Pregunta di Lektor

Ki base tin pa bisa ku frasenan ku ta menshoná esun “kende so tin inmortalidat” i esun “kende ningun hende no a mira ni por mira” ta referí na Hesus i no na Yehova Dios?

Apòstel Pablo a skirbi: “Kual [aparishon] e lo manifestá na su debido tempu—Esun, kende ta e bendishoná i e úniko Soberano, e Rei di reinan, i Señor di señornan; kende so tin inmortalidat i ta biba den e lus inaksesibel; kende ningun hende no a mira ni por mira.”—1 Timoteo 6:15, 16.

Komentaristanan bíbliko por lo general ta rasoná: ‘Kon e frasenan ei—manera por ehèmpel esun “kende so tin inmortalidat,” e “úniko Soberano” i esun “kende ningun hende no a mira ni por mira”—por ta señalá na un otro persona ku no ta e Todopoderoso?’ Ta sierto ku por usa e ekspreshonnan ei pa deskribí Yehova. Sin embargo, e konteksto ta indiká ku na 1 Timoteo 6:15 i 16, Pablo tabata referí spesífikamente na Hesus.

Na fin di versíkulo 14, Pablo ta menshoná “e aparishon di nos Señor Hesukristu.” (1 Timoteo 6:14) P’esei ora Pablo ta skirbi den versíkulo 15 “kual [“aparishon,” NW] e lo manifestá na su debido tempu,” e ta referí na un aparishon di Hesus, no di Yehova Dios. Ken anto ta e “úniko Soberano”? Ta parse rasonabel pa konkluí ku Hesus ta e Soberano ku Pablo ta referí na dje. Dikon? E konteksto ta duna di komprondé ku Pablo ta komparando Hesus ku gobernantenan humano. Hesus di bèrdat ta, manera Pablo a skirbi, “Rei di reinan [humano], i Señor di señornan [humano].” * Sí, kompará ku nan, Hesus ta e “úniko Soberano.” Na Hesus a wòrdu duná “dominio, gloria i un reino, pa tur pueblo, nashon i hende di tur idioma por sirbié.” (Daniel 7:14) Ningun soberano humano por bisa di tin derecho riba esei!

Kiko di e frase “kende so tin inmortalidat”? Atrobe, ta un komparashon ta ser hasí entre Hesus i reinan humano. Ningun gobernante terenal por bisa ku el a haña inmortalidat, pero Hesus sí por bisa esei. Pablo a skirbi: “Sabiendo ku Kristu, siendo lantá for di e mortonan, lo no muri nunka mas; morto no tin dominio mas riba dje.” (Romanonan 6:9) Pues, Hesus ta e promé persona deskribí den Beibel ku a haña e don di inmortalidat. Sí, tempu ku Pablo a skirbi su karta, Hesus tabata e úniko ku a alkansá bida indestruktibel.

Nos mester tene na mente tambe ku lo tabata robes pa Pablo bisa ku Yehova Dios so tabatin inmortalidat, ya ku Hesus tambe tabata inmortal ora ku Pablo a skirbi e palabranan ei. Pero Pablo por a bisa ku Hesus so tabata inmortal na komparashon ku gobernantenan humano.

Ademas, ta definitivamente bèrdat ku despues di Hesus su resurekshon i subimentu na shelu, e por ser deskribí komo esun ku “ningun hende no a mira ni por mira.” Ta sierto ku Hesus su disipelnan ungí lo a mir’é despues ku nan mes a muri i haña resurekshon pa shelu komo kriaturanan spiritual. (Juan 17:24) Pero ningun hende riba tera lo a mira Hesus den su estado glorifiká. Pues, di bèrdat por bisa ku desde Hesus su resurekshon i subimentu na shelu, en realidat “ningun hende” no a mira Hesus.

Ta bèrdat ku na promé bista por parse komo si fuera e deskripshonnan ku tin na 1 Timoteo 6:15 i 16 lo por ta apliká na Dios. Pero e konteksto di e palabranan di Pablo—huntu ku e evidensia di otro tekstonan bíbliko—ta mustra ku Pablo tabata referí na Hesus.

[Nota]