Dios òf Hende?

“AMI ta e lus di mundu; esun ku sigui mi lo no kana den skuridat, ma lo tin e lus di bida.” (Juan 8:12) Esakinan tabata palabranan di Hesukristu. Relashoná kuné, un hòmber eduká di promé siglo a skirbi: “Den [dje] tur e tesoronan di sabiduria i konosementu ta skondí.” (Kolosensenan 2:3) Ademas, Beibel ta bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Konosementu eksakto tokante Hesus ta masha importante pa nos por satisfasé nos nesesidat spiritual.

Hende rònt mundu a yega di tende di Hesukristu. No tin duda ku e tabatin influensia riba historia di humanidat. De echo, e kalènder ku mayoria parti di mundu ta usa ta basá riba e aña ku nan ta pensa ku el a nase. The World Book Encyclopedia ta splika: “Hopi hende ta referí na fechanan promé ku e aña ei komo P.K., òf promé ku Kristu. Pa fechanan despues di e aña ei, nan ta usa A.D., òf anno Domini (den e aña di nos Señor).”

Sin embargo, hende tin ideanan kontradiktorio tokante ken Hesus tabata. Pa algun e tabata djis un hòmber sobresaliente ku a marka historia. Sin embargo, tin otronan ku ta ador’é komo Dios Todopoderoso. Algun miembro dje religion hindú a kompará Hesukristu ku e dios hindú, Krishna, ku segun hopi hende tabata un dios den kurpa di hende. Hesus tabata simplemente un hende, òf e tabata un persona ku otronan mester adorá? Ken eksaktamente e tabata? Di unda el a bini? Ki klase di persona e tabata? I unda e ta aworakí? Manera nos lo mira den e siguiente artíkulo, e buki ku tin hopi di bisa di Hesus ta duna kontestanan verídiko riba e preguntanan aki.