Ki Ora Tin Motibu pa Bo Ta Rabiá?

NA EKLESIASTÉS 7:9 Beibel ta deklará: “Rabia ta biba den pechu di hende bobo.” E versíkulo aki ta mustra ku nos no mester ta muchu lihé pa rabia ora un hende peka kontra nos; mas bien, nos mester pordoná.

Sin embargo, nos mester komprondé for di Eklesiastés 7:9 ku nos no mester laga nada ni ningun hende pone nos rabia, ku nos mester pordoná tur piká maske kon serio òf kon frekuente nan ta i no purba di hasi nada tokante nan? Akaso nos no tin nodi preokupá ku nos ta peka ku palabra òf akshon kontra un otro hende pensando ku ta e otro persona ei mester pordoná nos? Klaru ku nò.

Yehova Dios ta e personifikashon di amor i e esensia di miserikòrdia i gran pasenshi. Pero den Beibel tin hopi ehèmpel den kua hende a provoká Yehova na rabia. Ora e piká tabata serio, el a tuma akshon kontra e pekadónan. Ban analisá un par di ehèmpel.

Piká Kontra Yehova

E relato na 1 Reinan 15:30 ta papia di e pikánan di Jeroboam “ku el a hasi Israel kometé, pa motibu di su provokashon ku kua el a provoká e SEÑOR Dios di Israel na rabia.” Na 2 Krónikanan 28:25, Beibel ta bisa di Rei Akaz di Huda: “El a traha lugánan haltu pa kima sensia na otro diosnan, i a provoká SEÑOR, e Dios di su tatanan, na rabia.” Nos por haña un otro ehèmpel na Huesnan 2:11-14: “Israel a hasi maldat den bista di SEÑOR i a sirbi e Baalnan . . . , asina nan a provoká SEÑOR na rabia. . . . I e rabia di SEÑOR a kima kontra Israel, i el a entregá nan den man di sakeadónan.”

Tin mas kosnan ku a provoká Yehova na rabia i ku a eksigí medida drástiko. Por ehèmpel, na Eksodo 22:18-20, nos ta lesa: “No permití pa un hasidó di bruha keda na bida. Ken ku tene relashon seksual ku un bestia mester wòrdu matá sigur. Esun ku ofresé sakrifisio na kualke dios, si no ta solamente na SEÑOR, mester wòrdu destruí kompletamente.”

Yehova no a pordoná kontinuamente e pikánan grandi ku antiguo Israel a kometé ora nan a sigui provok’é na rabia i no a mustra berdadero repentimentu. Esnan ku a violá su lei i ku no a ègt repentí i dal paso pa mustra ku nan a bira bèk pa obedesé Yehova, a haña nan ta paga ku nan bida. Esaki a tuma lugá riba un eskala nashonal na aña 607 promé ku nos era na man di e babilonionan, i un biaha mas na aña 70 di nos era na man di e romanonan.

Sí, Yehova ta sinti su mes provoká na rabia òf indigná pa motibu di e mal kosnan ku hende ta bisa òf hasi, i asta e ta destruí malechornan no repentí ku a kometé piká grave. Pero esaki ta pone Yehova den e kategoria di esnan ku Eklesiastés 7:9 ta papia di dje? Di ningun manera. E ta hustifiká ora e ta sinti su mes provoká dor di piká serio i semper su huisionan ta hustu. Beibel ta bisa di Yehova: “Su obra ta perfekto, pasobra tur su kamindanan ta hustu; un Dios di fieldat i sin inhustisia, hustu i rekto e ta.”—Deuteronomio 32:4.

Piká Serio Kontra Otro Hende

Bou di e Lei ku Dios a duna antiguo Israel, tabatin konsekuensianan serio pa piká grave  kometé kontra otro hende. Por ehèmpel, si un ladron a drenta den un kas anochi i e doño di kas a mat’é, e doño di kas no tabatin kulpa di sanger. E tabata un víktima inosente di un krímen serio. P’esei Beibel ta bisa relashoná ku esaki: “Si nan kohe un ladron ora ku e ta kibra drenta, i nan dal é, i é muri, [e doño di kas] lo no tin kulpa di sanger pa su motibu.”—Eksodo 22:2.

Un hende muhé ku wòrdu violá seksualmente por sinti su mes sumamente indigná, ya ku esaki ta un krímen grave den bista di Dios. Bou di e Lei di Moisés, un hòmber ku a violá un hende muhé mester a muri “meskos ku . . . un hòmber ku ta lanta kontra su próhimo i ta mat’é.” (Deuteronomio 22:25, 26) Ounke nos no ta bou di e Lei ei mas, e ta yuda nos komprondé hopi bon kiko Yehova ta pensa di violashon seksual: e ta mir’é komo un krímen horendo.

Den nos tempu tambe violashon seksual ta un krímen serio i e kastigunan pa esaki ta severo. E víktima tin tur derecho pa hasi un denunsia na polis. Den e manera aki, e outoridatnan enkargá por kastigá e violadó. I si e víktima ta menor di edat, e mayornan por hasi e denunsia.

Piká Menor

Sin embargo, no ta tur piká mester di intervenshon di outoridatnan. P’esei, nos no mester sinti nos indigná muchu lihé pa e fayonan  relativamente chikitu ku otro hende ta hasi pero nos mester pordoná. Kuantu biaha nos mester pordoná? Apòstel Pedro a puntra Hesus: “Señor, kuantu bes mi ruman lo peka kontra mi, i ami mester pordon’é? Te shete bes?” Hesus a kontest’é: “Mi ta bisa bo, no te shete bes, sino te setenta bes shete.”—Mateo 18:21, 22.

Di otro banda, kada un di nos tin ku sigui traha riba nos personalidat kristian pa purba evitá di peka kontra otro hende. Por ehèmpel, den bo trato ku bo próhimo, bo tin tendensia di ta sin heful, indiskreto òf asta arogante? E sistema di trata ei por ofendé otro hende. En bes di kulpa e víktima pa motibu ku el a rabia i pensa ku ta é ta esun ku tin ku pordoná, e persona ku a faya tin ku realisá ku ta é por ke ku e persona a sinti su mes ofendí. Promé ku tur kos, ta e kousante di e problema tin ku trata na kontrolá su akshonnan i su abla pa e no peka kontra otro hende. E esfuerso aki lo redusí e kantidat di biahanan ku nos ta ofendé otro hende. Beibel ta rekordá nos: “Tin hende ta papia sin pensa, manera hinká di spada, ma lenga di hende sabí ta trese kuramentu.” (Proverbionan 12:18) Ora nos hùrt un otro persona, asta ora no tabata nos intenshon, nos tin ku pidi despensa; esei sin duda lo yuda remediá e situashon.

E Palabra di Dios ta mustra ku nos mester “buska e kosnan ku ta trese pas i edifikashon di otro.” (Romanonan 14:19) Ora nos ta mustra takto i konsiderashon, nos ta aplikando e proverbio: “Un palabra papiá na ora apropiá ta manera un apel di oro den montura di plata.” (Proverbionan 25:11) Esei sigur ta laga un impreshon agradabel i plasentero atras! Un papiá suave i ku takto por asta kambia e aktitut rígido di otro hende: “Un lenga suave ta kibra wesu.”—Proverbionan 25:15.

P’esei, e Palabra di Dios ta konsehá nos: “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.” (Kolosensenan 4:6) “Sasoná ku salu” ta nifiká ku nos ta ekspresá nos mes na un manera agradabel, i esei ta redusí e posibilidat di peka kontra otro hende. Ku palabra i akshon kristiannan mester hasi esfuerso pa apliká e konseho di Beibel: “Buska pas i siguié.”—1 Pedro 3:11.

Pues anto, nos tin ku komprondé for di Eklesiastés 7:9 ku nos mester evitá di sinti nos indigná ora otro hende kometé piká relativamente menor kontra nos. Esakinan por ta debí na imperfekshon humano i asta por ta pa malu, pero no ta piká serio. Ma ora un piká ta serio, ta di komprondé ku e víktima por sinti su mes rabiá i ku e por disidí di tuma e medidanan apropiá.—Mateo 18:15-17.

[Plachi na página 14]

Yehova a laga e romanonan destruí e israelitanan ku no a repentí na aña 70 di nos era

[Plachi na página 15]

“Un palabra papiá na ora apropiá ta manera un apel di oro”