Pregunta di Lektor

E palabra “kisas” usá na Sofonias 2:3 ta nifiká ku sirbidónan di Dios no por ta sigur ku nan ta haña bida eterno?

E teksto aki ta bisa: “Buska SEÑOR, boso tur humildenan di tera ku a kumpli ku Su ordenansanan; buska hustisia; buska humildat. Kisas boso lo wòrdu skondí riba e dia di e rabia di SEÑOR.” Dikon e versíkulo aki ta bisa “kisas”?

Pa komprondé kon Yehova lo trata ku su sirbidónan fiel na Armagedón, ta bon pa kòrda kiko Beibel ta siña tokante loke Dios lo hasi pa esnan ku muri promé ku e tempu di huisio ei. Tin di nan ta haña un resurekshon pa bida inmortal komo kriaturanan spiritual den shelu, miéntras ku otronan lo ser resusitá riba tera ku e speransa di biba pa semper den Paradeis. (Juan 5:28, 29; 1 Korintionan 15:53, 54) Si Yehova ta kòrda i ta rekompensá su sirbidónan leal ku muri promé ku Armagedón, siguramente lo e trata den mesun manera ku su sirbidónan ku ta na bida riba e dia di su rabia.

E palabranan inspirá di apòstel Pedro tambe ta un animashon pa nos. El a skirbi: “[Dios] a warda Noe, un predikadó di hustisia, sano i salvo ku shete otro ora el a trese un diluvio riba un mundu di hende malbado; i redusiendo e statnan Sodoma i Gomora na shinishi el a kondená nan, . . . i el a libra hustu Lòt . . . Yehova sa kon pa libra hende deboto na dje for di prueba, pero pa reservá hende inhustu p’e dia di huisio pa ser kòrtá.” (2 Pedro 2:5-9, NW) Ounke den pasado Yehova a trese destrukshon riba e malbadonan, el a preservá tantu Noe komo Lòt, kendenan a sirbié fielmente. Asina tambe Yehova lo libra hende deboto na dje ora ku e trese destrukshon riba e malbadonan na Armagedón. “Un multitut grandi” di hende hustu lo sobrebibí.—Revelashon 7:9, 14.

Pues, ta parse ku na Sofonias 2:3 Beibel no ta usa “kisas” debí na sierto duda den Dios su abilidat di preservá na bida esnan ku tin su aprobashon. E “kisas” ku un persona lo wòrdu skondí riba e dia di e rabia di Yehova ta konta solamente ora e kuminsá buska hustisia i humildat. Pa e ser preservá na bida ta dependé di si e ta sigui buska humildat i hustisia.—Sofonias 2:3.

[Plachi na página 31]

“Yehova sa kon pa libra hende deboto na dje for di prueba”