Unda Bo Por Haña Siñansa Basá Riba Bèrdat?

UN HÒMBER na Tibet ta drei un wil di orashon (un silinder chikitu ku ta kontené orashonnan skirbí). Segun e, kada bes ku e wil dal un buèlta su orashonnan ta ser ripití. Den un kas grandi na India tin un kuarto chikitu apartá pa hasi puja; esei ta un forma di adorashon ku por enserá ofrenda di sensia, flor i otro kosnan na imágennan di vários dios i diosa. Míles di kilometer leu na Italia, un señora den un misa yen di adorno ta hinka rudia dilanti un imágen di Maria, mama di Hesus, i ta resa ku un rosario den su man.

Kisas bo mes a mira kuantu influensia religion tin riba bida di hende. E buki The World’s Religions—Understanding the Living Faiths ta bisa ku “religion . . . tabata i te ainda ta e sanger vital di sosiedatnan rònt mundu.” Den e buki God—A Brief History, e outor John Bowker ta remarká: “Nunka a yega di eksistí un sosiedat humano den kua Dios no a hunga niun papel; por lo general e ta esun ku ta krea i dirigí kosnan. Esei ta konta asta pa e sosiedatnan ku ta skohe konsientemente pa no kere den Dios.”

Si bo wak bon bèrdat, religion a influensiá bida di miónes di hende. Esei no ta un indikashon fuerte ku hende tin un nesesidat i hamber spiritual? Den su buki The Undiscovered Self e famoso sikólogo Dr. Carl G. Jung ta papia di hende su nesesidat pa adorá un poder superior i e ta bisa ku “bo por mira manifestashon di esaki den henter historia humano.”

 Tòg, hopi hende ta bisa ku nan no ta kere den Dios ni no tin interes den religion. Algun ku ta duda òf nenga ku Dios ta eksistí ta basa nan mes prinsipalmente riba e echo ku e religionnan ku nan konosé no a satisfasé nan nesesidat spiritual. Pero kasi tur hende, asta ateistanan, ta desplegá un òf otro forma di deboshon na e prinsipionan ku nan ta kere aden, komo si fuera esei ta nan religion.

Durante e míles di añanan di historia humano, den nan afan pa satisfasé nan nesesidat spiritual hende a purba hopi forma di adorashon. Esei a resultá den un variedat enorme di punto di bista religioso na tur parti di mundu. Por ehèmpel, ounke kasi tur religion ta promové kreensia den un poder superior, kada un tin su mes konsepto di ken òf kiko e ta. Mayoria religion ta enfatisá tambe e importansia di salbashon òf liberashon. Pero kada un tin su propio vershon di kiko e salbashon ei ta i kon hende por hañ’é. En bista di tantu kreensia asina, kon nos por identifiká siñansa basá riba bèrdat ku ta agradá Dios?