Bo Ta Luchando ku Bo Sintimentunan?

PA GRAN parti di Lena su bida, el a lucha ku sintimentunan negativo tokante su mes. El a bisa: “Añanan di abusu seksual den mi infansia a kaba ku kasi tur mi balor propio. Mi a sinti mi mes kompletamente inútil.” Simone tambe ta wak bèk riba su hubentut i ta bisa: “Den fondo di mi kurason mi a sinti un bashí i mi tabata karga e pensamentu ku mi no ta bal nada.” Aparentemente, awe tin hopi hende ta kana rònt sumamente infelis pa motibu di e sintimentunan ei. Un servisio di guia profeshonal pa teenager via telefòn ta bisa ku kasi mitar di e hóbennan ku ta yama ta ekspresá “sintimentunan persistente di falta di outo-estima.”

Segun algun eksperto, e sintimentu di inutilidat ta surgi ora otro hende pone un persona sinti ku e no ta bal nada. Un estado mental asina por desaroyá ora e persona ei tin ku soportá zundramentu konstante, hopi remarke skèrpi i krítika fuerte òf maltrato severo. Sea kual sea e motibu, e konsekuensianan por ta  debilitante i asta devastador. Un estudio médiko resien a revelá ku personanan ku tin sintimentunan negativo tokante nan mes tin e tendensia di deskonfiá tantu nan mes komo otro hende, i dor di esei, sin ku nan sa, nan ta hasi daño na nan amistatnan i nan bon relashon ku otro hende. E informe riba e estudio ta bisa ku “den un sentido nan ‘ta krea’ nèt e situashonnan ku nan tin mas miedu di dje.”

Hende ku ta sinti asina hopi bes ta víktima di loke Beibel ta yama nan “preokupashonnan.” (Salmo 94:19) Nan ta sinti ku kasi nada ku nan hasi no ta bon. Ora algu bai robes, nan ta kla pa kulpa nan mes. Ounke otro hende ta elogiá nan pa nan logronan, den fondo di nan kurason nan ta sinti ku nan ta un gañadó ku tardi òf trempan lo keda desenmaskará. Ku e pensamentu ku nan no ta digno di ta felis, hopi ta kai den un komportashon di outodestrukshon ku nan ta sinti nan mes inkapas pa korigí. Lena, menshoná anteriormente, a desaroyá un problema serio ku komementu pa motibu di su falta di rèspèt propio i e ta atmití: “Mi no a sinti mi kapas pa kambia nada.”

E hendenan ku ta lucha ku e “preokupashonnan” aki ta destiná pa sinti nan mes asina pa restu di nan bida? Por hasi algu pa kombatí e sintimentunan ei? Beibel ta kontené prinsipionan i konseho práktiko ku a yuda hopi hende vense den e lucha. Kua ta algun di e prinsipionan aki, i kon nan a yuda e personanan aki haña goso den bida? E siguiente artíkulo lo splika esei.