Yehova Ta “Esun Ku Ta Rekompensá Esnan Ku Ta Busk’é”

“Esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.”—HEBREONAN 11:6.

1, 2. Dikon algun sirbidó di Yehova lo por ta lucha ku sintimentunan negativo?

“MI TA un Testigu di Yehova pa kasi 30 aña, pero nunka mi a sinti mi digno di ser yamá asina,” Barbara a atmití. * “Maske mi a traha pionero i tabatin hopi otro privilegio di sirbishi, ningun di e kosnan ei no ta parse sufisiente pa laga mi kere den mi kurason ku mi ta digno di ser yamá un Testigu.” Keith a ekspresá mesun pensamentu. El a bisa: “Sa tin biaha ku mi ta sinti ku mi no ta digno pasobra Yehova su sirbidónan tin hopi motibu pa ta felis, pero ami no tabata felis. Esaki a laga mi sinti mi kulpabel, lokual a empeorá e situashon.”

² Hopi sirbidó fiel di Yehova, tantu di ántes komo di awor, a lucha ku sintimentunan similar. Esei a yega di pasa ku bo tambe? Kisas bo ta sinti ku bo ta hoga den hopi problema, miéntras ku bo kompañeronan den fe ta parse di ta disfrutá di bida, despreokupá i felis. Komo resultado, lo bo por sinti ku bo no tin Yehova su aprobashon ni ta meresé su atenshon. No sea muchu purá pa saka e konklushon ei. Beibel ta sigurá nos: “[Yehova] no a despresiá, ni a aboresé e aflikshon di esun ku ta afligí; tampoko e no a skonde su kara p’e; ma ora ku el a sklama na dje pa yudansa, el a  tende.” (Salmo 22:24) E palabranan profétiko ei tokante e Mesias ta mustra ku Yehova no solamente ta tende su sirbidónan fiel sino tambe ta rekompensá nan.

3. Dikon nos no ta liber di e preshonnan di e sistema di kosnan aki?

³ Ningun hende no ta liber di e preshonnan di e sistema di kosnan aki, ni sikiera e pueblo di Yehova. Nos ta biba den un mundu goberná pa Yehova su enemigu prinsipal, Satanas e Diabel. (2 Korintionan 4:4; 1 Juan 5:19) En bes di haña protekshon milagroso, Yehova su sirbidónan de echo ta e blanko prinsipal di Satanas su atake. (Jòb 1:7-12; Revelashon 2:10) P’esei te na Dios su tempu stipulá nos tin ku ‘perseverá den tribulashon’ i keda “dediká na orashon,” ku e konfiansa ku Yehova ta perkurá pa nos. (Romanonan 12:12) Nos no mester laga e preshonnan di mundu pone nos pensa ku nos Dios, Yehova, no ta stima nos!

Ehèmpelnan di Pasado di Perseveransia

4. Menshoná algun ehèmpel di sirbidónan fiel di Yehova ku a soportá situashonnan angustioso.

⁴ Hopi sirbidó di Yehova di pasado tabatin ku soportá situashonnan angustioso. Ana, por ehèmpel, a sufri di “amargura di alma” pasobra e no tabatin yu, un kondishon ku el a konsiderá meskos ku ser lubidá dor di Dios. (1 Samuel 1:9-11) Ora ku e reina asesino, Jezabel, tabata persiguí Elias, Elias a haña miedu i a resa na Yehova: “Ta basta; awor, o SEÑOR, tuma mi bida, pasobra mi no ta mihó ku mi tatanan.” (1 Reinan 19:4) Anto apòstel Pablo lo mester tabata hopi angustiá pa su imperfekshon ora ku el a atmití: “Ora mi ta deseá di hasi loke ta bon, maldat ta presente den mi.” Anto el a agregá: “Hende miserabel ku mi ta!”—Romanonan 7:21-24.

5. (a) Kon Dios a rekompensá Ana, Elias i Pablo? (b) Ki konsuelo nos por saka for di e Palabra di Dios si nos ta lucha ku emoshonnan negativo?

⁵ Nos sa naturalmente ku nan tur, Ana, Elias i Pablo, a perseverá den Yehova su sirbishi, i El a rekompensá nan rikamente. (1 Samuel 1:20; 2:21; 1 Reinan 19:5-18; 2 Timoteo 4:8) Apesar di esei, nan a lucha ku tur tipo di emoshon humano, inkluso tristesa, desesperashon i miedu. Pues nos no mester keda sorprendí si de bes en kuando nos tin sintimentunan negativo. Pero kiko bo por hasi ora ku preokupashonnan di bida ta pone bo puntra bo mes si realmente Yehova ta stima bo? Bo por saka konsuelo for di e Palabra di Dios. Por ehèmpel, den e artíkulo anterior, nos a konsiderá Hesus su deklarashon ku Yehova a konta “asta e drachinan di kabei riba boso kabes.” (Mateo 10:30) E palabranan alentador ei ta indiká ku Yehova ta profundamente interesá den kada un di su sirbidónan. Kòrda tambe riba Hesus su komparashon di mòfi. Si ni sikiera un di e paranan chikitu ei ta kai na suela sin ku Yehova ripará, pakiko lo e sera wowo pa bo situashon penoso?

6. Kon Beibel por ta un fuente di konsuelo pa esnan ku ta lucha ku sintimentunan negativo?

⁶ Realmente ta posibel ku nos komo hende imperfekto ta presioso den bista di e Kreadó todopoderoso, Yehova Dios? Sí! De echo, tin vários pasashi bíbliko ku ta sigurá nos di esaki. Dor di meditá riba e pasashinan bíbliko aki nos por ripití e palabranan di e salmista ku a deklará: “Den e multitut di mi preokupashonnan den mi, bo konsuelonan ta alegrá mi alma.” (Salmo 94:19) Laga nos konsiderá algun di e deklarashonnan konsolador aki di e Palabra di Dios ku lo yuda nos komprondé mas plenamente ku nos ta di gran balor pa Dios i ku lo e rekompensá nos segun ku nos ta sigui hasi su boluntat.

Yehova Su “Propiedat Spesial”

7. Ki profesia alentador Yehova a duna mediante Malakias na e nashon korupto?

⁷ Un situashon deplorabel a eksistí entre e hudiunan durante siglo 5 promé ku nos era. E saserdotenan tabata aseptá bestia inapropiá  i ofresé esakinan komo sakrifisio riba Yehova su altar. Huesnan tabata hasi distinshon di persona. Hasimentu di bruha, gañamentu, froude i adulterio tabata reina tur kaminda. (Malakias 1:8; 2:9; 3:5) Malakias a pronunsiá un profesia asombroso na e nashon aki ku tabata abiertamente korupto. Yehova ku tempu lo a trese su pueblo bèk na un kondishon aprobá. Nos ta lesa: “‘Nan lo ta di mi,’ e SEÑOR di ehérsitonan ta bisa, ‘riba e dia ku mi ta prepará mi mes propiedat, i lo mi spar nan manera un hòmber ta spar su mes yu hòmber ku ta sirbié.’”—Malakias 3:17.

8. Dikon nos por apliká e prinsipio di Malakias 3:17 na e multitut grandi?

⁸ Malakias su profesia tin un kumplimentu den nos tempu moderno en konekshon ku kristiannan ungí ku spiritu, kendenan ta forma un nashon spiritual di 144.000 persona. E nashon ei en bèrdat ta Yehova su “mes propiedat,” òf “pueblo pekuliar.” (1 Pedro 2:9) Malakias su profesia por ta un animashon tambe pa e “multitut grandi” ku ta “pará dilanti di e trono i dilanti di e Lamchi, bistí na paña blanku.” (Revelashon 7:4, 9) Esakinan ta bira ún tou huntu ku e ungínan, bou di ún Wardadó, Hesukristu.—Juan 10:16.

9. Dikon Yehova su pueblo ta “un propiedat spesial” p’e?

⁹ Kon Yehova ta konsiderá hende ku ta skohe pa sirbié? Manera nos a nota na Malakias 3:17, e ta konsiderá nan meskos ku un tata amoroso ta konsiderá su yu. Anto tuma nota di e palabranan kaluroso ku e ta deskribí su pueblo kuné: “mi mes propiedat.” Otro tradukshonnan ta tradusí e frase ei “un propiedat spesial,” “mi poseshon mas balioso” i “mi hoyanan.” Dikon Yehova lo konsiderá esnan ku ta sirbié komo algu asina spesial? Un motibu ta ku e ta un Dios gradisidu. (Hebreonan 6:10) E ta hala serka di esnan ku ta sirbié di kurason i e ta konsiderá nan spesial.

10. Kon Yehova ta protehá su pueblo?

¹⁰ Bo tin un kos di balor ku bo ta konsiderá un propiedat spesial? Bo no ta hasi esfuerso pa proteh’é? Yehova ta hasi meskos ku su “propiedat spesial.” Ta bèrdat ku e no ta protehá su pueblo di tur e pruebanan i tragedianan di bida. (Eklesiastés 9:11, NW) Pero Yehova por i ta protehá su sirbidónan fiel den sentido spiritual. E ta duna nan e fortalesa ku nan mester pa soportá kualke prueba. (1 Korintionan 10:13) P’esei Moisés a bisa Dios su pueblo di pasado, e israelitanan: “Sea fuerte i tene kurashi . . . SEÑOR bo Dios ta Esun ku ta bai ku bo. E lo no faya bo ni bandoná bo.” (Deuteronomio 31:6) Yehova ta trata na un manera rekompensador ku su pueblo. P’e, nan ta “un propiedat spesial.”

Yehova “Esun Ku Ta Rekompensá”

11, 12. Kon apresio pa Yehova den su papel di Esun ku ta rekompensá nos, lo yuda nos lucha kontra sintimentunan di duda?

¹¹ Un otro evidensia ku Yehova su sirbidónan ta balioso p’e ta ku e ta rekompensá nan. El a bisa e israelitanan: “‘Pone mi na prueba awor den esaki,’ e SEÑOR di ehérsitonan ta bisa, ‘si mi lo no habri pa boso e bentananan di shelu, i basha asina tantu bendishon, ku boso lo no tin sufisiente lugá pa konten’é.’” (Malakias 3:10) Klaru ku Yehova, ku tempu, lo rekompensá su sirbidónan ku bida eterno. (Juan 5:24; Revelashon 21:4) E rekompensa sumamente balioso aki ta revelá kon grandi  Yehova su amor i generosidat ta. Tambe esei ta mustra ku Yehova realmente ta balorá esnan ku ta skohe pa sirbié. Si nos siña mira Yehova komo un persona ku generosamente ta rekompensá nos, esei por yuda nos kombatí kualke duda tokante nos posishon dilanti Dios. De echo, Yehova ta urgi nos pa mir’é komo Esun ku ta rekompensá! Pablo a skirbi: “Esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.”—Hebreonan 11:6.

¹² Klaru ku nos ta sirbi Yehova pasobra nos stim’é, no djis pasobra e ta primintí di rekompensá nos. Sin embargo, no ta inkorekto ni egoista pa karga den nos kurason e speransa di un rekompensa. (Kolosensenan 3:23, 24) Yehova ta tuma e inisiativa i ta rekompensá esnan ku ta busk’é ku empeño, debí na su amor pa nan i e gran balor ku nan tin p’e.

13. Dikon e provishon di e reskate ta e evidensia di mas grandi di Yehova su amor pa nos?

¹³ E indikashon mas grandi di e balor potensial ku humanidat tin den bista di Yehova ta e provishon di e reskate. Apòstel Juan a skirbi: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Provishon di e sakrifisio di reskate di Hesukristu ta kontradisí e idea ku den bista di Yehova nos ta inútil òf no ta digno di ser stimá. De echo, si Yehova a paga un preis asina haltu pa nos—ofresiendo su Yu unigénito—sigur e mester ta stima nos masha hopi mes.

14. Kiko ta mustra kon Pablo a konsiderá e reskate?

¹⁴ Pues, si sintimentunan negativo mester lanta den bo, meditá riba e reskate. Sí, mira e regalo aki komo un regalo personal for di Yehova. Esei ta loke apòstel Pablo a hasi. Kòrda ku el a bisa: “Hende miserabel ku mi ta!” Pero despues el a sigui bisa: “Mi ta duna gradisimentu na Dios dor di Hesukristu, nos Señor,” kende, segun Pablo, “a stima mi, i a entregá su mes pa mi.” (Romanonan 7:24, 25; Galationan 2:20) Ora Pablo a bisa esaki, e no tabata egoista. Simplemente e tabatin e konfiansa ku Yehova a balor’é komo un persona. Meskos ku Pablo, nos tambe mester siña mira e reskate komo un regalo personal for di Dios. Yehova no solamente ta un Salbadó poderoso sino tambe Esun ku amorosamente ta rekompensá hende.

Tene Kuidou ku e “Trampanan” di Satanas

15-17. (a) Kon Diabel ta probechá di sintimentunan negativo? (b) Ki animashon nos por saka for di e eksperensia di Jòb?

¹⁵ Kisas tòg bo ta haña ku ta difísil pa kere ku e konsuelonan inspirá ku tin den e Palabra di Dios realmente ta apliká na bo. Podisé bo ta sinti ku e rekompensa di biba pa semper den Dios su mundu nobo ta algu ku otro hende por alkansá, pero ku abo simplemente no ta digno di esei. Si ta asina bo ta sinti, kiko bo por hasi?

¹⁶ Sin duda bo konosé Pablo su konseho na e efesionan: “Bisti e armadura kompletu di Dios, pa boso por para firme kontra e trampanan di Diabel.” (Efesionan 6:11) Ora nos pensa riba e trampanan di Satanas, kisas mesora nos ta pensa riba kosnan manera materialismo i inmoralidat, i esei ta na su lugá. E tentashonnan aki a kue un parti grandi di e pueblo di Dios den trampa tantu den tempu antiguo komo den nos tempu aktual. Sin embargo, nos no mester pasa por haltu di un otro trampa di Satanas: su esfuerso pa konvensé hende ku Yehova Dios no stima nan.

¹⁷ Diabel ta bon den probechá di e sintimentunan ei den su intento pa kita hende for di Dios. Kòrda e palabranan ku Bildad a bisa Jòb: “Kon anto un hende por ta hustu dilanti di Dios? Òf kon esun ku a nase di muhé por ta puru? Si ni luna no tin splendor, ni e streanan no ta puru den su bista, kuantu ménos hende ku ta bichi i yu di hende ku ta bichi!”  (Jòb 25:4-6; Juan 8:44) Bo por imaginá kon e palabranan ei lo mester a kibra Jòb? Pues no laga Satanas deskurashá abo. Di otro banda, sea alerta pa e trampanan di Satanas di manera ku lo bo tin e kurashi i resistensia pa lucha asta mas duru pa hasi loke ta korekto. (2 Korintionan 2:11) Pa loke ta Jòb, maske Yehova tabatin ku korigié, El a rekompensá su perseveransia dor di dun’é bèk dòbel di tur loke el a pèrdè.—Jòb 42:10.

Yehova “Ta Mas Grandi ku Nos Kurason”

18, 19. Kon Dios ta “mas grandi ku nos kurason,” i den ki sentido e “sa tur kos”?

¹⁸ Ta bèrdat ku por ta difísil pa kontrolá sintimentunan di desanimashon si esakinan ta profundamente ankrá. Sin embargo, Yehova su spiritu por yuda bo “basha e fòrtinan abou . . . ku ta wòrdu lantá kontra e konosementu di Dios.” (2 Korintionan 10:4, 5) Ora ku pensamentunan negativo ta menasá di hoga bo, reflekshoná riba e palabranan di apòstel Juan: “Na esaki nos lo sa ku nos ta di e bèrdat, i lo sigurá nos kurason dilanti di dje, den kiko ku nos kurason kondená nos; pasobra Dios ta mas grandi ku nos kurason i sa tur kos.”—1 Juan 3:19, 20.

¹⁹ Kiko e frase “Dios ta mas grandi ku nos kurason” ke men? Tin biaha nos kurason por kondená nos, spesialmente ora nos bira hopi konsiente di nos imperfekshonnan i faltanan. Òf por ta debí na nos kriansa, nos ta demasiado inkliná na pensa negativo di nos mes, komo si fuera nada ku nos hasi lo por ta aseptabel pa Yehova. E palabranan di apòstel Juan ta sigurá nos ku Yehova ta mas grandi ku esei! E ta mira mas leu ku nos erornan i ta ripará nos berdadero potensial. Tambe e sa nos motivashonnan i intenshonnan. David a skirbi: “E sa di kiko nos ta trahá; e ta kòrda ku ta stòf nos ta.” (Salmo 103:14) Sí, Yehova konosé nos mas mihó ku nos konosé nos mes!

“Un Korona di Bunitesa” i “un Diadema Real”

20. Kiko Isaias su profesia di restorashon ta revelá tokante e manera ku Yehova ta mira su sirbidónan?

²⁰ Pa medio di profeta Isaias, Yehova a duna su pueblo di antigwedat e speransa di ser restorá. Ora ku nan lo tabata den eksilio na Babilonia, e konsuelo i garantia aki lo tabata nèt loke e eksiliadonan desanimá aki tabatin mester! Mirando den futuro na e tempu ora ku nan lo regresá nan tera, Yehova a deklará: “Lo bo ta un korona di bunitesa den e man di SEÑOR, i un diadema real den e man di bo Dios.” (Isaias 62:3) Ku e palabranan aki, Yehova a bisti su pueblo ku dignidat i splendor. El a hasi e mesun kos ku su nashon di Israel spiritual awe. Ta komo si fuera el a tene nan na haltu pa tur hende atmirá nan.

21. Kon bo por haña e konfiansa ku Yehova lo rekompensá bo fiel perseveransia?

²¹ Ounke e profesia aki ta kumpli prinsipalmente riba e ungínan, e ta ilustrá e dignidat ku Yehova ta otorgá na tur persona ku ta sirbié. Pues, ora sintimentunan di duda ta afligí bo, kòrda ku maske bo ta imperfekto, bo por ta pa Yehova mesun balioso ku “un korona di bunitesa” i “un diadema real.” P’esei sigui hasi Yehova su kurason kontentu dor di buska sinseramente pa hasi su boluntat. (Proverbionan 27:11) Hasiendo asina, bo por tin e konfiansa ku Yehova lo rekompensá bo fiel perseveransia!

[Nota]

Bo Ta Kòrda?

• Den ki sentido nos ta un “propiedat spesial” pa Yehova?

• Dikon ta importante pa mira Yehova komo Esun ku ta rekompensá?

• Pa kua “trampanan” di Satanas nos mester ta alerta?

• Den ki manera Dios “ta mas grandi ku nos kurason”?

[Preguntanan di Estudio]

[Plachi na página 26]

Pablo

[Plachi na página 26]

Elias

[Plachi na página 26]

Ana

[Plachi na página 28]

E Palabra di Dios tin un abundansia di pensamentunan konsolador