Un Biahe Largu Ta Ser Rekompensá

FOR di Repúblika Demokrátiko di Congo ta bin e informe di dos ruman muhé karnal ku a disidí di hasi un biahe largu den un área asotá pa guera pa nan por asistí na e Kongreso di Distrito “Duna Gloria na Dios” na e pueblo Lisala. Fuera di e instrukshon spiritual i asosiashon kristian ku nan a spera di disfrutá di dje na e kongreso, nan tabata ansioso pa topa representantenan di e sukursal di Testigunan di Yehova na Kinshasa. Debí na e guera sivil den e pais, nan tabatin años sin mira un hende di sukursal, i nan kier a probechá di e oportunidat aki pa hasi esei.

Ku kanoa, e dos ruman muhénan a sali for di nan pueblo nativo Basankusu rumbo pa Lisala, un biahe di mas o ménos 300 kilometer dor di selva i riba dos riu. A tuma nan tres siman pa hasi e biahe. Komo ku ámbos ta den sirbishi di tempu kompletu, unu tin 3 aña i e otro 19 aña den e trabou di pionero, nan a probechá di nan biahe pa plama e bon nobo di Reino. Nan a dediká un 110 ora predikando na e hendenan ku nan a topa durante nan biahe, i a laga 200 tratado i 30 revista.

Riba e riu, nan mester a nabegá entre hipopótamo i krokodel ku ta komun den e region ei. Pues, tabata imposibel pa nabegá anochi! Tambe nan a pasa dor di hopi punto di kontròl militar.

Ounke esaki tabata un biahe hopi largu i agotador, e ruman muhénan tabata kontentu ku nan a hasi e esfuerso. Nan tur dos tabata masha gradisidu i kontentu ku nan por tabata presente na e kongreso na Lisala. Nan kurason tabata yen di entusiasmo pa e bèrdat, i e kompania di e 7.000 rumannan presente a animá nan. Despues di e kongreso, nan a konfrontá e mesun difikultatnan riba nan biahe di regreso, pero nan a yega kas i haña nan famianan sano i salvo.