Ken Hesukristu Ta?

IMAGINÁ bo kon emoshoná e hóben hudiu Andres lo tabata ora ku pa promé bes el a tende e palabranan di Hesus di Názarèt! Beibel ta bisa ku Andres a kore bai serka su ruman hòmber i a bis’é: “Nos a haña e Mesias [òf, Kristu].” (Juan 1:41) Na e idiomanan hebreo i griego, e palabranan ku generalmente ta ser tradusí komo “Mesias” i “Kristu” ta nifiká “E Ungí.” Hesus tabata E Ungí, òf E Skohí di Dios: e Lider primintí. (Isaias 55:4) Den e Skritura tabatin profesianan ku a papia di dje i e tempu ei e hudiunan, yen di ekspektativa, tabata spera riba dje.—Lukas 3:15.

Kon nos por sa ku Hesus realmente tabata E Skohí di Dios? Laga nos konsiderá loke a sosodé na aña 29 di nos era, tempu ku Hesus tabatin 30 aña di edat. El a bai serka Juan Boutista pa Juan batis’é den e awa di Riu Hordan. Beibel ta bisa: “I despues di a wòrdu batisá, Hesus a sali mesora for di awa; i ata, e shelunan a wòrdu habrí i el a mira e spiritu di Dios baha manera un palomba i keda riba dje. I ata, un bos for di e shelunan, bisando: ‘Esaki ta mi Yu stimá, den kende mi tin goso.’” (Mateo 3:16, 17) Despues ku Juan a tende e palabranan di aprobashon ei lo e no por tabatin ningun duda ku Hesus tabata E Skohí di Dios, no ta bèrdat? Dor di a drama Su spiritu santu riba Hesus, Yehova Dios a ungié òf nombr’é komo esun ku lo bira Rei di Su binidero Reino. Asina Hesus a bira Hesukristu òf Hesus E Ungí. Pero den ki sentido Hesus tabata e Yu di Dios? Di unda el a bin?

Su Orígen Tabata “for di Hopi Tempu Pasá”

Nos por dividí Hesus su bida den tres etapa. Esun di promé a kuminsá hopi tempu promé ku el a nase komo hende. Mikeas 5:2 ta bisa ku su orígen ta “for di hopi tempu pasá, for di e dianan di eternidat.” Hesus mes a bisa: “Ami ta di ariba,” esta di shelu. (Juan 8:23) E tabata biba den shelu komo un persona spiritual poderoso.

Siendo ku tur kos ku a ser kreá tabatin un prinsipio, tabatin un tempu ku Dios so tabata eksistí. Sin embargo, un kantidat inkontabel di siglonan pasá, Dios a bira Kreadó. Ken el a krea promé? E último buki di Beibel ta identifiká Hesus komo “e prinsipio di e kreashon di Dios.” (Revelashon 3:14) Hesus ta “e primogénito di henter kreashon.” Esei ta asina “pasobra pa medio di dje tur kos a wòrdu kreá, tantu den e shelunan komo riba tera, visibel i invisibel.” (Kolosensenan 1:15, 16) Sí, Hesus tabata e úniko ku Dios a krea direktamente. P’esei Beibel ta yam’é Dios su “Yu unigénito.” (Juan 3:16) E Yu primogénito tin tambe e título “e Palabra.” (Juan 1:14) Dikon? Pasobra promé ku el a nase komo hende, el a sirbi den shelu komo un persona ku a papia pa Dios.

“E Palabra” tabata huntu ku Yehova Dios “na prinsipio” ora ku “shelunan i tera” a ser kreá. E tabata e persona ku Dios a bisa: “Laga nos traha hende segun nos imágen.” (Juan 1:1; Génesis 1:1, 26) Yehova su Yu primogénito tabata einan na lado di su Tata, trahando aktivamente huntu kuné. Komo tal, e ta ser representá na Proverbionan 8:22-31, bisando: “Mi tabata na [e Kreadó] su lado, manera un trahadó eksperto, i dia tras dia mi tabata su delisia, regosihando semper su dilanti.”

Yehova Dios i su Yu unigénito lo mester a sera un relashon estrecho ku otro segun ku nan tabata traha huntu! E asosiashon es trecho ei ku Yehova pa un kantidat inkontabel di siglo tabatin un influensia profundo riba e Yu di Dios. E Yu obedesidu aki a bira presis manera su Tata, Yehova. De echo, Kolosensenan 1:15 ta yama Hesus “e imágen di e Dios invisibel.” Esaki ta un motibu pakiko konosementu di Hesus ta masha importante den satisfasé nos nesesidat spiritual i nos deseo natural di konosé Dios. Tur loke Hesus a hasi ora e tabata riba tera tabata eksaktamente loke Yehova a ferwagt di dje. P’esei, konosé Hesus ta nifiká tambe oumentá nos konosementu di Yehova. (Juan 8:28; 14:8-10) Pero kon Hesus a bini na tera?

Su Bida Komo Hende

E segundo etapa di Hesus su bida a kuminsá ora Dios a manda su Yu riba tera. Yehova a hasi esaki efektuando un milager pa transferí e bida di Hesus for di shelu pa e matris di un bírgen hudiu fiel ku yama Maria. Dor ku Hesus no tabatin un tata humano e no a heredá imperfekshon. Yehova su spiritu santu òf forsa aktivo a bini riba Maria, i e poder di Dios a kubrié milagrosamente manera un ‘sombra’ pa asina e sali na estado. (Lukas 1:34, 35) P’esei Maria a duna lus na un yu perfekto. Komo e yu di kriansa di e karpinté Hosé, Hesus a lanta den un kas humilde i tabata e yu mayó di e vários yunan di e famia.—Isaias 7:14; Mateo 1:22, 23; Marko 6:3.

Ounke hende no sa mashá di Hesus su infansia, ta bon pa menshoná un insidente ku ta remarkabel. Tempu ku Hesus tabatin 12 aña di edat, su mayornan a hib’é huntu ku nan durante nan bishita anual na Yerusalèm pa e selebrashon di Pasku. Einan el a pasa ratunan largu den e tèmpel “sintá meimei di e siñadónan, ta skucha nan i ta hasi nan pregunta.” Es mas, “tur esnan ku a tend’é a keda strañá di su komprondementu i su kontestanan.” Sí, e hóben Hesus no solamente por a hasi pregunta tokante kosnan spiritual ku a pone hende pensa, sino tambe e por a duna kontestanan inteligente ku a pone otro hende keda asombrá. (Lukas 2:41-50) Segun ku el a krese den e stat Názarèt, el a siña e trabou di karpinté, sin duda serka su tata di kriansa, Hosé.—Mateo 13:55.

Hesus a biba na Názarèt te ku su 30 aña. E ora ei el a bai serka Juan pa Juan batis’é. Despues ku Hesus a batisá el a kuminsá ku su ministerio vigoroso. Pa tres aña i mei el a biaha rònt su tera natal deklarando e bon nobo di e Reino di Dios. El a duna evidensia ku ta Dios a mand’é. Kon asina? Dor di a hasi hopi milager, esta, obranan poderoso ku hende no por hasi.—Mateo 4:17; Lukas 19:37, 38.

Hesus tabata tambe un hòmber tierno i ku sintimentunan profundo. Bo por a mira su ternura foral den e manera ku e ta konsiderá i trata otro hende. Dor ku Hesus tabata aserkabel i kariñoso, e hendenan tabata sinti nan atraí na dje. Asta mucha tabata sinti nan mes kómodo den su presensia. (Marko  10:13-16) Ounke algun hende den Hesus su tempu tabata menospresiá hende muhé, Hesus sí a trata nan ku rèspèt. (Juan 4:9, 27) El a yuda hende pober i oprimí haña refreskamentu òf ‘sosiegu pa nan alma.’ (Mateo 11:28-30) Su manera di siña hende tabata kla, simpel i práktiko. I loke el a siña su oyentenan a reflehá su deseo sinsero pa nan siña konosé e Dios berdadero, Yehova.—Juan 17:6-8.

Usando e spiritu santu di Dios pa hasi milager, ku kompashon Hesus a kura hende malu i afligí. (Mateo 15:30, 31) Por ehèmpel, un persona ku lepra a bini serka dje i a bis’é: “Si bo kier, bo por hasi mi bira limpi.” Kiko Hesus a hasi? El a saka su man i a mishi ku e hòmber, i a bis’é: “Mi kier! Sea limpi!” I e hòmber enfermo a kura!—Mateo 8:2-4.

Pensa tambe riba e okashon ku un multitut a bini serka Hesus i a keda huntu kuné tres dia largu sin nada pa kome. El a sinti duele di e hendenan i milagrosamente el a alimentá “kuater mil hende hòmber, sin konta hende muhé i mucha.” (Mateo 15:32-38) Na un otro okashon Hesus a kalma un tempestat ku tabata menasá siguridat di su amigunan. (Marko 4:37-39) El resusitá òf lanta hende ku a muri. * (Lukas 7:22; Juan 11:43, 44) Hesus tabata asta dispuesto pa entregá su bida humano perfekto pa asina hende imperfekto por tin un speransa pa futuro. Esta un amor profundo Hesus tabatin pa hende!

Unda Hesus Ta Awe?

Hesus a muri na un staka di tormento na e edat di 33 aña i mei. * Pero morto no a kaba ku su bida. E di tres etapa di su bida a kuminsá rònt di tres dia despues ora Yehova Dios a resusitá su Yu komo un persona spiritual. Despues ku Hesus a resusitá, el a aparesé na sentenáres di hende ku a biba e tempu ei. (1 Korintionan 15:3-8) Despues di esei, el “a sinta na man drechi di Dios” i a spera te ora e risibí poder real. (Hebreonan 10:12, 13) Ora e tempu ei a yega, Hesus a kuminsá goberná komo Rei. P’esei anto, kon nos mester imaginá Hesus awe? Nos mester imaginá nos ku e ta un hòmber sufriendo miéntras ku e ta wòrdu matá? Òf nos mester mir’é komo un persona ku otronan mester adorá? Awe, Hesus no ta un hende ni e no ta Dios Todopoderoso. Mas bien, e ta un kriatura spiritual poderoso, un Rei na mando. I pronto lo e manifestá su gobernashon riba nos tera yen di problema.

Usando un idioma simbóliko, Revelashon 19:11-16 ta deskribí Hesukristu komo un rei sintá riba un kabai blanku i ku ta bini pa husga i bringa un guera den hustisia. E tin “un spada skèrpi pa e dal e nashonnan kuné.” Sí, Hesus lo usa su gran poder pa destruí e malbadonan. I kiko lo sosodé ku esnan ku ta hasi esfuerso pa sigui e ehèmpel ku el a pone tempu e tabata riba tera? (1 Pedro 2:21) E i su Tata lo konserbá nan bibu atraves di e binidero “guera di e gran dia di Dios Todopoderoso”—ku hopi bes ta ser yamá Armagedón—pa asina nan por biba pa semper komo súpditonan terenal dje Reino selestial di Dios.—Revelashon 7:9, 14; 16:14, 16; 21:3, 4.

Durante Hesus su reinado di pas lo e hasi hopi milager na fabor di humanidat. (Isaias 9:6, 7; 11:1-10) Lo e kura hende malu i kaba ku morto. Dios lo usa Hesus pa resusitá míles di miónes di hende, dunando nan un oportunidat pa biba pa semper riba tera. (Juan 5:28, 29) Nos no por ni imaginá kon maravioso nos bida lo ta bou di e gobernashon di Reino. P’esei anto, ta importante pa nos sigui atkerí konosementu di Beibel i siña konosé Hesukristu mihó.

[Nota]

 [Kuadro na página 7]

HESUS TA DIOS TODOPODEROSO?

Hopi hende religioso ta bisa ku Hesus ta Dios. Algun ta pretendé ku Dios ta un Trinidat. Segun e siñansa aki “e Tata ta Dios, e Yu ta Dios i e Spiritu Santu ta Dios, sin embargo nan no ta tres Dios sino un solo Dios.” Supuestamente nan tres “ta mesun eterno i mesun igual.” (The Catholic Encyclopedia) E puntonan di bista ei ta korekto?

Yehova Dios ta e Kreadó. (Revelashon 4:11) E no tin prinsipio ni fin, i e ta todopoderoso. (Salmo 90:2) Di otro banda, Hesus sí tabatin un prinsipio. (Kolosensenan 1:15, 16) Refiriendo na Dios komo su Tata, Hesus a bisa: “E Tata ta mas ku mi.” (Juan 14:28) Hesus a splika tambe ku tabatin algun kos ku ni e ni e angelnan no tabata sa sino su Tata so.—Marko 13:32.

Ademas, Hesus a hasi orashon na su Tata, bisando:“No mi boluntat, ma di bo sosodé.” (Lukas 22:42) Hesus mester tabata hasiendo orashon na un Persona superior, no ta bèrdat? Fuera di esei, ta Dios a resusitá Hesus for di morto i no Hesus mes. (Echonan 2:32) Ta opvio anto ku e Tata i e Yu no tabata igual promé ku Hesus a bini na tera ni durante e tempu ku el a biba riba tera. Kiko dje tempu despues ku Hesus a resusitá i a bai shelu? Promé Korintionan 11:3 ta deklará: “Dios ta e kabes di Kristu.” De echo, semper e Yu lo keda sumiso na Dios. (1 Korintionan 15:28) P’esei e Skritura ta mustra ku Hesus no ta Dios Todopoderoso. Mas bien, e ta e Yu di Dios.

E supuesto terser persona den e Trinidat—spiritu santu—no ta un persona. Dirigiendo su mes na Dios den orashon, e salmista a bisa: “Bo ta manda bo spiritu, nan ta wòrdu kreá.” (Salmo 104:30) E spiritu aki no ta Dios mes; e ta un forsa aktivo ku Dios ta manda òf usa pa kumpli ku loke ku E ke. Mediante e spiritu aki Dios a krea e shelu literal, tera i tur kos bibu. (Génesis 1:2; Jòb 33:4) Dios a usa su spiritu santu pa inspirá e hendenan ku a skirbi Beibel. (2 Pedro 1:20, 21) Pues anto, Trinidat no ta un siñansa bíbliko. * Beibel ta bisa: “Yehova nos Dios ta un solo Yehova.”—Deuteronomio 6:4, NW.

[Nota]

[Plachi na página 5]

Ora Hesus a batisá el a bira E Ungí di Dios

[Plachi na página 7]

Hesus a usa su energia pa hasi e trabou ku Dios a dun’é

[Plachi na página 7]

Awe, Hesus ta un Rei poderoso