Siñansa Basá Riba Bèrdat Ku Ta Agradá Dios

PA HENDE ku ta biba riba tera por sa kiko ta e siñansanan ku ta basá riba bèrdat i ku ta agradá Dios, Dios tin ku revelá su pensamentunan na ser humano. I e tin ku hasi e revelashon ei disponibel na tur hende, sino kon hende por sa ki klase di doktrina, adorashon i komportashon e ta aprobá? Dios a duna e informashon ei? Si ta asina, den ki forma?

Un hende ku ta biba apénas un par di dékada lo por alkansá tur hende personalmente i sirbi komo un medio di komunikashon di Dios? Nò. Pero un registro permanente sí por. P’esei, lo no ta apropiá pa e revelashon di parti di Dios ta disponibel den forma di un buki? Un di e bukinan di antigwedat ku segun su mes afirmashon ta inspirá pa Dios ta Beibel. Un di su eskritornan a bisa: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Laga nos analisá Beibel un ratu i mira si e ta e fuente di siñansa ku ta basá riba bèrdat.

Kon Bieu E Ta?

Di tur e bukinan prinsipal di religion, Beibel ta un di esnan di mas bieu. Su promé partinan a wòrdu skirbí rònt di 3.500 aña pasá, i el a ser kompletá na aña 98 di nos era. Ounke ku mas o ménos 40 hòmber a tuma un periodo di 1.600 aña pa skirbié, Beibel ta un kolekshon di buki ku ta na armonia ku otro. Esei ta e kaso pasobra su berdadero Outor ta Dios.

Beibel ta e buki mas ampliamente distribuí i mas tradusí den henter historia. Tur aña rònt di 60 mion ehemplar di Beibel kompletu òf porshonnan di dje ta ser distribuí. A tradusí Beibel kompletu òf partinan di dje den mas ku 2.300 idioma i dialekto. Mas ku 90 porshento di humanidat tin akseso na Beibel, òf por lo ménos parti di dje, den nan idioma nativo. E buki aki a krusa  frontera nashonal, i a superá divishon rasial i barera étniko.

Kon E Ta Hinká den Otro?

Si bo tin un Beibel, ta bon pa bo habrié pa bo mira kon e ta hinká den otro. * Na promé lugá, wak e kontenido. Mayoria Beibel tin un na kuminsamentu ku ta menshoná nòmber di kada buki i number di página unda bo por hañ’é. Lo bo mira ku en realidat Beibel ta un kolekshon grandi di buki individual, i kada un ku un nòmber úniko. E promé buki ta Génesis i e último ta Revelashon, òf Apokalípsis, i e bukinan ta partí den dos sekshon. E promé 39 bukinan ta ser yamá e Skritura Hebreo ya ku mayoria di nan a ser skirbí na hebreo. E último 27 bukinan a ser skirbí na griego i ta forma e Skritura Griego. Algun hende ta yama e dos sekshonnan aki Tèstamènt Bieu i Tèstamènt Nobo.

Pa bo por buska mas fásil den Beibel, e bukinan ta dividí den kapítulo i versíkulo. Ora e revista aki menshoná un teksto, dirèkt tras di e nòmber di e buki di Beibel tin un number ku ta indiká e kapítulo di e buki ei. E siguiente number ta indiká e versíkulo. Por ehèmpel, “2 Timoteo 3:16” ta nifiká e di dos karta na Timoteo, kapítulo 3, versíkulo 16. Wak si bo por haña e teksto ei den Beibel.

Bo no ta kere ku e mihó manera pa bo konosé Beibel ta dor di les’é regularmente? Algun persona a haña ku ta mas fásil pa lesa e Skritura Griego promé, kuminsando ku e buki di Mateo. Dor di lesa tres pa sinku kapítulo pa dia, bo por lesa henter e Beibel den un aña. Pero kon bo por ta sigur ku loke bo ta lesa den Beibel ta realmente inspirá pa Dios?

Bo Por Konfia Beibel?

Bo ta ferwagt ku un buki inspirá pa Dios dirigí na tur hende lo mester ta kontené konseho duradero enkuanto bida, no ta bèrdat? Beibel ta reflehá un komprondementu di naturalesa humano ku ta apliká na tur generashon di humanidat, i su prinsipionan ta mes práktiko awe ku dia nan a ser deklará pa promé biaha. Bo por mira esaki fásilmente den un diskurso famoso ku Hesukristu, Fundadó di kristianismo, a yega di duna. E ta registrá na Mateo kapítulo 5 pa 7. E spich aki, konosí komo e Sermon Riba Seru, ta mustra nos no solamente kon pa haña berdadero felisidat sino tambe kon pa resolvé desakuerdo, kon pa hasi orashon, kon pa mira nesesidat material i hopi mas. Den e diskurso aki, i atraves di e sobrá páginanan di Beibel, e Skritura ta bisa nos bon kla kiko nos mester hasi i kiko nos mester evitá pa por agradá Dios i mehorá nos situashon den bida.

Un otro motibu pakiko nos por pone nos konfiansa den Beibel ta ku ora ta trata di asuntunan sientífiko, loke e buki di antigwedat aki ta bisa ta eksakto. Por ehèmpel, den un tempu ku mayoria hende tabata kere ku tera ta plat, Beibel a papia di “e sírkulo di tera.” * (Isaias 40:22) I mas ku 3.000 aña promé ku e famoso sientífiko Sir Isaac Newton a splika ku ta gravedat ta wanta e planetanan den espasio bashí, Beibel a bisa poétikamente ku “tera ta kologá riba nada.” (Jòb 26:7) Konsiderá tambe e deskripshon poétiko aki di e siklo di awa riba tera, registrá un 3.000 aña pasá: “Tur riu ta kore bai laman, tòg laman no ta yena. Na e lugá for di unda riunan ta bin, aya nan ta bolbe bai.” (Eklesiastés 1:7) Sí, e Kreadó di universo ta tambe Outor di Beibel.

E eksaktitut históriko di Beibel ta kuadra ku e echo ku e ta inspirá pa Dios. E susesonan ku Beibel ta relatá no ta simplemente mito. Nan  tin di haber ku fecha-, hende i lugánan spesífiko. Por ehèmpel, Lukas 3:1 ta duna detayenan spesífiko refiriendo na “e di diesinku aña di e reinado di Tiberio Cesar, tempu ku Ponsio Pilato tabata gobernadó di Judea, i Herodes tabata tetrarka [gobernadó] di Galilea.”

Ounke e historiadónan di pasado kasi semper a informá solamente di e éksitonan i méritonan di gobernantenan, e eskritornan di Beibel sí tabata onesto; nan a atmití asta nan mes erornan frankamente. Por ehèmpel, Rei David di Israel a konfesá: “Mi a peka gravemente ku loke mi a hasi. . . . Mi a aktua masha bobo mes.” E konfeshon franko ei ta dokumentá den Beibel. (2 Samuel 24:10) I e eskritor di Beibel Moisés mes a registrá un insidente den kua e no a demostrá konfiansa den e Dios berdadero.—Numbernan 20:12.

Tin mas prueba ku Beibel ta inspirá pa Dios. Esei ta su profesianan ku a ser kumplí, esta, historia skirbí di antemano. Algun di esakinan ta profesianan relashoná ku Hesukristu. Por ehèmpel, mas ku 700 aña promé ku Hesus a nase, e Skritura Hebreo a profetisá ku eksaktitut ku Esun Primintí aki lo a nase “na Bètlehèm di Judea.”—Mateo 2:1-6; Mikeas 5:2.

Konsiderá un otro ehèmpel. Na 2 Timoteo 3:1-5, Beibel ta deklará: “Den e último dianan tempunan trabahoso lo bin. Pasobra hende lo ta stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder.” Esaki no ta un deskripshon di e aktitut di hende en general awe? E palabranan aki a ser skirbí na aña 65 di nos era, mas ku 1.900 aña pasá!

Kiko Beibel Ta Siña Nos?

Segun ku bo ta lesa e mensahe di Beibel, lo bo por mira ku Beibel ta un fuente di sabiduria superior. E ta duna kontesta satisfaktorio riba preguntanan manera: Ken Dios ta? Diabel ta eksistí di bèrdat? Ken Hesukristu ta? Pakiko tin sufrimentu? Kiko ta sosodé ku nos ora nos muri? E kontestanan ku kisas otro hende ta duna bo ta dependé di loke nan ta kere i praktiká, i kada ken lo tin su propio vershon. Pero Beibel ta revelá e bèrdat tokante e temanan aki i hopi otro tópiko mas. Ademas, pa loke ta kondukta i aktitut pa ku otro hende i outoridatnan superior, e guia di Beibel no tin komparashon. *

Kiko Beibel ta revelá tokante e propósito di Dios pa tera i pa humanidat? E ta primintí: “Aki poko tempu e malbado lo no t’ei mas . . . Ma e humildenan lo heredá e tera, i lo deleitá nan mes den pas abundante.” (Salmo 37:10, 11) “Dios mes lo ta meimei di nan [humanidat], i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:3, 4) “E hustunan lo heredá e tera, i lo biba den dje pa semper.”—Salmo 37:29.

Tambe Beibel ta profetisá ku guera, krímen, violensia i maldat lo kaba pronto. Lo no tin enfermedat, ni behes ni morto mas. Bida eterno den un paradeis riba tera lo bira realidat. Ki un futuro maravioso! I tur esaki ta demostrá kuantu Dios ta stima humanidat!

Kiko Lo Bo Hasi?

Beibel ta un regalo maravioso di e Kreadó. Kiko bo tin ku hasi kuné? Un hòmber ku tin un background hindú tabata konvensí ku pa un revelashon di Dios benefisiá henter humanidat, e tin ku bai bèk te na  kuminsamentu di sivilisashon. Ora el a realisá ku tin sierto parti di Beibel ku ta mas bieu ku e vedanan (skrituranan hindú) di mas antiguo, el a disidí di lesa Beibel i analisá su kontenido. * Un profèser di universidat na Merka tambe a bin realisá ku e tin ku lesa e buki mas ampliamente distribuí aki na mundu promé ku e forma un opinion tokante dje.

Ora bo lesa Beibel i apliká su siñansanan, bo ta haña hopi bendishon. Beibel ta deklará: “Bendishoná ta e hende . . . [kende] su delisia ta den e lei di SEÑOR, i den su lei e ta meditá di dia i anochi. I e lo ta manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.” * (Salmo 1:1-3) Segun ku bo ta studia Beibel i meditá riba loke e ta bisa, bo ta bira felis pasobra di e forma ei bo ta satisfasé bo nesesidat spiritual. (Mateo 5:3) Beibel lo mustra bo kon bo por hiba un bida produktivo i kon bo por logra superá bo problemanan. Sí, “obedensia na [e leinan di Dios deskribí den Beibel] ta trese gran rekompensa kuné.” (Salmo 19:11) Ademas, ora bo pone konfiansa den Dios su promesanan lo bo haña bendishon awor i un speransa briante pa futuro.

Beibel ta hasi un apelashon fuerte na nos: “Meskos ku yunan resien nasí, anhelá na e lechi puru di e palabra.” (1 Pedro 2:2) Un beibi ta dependé di alimento i ta insistí p’e haña esei. Meskos tambe, nos realmente ta dependé di e konosementu di Dios. Pues, ‘krea un anhelo,’ òf un deseo fuerte, pa su Palabra. Beibel ta un buki di siñansa di Dios ku ta basá riba bèrdat. Pone e meta pa studi’é regularmente. Testigunan di Yehova den bo komunidat gustosamente lo yuda bo saka e máksimo probecho for di bo estudio. Nos ta invitá bo kalurosamente pa tuma kontakto ku nan. Òf bo por skirbi e editornan di e revista aki.

[Nota]

[Plachi na página 7]

‘Krea un anhelo’ pa e Palabra di Dios. Studia Beibel regularmente

[Rekonosementu pa Potrèt na página 5]

Potrèt di NASA