Morto Su Efekto Devastador

“MUCHA DI SEIS AÑA TA KOMETÉ SUISIDIO.” E titular impaktante aki a referí n’e morto trágiko di un mucha muhé ku yama Jackie. Su mama a kaba di muri di un malesa inkurabel. Promé ku Jackie a bula dilanti di un trein, el a bisa su rumannan ku e kier a ‘bira un angel p’e ta huntu ku su mama.’

Ian tabatin 18 aña ora el a roga su pastor pa splik’é pakiko Ian su tata a muri di kanser. E pastor a bis’é ku dor ku su tata tabata un bon hende, Dios tabata ke pa e ta den shelu. Despues ku Ian a tende e splikashon ei, el a disidí ku e no kier a konosé un Dios kruel asina. Pa Ian, bida no tabatin muchu sentido mas, i el a disidí di kuminsá kore tras di plaser. P’esei el a kuminsá bebe, usa droga i hiba un bida inmoral. Asina su bida a kuminsá bai for di kontròl.

“E Bibunan Sa Ku Nan Lo Muri”

E dos insidentenan lamentabel aki ta ilustrá kon devastador morto por ta, foral ora e presentá ònferwagt. Anto tòg tur hende ta konsiente di e echo aki ku Beibel ta deklará: “E bibunan sa ku nan lo muri.” (Eklesiastés 9:5) Pero hopi ta preferá di ignorá e realidat kruel ei. Kiko di abo? Bida ta eksigí asina tantu tempu i atenshon di nos ku kisas nos no ke pensa mes ku un dia—aparentemente leu den futuro—nos tin ku muri.

The World Book Encyclopedia ta bisa ku “mayoria hende tin miedu di muri i ta purba evitá di pensa riba dje.” Sin embargo, un aksidente serio òf un enfermedat peligroso por konfrontá nos diripiente ku e realidat di morto. Òf tal bes e entiero di un amigu òf un famia ta rekordá nos amargamente di loke ta warda tur hende.

Tòg, den tur e tristesa ku tin na un entiero, hopi bes bo ta tende hende bisa: “Bida mester sigui.” I esei ta bèrdat. Bida ta parse di pasa bai asina rápido ku masha lihé hende ta kuminsá eksperensiá e problemanan relashoná ku behes. Na e altura ei, morto no ta un kos di leu den futuro mas. A yega e tempu pa asistí na demasiado entiero i sufri e pèrdida di hopi amigu bieu. Pa hopi hende di edat, e pregunta inkietante ku ta pasa den nan mente ta: “Ki dia ta mi bùrt?”

E Gran Pregunta

Ounke niun hende no ta nenga ku morto ta algu sigur, ta keda sí un pregunta grandi kiko ta pasa despues di morto. E tantísimo splikashonnan kontradiktorio por pone hende ku tin nan dudanan mira henter e asuntu komo un debate sin sentido tokante loke ta deskonosí. E persona realista por konkluí ku siendo ku “ta un biaha so bo ta biba,” bo tin ku disfrutá di e bon kosnan di bida mas tantu posibel.

 Di otro banda, tin hende ta nenga di kere ku morto ta fin di tur kos. Sin embargo, nan no tin un idea kla kiko ta bini despues. Algun ta asumí ku bida lo sigui den un lugá di felisidat eterno, miéntras ku otronan ta pensa ku un dia nan lo bolbe biba, tal bes komo un persona distinto.

Kasi semper e famianan ku keda atras ta puntra nan mes: “Unda e mortonan ta?” Hopi aña pasá, miembronan di un tim di futbòl tabata riba kaminda pa un evento deportivo ora ku diripiente un trùk a bin dal den nan minibùs i pone e bùs bòltu baha for di kaminda. Sinku miembro di e tim a muri. For di e dia di e aksidente aki, e mama di un di e víktimanan ei kasi no por a hiba un bida normal mas. El a keda puntra su mes unda su yu ta. E tabata bai regularmente na graf di su yu pa papia kuné oranan largu na bos haltu. El a lamentá: “Mi no por kaba di kere ku no tin nada despues di morto, pero mi no ta sigur.”

Ta bon kla anto ku e manera ku nos ta mira morto tin su efekto riba nos bida awor. En bista di e manera ku hende ta reakshoná riba e tragedia di morto, ta surgi vários pregunta. Pensa kon lo bo kontestá nan. Nos mester djis lubidá riba morto i konsentrá riba bida? Nos mester laga e realidat di ku un dia nos lo muri stroba nos di disfrutá di bida? E famianan ku a keda atras semper tin ku keda puntra nan mes unda nan ser kerí ku a muri ta? Morto tin ku keda un misterio?