Kana ku Dios den e Tempu Turbulento Aki

“Enok a kana ku Dios, i e no tabat’ei mas, pasobra Dios a tum’é.”—Génesis 5:24.

1. Menshoná algun rasgo di nos tempu ku ta hasié trabahoso.

TEMPU turbulento! E ekspreshon aki ta un bon deskripshon di e añanan di intrankilidat i violensia ku humanidat ta pasando aden desde ku e Reino Mesiániko a keda establesé na aña 1914. Durante tur e tempu aki, hende ta bibando den loke Beibel ta yama e “último dianan.” Kalamidatnan manera hamber, malesa, temblor i guera a asotá humanidat na un eskala sin presedente. (2 Timoteo 3:1; Revelashon 6:1-8) E adoradónan di Yehova no a keda di spar. Te na sierto grado, nos tur tin ku lucha ku e difikultatnan i insertidumbre di e mundu djawe. Preshonnan ekonómiko, intrankilidat polítiko, kriminalidat i malesa ta entre e kosnan ku ta hasi bida hopi difísil.

2. Ki retonan sirbidónan di Yehova a konfrontá?

² Ademas, hopi sirbidó di Yehova a soportá ola tras ola di persekushon intenso segun ku Satanas a sigui hasi guera kontra esnan ku ta “warda e mandamentunan di Dios i tin e [“trabou di duna,” NW] testimonio di Hesukristu.” (Revelashon 12:17) I ounke ta bèrdat ku no ta nos tur a sufri persekushon severo direktamente, tur kristian berdadero tin ku lucha kontra Satanas e Diabel i e spiritu ku e ta fomentá den humanidat. (Efesionan 2:2; 6:12) Nos mester ta konstantemente alerta pa e spiritu ei no influensiá nos, ya ku nos ta top’é na trabou, na skol i na kualke otro lugá kaminda nos ta den kontakto estrecho ku personanan ku no tin ningun interes den adorashon puru.

Kana ku Dios, No ku e Paganonan

3, 4. Den ki manera kristiannan ta distinto for di mundu?

³ Si nos wak bèk den promé siglo, e kristiannan tambe a lucha duru kontra e spiritu di e mundu aki, i esei a hasi nan hopi distinto for  di e hendenan pafó di e kongregashon kristian. Pablo a deskribí e diferensia ora el a skirbi: “Esaki mi ta bisa anto i ta afirmá huntu ku Señor, pa boso no kana mas meskos ku e paganonan tambe ta kana, den e banidat di nan mente, siendo tapá ku skuridat den nan komprondementu, ekskluí di e bida di Dios pa motibu di e ignoransia ku ta den nan, pa motibu di e duresa di nan kurason; i nan, pèrdiendo tur heful, a entregá nan mes na sensualidat pa, ku golosidat, nan praktiká tur klase di impuresa.”—Efesionan 4:17-19.

⁴ E palabranan ei ta splika bon kla e skuridat spiritual i moral profundo di e mundu aki, tantu den tempu di Pablo komo den nos tempu. Meskos ku den promé siglo, kristiannan awe no ta sigui ‘kana manera e paganonan.’ Mas bien nan tin e maravioso privilegio di por kana ku Dios. Ta bèrdat ku algun persona kisas ta kuestioná si ta rasonabel pa bisa ku un simpel hende imperfekto por kana ku Yehova. Sin embargo, Beibel ta mustra ku nan por. Es mas, Yehova ta spera esei di nan. Den siglo 8 promé ku nos era, profeta Mikeas a skirbi e siguiente palabranan inspirá: “[Yehova] a bisa bo, o hende, loke ta bon; i kiko SEÑOR ta eksigí di bo, si no ta pa hasi hustisia, pa stima miserikòrdia, i pa kana humildemente ku bo Dios?”—Mikeas 6:8.

Kon i Pakiko Nos Mester Kana ku Dios?

5. Kon un hende imperfekto por kana ku Dios?

⁵ Kon nos por kana ku e Dios todopoderoso i invisibel? Klaru ku nos no por kana ku Yehova den e mesun sentido ku nos ta kana ku otro hende. Den Beibel e ekspreshon “kana” por nifiká “sigui un sierto proseder.” * Ku esaki na mente, nos ta komprondé ku un persona ku ta kana ku Dios ta sigui un rumbo di bida ku Dios a deskribí i ku ta agradá Dios. Un proseder asina ta hasi nos distinto for di mayoria hende rònt di nos. Sin embargo, esei ta e úniko eskoho korekto pa un kristian. Dikon? Tin hopi motibu.

6, 7. Dikon kana ku Dios ta e mihó kaminda pa sigui?

⁶ Na promé lugá, Yehova ta nos Kreadó, e Fuente di nos bida, i Esun ku ta perkurá tur loke nos tin mester pa keda na bida. (Revelashon 4:11) Pues, ta e so tin derecho di bisa nos kon pa kana. Ademas, kana ku Dios ta e estilo di bida di mas benefisioso ku nos por hiba. Yehova a hasi provishon pa esnan ku ta kana kuné haña pordon pa nan pikánan, i e ta ofresé nan e speransa di bida eterno. Tambe nos amoroso Tata selestial ta duna konseho sabí ku ta yuda esnan ku ta kana kuné hasi nan bida un éksito for di awor, apesar ku nan ta imperfekto i ta biba den un mundu ku ta bou di kontròl di Satanas. (Juan 3:16; 2 Timoteo 3:15, 16; 1 Juan 1:8; 2:25; 5:19) Un motibu mas pa kana ku Dios ta pasobra e echo ku nos ta dispuesto pa hasi esei ta kontribuí na pas i unidat di e kongregashon.—Kolosensenan 3:15, 16.

⁷ Por último, i mas importante, ora nos ta kana ku Dios, nos ta mustra na ki banda nos ta pará relashoná ku e gran kuestion ku a lanta aya den e hòfi di Edén, esta, e kuestion di soberania. (Génesis 3:1-6) Nos ta demostrá na e bida ku nos ta hiba ku nos ta pará totalmente na banda di Yehova, i sin miedu nos ta proklamá ku ta é so ta e Soberano legítimo. (Salmo 83:18) Di e manera ei nos ta aktua na armonia ku nos orashon pa Dios su nòmber sea santifiká i pa su boluntat sosodé. (Mateo 6:9, 10) Esta sabí esnan ku skohe pa kana ku Dios ta! Nan por tin sigur ku nan ta riba e bon kaminda, pasobra Yehova ta e ‘úniko sabí.’ E no ta faya nunka.—Romanonan 16:27.

8. Kon e tempu di Enok i Noe tabata paresido na nos tempu?

⁸ Pero kon ta posibel pa biba manera kristiannan lo mester biba ora ku e situashon den mundu ta asina turbulento i mayoria hende no ta interesá den sirbi Yehova? Nos ta haña e kontesta ora nos konsiderá hòmbernan fiel di  pasado ku a mantené nan integridat durante tempu masha difísil. Dos di nan tabata Enok ku Noe. Ámbos a biba den tempu hopi paresido na nos tempu. Maldat tabata reina tur kaminda. Den tempu di Noe e tera tabata yen di violensia i inmoralidat. Sin embargo, Enok ku Noe a resistí e spiritu di e mundu di nan tempu i a kana ku Yehova. Kon nan a logra hasi esei? Pa kontestá e pregunta ei nos lo trata den e artíkulo aki e ehèmpel di Enok. Den e siguiente artíkulo nos lo konsiderá Noe.

Enok A Kana ku Dios den Tempu Turbulento

9. Ki informashon nos tin tokante Enok?

⁹ Enok tabata e promé persona ku segun e Skritura a kana ku Dios. Beibel ta bisa: “Enok a kana 300 aña ku Dios despues ku el a engendrá Matusalen.” (Génesis 5:22) Anto despues di menshoná e largura di Enok su bida—ku na komparashon ku di nos tabata largu, pero ku pa e tempu ei tabata kòrtiku—e registro ta bisa: “Enok a kana ku Dios, i e no tabat’ei mas, pasobra Dios a tum’é.” (Génesis 5:24) Evidentemente, Yehova a trasladá Enok for di e mundu di hende bibu pa pon’é drumi den morto promé ku opositornan por a pone man riba dje. (Hebreonan 11:5, 13) Fuera di e versíkulonan kòrtiku ei, tin masha tiki referensia na Enok den Beibel. No opstante, for di e informashon ku nos tin i for di otro indikashonnan, nos tin bon motibu pa bisa ku Enok su tempu tabata turbulento.

10, 11. (a) Kon korupshon a plama despues di e rebelion di Adam ku Eva? (b) Ki mensahe profétiko Enok a prediká, i ki reakshon sigur el a topa kuné?

¹⁰ Konsiderá por ehèmpel kon lihé korupshon a plama den e rasa humano despues ku Adam a peka. Beibel ta konta nos ku Adam su yu primogénito, Kain, a bira e promé hende asesino ora ku el a mata su ruman hòmber Abel. (Génesis 4:8-10) Despues di Abel su morto violento, Adam ku Eva a haña un otro yu hòmber ku nan a yama Sèt. Nos ta lesa di dje: “Pa Sèt tambe a nase un yu hòmber, i el a dun’é e nòmber Enos. E ora ei hende a kuminsá invoká e nòmber di SEÑOR.” (Génesis 4:25, 26) Lamentablemente, e manera di ‘invoká e nòmber di Yehova’ tabata den un manera apóstata. * Hopi aña despues ku Enos a nase,  un desendiente di Kain ku yama Lamek a komponé un kantika pa su dos esposanan anunsiando ku el a mata un mucha hòmber ku a herid’é. Tambe el a spièrta: “Si Kain a wòrdu vengá shete bes, anto Lamek setenta bes shete.”—Génesis 4:10, 19, 23, 24.

¹¹ E echonan breve ei ku a keda menshoná ta indiká ku e korupshon ku Satanas a introdusí den e hòfi di Edén a pone maldat plama rápidamente entre e desendientenan di Adam. Den un mundu asina, Enok tabata un profeta di Yehova kende su palabranan poderoso i inspirá ta resoná te awe. Hudas ta informá ku Enok a profetisá: “Mira, Señor a bin ku hopi míles di su santunan, pa ehekutá huisio kontra tur, i pa kondená tur e hendenan impio [malbado] pa tur nan echonan di impiedat ku nan a kometé den impiedat, i pa tur e kosnan duru ku pekadónan impio a papia kontra dje.” (Hudas 14, 15) E palabranan ei lo haña nan kumplimentu final na Armagedón. (Revelashon 16:14, 16) Pero nos por tin sigur ku asta den tempu di Enok tabatin hopi ‘pekadó malbado’ ku a tende Enok su profesia ku disgustu. Tabata masha amoroso di Yehova su parti ku el a kita e profeta for di nan alkanse!

Kiko A Fortalesé Enok pa Kana ku Dios?

12. Kiko a hasi Enok distinto for di e hendenan di su tempu?

¹² Aya den e hòfi di Edén, Adam ku Eva a skucha Satanas, i Adam a rebeldiá kontra Yehova. (Génesis 3:1-6) Nan yu Abel a sigui un kaminda diferente, i Yehova su aprobashon tabata riba dje. (Génesis 4:3, 4) Desafortunadamente, mayoria di Adam su desendientenan no tabata manera Abel. Sin embargo, Enok ku a nase sientos di aña despues sí tabata asina. Kiko tabata e diferensia entre Enok i mayoria di e otro desendientenan di Adam? Apòstel Pablo a kontestá e pregunta ei ora el a skirbi: “Pa medio di fe Enok a wòrdu trasladá pa e no mira morto; i e no a wòrdu hañá, pasobra Dios a traslad’é; pasobra el a optené e testimonio ku promé ku el a wòrdu trasladá, e tabata agradá Dios.” (Hebreonan 11:5) Enok tabata parti di “un nubia asina grandi di testigunan [pre-kristian],” kendenan tabata ehèmpelnan ekselente di fe. (Hebreonan 12:1) Ta fe a yuda Enok perseverá i a la bes mantené un kondukta korekto durante un bida ku a pasa riba 300 aña, mas ku tres biaha e durashon di bida di mayoria di nos awe!

13. Ki klase di fe Enok tabatin?

¹³ Pablo a deskribí e fe di Enok i di otro testigunan ora ku el a skirbi: “Fe ta e siguransa di kosnan ku hende ta spera, e konvikshon di kosnan ku hende no ta mira.” (Hebreonan 11:1) Sí, fe ta spera kos ku konvikshon, basá riba siguransa ku loke nos ta spera lo ser realisá. Nos speransa ta asina fuerte ku e ta influensiá e loke nos ta konsiderá komo lo mas importante den bida. E klase di fe ei a kapasitá Enok pa kana ku Dios ounke e mundu rònt di dje no a kana ku Dios.

14. Enok su fe lo por tabata basá riba ki konosementu eksakto?

¹⁴ Fe berdadero ta basá riba konosementu eksakto. Ki konosementu Enok tabatin? (Romanonan 10:14, 17; 1 Timoteo 2:4) Sin duda, e tabata sa tokante e susesonan den Edén. Probablemente el a tende tambe kon bida tabata den e hòfi di Edén, i kisas e hòfi tabata eksistí ainda pero tabata prohibí pa hende drenta. (Génesis 3:23, 24) I e tabata sa  di Dios su propósito pa e desendensia di Adam yena e tera i hasi henter e planeta manera e Paradeis original. (Génesis 1:28) Ademas, Enok sigur a apresiá Yehova su promesa di produsí un Simia ku lo a machiká Satanas su kabes i drecha tur e mal efektonan ku Satanas su engaño a kousa. (Génesis 3:15) De echo, Enok su propio profesia inspirá, konserbá den e buki di Hudas, tin keber ku e destrukshon di e simia di Satanas. Siendo ku Enok tabatin fe, nos sa ku el a adorá Yehova komo esun ku “ta rekompensá esnan ku ta busk’é.” (Hebreonan 11:6) Pues, ounke Enok no tabatin tur e konosementu ku nos tin, e tabata sa sufisiente pa forma e fundeshi di un fe firme. Ku un fe asina, el a mantené su integridat durante tempu turbulento.

Imitá Enok Su Ehèmpel

15, 16. Kon nos por sigui e ehèmpel di Enok?

¹⁵ Komo ku meskos ku Enok, nos tambe ke agradá Yehova durante e tempu turbulento ku ta eksistí awe, nos ta hasi bon di sigui Enok su ehèmpel. Nos tin ku atkerí konosementu eksakto di Yehova i di su propósito i keda ku esei den nos mente. Pero nos mester hasi mas. Nos mester laga e konosementu eksakto ei dirigí nos rumbo. (Salmo 119:101; 2 Pedro 1:19) Nos mester laga Dios su manera di pensa guia nos, i semper hasi esfuerso pa tur loke nos ta pensa i hasi agrad’é.

¹⁶ Nos no tin ningun registro di ken mas den tempu di Enok tabata sirbi Yehova, pero klaramente Enok tabata sea e úniko òf parti di un minoria chikitu. Nos tambe ta forma un minoria den mundu, pero esei no ta deskurashá nos. Yehova lo sostené nos, sin importá ken por ta kontra nos. (Romanonan 8:31) Ku kurashi Enok a duna spièrtamentu tokante e binidero destrukshon di hende malbado. Nos tambe tin kurashi segun ku nos ta prediká “e evangelio aki di e reino” apesar di bofon, oposishon i persekushon. (Mateo 24:14) Enok no a biba mes largu ku hopi di e hendenan di su tempu. No opstante, su speransa no tabata den e mundu ei. Su bista tabata fihá riba algu hopi mas magnífiko. (Hebreonan 11:10, 35) Nos tambe tin nos bista fihá riba e kumplimentu di Yehova su propósito. Pues, nos no ta hasi uso kompletu di e mundu aki. (1 Korintionan 7:31) Mas bien, nos ta usa nos fortalesa i rekursonan prinsipalmente den Yehova su sirbishi.

17. Ki konosementu nos tin ku Enok no tabatin, pues kiko nos mester hasi?

¹⁷ Enok tabatin fe ku e Simia ku Dios a primintí lo a aparesé na Yehova su debido tempu. Awor ta hasi kasi 2.000 aña pasá ku e Simia ei—Hesukristu—a aparesé, proveé e reskate i habri e kaminda pa tantu nos komo e testigunan fiel di pasado manera Enok por heredá bida eterno. E Simia ei, ku awor ta entronisá komo Rei di e Reino di Dios, a saka Satanas for di shelu i bent’é aki bou na tera, i nos ta mira tur rònt di nos e tribulashon ku esei a kousa. (Revelashon 12:12) Sí, nos tin hopi mas konosementu disponibel ku Enok tabatin. Pues anto, laga nos tin fe firme meskos ku e tabatin. Laga nos konfiansa den kumplimentu di Dios su promesanan influensiá tur loke nos ta hasi. Meskos ku Enok, laga nos kana ku Dios, maske nos ta biba den tempu turbulento.

[Nota]

Kon Lo Bo Kontestá?

• Kiko ke men kana ku Dios?

• Dikon kana ku Dios ta e mihó kaminda pa sigui?

• Kiko a kapasitá Enok pa kana ku Dios apesar di tempu turbulento?

• Kon nos por imitá Enok?

[Preguntanan di Estudio]

[Plachi na página 15]

Pa medio di fe, ‘Enok a sigui kana ku e Dios berdadero’

[Plachi na página 17]

Nos ta kere firmemente ku Yehova su promesanan lo ser realisá

[Rekonosementu di Potret na página 13]

Muhé, te na punta na man drechi: FAO photo/B. Imevbore; edifisio ku ta basha abou: San Hong R-C Plachi Company