Menonitanan Ta Buska e Bèrdat di Beibel

UN MAINTA den novèmber 2000, algun misionero Testigu di Yehova na Bolivia a wak pafó di bentana di nan kasita i a mira un grupo di hòmber ku muhé simpel bistí pará tur nervioso na porta. Ora e misioneronan a habri porta, e promé palabranan di e bishitantenan tabata: “Nos ke haña e bèrdat di Beibel.” E bishitantenan tabata menonita. E hòmbernan tabata bistí na ketelpak, i e muhénan tabatin frèskòt koló skur, i nan tabata papia un dialekto aleman ku otro. Nan kara tabata tur spantá. Nan tabata blo wak si hende no a sigui nan. Sin embargo, for di ora nan tabata subi trapi pa drenta e kas, un di e yònkumannan di: “Mi ke konosé e hendenan ku ta usa e nòmber di Dios.”

Unabes paden, e bishitantenan a kuminsá relahá ora ku a sirbi nan poko refresko. Nan a bin di leu, di un kolonia di kunukero isolá. Einan, nan tabatin seis aña ta risibí e revista Toren di Vigilansia via pòst. Nan a puntra: “Nos a lesa ku lo tin un paradeis riba tera. Ta bèrdat?” E Testigunan a mustra nan e kontesta ku Beibel ta duna. (Isaias 11:9; Lukas 23:43; 2 Pedro 3:7, 13; Revelashon 21:3, 4) “Boso a wak!” un kunukero a bisa e otronan. “Ta bèrdat. Lo tin un paradeis riba tera.” Un tras di otro nan a bisa: “Mi kier sa ku nos a haña e bèrdat.”

Ken e menonitanan ta? Kiko nan ta kere? Pa kontestá e preguntanan aki, nos tin ku bai bèk na siglo 16.

Ken e Menonitanan Ta?

Durante añanan di 1500, e oumento rápido den tradukshon i imprenta di Beibel den e idiomanan komun di Europa a stimulá einan un interes nobo den estudio di Beibel. Martin Luther i otro reformadónan a rechasá hopi siñansa di Iglesia Katóliko. Sin embargo, e iglesianan protestant resien formá a keda ku hopi práktika ku no ta bíbliko. Por ehèmpel, mayoria hende tabata haña ku mester batisá tur yu resien nasí den iglesia. Sin embargo, algun hende ku tabata studia Beibel en buska di e bèrdat a bin realisá ku un persona ta bira miembro di e kongregashon kristian solamente dor di tuma un desishon basá riba konosementu promé ku e batisá. (Mateo 28:19, 20) Predikadónan seloso ku tabata tene na e kreensia aki a kuminsá bishitá stat- i pueblitonan pa siña hende tokante  Beibel i pa batisá adultonan. P’esei hende a yama nan anaboutista, ku ta nifiká “esnan ku ta batisá pa di dos biaha.”

Un persona ku a akudí na e anaboutistanan den su búskeda di e bèrdat tabata Menno Simons, un pastor katóliko di e pueblito di Witmarsum den parti nort di Hulanda. Pa aña 1536 el a kibra tur laso ku iglesia i a bira un hòmber persiguí. Na aña 1542 e propio emperador di e Imperio Romano Santu, Karel V, a primintí un rekompensa di 100 florin pa e aresto di Menno. Apesar di esei, Menno a forma kongregashonnan ku algun di e anaboutistanan. Poko tempu despues nan a kuminsá yama é ku su siguidónan menonitanan.

Menonitanan Awe

Den transkurso di tempu, persekushon a pone míles di menonita di Wèst Europa muda bai Norteamérika. Ei, nan tabatin oportunidat pa sigui ku nan búskeda di e bèrdat i plama nan mensahe na hopi otro hende. Pero e selo ardiente di nan antepasadonan pa hasi un estudio progresivo di Beibel i pa e predikashon públiko a bai kasi kompletamente pèrdí. Mayoria menonita a pega na sierto siñansanan ku ta kontrario na Beibel, manera Trinidat, inmortalidat di alma humano i fièrnu di kandela. (Eklesiastés 9:5; Ezekiel 18:4; Marko 12:29) Awendia, e menonitanan su esfuerso komo misionero tin e tendensia di enfoká mas riba servisionan médiko i sosial ku riba evangelismo.

Segun kálkulo tin awor rònt di 1.300.000 menonita ta biba den 65 pais. Sin embargo, e menonitanan djawendia ta lamentá e falta di union ku tin den nan, meskos ku Menno Simons a lamentá esei siglonan promé. Durante Promé Guera Mundial, diferensianan di opinion relashoná ku e konfliktonan di mundu a kousa divishon masha grandi den nan. Hopi menonita na Norteamérika a nenga servisio militar riba base bíbliko. Pero e buki An Introduction to Mennonite History (Un Introdukshon di Historia Menonita) ta bisa: “Pa aña 1914, rechaso di servisio militar tabata prinsipalmente un kos di pasado pa e iglesianan menonita na Wèst Europa.” Awe, te na sierto grado algun grupo menonita a adoptá kustumbernan moderno. Otronan ainda ta sera nan pañanan ku hak en bes di usa boton i ta kere ku hende hòmber no mag di feita nan barba.

Algun grupo menonita ku tabata determiná pa keda separá for di e mundu moderno, a muda bai ku nan komunidat na lugánan kaminda gobièrnunan lokal ta permití nan biba sin interferensia. Por ehèmpel, na Bolivia tin segun kálkulo 38.000 menonita ta biba den kantidat di kolonianan masha aislá, kada un ku otro reglanan di kondukta. Algun kolonia ta prohibí uso di vehíkulonan di motor, i ta permití solamente uso di kabai ku kitoki. Sierto kolonianan ta prohibí radio, televishon i músika. Tin ta asta prohibí e hendenan di siña e idioma di e pais kaminda nan ta biba. Un habitante di un kolonia a bisa: “E pastornan no ta laga nos siña spañó pa asina nan por tene nos bou di nan kontròl.” Hopi menonita ta sinti nan oprimí i ta biba ku hopi miedu di ser ekspulsá for di e komunidat, un idea teribel pa un persona ku nunka a biba pafó di e komunidat menonita.

Kon A Sembra un Simia di e Bèrdat

Tabata bou di e sirkunstansianan aki ku un kunukero menonita ku yama Johann a mira un revista Toren di Vigilansia na kas di su bisiña. Johann su famia a emigrá for di Canada pa Mexico i despues pa Bolivia. Pero Johann semper  a deseá di haña yudansa den su búskeda di e bèrdat di Beibel. El a pidi pa fia e revista.

Despues, ora ku Johann tabata den stat pa bende su produktonan di kunuku, el a aserká un Testigu ku tabata ofresé E Toren di Vigilansia den plasa. E Testigu a dirigié na un misionero di abla aleman, i poko despues Johann a kuminsá haña E Toren di Vigilansia via pòst na aleman. Nan tabata studia kada edishon kuidadosamente i pas’é di famia pa famia den su kolonia te ora ku e revista tabata tur gastá. Tabatin biaha ku famianan tabata reuní huntu pa studia un revista Toren di Vigilansia te meianochi, buskando e tekstonan menshoná den e revista. Johann a keda konvensí ku Testigunan di Yehova mester ta esnan ku unidamente ta hasiendo Dios su boluntat rònt mundu. Promé ku Johann a muri, el a bisa su kasá i su yunan: “Sigui lesa semper E Toren di Vigilansia. Lo e yuda boso komprondé Beibel.”

Algun miembro di Johann su famia a kuminsá papia ku nan bisiñanan tokante e kosnan ku nan tabata siña for di Beibel. Nan a konta nan: “E tera lo no ser destruí. Mas bien, Dios lo hasié un paradeis. I Dios no ta tormentá hende den fièrnu.” No a tarda hopi ku palabra di e kòmbersashonnan aki a yega na orea di e pastornan di iglesia, kendenan a menasá di ekspulsá Johann su famia si nan no a stòp. Mas despues, durante un kòmbersashon di famia riba e preshon ku e ansianonan menonita tabata pone riba nan, un yònkuman a papia frankamente. El a bisa: “Mi no sa dikon nos ta keha tokante nos ansianonan di iglesia. Nos tur sa kua ta e religion berdadero, i nos no a hasi nada tokante esei.” E palabranan aki a touch kurason di e tata di e yònkuman. Poko despues, dies miembro di e famia a sali riba un biahe sekreto en buska di Testigunan di Yehova i a bin terminá na kas di e misioneronan, manera a keda menshoná den e introdukshon.

E siguiente dia, e misioneronan a bai bishitá nan amigunan nobo den e kolonia. E vehíkulo di motor di e misioneronan tabata e úniko riba kaminda. Segun ku nan tabata kore pokopoko pasa kitokinan halá pa kabai, nan a keda fasiná di mira e habitantenan lokal, kendenan tambe tabata fasiná di mira nan. Djis despues nan a sinta na mesa ku dies menonita ku a representá dos famia.

E dia ei, a dura kuater ora pa studia kapítulo 1 di e buki Conocimentu cu Ta Hiba na Bida Eterno. * Pa kada paragraf, e kunukeronan a buska mas teksto bíbliko i nan kier a sa si nan tabata komprondé e tekstonan korektamente. Despues di kada pregunta di estudio a sigui un pousa di vários minüt segun ku e kunukeronan a konsultá ku otro na e dialekto aleman promé ku un bosero finalmente a kontestá na spañó pa e grupo. Tabata un dia memorabel, pero un tormenta tabata formando. Nan tabata a punto di konfrontá prueba, meskos ku a pasa ku Menno Simons tempu ku el a kuminsá ku su búskeda pa e bèrdat di Beibel kasi sinku siglo pasá.

Nan A Haña Nan ku Prueba pa e Bèrdat

Un par di dia despues, e ansianonan di iglesia a bin na kas di e famia di Johann ku un ultimátum pa esnan interesá den Testigunan di Yehova: “Nos a tende ku Testigunan di Yehova a bishitá boso. Boso mester prohibí nan di bolbe, i si boso no entregá nan literatura pa nos kima nan, nos lo ekspulsá boso.” Nan a haña apénas ún seshon di estudio di Beibel ku e Testigunan, pues esaki tabata un prueba masha grandi.

 Un di e kabesnan di famia a kontestá: “Nos no por hasi loke boso ta pidi. E hendenan ei a bin pa siña nos e Beibel.” Kon e ansianonan a reakshoná? Nan a ekspulsá nan pasobra nan a studia Beibel! Esaki en bèrdat tabata un sla duru. E garoshi di e fábrika di keshi di e kolonia a pasa dilanti di kas di un famia sin rekohé nan lechi, i asina a blòkia nan úniko fuente di entrada. Un kabes di famia a pèrdè su trabou. Na e tienda di e kolonia nan a nenga di atendé un otro kabes di famia i nan a ekspulsá su yu muhé di dies aña for di skol. Bisiñanan a rondoná un kas pa bai ku e esposa di un di e yònkumannan, deklarando ku e mucha muhé no por sigui biba ku su kasá ekspulsá. Apesar di tur esaki, e famianan ku tabata studia Beibel no a stòp di buska e bèrdat.

E misioneronan a sigui bin tur siman pa kondusí e estudio di Beibel maske esei tabata un kareda basta largu. E estudionan ei a fortalesé e famianan aki mashá! Algun miembro di famia tabata biaha dos ora ku kabai ku kitoki pa nan por ta presente. Tabata un okashon masha konmovedor ora ku e famianan pa promé bes a pidi un di e misioneronan hasi orashon. Den e kolonianan aki menonitanan nunka ta hasi orashon na bos haltu, pues nunka promé nan no a tende un hende hasi orashon na nan fabor. Wowo di e hòmbernan a yena ku awa. Anto bo por imaginá nan kuriosidat ora ku e misioneronan a bin ku un tape recorder? Músika no tabata permití nunka den nan kolonia. Nan tabata asina kontentu ku e bunita Melodianan di Reino ku nan a disidí di kanta kantika di Reino despues di kada estudio! Sin embargo, e pregunta a keda: Kon nan ta bai sobrebibí den nan sirkunstansia nobo?

Nan A Haña un Hermandat Amoroso

Siendo ekskluí for di nan komunidat, e famianan a kuminsá traha nan mes keshi. E misioneronan a yuda nan haña kumpradó. Un Testigu di Yehova di hopi tempu na Norteamérika ku a lanta den un kolonia menonita na Suramérika a tende di e situashon penoso di e famianan. E tabatin un deseo spesial pa yuda. Denter di un siman, el a bula bai Bolivia pa bishitá nan. Ademas di duna nan hopi animashon spiritual, el a yuda e famianan kumpra nan mes pikòp di manera ku nan por a asistí na e reunionnan na e Salòn di Reino i tambe transportá nan produktonan di kunuku hiba plasa.

Un miembro di un famia a bisa: “Tabata difísil despues ku nan a ekspulsá nos for di e komunidat. Nos tabata bai Salòn di Reino ku karanan tristu, pero nos tabata bolbe bèk kontentu.” En bèrdat, Testigunan lokal a yuda nan bon den e situashon difísil ku nan a konfrontá i a ofresé nan sosten. Algun Testigu a siña aleman, i vários Testigu di abla aleman a bin Bolivia for di Europa pa yuda kondusí reunionnan kristian na aleman. Despues di poko tempu, 14 persona di e komunidat menonita tabata prediká e bon nobo di Reino ku otro hende.

Dia 12 di òktober 2001, ménos ku un aña despues di nan promé bishita na e kas di misionero, 11 di e eks-anaboutistanan aki a bolbe batisá, e biaha aki komo símbolo di nan dedikashon na Yehova. Entre tantu, tin mas ku a dal e paso aki di boutismo. Un di nan despues a komentá: “For di dia ku nos a siña e bèrdat di Beibel, nos ta sinti nos manera katibu ku a ser poné den libertat.” Un otro a bisa: “Hopi menonita ta keha di e falta di amor ku tin den nan komunidat. Pero Testigunan di Yehova ta mustra interes den otro. Mi ta sinti mi safe meimei di nan.” Si bo ta en buska di un mihó komprondementu di e bèrdat di Beibel, bo tambe lo por konfrontá difikultatnan. Pero si bo buska e yudansa di Yehova i mustra fe i kurashi manera e famianan aki a hasi, bo tambe lo tin éksito i haña felisidat.

[Nota]

[Plachi na página 25]

Nan a keda kontentu di haña literatura bíbliko na aleman

[Plachi na página 26]

Ounke músika semper tabata prohibí, awor nan ta kanta despues di kada estudio di Beibel