Historia di Bida

Mi A Perseverá Komo un Sòldá di Kristu

SEGUN E RELATO DI YURII KAPTOLA

“Awor mi ta konvensí ku di bèrdat bo tin fe!” E palabranan ei a bini for di e hende ku ménos mi a pensa—un ofisial den e ehérsito soviétiko—i nan a duna mi un empuhe nèt na ora. Mi tabatin un sentensia di hopi aña den prizon ta kologá riba mi kabes i mi a pidi Yehova fervientemente p’e sostené mi. Mi tabatin ku enfrentá un lucha largu ku a eksigí perseveransia i determinashon.

MI A nase dia 19 di òktober 1962 i mi a lanta den e parti wèst di Ukrania. Den e mesun aña ei, mi tata, kende tambe tabata yama Yurii, a bin den kontakto ku Testigunan di Yehova. No a dura muchu ku el a bira e promé persona den nos pueblo ku a adorá Yehova. Ofisialnan ku tabata kontra Testigunan di Yehova a tuma nota di su aktividatnan.

Sin embargo, mayoria di nos bisiñanan a respetá mi mayornan pa nan kualidatnan kristian i interes den otro hende. Mi mayornan a probechá di tur oportunidat pa inkulká den ami ku mi tres ruman muhénan un amor pa Dios for di un edat hopi yòn, i esaki a yuda mi dil ku e hopi problemanan ku mi a haña mi aden na skol. Un di e problemanan ei a surgi ora ku kada alumno mester a bisti un badge ku ta identifik’é komo un di Lenin Su Yunan di Òktober. Pa motibu di mi neutralidat kristian, mi no a bisti e badge i p’esei tabata bisto ku mi tabata diferente.—Juan 6:15; 17:16.

Despues, ora mi tabata den derde klas, tur alumno mester a djòin un organisashon komunista pa hóbennan ku tabata yama Pioneronan  Hóben. Un dia nan a hiba nos klas n’e kurá di skol pa e seremonia di instalashon. Mi tabatin hopi miedu, pensando ku nan lo a bai hasi bofon di mi i zundra mi. Tur mucha ku eksepshon di mi a trese nan lensu kòrá nobo for di kas ku ta identifiká nan komo Pioneronan Hóben, i e muchanan a para den un rei largu dilanti e kabes di skol, e maestronan i e muchanan den klasnan mas haltu. Ora nan a manda e últimonan aki mara e lensu rònt di nos garganta, mi a sak mi kabes i wak abou, sperando ku niun hende lo no a presta atenshon na mi.

Hibá na Prizonnan Aislá

Tempu mi tabatin 18 aña nan a sentensiá mi na tres aña di prizon pa motibu ku mi a mantené neutralidat kristian. (Isaias 2:4) E promé aña mi a bai e prizon di Trudovoye, un stat den e Distrito di Vinnitskaya di Ukrania. Einan mi a topa rònt di 30 otro Testigu di Yehova. Nan a manda nos dos-dos bai traha na diferente pòst militar, pasobra e outoridatnan no tabata ke pa nos tabatin kontakto ku otro.

Na ougùstùs 1982, nan a manda ami ku Eduard—un otro Testigu—huntu ku un grupo di otro prezu ku trein (den wagòn di prizon) pa e Serunan Ural den nort. Ocho dia largu nos mester a soportá un kalor teribel i tur primí riba otro te ora nos a yega e Prizon di Solikamsk, den e Distrito di Permskaya. Nan a pone ami ku Eduard kada un den un sèl. Dos siman despues, nan a hiba mi Vels, mas pa nort den e region di Krasnovishersky.

Nos transporte a yega meianochi, i tabata hopi sukú. Apesar di e skuridat, un ofisial a ordená nos grupo pa krusa un riu den boto. Nos no por a mira ni e riu te pa mira e boto! Asina mes, nos a keda fula rònt te ora nos a bin dal den e boto, i ounke nos tabatin yen di miedu, nos a logra krusa e riu. Unabes na otro banda di e riu, nos a sigui kana den direkshon di un lus visibel riba un seru eibanda, kaminda nos a haña un par di tènt. Esakinan mester a bira nos kas nobo. Ami a bai biba den un tènt relativamente grandi huntu ku mas o ménos 30 otro prezu. Durante wenter, nos tabatin ku soportá temperaturanan ku tin biaha tabata baha te na 40 grado Celsius bou di sero, i e tènt no a ofresé muchu komodidat. E trabou prinsipal di e prezunan tabata di kap palu, pero ami tabata konstruí hùt pa prezu.

Alimento Spiritual Ta Yega Nos Komunidat Isolá

Ami tabata e úniko Testigu den e komunidat ei; pero Yehova no a bandoná mi. Un dia a yega un pakete di mi mama, kende tabata biba ainda na wèst Ukrania. Ora un guardia a habri e pakete, e promé kos ku el a mira tabata un Beibel chikitu. El a koh’é i kuminsá blader den dje. Mi a purba pensa riba kiko mi por a bisa pa evitá ku e lo a konfiská e tesoro spiritual aki. Diripiente e guardia a puntra: “Kiko esaki ta?” Promé ku mi por a pensa riba un kontesta, un inspektor ku tabata pará eibanda a kontestá: “Ahn, ta un dikshonario esei ta.” Mi a keda ketu. (Eklesiastés 3:7) E inspektor a listra e sobrá di e pakete i despues a entregá mi e huntu ku e Beibel presioso. Mi a keda asina kontentu ku mi a dun’é algun nechi for di mi pakete. Ora mi a risibí e pakete aki, mi tabata sa ku Yehova no a lubidá mi. El a saka su man generosamente i a perkurá pa mi nesesidatnan spiritual.—Hebreonan 13:5.

Mi A Prediká sin Stòp

Un par di luna despues, mi a keda sorprendí ora mi a risibí un karta di un ruman kristian ku tabata será den un prizon mas o ménos 400 kilometer leu. El a pidi mi pa buska kontakto ku un hòmber ku a mustra interes den Beibel i ku kisas awor ta den mi kampamentu. No tabata sabí pa skirbi un karta indiskreto asina, ya ku outoridatnan tabata listra nos kartanan. Pues no tabata un  sorpresa ku un di e ofisialnan a manda yama mi den su ofisina i a spièrta mi seriamente pa mi no prediká. Anto el a ordená mi pa firma un dokumento ku a deklará ku lo mi stòp di papia ku otro hende tokante mi fe. Mi a kontest’é ku mi no ta komprondé pakiko mi mester firma un deklarashon asina, ya ku tur hende sa kaba ku mi ta un Testigu di Yehova. Mi a puntr’é ku si otro prezu kier a sa dikon mi ta será, kiko mi mester a bisa nan? (Echonan 4:20) E ofisial a realisá ku e no por a intimidá mi, pues el a disidí di kore ku mi. Nan a manda mi un otro kampamentu.

Nan a transferí mi n’e pueblito di Vaya, 200 kilometer leu. Ei mi superiornan a respetá mi posishon kristian i a asigná mi na trabounan no-militar—promé komo karpinté, despues komo elèktrishèn. Pero e trabounan aki a trese otro retonan. Na un okashon, nan a bisa mi pa kohe mi hèrmèntnan i bai na e klup di e pueblo. Ora mi a yega, e sòldánan a keda kontentu di mira mi. Nan tabatin problema pa pone e lusnan ku a dòrna vários di e emblemanan militar funshoná na drechi. Nan tabata ke pa mi yuda drecha nan pasobra nan tabata preparando pa e selebrashon anual di Dia di Ehérsito Kòrá. Despues ku mi a hasi orashon i pensa bon kiko mi mester a hasi, mi a bisa nan ku mi no por a hasi e tipo di trabou ei. Mi a duna nan mi hèrmèntnan i sali bai. Nan a denunsiá mi na e supdirektor, i pa mi sorpresa e hòmber a skucha e kehonan kontra mi i kontestá: “Mi ta respet’é pa esei. E ta un hòmber di prinsipio.”

Animashon for di un Fuente Ku Mi No A Spera

Dia 8 di yüni 1984, despues di a pasa eksaktamente tres aña será, mi a sali liber. Ora mi a regresá Ukrania, mi tabatin ku inskribí den milisia komo un eks-prezu. E ofisialnan a bisa mi ku nan lo a bolbe hibá mi dilanti korte despues di seis luna i ku lo tabata mihó pa mi bandoná e distrito kompletamente. Pues mi a bandoná Ukrania i ku tempu mi a haña trabou na Latvia. Pa un tempu mi por a prediká i asosiá ku e grupo chikitu di Testigu ku tabata biba den e kapital Riga i rònt di dje. Sin embargo, despues di apénas un aña, nan a yama mi atrobe pa servisio militar. Na e ofisina di inskripshon, mi a bisa e ofisial ku ya kaba anteriormente mi a nenga di drenta servisio militar. El a grita mi: “Bo sa realmente kiko bo ta hasiendo? Mi tin gana di sa kiko bo ta bai bisa e teniente koronèl!”

El a kana bai ku mi na un kuarto n’e di dos piso kaminda e teniente koronèl tabata sintá tras di un mesa largu. Esaki a skucha ku sumo atenshon segun ku mi a splika mi posishon i despues el a bisa mi ku ainda mi tabatin tempu pa bolbe pensa riba mi desishon promé ku mi enfrentá e komité enkargá ku inskripshon di miembro. Ora nos a sali for di e ofisina di e teniente koronèl, e ofisial ku a grita mi na promé instante a konfesá: “Awor si mi ta konvensí ku di bèrdat bo tin fe!” Dia mi a presentá dilanti un komité militar, mi a ripití mi posishon neutral i nan a laga mi bai.

 Durante e tempu ei, mi a biba den un motèl. Un anochi mi a tende un hende bati pokopoko na porta. Mi a habri e porta i a topa un hòmber na bachi i ku un tas den man. El a introdusí su mes, bisando: “Mi ta di Siguridat di Estado. Mi sa ku aktualmente bo ta den difikultat i ku nan ta bai husga bo den korte.” Mi a kontestá: “Sí, esei ta korekto.” E hòmber a kontinuá: “Si bo ta dispuesto pa koperá ku nos, nos por yuda bo.” Mi di: “Nò, esei no ta posibel. Lo mi keda leal na mi kreensianan kristian.” Sin hasi ningun esfuerso mas pa konvensé mi, el a bai.

Bèk den Prizon, Bèk den Predikashon

Dia 26 di ougùstùs 1986, e Korte Nashonal di Riga a sentensiá mi na kuater aña di trabou fòrsá, i nan a hiba mi na e Prizon Sentral di Riga. Nan a hinka mi den un sèl grandi huntu ku 40 otro prezu, i mi a purba prediká na kada prezu den e sèl ei. Algun a bisa ku nan ta kere den Dios; otronan a djis hari mi. Mi a ripará ku e hòmbernan tabata partí den grupo, i despues di dos siman e kabesantenan di e gruponan aki a bisa mi ku mi no tabatin mag di prediká, ya ku mi no tabata kumpli ku nan leinan no-skirbí. Mi a splika nan ku mi tabata enkarselá pa nèt e motibu ei, esta, pa motibu ku mi ta obedesé otro leinan.

Mi a sigui prediká diskretamente, i ora mi a haña algun persona ku tabatin inklinashon spiritual, mi a logra studia Beibel ku kuater di nan. Durante nos estudionan, nan tabata skirbi e siñansanan básiko di Beibel den un buki di nota. Un par di luna despues, nan a manda mi un kampamentu di alta siguridat na Valmiera, kaminda mi a traha komo elèktrishèn. Ei mi a haña chèns di studia Beibel ku un otro elèktrishèn ku kuater aña despues a bira Testigu di Yehova.

Dia 24 di mart 1988, nan saka mi for di e kampamentu di alto siguridat i hiba mi un otro den un komunidat djis eibanda. Esei sí tabata un berdadero bendishon, ya ku ei mi a haña mas libertat. Nan a manda mi pa traha na vários sitio di konstrukshon, i konstantemente mi tabata buska oportunidat pa prediká. Frekuentemente, mi tabata pafó di e kampamentu, predikando te anochi lat, pero nunka mi a haña mi ku difikultat ora mi a yega e kampamentu bèk.

Yehova a bendishoná mi esfuersonan. Den e área ei tabata biba un par di Testigu, pero den e stat mes tabatin un so, Vilma Krūmin̗a—un ruman muhé di edat. Ami ku ruman Krūmin̗a a kuminsá kondusí hopi estudio di Beibel ku hóbennan. De bes en kuando, rumannan tabata bini for di Riga pa traha den sirbishi huntu ku nos i algun pionero regular a bini asta for di Leningrad (awor St. Petersburg). Ku yudansa di Yehova, nos a kuminsá vários estudio di Beibel, i pronto mi a drenta e sirbishi di pionero, dedikando 90 ora pa luna na e trabou di prediká.

Dia 7 di aprel 1990, e Korte di Pueblo na Valmiera a atendé mi kaso. Ora e huisio a kuminsá, mi a rekonosé e fiskal. Tabata trata aki di un yònkuman ku ken mi a yega di papia tokante Beibel! El a rekonosé mi i a smail pero no a bisa nada. Ainda mi ta kòrda loke e hues a bisa mi n’e huisio riba e dia ei: “Yurii, e desishon pa enkarselá bo kuater aña pasá tabata ilegal. Nan no mester a kondená bo.” Diripiente mi tabata un hòmber liber!

Un Sòldá di Kristu

Na yüni 1990, mi mester a bolbe inskribí na e ofisina di inskripshon pa mi por a haña pèrmit di residensia na Riga. Mi a drenta e mesun ofisina ku e mesun mesa largu kaminda kuater aña promé mi a bisa e teniente koronèl ku lo mi no drenta servisio militar. E biaha aki, el a lanta para kumindá mi, duna mi man, i bisa mi: “Ta un bèrgwensa ku bo  tabatin ku pasa dor di tur e kosnan aki. Dispensá mi ku kosnan a bai asina.”

Mi a kontest’é: “Mi ta un sòldá di Kristu, i mi tin ku kumpli ku mi enkargo. Ku yudansa di Beibel, abo tambe por disfrutá di loke Kristu a primintí su siguidónan—un bida felis i un futuro eterno.” (2 Timoteo 2:3, 4) E koronèl a kontestá: “No muchu tempu pasá mi a kumpra un Beibel i awor mi ta lesand’e.” Mi tabatin e buki Bo por biba pa semper den Paradijs riba tera huntu ku mi. * Mi a habrié na e kapítulo ku ta splika e señal di e último dianan i a mustr’é kon profesia di Beibel ta relashoná ku nos tempu. Ku apresio profundo e koronèl a duna mi man atrobe i a deseá mi éksito den mi trabou.

Den e tempu ei e kunuku na Latvia tabata kla pa wòrdu kosechá. (Juan 4:35) Na 1991, mi a kuminsá sirbi komo ansiano di kongregashon. Tabatin solamente dos ansiano nombrá den henter e pais! Un aña despues, e úniko kongregashon na Latvia a parti den dos—un di abla latvio i e otro di abla ruso. Ami tabatin e privilegio di sirbi e kongregashon ruso. E kresementu tabata asina rápido ku e siguiente aña nos kongregashon a parti den tres! Ora mi wak bèk, ta bisto ku ta Yehova mes tabata dirigiendo su karnénan na su organisashon.

Na 1998, nan a nombra mi komo pionero spesial na Jelgava, un pueblo ku ta keda 40 kilometer zùitwèst di Riga. E mesun aña ei mi a bira un di e promé rumannan di Latvia ku a ser invitá pa asistí n’e Skol di Entrenamentu Ministerial kondusí den e idioma ruso na Solnechnoye, banda di St. Petersburg, Rusia. Na e skol ei mi a bin mira e importansia pa tin un aktitut amoroso pa asina mi por tin éksito den e ministerio. Loke a impreshoná mi spesialmente, muchu mas ku e kosnan ku nos a siña na e skol, tabata e amor i atenshon ku e famia di Bètel i e instruktornan di e skol tabatin pa nos.

Mi a alkansá un otro logro importante den mi bida na 2001 ora mi a kasa ku Karina, un dushi ruman muhé kristian. Karina a djòin mi den e sirbishi di pionero spesial, i tur dia ora mi mira mi kasá yega kas for di sirbishi di vèlt ku kara kontentu, e ta un estímulo pa mi. En bèrdat, ta un goso grandi pa sirbi Yehova. E eksperensianan difísil bou di e régimen komunista a siña mi konfia den dje kompletamente. Ningun sakrifisio ta demasiado grandi pa esun ku ta deseá di mantené amistat ku Yehova i sostené su soberania. E echo ku mi por a yuda otro hende siña tokante Yehova a duna mi propósito den bida. Tabata un gran onor pa mi por a sirbi Yehova “manera un bon sòldá di Kristu.”—2 Timoteo 2:3.

[Nota]

[Plachi na página 10]

Nan a sentensiá mi na kuater aña di trabou fòrsá i a sera mi den e Prizon Sentral di Riga

[Plachi na página 12]

Den sirbishi huntu ku Karina