“E Temor di Señor, Ta Esei Ta Sabiduria”

“EKONKLUSHON di tur loke ku a wòrdu tendí, ta: teme Dios i warda su mandamentunan, pasobra esaki ta aplikabel na kada persona.” (Eklesiastés 12:13) Na e konklushon profundo ei Rei Salomon di Israel di antigwedat a yega bou di inspirashon divino! E patriarka Jòb tambe a komprondé e importansia di teme Dios, pasobra el a bisa: “Mira, e temor di SEÑOR, ta esei ta sabiduria; i pa apartá for di maldat ta komprondementu.”—Jòb 28:28.

Beibel ta duna hopi importansia na teme Yehova. Pakiko ta sabí pa nos kultivá un temor respetuoso di Dios? Den ki manera e temor ei ta benefisiá nos—komo persona i komo un grupo di adoradónan berdadero? Versíkulo 26 pa 35 di Proverbionan kapítulo 14 ta kontestá e preguntanan aki. *

Fuente di “Konfiansa Fuerte”

Salomon ta deklará: “Den e temor di SEÑOR tin konfiansa fuerte, i su yunan lo tin un lugá di refugio.” (Proverbionan 14:26) E fuente di konfiansa di un hende ku tin temor di Dios ta Yehova, e Dios leal i todopoderoso. Nada straño ku e hende ei ta enfrentá futuro ku un konfiansa fuerte! E tin un futuro largu i bendishoná su dilanti.

Pero kiko nos por bisa di e futuro di e personanan ku ta pone nan konfiansa den mundu—su plannan, su organisashonnan, su ideologianan i su poseshonnan? Kualke futuro ku nan ta spera di haña lo ta kòrtiku, pasobra Beibel ta deklará: “E mundu ta pasa bai i su deseonan tambe, ma esun ku hasi e boluntat di Dios ta permanesé pa semper.” (1 Juan 2:17) Tin kualke motibu anto pa nos “stima mundu [i] e kosnan ku tin den mundu”?—1 Juan 2:15.

Ki medida mayornan ku tin temor di Dios por tuma pa garantisá ku “lo tin un lugá di refugio” pa nan yunan? E salmista a kanta: “Bin, yunan, skucha mi; lo mi siña boso e temor di SEÑOR.” (Salmo 34:11) Ora yunan siña teme Dios a base di e ehèmpel i instrukshon di nan mayornan, nan tin mas chèns di krese bira hòmber- i muhénan ku tin konfiansa fuerte den Yehova.—Proverbionan 22:6.

Salomon ta kontinuá: “E temor di SEÑOR ta un fuente di bida, pa evitá e trampanan di morto.” (Proverbionan 14:27) E temor di Yehova ta “un fuente di bida” pasobra e Dios berdadero ta “e fuente di awa bibu.” (Jeremias 2:13) E konosementu ku nos ta gana di Yehova i di Hesukristu por hiba nos na bida eterno. (Juan 17:3) Ademas, temor di Dios ta yuda nos evitá e trampanan di morto. Kon asina? Proverbionan 13:14 ta deklará: “Siñansa di e hende sabí ta un fuente di bida, pa evitá e trampanan di morto.” Ora nos teme Yehova, obedesé su lei i laga su Palabra guia nos pasonan, nos lo ta protehá kontra práktika- i emoshonnan dañino ku por hiba na un morto prematuro, no ta bèrdat?

 “Gloria di un Rei”

Durante e mayor parti di su reinado, Salomon tabata un rei temeroso di Dios ku a obedesé Yehova. Esaki a resultá den un gobernashon eksitoso. Kiko ta determiná kon bon un rei ta goberná? Proverbionan 14:28 ta kontestá: “Un poblashon grandi ta gloria di un rei, ma skarsedat di hende ta ruina di un prens.” Loke ta determiná e éksito di un rei ta e bienestar di su súpditonan. Si un parti grandi di e poblashon ta deseá di keda bou di su liderato, esei ta rekomend’é komo un bon gobernante. Salomon tabatin “súpditonan di laman [Kòrá] te laman [Mediteráneo] i dje Riu [Eufrates] te na e finnan di tera.” (Salmo 72:6-8, NW) Su gobernashon tabata karakterisá pa un pas i prosperidat sin presedente. (1 Reinan 4:24, 25) E reinado di Salomon tabata un éksito. Di otro banda, falta di respaldo di parti di e poblashon ta indiká bèrgwensa pa un prens òf gobernante.

Den e konteksto aki, kiko nos por bisa tokante e gloria di e Salomon Mayor, e Rei Mesiániko, Hesukristu? Pensa riba e súpditonan ku e tin te awe. For di un ekstremo te na otro ekstremo di e tera aki, mas ku seis mion hòmber i muhé ku ta teme Dios a skohe kaba pa biba bou di e liderato di Kristu. Nan tin fe den Hesus i ta uní den adorashon berdadero di e Dios bibu. (Juan 14:1) Pa fin di e Reino di Mil Aña, tur e personanan ku ta den e memoria di Dios lo a ser resusitá. Pa e tempu ei lo tin un paradeis riba tera yen di hende kontentu i hustu ku a manifestá gratitut pa nan Rei. Esei sigur lo duna prueba di e éksito di Kristu su gobernashon! Laga nos tene duru na nos maravioso speransa di Reino.

Benefisionan Spiritual i Físiko

Temor respetuoso di Dios por duna nos un kurason trankil i pas mental. Nos por bisa esaki pasobra dos di e hopi fasetanan di sabiduria ta bon huisio i disernimentu. Proverbionan 14:29 ta deklará: “Esun ku no ta rabia lihé tin gran komprondementu, ma esun ku ta rabia lihé ta halsa bobedat.” Komprondementu òf disernimentu ta yuda nos realisá ku rabia deskontrolá tin un efekto perhudisial riba nos spiritualidat. E obranan ku lo por stroba nos di “heredá e reino di Dios” ta entre otro “hostilidat, bringamentu, yalursheit, rabiamentu, pleitamentu.” (Galationan 5:19-21) Segun e konseho di Beibel, asta ora nos tin motibu pa rabia, nos no mester keda den e estado ei. (Efesionan 4:26, 27) I falta di pasenshi por pone nos papia i kometé un ke otro bobedat ku lo duel nos despues.

Mustrando riba e efektonan físiko negativo di rabia, e rei di Israel ta bisa: “Un kurason trankil ta bida pa e kurpa, ma envidia ta putrimentu di wesu.” (Proverbionan 14:30) Rabia i furia por kousa vários enfermedat, manera problema ku halamentu di rosea, preshon haltu, mal funshonamentu di higra i daño na pánkreas. Ademas, dòkternan ta bisa ku rabia i furia ta emoshonnan ku ta empeorá òf asta kousa enfermedatnan manera úlsera, asma, iritashon i malesa di kueru i problema ku digestion. Di otro banda, “un kurason trankil ta bida pa e kurpa.” (Proverbionan 14:30) Ta sabí anto pa nos “buska e kosnan ku ta trese pas i edifikashon di otro.”—Romanonan 14:19.

Temor di Dios Ta Yuda Nos pa Ta Imparsial

Salomon ta bisa: “Esun ku oprimí e pober [“e persona di kondishon humilde,” NW] ta insultá Esun ku a trah’é, ma esun ku tene miserikòrdia di esun den nesesidat ta onr’é.” (Proverbionan 14:31) Un hende ku tin temor di Dios ta realisá ku ta e mesun persona, Yehova Dios, a traha tur hende. P’esei, e persona di kondishon humilde ta nos próhimo, i e manera ku nos ta trat’é tin su refleho riba e Kreadó di humanidat. Pa nos glorifiká Dios, nos tin ku trata otro na un manera hustu i imparsial. E kristian di poko rekurso mester  risibí atenshon spiritual sin parsialidat. Nos tin ku alkansá tantu pober komo riku ku e bon nobo di e Reino di Dios.

Refiriendo na un otro benefisio di temor di Dios, e rei sabí ta bisa: “E malbado ta keda bentá abou den su maldat, ma e hustu tin un refugio na ora di su morto [“den su integridat,” NW].” (Proverbionan 14:32) Kon e malbado ta keda bentá abou den su maldat? Algun erudito ta bisa ku esaki ta nifiká ku e persona aki no tin niun posibilidat pa rekuperá ora e haña su mes den un kalamidat. Di otro banda, ora e hende ku ta teme Dios haña su mes ku kontratempu, e ta buska refugio den su integridat na Dios. Ku pleno konfiansa den Yehova te na morto, e ta demostrá e mesun determinashon ku Jòb tabatin, kende a bisa: “Te na mi morto lo mi no bandoná mi integridat.”—Jòb 27:5.

Pa un persona mantené integridat, e mester tin temor di Dios i sabiduria. I unda e por haña sabiduria? Proverbionan 14:33 ta kontestá: “Sabiduria ta reposá den kurason di esun ku tin komprondementu, i asta entre e bobonan e ta hasi su mes konosí.” Sí, sabiduria por ser hañá den kurason di e hende ku tin komprondementu. Pero den ki manera e ta hasi su mes konosí entre e bobonan? Segun un buki di referensia, “e persona bobo, ansioso pa laga parse ku e ta sabí, ta papia purá-purá loke e ta kere ta sabiduria pero e mes ta bira kombertié den bobedat.”

“Loke Ta Halsa un Nashon”

Kambiando di enfoke, e rei di Israel ta hala nos atenshon awor riba kon temor di Dios ta afektá henter un nashon, i no un solo individuo: “Hustisia ta halsa un nashon, ma piká ta un bèrgwensa pa kualke nashon.” (Proverbionan 14:34) E prinsipio aki a keda demostrá bon kla den e kaso di e nashon di Israel! Tempu ku Israel a pega na e normanan haltu di Dios, el a ser halsá riba e nashonnan rònt di dje. Sin embargo, e frekuente aktonan di desobedensia a hiba na bèrgwensa, i ku tempu, Yehova a asta rechasá Israel. E prinsipio aki ta konta pa e pueblo di Dios awe tambe. E kongregashon kristian ta diferente for di mundu pa motibu ku e ta pega na e prinsipionan hustu di Dios. Sin embargo, pa nos mantené e posishon elevá ei, kada un di nos personalmente tin ku hiba un bida desente. Si nos praktiká piká, esei ta trese solamente bèrgwensa pa nos mes i tambe reproche riba e kongregashon i riba Dios.

Relashoná ku loke ta duna un rei plaser, Rei Salomon ta bisa: “Rei tin delisia den un sirbidó sabí, ma su rabia ta kontra esun ku ta kousa bèrgwensa.” (Proverbionan 14:35) I Proverbionan 16:13 ta deklará: “Lepnan hustu ta e delisia di reinan, i nan ta stima esun ku ta papia loke ta korekto.” Sí, nos Lider i Rei, Hesukristu, tin delisia ora nos ta aktua na un manera hustu i sabí, i tambe ora nos ta usa nos lepnan den e aktividat di prediká e Reino i hasi disipel. Sí, laga nos keda okupá anto den e obra ei segun ku nos ta disfrutá di e bendishonnan ku ta bini pa hende ku ta teme e Dios berdadero.

[Nota]

[Plachi na página 15]

Temor di Dios ta algu ku hende por siña