‘Mi Yudansa Ta Bin for di Yehova’

Soltero Pero Kontentu den Yehova Su Sirbishi

UN HENDE muhé kristian na Spaña a bisa: “Ounke nos no ta kasá, e gran mayoria di nos ta mashá felis.” Pa ki motibu nan ta sinti nan felis? “Nos ta kontentu di ta liber di hopi ansiedat pa nos por sirbi nos Dios, Yehova, mas plenamente.”

E sintimentunan ei ta kuadra ku loke e Palabra di Dios ta remarká tokante solteria. Ora apòstel Pablo a papia di asuntunan ku tin di haber ku matrimonio, bou di inspirashon el a duna e siguiente punto di bista: “Mi ta bisa e solteronan i e biudanan, ku ta bon pa nan, si nan keda manera ami.” Pablo mes no tabata kasá. Pero pa ki motibu el a rekomendá hende pa keda soltero? El a mustra ku e persona kasá ta dividí, miéntras ku e hòmber òf muhé ku no ta kasá ta “okupá su mes ku e kosnan di Señor.” (1 Korintionan 7:8, 32-34) E faktor prinsipal ku ta hasi un persona soltero felis i kontentu ta e echo ku e por sirbi Yehova.

Soltero ku un Propósito Noble

Den kulturanan ku ta duna hopi importansia na matrimonio i kriamentu di famia, e komentarionan di Pablo por zona straño. Sin embargo, Hesukristu—kende no tabata kasá, pero tòg felis i kontentu—a menshoná un propósito noble pa kristiannan ku ta soltero. El a bisa: “Tin eunuko ku a hasi nan mes eunuko pa kousa di e reino di shelu. Esun ku por aseptá esaki, lag’é asept’é.”—Mateo 19:12.

Na armonia ku e palabranan ei, hopi hende a haña ku e echo ku nan ta soltero ta permití nan sirbi Dios sin e distraishonnan ku e bida kasá sa trese kuné. (1 Korintionan 7:35) Míles di kristiannan ta adorando Yehova felismente sin un kasá, i nan ta haña goso den yuda otro hende aktivamente. *

Hopi kristian ku no ta kasá ta realisá ku no ta hende kasá so ta felis i ku no ta tur hende ku no ta kasá ta infelis. Pa tantu hende soltero komo hende kasá sa tin momentunan di felisidat i tambe di tristesa. En realidat, Beibel ta masha realista ora e bisa ku matrimonio riba su mes ta trese “tribulashon.”—1 Korintionan 7:28.

Soltero pa Motibu di Sirkunstansia

Hopi hende ta soltero no pasobra nan ke sino pa motibu di sirkunstansia. Kisas nan ta deseá sí e kalor, e kompañerismo i e kariño ku ta eksistí den un matrimonio, pero asuntunan finansiero òf otro motibunan por pone ku algun di nan no por kasa aworakí. Vários kristian—di kua hopi ta nos kerido ruman muhénan spiritual—a keda soltero pasobra nan ta determiná pa obedesé e konseho di Beibel pa  kasa solamente “den Señor.” (1 Korintionan 7:39) Nan ke keda leal na Yehova, p’esei nan ta limitá nan buskamentu di un partner entre su sirbidónan dediká i batisá.

Tin biaha, algun di nan ta sinti un soledat. Un kristian soltero ku a atmití ku e ta sinti su mes asina a bisa despues: “Nos konosé Yehova su lei i nos no ke desagrad’é di ningun manera. Tal bes nos ta deseá di tin e kompañerismo di un kasá, pero maske kuantu hende den e mundu aki purba ‘fix’ un kasamentu pa nos, nos ta para firme. Nos no ke ta den kompania mes di hòmber òf muhé ku no ta kreyente.” Un kristian ku ta apliká konseho di Beibel i ku ta pega na normanan moral haltu pa asina agradá Yehova, apesar di kualke angustia emoshonal ku esei por trese kuné, ta digno di elogio.

Dios Ta Duna Yudansa

Yehova ta leal na esnan ku ta mustra nan lealtat na dje den asuntunan manera nenga di kasa ku personanan ku no ta sirbié. Rei David a papia di su mes eksperensia ora el a bisa: “Ku hende leal, lo bo [Yehova] aktua ku lealtat.” (Salmo 18:25, NW) Ademas Dios ta primintí hende ku ta obedes’é fielmente: “Nunka lo mi no bandoná bo, i nunka lo mi no laga bo desampará.” (Hebreonan 13:5) Nos por imitá Yehova dor di semper bai elogiá kristiannan soltero di tur edat ku ta pega fielmente na e Palabra di Dios. Tambe nos por pidi Yehova fortalesé nan pa nan por enfrentá nan retonan.—Huesnan 11:30-40.

Hopi kristian soltero ta haña ku dor di partisipá plenamente den e obra di edukashon bíbliko, nan bida tin un propósito. Tuma por ehèmpel Patricia, un soltera di 30 i piku aña, kende ta un pionero òf evangelisadó di tempu kompletu. E ta bisa: “Ounke mi bida komo soltero a pone mi pasa den hopi prueba, el a duna mi chèns di bira un pionero regular. Komo un persona soltero, mi programa ta mas fleksibel, lokual ta duna mi mas tempu pa studia. Tambe mi a siña dependé mas i mas riba Yehova, foral ora mi ta pasa den tempunan difísil.”

E punto di bista ei ta basá riba e promesa alentador di Beibel: “Pone bo bida den man di SEÑOR, konfia den dje: lo e aktua.” (Salmo 37:5, BPK) En bèrdat, tur fiel adoradó di Yehova, sea kasá òf soltero, por haña konsuelo i fortalesa den e palabranan inspirá: ‘Mi yudansa ta bin for di Yehova.’—Salmo 121:2.

[Nota]

[Komentario na página 9]

“Esun ku no ta kasá ta okupá su mes ku e kosnan di Señor, kon e por agradá Señor.”—1 KORINTIONAN 7:32

[Kuadro na página 8]

LOKE BO POR HASI PA BENEFISIÁ DI BO SOLTERIA

Hesus, kende no a kasa nunka, a deklará: “Mi kuminda ta pa hasi e boluntat di esun ku a manda mi, i pa kumpli ku su trabou.”—Juan 4:34.

Felipe su kuater yu muhénan no-kasá a tene nan mes okupá komo “profeta.”—Echonan 21:8, 9.

Ruman muhénan kristian soltero ku ta deklará e mensahe di Reino ta parti di un ‘ehérsito grandi ku ta anunsiá e bon nobo.’—Salmo 68:11, NW.