Lo Bo Reflehá e Gloria di Dios?
Lo Bo Reflehá e Gloria di Dios?
“Nos . . . ta reflehá manera spil e gloria di Yehova.”—2 KORINTIONAN 3:18, NW.
1. Kiko Moisés a mira, i kiko a pasa despues?
TABATA un di e vishonnan di mas impreshonante ku kualke hende a yega di eksperensiá. Miéntras ku Moisés tabata su so te den haltu ayá riba Seru Sinaí, Dios a kumpli ku un petishon inusual ku Moisés a hasi. E tabatin mag di mira loke ningun hende a yega di a mira: e gloria di Yehova. Ta mas ku klaru ku Moisés no a mira Yehova direktamente. Dios su aparensia ta asina glorioso ku ningun hende por mir’é i keda na bida. Yehova mas bien a tapa Moisés ku su “man” komo protekshon te ora ku El a kaba di pasa, evidentemente usando un representante angelikal. Kaba el a permití Moisés mira e resplandor ku a keda atras despues di e manifestashon divino aki di gloria. Tambe Yehova a papia ku Moisés mediante un angel. Beibel ta deskribí loke a pasa despues: “A sosodé ku ora Moisés tabata baha for di Seru Sinaí . . . e kútis di su kara tabata bria pa motibu ku el a papia ku SEÑOR.”—Eksodo 33:18–34:7, 29.
2. Kiko apòstel Pablo a skirbi tokante e gloria ku kristiannan ta reflehá?
2 Imaginá bo riba e seru ei huntu ku Moisés. Ki emoshonante lo tabata pa mira e splendor briante di e Todopoderoso i skucha su palabranan! Lo tabata ki un gran privilegio di por baha for di Seru Sinaí huntu ku Moisés, e mediadó di e pakto òf aliansa di Lei! Pero bo tabata sa ku kristiannan berdadero ta reflehá e gloria di Dios den algun manera ku ta surpasá asta e manera ku Moisés a refleh’é? E detaye masha interesante ei nos ta haña den un karta di apòstel Pablo. El a skirbi ku kristiannan ungí “ta reflehá manera spil e gloria di Yehova.” (2 Korintionan 3:7, 8, 18, NW) Den un sentido, kristiannan ku tin e speransa di biba riba tera tambe ta reflehá e gloria di Dios.
Kon Kristiannan Ta Reflehá e Gloria di Dios
3. Kon nos a siña konosé Yehova den maneranan ku Moisés no por a konos’é?
3 Kon ta posibel ku nos por reflehá e gloria di Dios? Nos no a mira ni tende Yehova den e manera ku Moisés sí a mir’é i tend’é. Sin embargo, nos a siña konosé Yehova den maneranan ku Moisés no tabata por. Hesus a presentá komo e Mesias kasi 1.500 aña despues ku Moisés a muri. Konsekuentemente, Moisés no por tabata sa ku e Lei lo a kumpli den Hesus, kende a muri pa libra hende for di e opreshon teribel kousá pa piká i morto. (Romanonan 5:20, 21; Galationan 3:19) Ademas, ta na un manera limitá so Moisés por a mira kon magnífiko Yehova su propósito tabata, un propósito ku a enfoká riba e Reino Mesiániko i e Paradeis terenal ku esaki lo trese. Pues, nos ta mira e gloria di Yehova, no ku nos wowo literal, sino ku nos wowo di fe basá riba e siñansanan di Beibel. Ademas, nos a tende Yehova su bos, no mediante un angel, sino via Beibel, spesialmente e Evangelionan, ku na un manera masha bunita ta deskribí e siñansanan i ministerio di Hesus.
4. (a) Kon kristiannan ungí ta reflehá e gloria di Dios? (b) Den ki maneranan kristiannan ku tin e speransa terenal ta reflehá e gloria di Dios?
4 Ounke kristiannan no ta reflehá e gloria di Dios pa medio di brio ku ta sali for di nan kara, nan karanan práktikamente ta bria ora nan ta konta otro hende tokante Yehova su personalidat i propósitonan glorioso. Relashoná ku nos tempu, profeta Isaias a predisí ku e pueblo di Isaias 66:19) Ademas, na 2 Korintionan 4:1 i 2, nos ta lesa: “Komo ku nos tin e ministerio aki, . . . nos a renunsiá e kosnan skondí pa motibu di bèrgwensa i no ta kana ku astusia ni ta usa e palabra di Dios ku engaño, ma pa medio di e manifestashon di bèrdat nos ta rekomendá nos mes na e konsenshi di tur hende den bista di Dios.” Pablo tabata referí partikularmente na kristiannan ungí, kendenan ta “sirbidónan di un aliansa nobo.” (2 Korintionan 3:6) Pero nan ministerio tabatin un efekto riba masha hopi hende ku a haña e speransa di bida eterno riba tera. E ministerio di ámbos grupo ta enserá reflehá e gloria di Yehova no solamente den loke nan ta siña otro hende sino tambe den e manera ku nan ta biba. Nos tin e responsabilidat i e privilegio di reflehá manera spil e gloria di e Dios Haltísimo!
Dios “lo deklará [Yehova su] gloria meimei di e nashonnan.” (5. Nos prosperidat spiritual ta prueba di kiko?
5 Awe, e glorioso bon nobo di e Reino di Dios ta ser prediká den henter mundu, manera Hesus a profetisá. (Mateo 24:14) Personanan di tur nashon, tribu, pueblo i lenga a reakshoná entusiasmá riba e bon nobo i a transformá nan bida pa nan por hasi e boluntat di Dios. (Romanonan 12:2; Revelashon 7:9) Meskos ku e promé kristiannan, nan no por stòp di papia tokante e kosnan ku nan a mira i tende. (Echonan 4:20) Mas ku seis mion persona, mas tantu ku na kualke otro tempu den historia, ta reflehá e gloria di Dios awe. Abo ta un di nan? E prosperidat spiritual di e pueblo di Dios ta duna prueba konvinsente ku nan tin Yehova su bendishon i protekshon. E echo ku Yehova su spiritu ta riba nos ta asta mas bisto ainda si tuma na kuenta e forsanan poderoso ku tin kontra nos. Laga nos mira ta dikon nos por bisa ku Yehova su spiritu di bèrdat ta riba nos.
Nan Lo No Silensiá e Pueblo di Dios
6. Dikon nos mester tin fe i kurashi pa tuma un posishon na fabor di Yehova?
6 Suponé ku bo a haña un dagfar pa bai testifiká den korte kontra un kriminal sin eskrúpulo. Bo sa ku e kriminal ei tin un organisashon poderoso i ku lo e usa tur loke e tin na su alkanse pa stroba bo di desenmaskar’é. Pa bo testifiká kontra un kriminal asina bo mester tin kurashi i tambe konfiansa ku outoridatnan lo protehá bo kontra dje. Nos ta den un situashon similar. Ora nos ta duna testimonio tokante Yehova i su propósitonan, nos ta testifikando kontra Satanas e Diabel, i ta desenmaskar’é komo un matadó i un gañadó ku ta gaña henter mundu. (Juan 8:44; Revelashon 12:9) Pa bo tuma un posishon na fabor di Yehova i kontra e Diabel bo mester tin fe i kurashi.
7. Kuantu influensia Satanas tin, i kiko e ta purba hasi?
7 Naturalmente, Yehova ta e Supremo. Su poder ta infinitamente superior ku esun di Satanas. Nos por tin sigur ku Yehova no solamente por protehá nos segun ku nos ta sirbié fielmente, sino tambe ta ansioso pa hasié. (2 Krónikanan 16:9) Sin embargo, Satanas ta prens òf gobernante di tantu e demoñonan komo di e mundu di humanidat alehá for di Dios. (Mateo 12:24, 26; Juan 14:30) Siendo ku Satanas ta limitá na e bisindario di mundu i tin “gran furia,” e ta oponé Yehova su sirbidónan amargamente i ta usa e mundu bou di su kontròl pa purba sera boka di tur hende ku ta prediká e bon nobo. (Revelashon 12:7-9, 12, 17) Kon e ta hasi esaki? E ta usa por lo ménos tres manera.
8, 9. Kon Satanas ta usa amor mal dirigí, i dikon nos mester skohe ku masha kuidou e personanan ku ken nos ta asosiá?
8 Un manera ku Satanas ta purba distraí nos ta dor di preokupashonnan di bida. Hende den e último dianan aki ta stimadó di plaka, stimadó di nan mes i stimadó di plaser. Nan no ta stimadó di Dios. (2 Timoteo 3:1-4) Dor ku mayoria hende ta kompletamente apsorbá den e asuntunan di bida diario, nan ‘no ta hasi kaso’ di e bon nobo ku nos ta trese pa nan. Simplemente nan no ta interesá pa siña e bèrdat di Beibel. (Mateo 24:37-39, NW) Nan aktitut por kontagiá nos i pone nos baha nos aktividat i bira floho òf indiferente den sentido spiritual. Si nos permití nos mes kultivá amor pa kosnan material i pa e plasernan di bida, nos amor pa Dios lo fria.—Mateo 24:12.
9 Pa e motibu aki, kristiannan ta skohe ku masha kuidou e personanan ku ken nan ta asosiá. Rei Salomon a skirbi: “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) Laga nos “anda” ku esnan ku ta reflehá e gloria di Dios. Anto esta dushi esei ta! Ora nos reuní huntu ku nos rumannan spiritual na nos reunionnan i na otro okashon, nan amor, nan fe, nan goso i nan sabiduria ta animá nos. E tipo di asosiashon saludabel ei ta fortalesé nos determinashon pa perseverá den nos ministerio.
10. Den ki maneranan Satanas a usa bofon kontra hende ku ta reflehá e gloria di Dios?
10 Un di dos manera ku Satanas ta purba stòp tur kristian di reflehá e gloria di Dios ta dor di bofon. E táktika aki no mester ta un sorpresa pa nos. Durante Hesukristu su ministerio riba tera hende a hasi bofon di dje, nan a harié i el a wòrdu chèrchá, maltratá i asta skupí. (Marko 5:40; Lukas 16:14; 18:32) E promé kristiannan tambe tabata e blanko di bofon. (Echonan 2:13; 17:32) Sirbidónan di Yehova di tempu moderno ta konfrontá mesun maltrato. Segun apòstel Pedro, hende de echo lo klasifiká nan komo “profeta falsu.” Pedro a profetisá: “Den e último dianan bofonadónan lo bin ku nan bofon, siguiendo nan mes pashonnan, i bisando: ‘Unda e promesa di su binida ta? Pasobra . . . tur kos ta keda meskos ku nan tabata for di prinsipio di kreashon.’” (2 Pedro 3:3, 4) Hende ta hasi bofon di Dios su pueblo pasobra supuestamente nan lo no ta biba ku realidat di bida. E hendenan ei ta konsiderá e normanan moral di Beibel komo ouderwets. Pa hopi di nan, e mensahe ku nos ta prediká ta bobedat òf lokura. (1 Korintionan 1:18, 19) Komo kristian, nos por haña nos ku bofon na skol, na trabou i tin biaha asta den e sírkulo di famia. Nos no ta laga esaki desanimá nos pero ta sigui reflehá e gloria di Dios mediante nos predikashon, sabiendo meskos ku Hesus, ku e Palabra di Dios ta bèrdat.—Juan 17:17.
11. Kon Satanas a usa persekushon pa purba silensiá kristiannan?
11 Un di tres táktika ku Diabel ta usa den un intento pa silensiá nos ta oposishon òf persekushon. Hesus a bisa su siguidónan: “Nan lo entregá boso na tribulashon i lo mata boso, i tur nashon lo odia boso pa kousa di mi nòmber.” (Mateo 24:9) Sí, komo Testigu di Yehova, nos ta konfrontá persekushon violento i kruel den hopi parti di tera. Nos sa ku hopi tempu pasá Yehova a profetisá ku lo desaroyá odio, òf enemistat, entre esnan ku ta sirbi Dios i esnan ku ta sirbi Satanas e Diabel. (Génesis 3:15) Nos sa tambe ku dor di mantené integridat bou di prueba, nos ta duna testimonio ku Yehova su soberania universal ta esun legítimo. Teniendo esaki na mente por yuda nos keda fuerte asta bou di e sirkunstansianan di mas difísil. Si nos keda desididu pa reflehá e gloria di Dios lo no tin ningun persekushon ku por silensiá nos pa semper.
12. Dikon nos mester alegrá segun ku nos ta keda fiel apesar di Satanas su oposishon?
12 Bo ta resistí e atrakshon di mundu i ta duna prueba di ta fiel apesar di bofon i oposishon? Si ta asina, bo tin motibu pa alegrá. Hesus a sigurá esnan ku lo a siguié: “Bendishoná boso ta ora ku hende insultá boso i persiguí boso, i ta gaña tur klase di maldat riba boso pa mi kousa. Regosihá i sea kontentu, pasobra boso rekompensa den shelu ta grandi; pasobra asina nan a persiguí e profetanan ku tabata promé ku boso.” (Mateo 5:11, 12) Bo perseveransia ta duna prueba ku Yehova su spiritu santu poderoso ta riba bo, i ta kapasitá bo pa reflehá su gloria.—2 Korintionan 12:9.
Ta Yehova Ta Duna Perseveransia
13. Menshoná un motibu prinsipal pakiko nos ta perseverá den nos ministerio kristian.
13 Un motibu prinsipal pakiko nos ta perseverá den e ministerio ta pasobra nos ta stima Yehova i ta un plaser pa nos reflehá su gloria. Hende tin e tendensia di imitá personanan ku nan ta stima i respetá, i no tin ningun persona mas digno di imitashon ku Yehova Dios. Debí na su gran amor, el a manda su Yu na tera pa duna testimonio di e bèrdat i pa libra humanidat obediente. (Juan 3:16; 18:37) Meskos ku Dios, nos tambe ke pa tur klase di hende bin na repentimentu i haña salbashon; ta p’esei nos ta prediká na nan. (2 Pedro 3:9) E deseo aki, huntu ku nos determinashon pa imitá Dios, ta motivá nos pa sigui perseverá den reflehá su gloria mediante nos ministerio.
14. Kon Yehova ta fortifiká nos pa perseverá den nos ministerio?
14 Pero básikamente nos fortalesa pa perseverá den e ministerio kristian ta bin di Yehova. Romanonan 15:5, NW; Santiago 1:5) Es mas, Yehova no ta permití nos pasa den ningun prueba ku ta imposibel pa soportá. Si nos konfia den Yehova, lo e proveé e salida di manera ku nos por sigui reflehá su gloria.—1 Korintionan 10:13.
E ta sostené nos i fortifiká nos pa medio di su spiritu, su organisashon i su Palabra, Beibel. Yehova “ta suministrá perseveransia” na esnan ku ta dispuesto pa reflehá su gloria. E ta kontestá nos orashonnan i ta duna nos e sabiduria pa trata ku prueba. (15. Kiko ta yuda nos perseverá?
15 Perseveransia den nos ministerio ta duna prueba ku Dios su spiritu ta riba nos. Pensa riba e ilustrashon aki: Suponé ku un hende pidi bo parti un sierto tipo di pan, di kas pa kas, anto grátis. Bo ta haña e instrukshon pa hasi esaki riba bo propio gastu i den bo tempu liber. Ademas, despues di poko tempu bo ta haña sa ku eigenlijk ta masha tiki hende ke bo pan; tin hende asta lo bai kontra di bo esfuerso pa parti e pan. Bo ta kere ku lo bo sigui ku e tarea ei luna den luna afó, aña den aña afó? Probablemente ku nò. Sin embargo pa años, asta pa dékadanan, podisé bo a hasi hopi esfuerso sí pa deklará e bon nobo den bo tempu liber i riba bo propio gastu. Dikon? No ta pasobra bo stima Yehova i pa medio di su spiritu el a bendishoná bo esfuerso dor di yuda bo perseverá? Sigur ku sí!
Un Obra Inolvidabel
16. Kiko perseveransia den nos ministerio ta nifiká pa nos i pa esnan ku skucha nos?
16 E ministerio di e aliansa nobo ta un regalo inkomparabel. (2 Korintionan 4:7) Di manera similar, e ministerio kristian ku e otro karnénan ta efektuá rònt mundu ta un tesoro. Segun ku bo ta sigui perseverá den bo ministerio, bo por “sigurá salbashon, tantu pa bo mes komo pa esnan ku ta tende bo,” manera Pablo a skirbi Timoteo. (1 Timoteo 4:16) Pensa un ratu kiko esei ta nifiká. E bon nobo ku bo ta prediká ta ofresé otro hende e oportunidat di biba pa semper. Bo por forma lasonan fuerte di amistat ku esnan ku bo yuda spiritualmente. Imaginá ki un goso lo ta pa biba pa semper den Paradeis huntu ku e hendenan ku abo a yuda siña konosé Dios! Nan sigur lo no lubidá nunka e esfuerso ku bo a hasi pa yuda nan. Esei sí lo duna gran satisfakshon!
17. Dikon nos tempu ta un periodo úniko den historia humano?
17 Bo ta biba den un periodo úniko den historia humano. Nunka mas hende lo bolbe prediká e bon nobo den un mundu alehá for Dios. Noe a biba den un mundu asina, i el a mir’é pasa bai. Noe lo mester a keda hopi kontentu di sa ku el a kumpli fielmente ku Dios su boluntat pa traha un arka, lokual a hiba na su salbashon i di su famia! (Hebreonan 11:7) Bo tambe por tin mesun goso. Pensa kon lo bo sinti den e mundu nobo ora ku bo kòrda bèk riba bo aktividat durante e último dianan aki, i bo sa ku bo a hasi loke bo tabata por pa promové interesnan di Reino.
18. Ki siguransa i animashon Yehova ta duna su sirbidónan?
18 Pues, laga nos sigui reflehá e gloria di Dios. Esei lo ta algu ku nos lo kòrda pa semper. Yehova tambe ta kòrda nos obra. Beibel ta duna e animashon aki: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan. I nos ta deseá ku kada un di boso lo mustra e mesun diligensia pa asina realisá e siguransa kompletu di speransa te na fin, pa boso no flakia, ma pa boso ta imitadónan di esnan ku pa medio di fe i pasenshi ta heredá e promesanan.”—Hebreonan 6:10-12.
Bo Por Splika?
• Kon kristiannan ta reflehá e gloria di Dios?
• Kua ta algun táktika ku Satanas ta usa den su intento pa silensiá e pueblo di Dios?
• Ki prueba tin ku Dios su spiritu ta riba nos?
[Preguntanan di Estudio]
[Plachi na página 15]
Moisés su kara a reflehá gloria
[Plachi na página 16, 17]
Nos ta reflehá e gloria di Dios den nos ministerio