Pregunta di Lektor

Weganan di kòmpiuter i di vidio ku ta violento por afektá un persona su relashon ku Yehova?

Rei David di Israel di antigwedat a skirbi: “SEÑOR ta tèst hende hustu i pekadó. Di henter su kurason e ta odia esnan ku ta gusta violensia.” (Salmo 11:5, BPK) Na e idioma original, e palabra pa “odia” por nifiká ser un enemigu. P’esei, tur hende ku ta stima violensia ta hasi nan mes enemigu di Dios. Pues, e pregunta ku nos tin ku konsiderá ta: Nos por ta kultivando un amor pa violensia dor di hunga sierto weganan di kòmpiuter òf di vidio?

Weganan di kòmpiuter òf di vidio violento ta glorifiká uso di arma. Hopi bes nan ta train esun ku ta hunga nan den e arte di guera. E revista The Economist a deklará: “Militarnan di Merka ta dependé hopi mas tantu riba weganan di kòmpiuter komo medionan di entrenamentu. Bo por kumpra algun di e weganan ku e militarnan ta usa den kualke negoshi komersial ku ta bende e tipo di weganan aki.”

Ta bèrdat ku personanan ku ta hunga wega di kòmpiuter òf di vidio violento no ta hasi daño na hende real. Pero kiko e forma di entretenimentu aki ta indiká di loke por ta sosodiendo ku nan kurason? (Mateo 5:21, 22; Lukas 6:45) Kiko lo bo pensa di un persona ku ta gusta hinka, tira, manka i mata hende imaginario? Kiko si e persona aki ta pasa hopi ora tur siman satisfasiendo e fantasianan violento aki, te ku e ta kasi bira adikto na e weganan ei? A lo ménos lo bo yega n’e konklushon ku e ta kultivando un amor pa violensia, meskos ku un persona ku ta wak pornografia ta kultivá deseonan inmoral.—Mateo 5:27-29.

Kon intenso Yehova ta odia un persona ku ta stima violensia? David a bisa ku Yehova ta odi’é “di henter su kurason.” Den tempu di Noe, Yehova a demostrá kon intenso e ta odia esnan ku ta stima violensia. Yehova a bisa Noe: “E fin di tur karni a bin mi dilanti, pasobra tera ta yen di violensia pa nan motibu; i mira, mi ta bai destruí nan huntu ku tera.” (Génesis 6:13) E Dios berdadero a destruí un mundu di humanidat kompletu pa motibu di nan kamindanan violento. El a preservá solamente Noe i su famia: ocho persona ku no a stima violensia.—2 Pedro 2:5.

Hende ku ke ta amigu di Yehova ta “bati nan spadanan traha plug ku nan, i nan lo bati nan lansanan traha skèr-pa-snui ku nan.” En bes di siña stima violensia, nan no ta siña òf “train pa guera” mas. (Isaias 2:4) Pa nos keda amigu di Dios i no bira su enemigu, nos tin ku ‘apartá nos mes di maldat i hasi bon.’ Nos tin ku “buska pas i siguié.”—1 Pedro 3:11.

Awor, kiko si nos ta un persona ku ya ta hunga weganan di kòmpiuter òf di vidio violento? E ora ei nos mester tin e determinashon firme pa agradá Yehova i stòp di praktiká loke e ta odia. Un kos sigur ku nos tin ku hasi ta resa pidi Dios pa su spiritu santu yuda nos pa nos stòp ku e práktika aki ku ta perhudiká nos spiritualmente. Nos por stòp kuné si nos permití kualidatnan manera pas, bondat i dominio propio yuda nos hiba un bida ku ta mas na armonia ku e kamindanan di Yehova.—Lukas 11:13; Galationan 5:22, 23.