“Sigui Duna Prueba di Loke Boso Mes Ta”

“Sigui pone boso mes na prueba pa mira si boso ta den e fe, sigui duna prueba di loke boso mes ta.”—2 KORINTIONAN 13:5, NW.

1, 2. (a) Kon duda tokante nos kreensianan por afektá nos? (b) Ki situashon den Korinto di promé siglo kisas a pone ku algun hende no tabata sa sigur den kua kaminda nan tin ku kana?

UN HÒMBER biahando den un área pafó di stat ta yega na un punto ku e kaminda ta parti na dos. Siendo den duda kua kaminda lo hib’é na su destinashon, e ta puntra e hendenan ku ta pasa eibanda kon pa yega pero nan ta dun’é informashon kontradiktorio. Konfundí, e no por sigui ku su biahe. Si nos tin duda tokante nos kreensianan, esei por tin e mesun efekto riba nos. E duda ei por stroba nos di tuma desishon, pasobra e ta pone ku nos no sa sigur ta kua kaminda nos tin ku sigui.

² Den promé siglo, a surgi un situashon ku lo por tabatin un efekto asina riba algun hende den e kongregashon kristian di Korinto, Gresia. “Super-apòstelnan” tabata kuestioná e outoridat di apòstel Pablo, bisando: “Su kartanan ta duru i fuerte, ma su presensia personal no ta impreshoná, i su manera di papia ta despresiabel.” (2 Korintionan 10:7-12; 11:5, 6) Tal punto di bista kisas a pone ku algun hende den e kongregashon di Korinto no tabata sa sigur kon nan tin ku kana.

3, 4. Dikon Pablo su konseho na e korintionan mester interesá nos?

³ Pablo a funda e kongregashon na Korinto durante su bishita einan na aña 50 di nos era. El a keda na Korinto “un aña i seis luna i tabata siña nan e palabra di Dios.” De echo, “hopi di e korintionan, ora nan a tende, a kere i a wòrdu batisá.” (Echonan 18:5-11) Pablo tabata hopi interesá den e bienestar spiritual di su rumannan den fe na Korinto. Ademas, e korintionan a skirbi Pablo pa pidié konseho riba sierto asuntunan. (1 Korintionan 7:1) Pues el a duna nan ekselente konseho.

⁴ Pablo a skirbi: “Saminá boso mes pa wak si boso ta den e fe; saminá boso mes!” Òf segun Tradukshon di Mundu Nobo: “Sigui pone boso mes na prueba pa mira si boso ta den e fe, sigui duna prueba di loke boso mes ta.” (2 Korintionan 13:5) Dor di apliká e konseho aki e rumannan ei na Korinto lo no a duda den kua kaminda nan tin ku kana. E konseho ei por protehá nos di duda awe. Pues anto, kon nos por sigui Pablo su konseho? Kon nos por saminá nos mes pa wak si nos ta den e fe? I kiko duna prueba di loke nos mes ta, ta enserá?

“Saminá Boso Mes pa Wak si Boso Ta den e Fe”

5, 6. Ki spil nos tin pa saminá nos mes aden pa wak si nos ta den e fe, i dikon esaki ta e spil ideal?

⁵ Hende por lo general ta saminá nan mes den un spil. Den e kaso aki, Beibel no ta pidi nos saminá tur e kreensianan ku nos a aseptá, sino mas bien pa nos saminá nos mes individualmente. Nos tin un spil perfekto pa saminá nos mes aden. Un kantika ku e salmista David a komponé ta deklará: “E lei di SEÑOR ta perfekto, e ta restorá alma; e testimonio di SEÑOR ta fiel, e ta hasi hende simpel bira sabí. E preseptonan di SEÑOR ta korekto, nan ta alegrá kurason; e  mandamentunan di SEÑOR ta puru, nan ta iluminá wowo.” (Salmo 19:7, 8) Beibel ta kontené Yehova su leinan perfekto i preseptonan korekto, su testimonio konfiabel i mandamentunan puru. E mensahe ku nos ta haña den Beibel ta e spil ideal pa nos saminá nos mes aden.

⁶ Relashoná ku e mensahe inspirá ei di Dios, apòstel Pablo a bisa: “E palabra di Dios ta bibu i aktivo i mas skèrpi ku kualkier spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.” (Hebreonan 4:12) Sí, Dios su palabra por saminá nos kurason, loke nos ta realmente di paden. Kon nos por hasi aplikashon personal di e mensahe skèrpi i poderoso aki? E salmista ta deklará bon kla kon nos por apliká Dios su palabra pa saminá nos kurason. El a kanta: “Bendishoná ta e hende . . . [kende] su delisia ta den e lei di SEÑOR, i den su lei e ta meditá di dia i anochi.” (Salmo 1:1, 2) Nos ta haña ‘e lei di Yehova’ den Dios su Palabra skirbí, Beibel. Nos mester tin delisia den lesa e Palabra di Yehova. De echo nos tin ku apartá tempu pa meditá riba dje. Segun ku nos ta hasi esaki, nos tin ku saminá nos mes a base di loke tin skirbí den dje.

7. Kua ta e manera prinsipal pa saminá nos mes pa wak si nos ta den e fe?

⁷ Pues, e manera prinsipal pa saminá si nos ta den e fe ta dor di lesa i meditá riba e Palabra di Dios i mira te na ki grado nos kondukta ta na armonia ku loke nos ta siña. Nos por ta kontentu ku nos tin hopi yudansa pa komprondé e Palabra di Dios.

8. Kon e publikashonnan di “e esklabo fiel i prudente” por yuda nos saminá nos mes pa wak si nos ta den e fe?

⁸ Yehova a perkurá siñansa i instrukshon mediante e publikashonnan di “e esklabo fiel i prudente,” ku ta splika e Skritura. (Mateo 24:45) Por ehèmpel, konsiderá e kuadro titulá “Pregunta pa Meditá Ariba” na final di mayoria kapítulo di e buki Hala Serka Yehova. * E rasgo ei di e buki aki ta duna nos oportunidatnan ekselente pa meditá riba un base personal. Nos revistanan, E Toren di Vigilansia i Spièrta!, ta trata tambe vários tópiko ku ta yuda nos saminá nos mes pa wak si nos ta den e fe. Relashoná ku e artíkulonan basá riba e buki di Proverbionan ku a sali den edishonnan resien di E Toren di Vigilansia, un señora kristian a bisa: “Mi ta haña e artíkulonan aki hopi práktiko. Nan ta yuda mi saminá mi mes pa wak si mi papiá, kondukta i aktitut realmente ta na armonia ku Yehova su normanan hustu.”

9, 10. Ki provishonnan di Yehova ta yuda nos sigui saminá nos mes pa wak si nos ta den e fe?

⁹ Nos ta haña tambe un abundansia di guia i animashon na reunionnan di kongregashon, asambleanan i kongresonan. E kosnan aki ta kai bou di e provishonnan spiritual ku Dios ta perkurá pa esnan ku Isaias a profetisá di dje bisando: “Lo sosodé den e último dianan ku e seru di e kas di SEÑOR lo wòrdu establesí komo e seru prinsipal, i lo wòrdu halsá mas haltu ku e seritunan; i tur nashon lo basha bai na dje. I hopi pueblo lo bin bisa: ‘Ban, laga nos subi bai na e seru di SEÑOR, . . . pa e siña nos tokante di su kamindanan, i pa nos kana den su bereanan.’” (Isaias 2:2, 3) Un kos ta sigur, ta un bendishon di por tin tal instrukshon tokante e kamindanan di Yehova.

¹⁰ Un otro manera pa saminá nos mes ta mediante e konseho ku nos ta haña di personanan ku tin e debido kualidatnan spiritual, entre otro, e ansianonan kristian. Beibel ta bisa relashoná ku nan: “Rumannan, ounke un hòmber dal un paso robes promé ku e realisá esei, boso ku tin kualidatnan spiritual, trata na reahustá e hòmber ei ku un spiritu  di suavedat, vigilando bo mes, pa miedu ku bo mes tambe no ser tentá.” (Galationan 6:1, NW) Nos por ta masha gradisidu pa e provishon aki ku t’ei pa reahustá nos!

11. Kiko saminá pa wak si nos ta den e fe ta enserá?

¹¹ Nos publikashonnan, reunionnan kristian, hòmbernan nombrá, tur esakinan ta provishonnan maravioso di Yehova. Pues manera nos a menshoná anteriormente, pa saminá pa wak si nos ta den e fe, nos tin ku hasi un eksaminashon propio. P’esei ora nos ta lesa nos publikashonnan òf ta skucha konseho bíbliko, nos tin ku puntra nos mes: ‘Esaki ta deskribí loke mi ta? Ami ta hasi esaki? Mi ta pega na e totalidat di kreensianan kristian?’ Nos aktitut pa ku e informashon ku nos ta risibí mediante e provishonnan aki tin un influensia riba nos kondishon spiritual tambe. Beibel ta bisa: “Un hende ku no ta spiritual no ta aseptá e kosnan di e spiritu di Dios; pasobra nan ta lokura p’e . . . Ma esun ku ta spiritual ta husga [òf, “saminá,” NW] tur kos.” (1 Korintionan 2:14, 15) Akaso nos lo no mester hasi esfuerso pa mantené un punto di bista positivo i spiritual di loke nos ta lesa den nos buki-, revista- i otro publikashonnan i di loke nos ta tende na nos reunionnan i for di e ansianonan?

“Sigui Duna Prueba di Loke Boso Mes Ta”

12. Kiko duna prueba di loke nos mes ta, ta enserá?

¹² Duna prueba di loke nos ta, ta enserá ku nos ta evaluá nos mes. Sí, pasobra nos por ta den e bèrdat, pero te na ki grado nos ta biba na armonia ku e bèrdat? Nos tin ku evaluá nos mes pa wak si nos ta duna prueba di madures i di berdadero apresio pa provishonnan spiritual.

13. Segun Hebreonan 5:14, kiko ta sirbi komo prueba di nos madures?

¹³ Ki prueba òf evidensia di madures kristian nos por buska pa wak den nos mes? Apòstel Pablo a skirbi: “Kuminda sólido ta pa hende madurá, kendenan, pa motibu di práktika, tin nan mente entrená pa diserní loke ta bon i loke ta malu.” (Hebreonan 5:14) Nos ta duna prueba di madures dor di entrená nos mente su kapasidat di diserní òf distinguí. Meskos ku pa un atleta por sobresalí den su deporte e mester entrená promé sierto múskulonan di su kurpa dor di usa nan bes tras bes, asina nos mester entrená nos mente su kapasidat di distinguí dor di us’é ora di apliká prinsipionan bíbliko.

14, 15. Dikon nos mester hasi esfuerso diligente pa studia e kosnan mas profundo di e Palabra di Dios?

¹⁴ Pero promé ku nos por entrená nos mente su kapasidat di distinguí, nos tin ku gana konosementu. Pa hasi esaki, estudio personal diligente ta esensial. Ora ku regularmente nos ta hasi estudio personal—spesialmente di e kosnan profundo di e Palabra di Dios—nos kapasidat di distinguí ta bira mihó. Atraves di añanan, E Toren di Vigilansia a trata hopi tópiko profundo. Kon nos ta reakshoná ora nos topa artíkulonan ku ta trata bèrdatnan mas profundo? Nos tin e tendensia di evitá nan djis pasobra nan tin  “algun kosnan ku ta difísil pa komprondé”? (2 Pedro 3:16) Al kontrario, nos ta hasi èkstra esfuerso pa komprondé loke ta ser bisá.—Efesionan 3:18.

¹⁵ Kiko si nos ta haña estudio personal difísil pa hasi? Ta masha importante pa nos hasi esfuerso pa siña gust’é. * (1 Pedro 2:2) Si nos ke krese na madures ta nesesario pa nos siña saka nutrishon for di kuminda sólido, e bèrdatnan mas profundo di e Palabra di Dios. Si nos no hasi esei, nos kapasidat di distinguí lo keda limitá. Sin embargo, duna prueba di madures ta enserá mas ku haña un mente entrená pa distinguí. Nos mester apliká den nos bida diario e konosementu ku nos ta gana mediante estudio personal diligente.

16, 17. Ki konseho disipel Santiago a duna tokante bira “kumplidónan di e palabra”?

¹⁶ Nos ta haña prueba di loke nos mes ta tambe den nos ekspreshonnan di apresio pa e bèrdat, esta, nos obranan di fe. Usando un ilustrashon impaktante pa deskribí kon nos mester saminá nos mes, disipel Santiago a bisa: “Sea kumplidónan di e palabra i no solamente tendedónan ku ta gaña nan mes. Pasobra si un hende ta tendedó di e palabra i no kumplidó, e ta manera un hende ku ta wak su kara natural den spil; pasobra unabes ku el a wak su mes i a bai, el a lubidá mesora kon e tabata. Ma esun ku fiha su bista riba e lei perfekto, e lei di libertat, i ta permanesé den dje, sin bira un tendedó lubidadó, sino un kumplidó berdadero, e hende aki lo ta bendishoná den loke e ta hasi.”—Santiago 1:22-25.

¹⁷ Santiago tabata ke men: ‘Wak bo mes den e spil di e palabra di Dios, i evaluá bo mes. Persistí den hasi esaki i saminá bo mes a base di loke bo ta haña den e palabra di Dios. Anto no lubidá umbes kiko bo a mira. Hasi e korekshonnan nesesario.’ Tin biaha por ta difísil pa sigui e konseho aki.

18. Dikon ta difísil pa sigui e konseho di Santiago?

¹⁸ Tuma por ehèmpel e rekisito pa partisipá den e trabou di prediká e Reino. “Ku kurason hende ta kere pa haña hustisia, i ku boka e ta konfesá [“hasi deklarashon públiko,” NW] pa haña salbashon.” (Romanonan 10:10) Pa nos hasi deklarashon públiko ku nos boka pa haña salbashon, nos mester hasi vários ahuste. Mayoria di nos no ta haña e trabou di prediká fásil pa hasi. Pa nos prediká ku entusiasmo i duna e trabou e lugá ku e meresé den nos bida nos tin ku hasi asta mas kambio i sakrifisio. (Mateo 6:33) Pero unabes nos bira hasidónan di e trabou aki ku Dios a duna nos, nos ta felis debí na e alabansa ku e ta trese pa Yehova. Pues anto, nos ta proklamadónan entusiasmá di e Reino?

19. Nos obranan di fe mester enserá kiko?

¹⁹ Te kon leu nos obranan di fe mester bai?  Pablo a deklará: “E kosnan ku boso a siña i a risibí i a tende i a mira den mi, praktiká e kosnan aki; i e Dios di pas lo ta ku boso.” (Filipensenan 4:9) Nos ta duna prueba di loke nos ta dor di praktiká loke nos a siña, aseptá, tende i mira, pues, tur loke dedikashon kristian i ser disipel di Kristu ta enserá. Yehova ta instruí nos mediante profeta Isaias: “Esaki ta e kaminda, kana den dje.”—Isaias 30:21.

20. Ki tipo di personanan ta un bendishon grandi pa e kongregashon?

²⁰ Hende hòmber i hende muhé ku ta studia e Palabra di Dios diligentemente, ku ta prediká e bon nobo ku entusiasmo, ku ta mantené nan integridat intachabel i ku ta apoyadónan leal di e Reino ta un bendishon grandi pa e kongregashon. Nan presensia ta agregá stabilidat na e kongregashon ku nan ta asosiá kuné. Nan ta hopi útil, spesialmente pasobra tin asina tantu hende nobo pa perkurá p’e. Ora nos ta tuma na pechu Pablo su konseho pa ‘sigui saminá nos mes òf pone nos mes na prueba pa mira si nos ta den e fe, sigui duna prueba di loke nos mes ta,’ nos tambe lo tin un bon influensia riba otro hende.

Haña Delisia den Hasi e Boluntat di Dios

21, 22. Kon nos por tin delisia den hasi e boluntat di Dios?

²¹ Rei David di Israel di antigwedat a kanta: “Pa hasi bo boluntat, o mi Dios, ta un delisia pa mi; bo lei ta den mi kurason.” (Salmo 40:8) Pa David tabata un delisia di por hasi e boluntat di Dios. Dikon? Pasobra Yehova su lei tabata den David su kurason. David no a duda den kua kaminda e tabatin ku kana.

²² Ora e lei di Dios ta den nos kurason, nos lo no tin duda kua kaminda nos tin ku sigui. Hasi e boluntat di Dios ta un delisia pa nos. Di tur manera anto, laga nos “hasi tur esfuerso” segun ku nos ta sirbi Yehova di kurason.—Lukas 13:24.

[Nota]

Bo Ta Kòrda?

• Kon nos por saminá nos mes pa wak si nos ta den e fe?

• Kiko duna prueba di loke nos mes ta, ta enserá?

• Ki prueba nos por duna di madures kristian?

• Kon nos obranan di fe ta yuda nos evaluá loke nos ta?

[Preguntanan di Estudio]

[Plachi na página 23]

Bo sa kua ta e manera prinsipal pa saminá bo mes pa wak si bo ta den e fe?

[Plachi na página 24]

Nos ta duna prueba di nos madures kristian dor di hasi uso di nos kapasidat di distinguí

[Plachinan na página 25]

Nos ta duna prueba di loke nos ta dor di ‘no bira tendedó lubidadó, sino kumplidó di e palabra’