‘Mi Yudansa Ta Bin for di Yehova’

Hopi Hende Ta Aseptá Adorashon di Yehova

PROFESIANAN di Beibel relashoná ku nos tempu a mustra ku hende di tur nashon lo basha bai na e adorashon elevá di Yehova. Por ehèmpel, mediante profeta Hageo, Yehova Dios a deklará: “Lo mi sagudí tur e nashonnan; i nan lo bin ku e rikesa di tur nashon; i lo mi yena e kas aki ku gloria.” (Hageo 2:7) Tantu Isaias komo Mikeas a profetisá ku durante nos tempu—“den e último dianan”—nashonnan i pueblonan lo adorá Yehova den un forma aseptabel.—Isaias 2:2-4; Mikeas 4:1-4.

E profesianan ei realmente ta kumpliendo awe? E echonan ta papia pa nan mes. Durante e último dies añanan so, mas ku 3.110.000 persona nobo a dediká nan mes na Yehova den mas ku 230 pais. Sí, 6 di kada 10 Testigu di Yehova ku ta sirbiendo rònt mundu aktualmente a batisá durante e último dékada. Na 2004, komo promedio, kada dos minüt e kongregashon kristian a haña un miembro nobo aserka, esta, un sirbidó dediká di Dios! *

Meskos ku den e promé siglo, awe ‘un gran kantidat a bira kreyente i a kombertí na Señor.’ Ounke e oumento na kantidat riba su mes no ta un prueba di e bendishon di Dios, e ta duna evidensia sí ku e “man di Señor” ta ku su pueblo. (Echonan 11:21) Kiko ta pone miónes di hende adorá Yehova? I ki efekto e desaroyo aki tin riba bo personalmente?

Hende di Bon Kurason Ta Ser Atraí

Hesus a deklará den un forma hopi direkto: “Ni un hende no por bin serka mi, si no ta e Tata ku a manda mi a hal’é.” (Juan 6:44) P’esei, finalmente, Yehova ta responsabel pa atraé hende ku tin “e disposishon korekto pa bida eterno.” (Echonan 13:48, NW) E spiritu di Dios por pone hende realisá ku nan tin un nesesidat spiritual. (Mateo 5:3) Un konsenshi molestiá, un búskeda desesperá pa haña speransa òf un krísis profundo por pone algun hende buska Dios i asina siña tokante su propósito pa humanidat.—Marko 7:26-30; Lukas 19:2-10.

Hopi hende ta sinti nan atraí na e adorashon di Yehova ya ku e programa di edukashon bíbliko di e kongregashon ta yuda nan haña kontesta pa preguntanan ku tin nan konfundí.

“Si ta eksistí un Dios, pakiko ainda tin tantu inhustisia?” Esei tabata e pregunta ku a tormentá Davide, un diler den droga na Italia. E no tabata ègt interesá den religion, p’esei el a hasi e pregunta desafiante aki mas bien pa lanta un diskushon. El a bisa: “Mi no a kere ku lo mi a bai haña un kontesta rasonabel i konvinsente. Pero e Testigu ku a papia ku mi tabatin hopi pasenshi i a proba tur loke el a bisa ku pasashinan di Beibel. E kòmbersashon ei tabatin un efekto profundo riba mi.” Awe, Davide a drecha su bida i ta sirbi Yehova.

 Otronan, den nan afan pa sa kiko ta e nifikashon i propósito di bida, ta haña e kaminda ku ta hiba na e parti terenal di Yehova su organisashon. Un sikiatra na Zagrep, Kroasia, ku tabata buskando un terapia pa su mes problemanan emoshonal, a bishitá un kolega famoso. Pa su sorpresa, e dòkter a dun’é e number di telefòn di e sukursal di Testigu di Yehova na Zagrep, i tambe e nòmber di un Testigu ku e tabata konosé. El a bis’é: “Wak, ami ta kere ku e hendenan aki por yuda bo. Si mi manda bo bai misa, úniko kos ku lo bo haña ta estatua sin bida—niun hende no ta bisa nada i tur kos ta skur. Mi no ta kere ku misa por yuda bo. Mi a manda otro pashènt serka Testigunan di Yehova, i mi ta kere ku esei lo ta e mihó kos pa bo tambe.” Gustosamente, e Testigunan a bishit’é i poko despues a kuminsá un estudio di Beibel kuné. Despues di un par di siman, e sikiatra ei a deklará yen di goso ku konosementu di e propósito di Dios a duna su bida nifikashon.—Eklesiastés 12:13.

Hopi hende ku a haña nan ku un krísis personal a ripará ku ta e bèrdat di Beibel so por duna berdadero konsuelo. Na Gresia, un mucha hòmber di shete aña a kai for di dak di su skol i muri. Un par di luna despues, dos Testigu a topa su mama i a trata na konsol’é dor di papia kuné tokante e speransa di resurekshon. (Juan 5:28, 29) Ora e señora a tende esei, el a kuminsá yora. E ruman muhénan a puntr’é: “Si bo ke sa mas tokante Beibel, ki dia nos por bishitá bo?” “Aworakí mes!” el a kontestá. E señora a hiba nan su kas i nan a kuminsá un estudio di Beibel kuné. Awe, henter su famia ta sirbiendo Yehova.

Bo Ta Hasiendo Bo Parti?

E tipo di eksperensianan aki ta tumando lugá rònt mundu. Yehova ta rekohiendo i ta entrenando un multitut grandi di adoradónan berdadero for di tur nashon. E grupo internashonal aki tin e perspektiva di sobrebibí e binidero fin di e mundu malbado aki i sigui biba den un hustu mundu nobo.—2 Pedro 3:13.

Komo resultado di Yehova su bendishon, no tin nada ku por stroba e trabou di rekohementu sin presedente aki di kumpli. (Isaias 55:10, 11; Mateo 24:3, 14) Abo ta partisipando selosamente den e aktividat aki di prediká e Reino? Si ta asina, bo por konta ku e respaldo di Dios i bo por ripití e palabranan aki di e salmista: ‘Mi yudansa ta bin for di Yehova.’—Salmo 121:2.

[Nota]

[Komentario na página 9]

“Ni un hende no por bin serka mi, si no ta e Tata ku a manda mi a hal’é.”—JUAN 6:44

[Kuadro na página 8]

KEN TA TRAS DI E OUMENTO AKI?

“Si SEÑOR no traha e kas, ta en bano esnan ku ta trah’é ta traha kansa kurpa.”—Salmo 127:1.

“Dios a duna kresementu. Asina anto, ni esun ku ta planta ni esun ku ta muha no ta nifiká nada, sino Dios, kende ta duna kresementu.” —1 Korintionan 3:6, 7.