel ta bisa: “Laga nos ofresé kontinuamente un sakrifisio di alabansa na Dios, esta, e fruta di lepnan ku ta duna gradisimentu [“hasi deklarashon públiko,” NW] na su nòmber.” (Hebreonan 13:15) E manera prinsipal di demostrá fieldat den sirbishi di vèlt ta dor di partisipá den dje ku regularidat. Pakiko nos lo mester laga un luna pasa sin duna testimonio tokante Yehova i su propósitonan? Tambe partisipashon regular den e trabou di prediká ta yuda nos mehorá nos abilidatnan i nos efektividat.
15 Un otro manera ekselente pa demostrá fieldat den sirbishi di vèlt ta dor di apliká e sugerensianan ku nos ta haña den E Toren di Vigilansia i Nos Ministerio di Reino. Ora nos prepará i usa e presentashonnan sugerí òf otro presentashonnan ku ta realístiko, nos no ta ripará ku nos ministerio ta mas produktivo? Ora nos topa un persona ku mustra interes den e mensahe di Reino, nos ta lihé pa sigui kultivá e interes di e persona? I kiko di estudionan di Beibel ku kisas nos a kuminsá ku hende interesá? Nos ta konfiabel i fiel den kondusí e estudionan di Beibel ku regularidat? Si nos demostrá di ta fiel den e ministerio, esei por hiba na bida pa nos i pa esnan ku ta skucha nos.—1 Timoteo 4:15, 16.
Keda Separá di Mundu
16, 17. Den ki maneranan nos por demostrá ku nos ta separá di mundu?
16 Den orashon na Dios, Hesus a bisa di su siguidónan: “Mi a duna nan bo palabra; i mundu a odia nan, pasobra nan no ta di mundu, meskos ku ami no ta di mundu. Mi no ta pidi bo pa saka nan for di mundu, ma pa bo warda nan di e malbado. Nan no ta di mundu, meskos ku ami no ta di mundu.” (Juan 17:14-16) Kisas nos ta firme i desididu pa keda separá di mundu riba kuestionnan grandi, manera neutralidat, kustumber- i dianan di fiesta religioso i inmoralidat. Pero kiko di kosnan mas chikitu? Lo por ta asina ku sin ku nos a realisá mes, nos ta ser influensiá dor di e maneranan di mundu? Por ehèmpel, si nos no ta kuidadoso, fásilmente nos manera di bisti por bira inapropiá i demostrá falta di dignidat. Fieldat ta enserá ser “desente i moderá” den e asuntu di bistimentu i areglo personal. (1 Timoteo 2:9, 10) De echo, “nos no ta duna motibu di ofensa den nada, pa e ministerio no wòrdu desakreditá, ma den tur kos nos ta rekomendá nos mes komo sirbidónan di Dios.”—2 Korintionan 6:3, 4.
17 Motivá pa e deseo di onra Yehova, nos ta bisti den un manera ku ta reflehá dignidat ora nos ta bai reunionnan di kongregashon. Meskos ta e kaso ora nos ta reuní na gran kantidat na nos asamblea- i kongresonan. Nos paña di bisti mester ta práktiko i presentabel. Esaki ta sirbi komo un testimonio pa otro hende ku ta opservá nos. Asta e angelnan ta tuma nota di nos aktividat, meskos ku nan a tuma nota di e aktividat di Pablo i di su kompañeronan kristian. (1 Korintionan 4:9) Bon mirá, semper nos mester ta apropiadamente bistí. Pa algun hende, fieldat den skohementu di paña di bisti por parse un asuntu chikitu, pero den bista di Dios e ta importante.
Bendishonnan pa Fieldat
18, 19. Fieldat ta resultá den ki bendishonnan?
18 Beibel ta yama kristiannan berdadero “mayordomonan ekselente di e bondat inmeresí di Dios ekspresá den vários manera.” Komo tal, nan ta ‘dependé di e forsa ku Dios ta suministrá.’ (1 Pedro 4:10, 11, NW) Ademas, komo mayordomo, nos a ser konfiá ku loke no ta pertenesé na nos personalmente, esta, ekspreshonnan di Dios su bondat inmeresí di kua unu ta e ministerio. Demostrando ku nos ta mayordomonan ekselente, nos ta dependé riba e forsa ku Dios ta suministrá, “e poder mas ayá di loke ta normal.” (2 Korintionan 4:7, NW) Esaki ta un ekselente entrenamentu pa yuda nos konfrontá kualke prueba ku por presentá den futuro!
19 E salmista a kanta: “Stima SEÑOR, boso tur, su santunan! SEÑOR ta preservá e fielnan.” (Salmo 31:23) Laga nos ta determiná pa demostrá di ta fiel, ku e pleno konfiansa ku Yehova ta “Salbadó di tur klase di hende, spesialmente di esnan fiel.”—1 Timoteo 4:10, NW.
Bo Ta Kòrda?
• Pakiko nos mester ta “fiel den un kos masha chikitu”?
• Kon nos por demostrá di ta fiel
pa loke ta onrades?
den e ministerio?
den keda separá di mundu?
[Preguntanan di Estudio]
[Plachinan na página 26]
Fiel den kos masha chikitu, fiel tambe den hopi
[Plachi na página 29]
‘Komportá boso mes onradamente den tur kos’
[Plachi na página 29]
Un ekselente manera pa demostrá fieldat ta dor di prepará bon pa sirbishi di vèlt
[Plachi na página 30]
Sea moderá den bistimentu i areglo personal