Nos Lo Kana den e Nòmber di Yehova Nos Dios

“Pa loke ta nos, nos sí lo kana den e nòmber di [“Yehova,” NW] nos Dios pa semper i semper.”—MIKEAS 4:5.

1. Pa loke ta moralidat, kon e situashon tabata den tempu di Noe, i kon Noe tabata diferente?

E PROMÉ hòmber ku Beibel ta menshoná ku a kana ku Dios tabata Enok. E di dos tabata Noe. Beibel ta konta nos: “Noe tabata un hòmber hustu, perfekto den su generashonnan: Noe tabata kana ku Dios.” (Génesis 6:9) Pa tempu di Noe, humanidat en general a desviá for di adorashon puru. Loke a hasi e situashon pió tabata ku angelnan infiel a forma union innatural ku hende muhé i a produsí yu gigante òf nèfilim, e “hòmbernan poderoso,” òf “hòmbernan di fama” di e tempu ei. Nada straño anto ku e tera a yena ku violensia! (Génesis 6:2, 4, 11) Sin embargo, Noe a demostrá ku e tabata un hòmber ireprochabel i e tabata “un predikadó di hustisia.” (2 Pedro 2:5) Ora Dios a dun’é òrdu pa traha un arka pa konserbá bida, Noe a obedes’é i “konforme tur loke Dios a orden’é, el a hasi.” (Génesis 6:22) Di bèrdat, Noe a kana ku Dios.

2, 3. Ki ekselente ehèmpel Noe a pone pa nos awe?

² Pablo a inkluí Noe riba su lista di testigunan fiel ora el a skirbi: “Pa medio di fe Noe, siendo spièrtá pa Dios tokante di kosnan ku no a wòrdu mirá ainda, ku temor di Dios a prepará un arka pa salbashon di e hendenan di su kas, pa medio di kual el a kondená mundu i a bira un heredero di e hustisia ku ta segun fe.” (Hebreonan 11:7) Ki un ekselente ehèmpel! Siendo sigur ku Yehova su palabra lo ser realisá, Noe a usa su tempu, energia i rekursonan pa por a kumpli ku e mandamentunan di Dios. Den un manera similar, hopi kristian awe ta bira lomba pa oportunidatnan den e mundu aki i ta usa nan tempu, energia i rekursonan pa obedesé Yehova su mandamentunan. Nan fe ta remarkabel i lo resultá den nan propio salbashon i tambe di otro hende.—Lukas 16:9; 1 Timoteo 4:16.

³ Pa Noe i su famia a ehersé fe lo mester tabata mesun difísil ku e tabata pa Enok, e bisawelo di Noe ku nos a trata den e artíkulo anterior. Den tempu di Noe meskos ku den tempu di Enok, adoradónan berdadero tabata un minoria chikitu, apénas ocho persona a resultá fiel i a sobrebibí e Diluvio. Noe a prediká hustisia den un mundu violento i inmoral. Ademas, e ku su famia tabata traha un inmenso arka di palu komo preparashon pa un diluvio mundial, ounke ningun hende no a yega di mira un diluvio asina. Esei lo mester a parse hopi straño pa e hendenan ku tabata opservá nan.

4. Hesus a hala atenshon na ki fayo di e hendenan di Noe su tempu?

⁴ Ta interesante pa nota ku ora Hesus a referí na e dianan di Noe, e no a papia di e violensia, e religion falsu ni di e inmoralidat, pa teribel ku e kosnan ei tabata. E fayo ku Hesus a hala atenshon na dje tabata e echo ku e hendenan a nenga di hasi kaso di e spièrtamentu ku tabata ser duná. El a bisa ku nan tabata “kome i bebe, nan tabata kasa i duna pa kasa, te dia ku Noe a bai den e arka.” Kiko tabatin di  malu den kome, bebe, kasa i duna pa kasa? E hendenan tabata gewon hiba un bida “normal”! Pero tabatin un diluvio na kaminda, i Noe tabata prediká hustisia. Su palabranan i su kondukta lo mester tabata un spièrtamentu pa nan. Sin embargo, segun e Tradukshon di Mundu Nobo, “nan no a hasi kaso te ku e diluvio a bini i a bari nan tur.”—Mateo 24:38, 39.

5. Ki kualidatnan Noe i su famia tabatin mester di dje?

⁵ Ora nos wak bèk na e tempu ei, nos ta mira ku Noe su estilo di bida a demostrá sabiduria. Sin embargo, den e dianan promé ku Diluvio, kurashi tabata nesesario pa ta diferente for di tur otro hende. Noe ku su famia mester tabatin konvikshon firme pa traha e arka inmenso i pa yen’é ku representante di e sortonan di bestia. Akaso algun di e poko hendenan fiel ei a yega di deseá ku nan tabata ménos riparabel i ku nan por a djis hiba un bida “normal”? Asta si tal pensamentu a pasa den nan mente, nan no a debilitá den nan integridat. Despues di hopi-hopi aña—mas ku kualke un di nos lo tin ku perseverá den e sistema di kosnan aki—e fe di Noe a hiba na su salbashon durante e Diluvio. Sin embargo, Yehova a ehekutá huisio riba tur esnan ku tabata hiba un bida “normal” i ku no a hasi kaso di e importansia di e tempu ku nan tabata biba aden.

Violensia un Biaha Mas Ta Asotá Humanidat

6. Despues di Diluvio, ki situashon tabata eksistí ainda?

⁶ Despues ku e awanan di Diluvio a baha, humanidat tabatin un komienso nobo. Sin embargo, hende ainda tabata imperfekto, i “e intenshon di kurason di hende” a sigui ta “malu for di su hubentut.” (Génesis 8:21) Ademas, ounke e demoñonan no por a bisti kurpa humano mas, ainda nan tabata masha aktivo. E mundu di humanidat malbado a demostrá rápidamente ku e tabata “bou di kontròl di e malbado,” i meskos ku awe, adoradónan berdadero tabatin ku lucha kontra “e trampanan di Diabel.”—1 Juan 5:19; Efesionan 6:11, 12.

7. Kon violensia a eskalá den e mundu despues di Diluvio?

⁷ Por lo ménos for di e tempu di Nimròd, e tera despues di Diluvio a yena un biaha mas ku aktonan di violensia humano. Debí na e kresementu di poblashon i e progreso di teknologia, e violensia ei a eskalá den transkurso di tempu. Na prinsipio, tabatin spada, lansa, bog ku flecha, i garoshi di guera. Den tempunan mas resien a bin bazuka i kañon, despues rifel i e artieria sofistiká na komienso di siglo 20. Promé Guera Mundial a introdusí armanan mas spantoso, manera avion, tanki di guera, supmarino i gas venenoso. Den e guera ei, e armanan aki a kosta bida di miónes di hende. Esei tabata un kos inesperá? Nò.

8. Kon Revelashon 6:1-4 a kumpli?

⁸ Na aña 1914, Hesus a keda entronisá komo Rei di Dios su Reino selestial, i “e dia di Señor” a kuminsá. (Revelashon 1:10) Den un vishon ku e buki di Revelashon ta informá di dje, nos ta mira Hesus komo Rei ta kore viktoriosamente riba un kabai blanku. Otro  ginetenan ta siguié, kada un representando un plaga distinto ku ta asotá humanidat. Un di e ginetenan ta kore un kabai kòrá, i na dje a wòrdu permití “pa kita pas for di riba tera, i pa hasi hende mata otro; i un spada grandi a wòrdu duná na dje.” (Revelashon 6:1-4) E kabai aki ku su ginete ta simbolisá guera, i e spada grandi ta representá e destrukshon sin presedente ku guera moderno ku su armanan poderoso ta kousa. Awe e armanan ei ta inkluí armanan nuklear, kada un ku e kapasidat di destruí dies di míles di hende; rakètnan ku por lansa e armanan nuklear ei riba ophetivonan ku ta keda míles di kilometer leu; i tambe armanan kímiko i biológiko sofistiká ku por kousa destrukshon masal.

Nos Sí Ta Hasi Kaso di e Spièrtamentunan di Yehova

9. Kon e mundu djawe ta kompará ku esun ku a eksistí promé ku Diluvio?

⁹ Den tempu di Noe, Yehova a destruí humanidat debí na e violensia ekstremo di hende malbado i tambe di e gigantenan. Kiko di awe? Mundu ta ménos violento ku e tempu ayá? Definitivamente ku nò! Ademas, meskos ku den tempu di Noe, hende awe ta sigui ku nan bida di tur dia, purbando di hiba un bida “normal,” i ta nenga di hasi kaso di e spièrtamentu ku ta ser proklamá. (Lukas 17:26, 27) Tin kualke motibu anto pa nos duda ku Yehova un biaha mas lo destruí humanidat? Nò.

10. (a) Ki spièrtamentu nos ta haña bes tras bes den profesia bíbliko? (b) Kiko ta e úniko proseder sabí pa sigui awe?

¹⁰ Sientos di aña promé ku Diluvio, Enok a profetisá tokante e destrukshon ku lo mester bin den nos tempu. (Hudas 14, 15) Hesus tambe a papia di e binidero “gran tribulashon.” (Mateo 24:21) Otro profetanan a duna spièrtamentu di e tempu ei. (Ezekiel 38:18-23; Daniel 12:1; Joel 2:31, 32) I den e buki di Revelashon nos ta lesa un deskripshon masha bibu di e destrukshon final ei. (Revelashon 19:11-21) Kada un di nos personalmente ta imitá Noe i ta aktivo komo predikadónan di hustisia. Nos ta tuma nota di Yehova su spièrtamentunan i amorosamente nos ta yuda nos próhimo hasi meskos. Pues, meskos ku Noe, nos ta kana ku Dios. De echo, ta masha importante pa ken ku ta deseá bida, sigui kana ku Dios. Kon nos por hasi esei apesar di e preshonnan ku nos ta konfrontá tur dia? Nos tin ku kultivá un fe firme ku Dios su propósito lo ser realisá.—Hebreonan 11:6.

Sigui Kana ku Dios den Tempu Turbulento

11. Den ki manera nos ta imitá kristiannan di promé siglo?

¹¹ Den promé siglo, kristiannan ungí tabata pertenesé na e asina yamá “E Kaminda.”  (Echonan 9:2) Henter nan estilo di bida tabata konsentrá riba fe den Yehova i Hesukristu. Nan a sigui den e kaminda ku nan Shon a kana. Awe, kristiannan fiel ta hasi meskos.

12. Kiko a pasa despues ku Hesus a alimentá un multitut milagrosamente?

¹² E importansia di fe ta keda bisto den un suseso ku a tuma lugá durante Hesus su ministerio. Na un okashon, Hesus milagrosamente a alimentá un multitut di mas o ménos 5.000 hende. E hendenan a keda asombrá i enkantá. Pero tuma nota loke a sosodé despues. Nos ta lesa: “Ora ku e hendenan a mira e milager ku Hesus a hasi, nan a bisa: ‘Esaki berdaderamente ta e profeta ku mester a bin den mundu.’ Hesus anto, sabiendo ku nan tabatin intenshon di bin i gar’é pa hasié rei, a retirá atrobe bai riba e seru, e so.” (Juan 6:10-15) E anochi ei el a bai un otro kaminda. E echo ku Hesus a nenga di bira rei probablemente a desepshoná hopi hende. Al fin i al kabo, el a demostrá ku e tabata sufisiente sabí pa ta rei i ku e tabatin e poder pa satisfasé e hendenan su nesesidatnan físiko. Sin embargo, no tabata Yehova su tempu ainda p’e goberná komo Rei. Ademas, Hesus su Reino lo tabata selestial, no terenal.

13, 14. Ki punto di bista hopi disipel a revelá, i kon nan fe a ser di tèst?

¹³ Pero e multitut tabata desididu i a sigui Hesus i a hañ’é “na e otro banda di laman,” segun e relato di Juan. Dikon nan a siguié apesar ku el a rechasá nan esfuerso pa hasié rei? Ku nan akshon, hopi di nan a revelá ku nan tabatin un punto di bista karnal, papiando enfátikamente di e provishonnan material ku Yehova a perkurá den desierto den tempu di Moisés. Indirektamente nan a duna di komprondé ku Hesus lo mester a sigui perkurá materialmente pa nan. Hesus a ripará nan mal motivashon, i el a kuminsá siña nan bèrdatnan spiritual ku lo por a yuda ahustá nan manera di pensa. (Juan 6:17, 24, 25, 30, 31, 35-40) Komo reakshon, algun a murmurá kontra dje, foral ora ku el a papia e ilustrashon aki: “Di bèrdat, di bèrdat, mi ta bisa boso, si boso no kome e karni di e Yu di hende i bebe su sanger, boso no tin bida den boso. Esun ku kome mi karni i bebe mi sanger tin bida eterno, i lo mi lant’é den e último dia.”—Juan 6:53, 54.

¹⁴ Hesus su ilustrashonnan hopi biaha a motivá hende pa demostrá si di bèrdat nan tabata deseá di kana ku Dios. E ilustrashon aki no tabata un eksepshon. El a kousa reakshonnan fuerte. Nos ta lesa: “Hopi di su disipelnan, ora nan a tende esaki, a bisa: ‘E diskurso aki ta ofensivo; ken por skuch’é?’” [NW] Hesus e ora ei a splika nan ku nan mester buska e nifikashon spiritual di su palabranan. El a bisa: “Ta e spiritu ta esun ku ta duna bida; e karni no bal nada; e palabranan ku mi a papia ku boso ta spiritu i ta bida.” Sin embargo, hopi di nan no kier a skucha, i e relato ta informá nos: “Komo resultado di esaki hopi di su disipelnan a retirá i no tabata kana kuné mas.”—Juan 6:60, 63, 66.

15. Ki punto di bista korekto algun di e siguidónan di Hesus tabatin?

¹⁵ Pero no ta tur disipel di Hesus a reakshoná na e manera ei. Ta bèrdat ku e disipelnan leal no a komprondé bon-bon kiko Hesus a bisa. Tòg nan konfiansa den dje a keda masha  firme. Pedro, un di e disipelnan leal aki, a ekspresá e sintimentu di tur ku sí a keda ora el a bisa: “Señor, serka ken nos lo bai? Abo tin e palabranan di bida eterno.” (Juan 6:68) Ki un aktitut ekselente i ki un tremendo ehèmpel!

16. Kon nos por ser di tèst, i ki punto di bista korekto nos mester kultivá?

¹⁶ Nos awe por ser di tèst meskos ku e promé disipelnan ei. Den nos kaso, nos lo por ta desapuntá ku Yehova su promesanan no ta kumpliendo lihé manera nos personalmente lo tin gana di mira nan kumpli. Nos lo por sinti ku e splikashonnan di e Skritura den nos publikashonnan basá riba Beibel ta difísil pa komprondé. E komportashon di un ruman kristian lo por desepshoná nos. Lo ta korekto pa stòp di kana ku Dios pa e motibunan aki òf otronan similar? Klaru ku nò! E disipelnan ku a bandoná Hesus a demostrá ku nan manera di pensa tabata karnal. Nos tin ku evitá di hasi meskos.

“Nos No Ta di Esnan Ku Ta Hala Atras”

17. Kiko por yuda nos sigui kana ku Dios?

¹⁷ Apòstel Pablo a skirbi: “Tur Skritura ta inspirá pa Dios.” (2 Timoteo 3:16) Via e páginanan di Beibel, Yehova ta bisa nos bon kla: “Esaki ta e kaminda, kana den dje.” (Isaias 30:21) Obedensia na e Palabra di Dios ta yuda nos ‘mira bon kon nos ta kana.’ (Efesionan 5:15) Studia Beibel i meditá riba loke nos ta siña ta yuda nos sigui ‘kana den bèrdat.’ (3 Juan 3) En realidat, manera Hesus a bisa, “ta e spiritu . . . ta duna bida; e karni no bal nada.” E úniko guia konfiabel pa dirigí nos pasonan ta guia spiritual, ku ta bin mediante Yehova su Palabra, su spiritu i su organisashon.

18. (a) Ki kosnan ku no ta sabí algun kristian ta hasi? (b) Ki klase di fe nos ta kultivá?

¹⁸ Awe, esnan ku ta bira malkontentu debí na un manera di pensa karnal òf debí na ekspektativanan ku no a kumpli hopi bes ta kuminsá bai tras di tur loke e mundu aki tin di ofresé. Nan ta pèrdè nan sentido di urgensia i nan no ta mira e nesesidat mas pa ‘keda alerto.’ Ademas, nan ta skohe pa sigui tras di metanan egoista en bes di pone interesnan di Reino na promé lugá. (Mateo 24:42) Kana den e manera ei no ta niun tiki sabí. Tuma nota di e palabranan di apòstel Pablo: “Nos no ta di esnan ku ta hala atras pa destrukshon, sino di esnan ku tin fe pa preservashon di e alma.” (Hebreonan 10:39) Meskos ku Enok i Noe, nos ta biba den tempu turbulento, anto meskos ku nan, nos tin e privilegio di kana ku Dios. Dor di hasi esei, nos tin e speransa sigur ku nos lo mira Yehova su promesanan kumpli, maldat ser destruí i e komienso di un hustu mundu nobo. Ki un prospekto maravioso!

19. Kon Mikeas ta deskribí e kaminda di adoradónan berdadero?

¹⁹ E profeta inspirá Mikeas a bisa di e nashonnan di mundu ku nan lo a kana “kada un den e nòmber di su dios.” Kaba el a papia di su mes i otro adoradónan fiel i a bisa: “Pa loke ta nos, nos sí lo kana den e nòmber di [“Yehova,” NW] nos Dios pa semper i semper.” (Mikeas 4:5) Si bo tin mesun determinashon ku Mikeas, keda serka di Yehova sin importá kon turbulento nos tempu bira. (Santiago 4:8) Laga e deseo sinsero di kada un di nos ta pa kana ku Yehova nos Dios awor i pa eternidat!

Kon Lo Bo Kontestá?

• Ki similaridatnan tin entre e tempu di Noe i awe?

• Ki kaminda Noe i su famia a sigui, i kon nos por imitá nan fe?

• Ki punto di bista robes algun siguidó di Hesus tabatin?

• Kiko kristiannan berdadero ta determiná pa hasi?

[Preguntanan di Estudio]

[Plachinan na página 20]

Meskos ku den tempu di Noe, awendia hende ta kompletamente apsorbá den nan aktividatnan diario

[Plachi na página 21]

Komo predikadónan di Reino, “nos no ta di esnan ku ta hala atras”