Rechasá Pensamentu Robes!

TEMPU ku e patriarka Jòb tabata pasando den difikultat, el a risibí bishita di su tres amigunan Elifas, Bildad i Zofar. Nan a bin pa ekspresá nan duele i pa konsol’é. (Jòb 2:11) Esun ku tabatin mas bos i tal bes esun di mas edat den nan tres tabata Elifas. E tabata e promé ku a tuma palabra i e tabata esun ku a papia mas. Ki tipo di pensamentu Elifas a reflehá den su tres diskursonan?

Kòrdando un eksperensia sobrenatural ku Elifas a yega di haña, el a bisa: “Un spiritu a pasa dilanti di mi kara; kabei di mi kueru a reis. El a keda para, ma mi no por a diserní su aparensia; un figura tabata dilanti di mi wowo; tabatin silensio, e ora ei mi a tende un bos.” (Jòb 4:15, 16) Ki tipo di spiritu a influensiá e pensamentu di Elifas? E tono krítiko di e palabranan ku a sigui ta mustra ku e spiritu sigur no tabata un di e angelnan hustu di Dios. (Jòb 4:17, 18) Tabata trata aki di un spiritu malbado. Sino, dikon Yehova a reprendé Elifas i su dos amigunan pa e mentiranan ku nan a papia? (Jòb 42:7) Sí, Elifas a haña su mes bou di influensia di demoño. Su komentarionan a reflehá un pensamentu malbado.

Ki ideanan nos por dedusí for di e deklarashonnan di Elifas? Pakiko ta importante pa nos tene kuidou ku pensamentu robes? I ki medida nos por tuma pa rechas’é?

‘E No Ta Pone Konfiansa den Su Sirbidónan’

Den tur e tres diskursonan, Elifas a presentá e idea ku Dios ta asina eksigente ku nada ku su sirbidónan hasi no ta bon p’e. Elifas a bisa Jòb: “E no ta pone konfiansa ni sikiera den su sirbidónan, i e ta kulpa su angelnan di eror.” (Jòb 4:18) Despues, papiando di Dios atrobe, Elifas a bisa: “E no ta pone konfiansa den su santunan, i e shelunan no ta puru den su bista.” (Jòb 15:15) I el a puntra: “Ki probecho esei lo duna e Todopoderoso, ku bo ta hustu?” (Jòb 22:3) Bildad tabata di akuerdo ku e punto di bista aki, pasobra el a deklará: “Si ni luna no tin splendor, ni e streanan no ta puru den [Dios] su bista.”—Jòb 25:5.

Nos mester tene kuidou pa no laga e tipo di pensamentu ei influensiá nos. E por pone nos pensa ku Dios ta demasiado eksigente. E punto di bista aki ta afektá hustamente nos relashon ku Yehova. Ademas, si nos sukumbí na e tipo di rasonamentu aki, kon nos lo reakshoná ora nos haña disiplina nesesario? En bes di aseptá e korekshon humildemente, nos kurason por “bira razu kontra SEÑOR,” i nos por bai karga renkor kontra dje. (Proverbionan 19:3) Esei sí lo ta spiritualmente desastroso!

 “Kiko Hende Por Hasi Ku Ta Resultá Útil pa Dios?”

Un otro opinion estrechamente ligá ku e idea ku Dios ta demasiado eksigente ta ku hende ta inútil p’e. Den Elifas su di tres diskurso e ta lansa e pregunta: “Kiko hende por hasi ku ta resultá útil pa Dios? Jòb, bo ta kere ku asta e hende di mas sabí por ta útil pa Dios?” (Jòb 22:2, BPK) Elifas tabata insinuando ku den bista di Dios hende no ta sirbi pa nada. Den e mesun liña di pensamentu, Bildad a pretendé: “Kon anto un hende [“mortal,” NW] por ta hustu dilanti di Dios? Òf kon esun ku a nase di muhé por ta puru?” (Jòb 25:4) Segun e rasonamentu ei, kon Jòb, un simpel hòmber mortal, por tribi di kere ku e tin un posishon hustu dilanti Dios?

Awe algun hende ta tormentá nan mes ku sintimentunan negativo tokante nan mes. Tal bes e manera ku nan a ser kriá, e preshonnan di bida ku nan mester a wanta, òf e echo ku nan ta víktima di odio rasial òf étniko a kontribuí na e sintimentunan aki. Pero Satanas i su demoñonan tambe tin plaser den intimidá hende. Si nan por influensiá un persona pa pon’é sinti ku nada ku e hasi no ta bon pa Dios Todopoderoso, e por kai mas lihé den desanimashon. Ku tempu, un persona asina por drif bai i asta alehá for di e Dios bibu.—Hebreonan 2:1; 3:12.

Edat avansá i problema ku salú ta pone limitashonnan riba nos. Loke nos ta hasi aworakí den sirbishi di Reino por parse kasi nada na komparashon ku loke nos tabata hasi tempu ku nos tabata mas yòn, mas salú i mas fuerte. Ta masha importante pa rekonosé ku Satanas i su demoñonan ke pa nos sinti ku nada ku nos hasi no ta bon pa Dios! Nos tin ku rechasá e pensamentu ei.

Kon pa Rechasá Pensamentu Negativo

Apesar di e sufrimentu ku Satanas e Diabel a trese riba dje, Jòb a bisa: “Te na mi morto lo mi no bandoná mi integridat.” (Jòb 27:5) Pa motibu ku Jòb a stima Dios, e tabata determiná pa mantené su integridat apesar di tur kos, i e no a laga nada kambia esei. Den esaki tin un klave pa rechasá pensamentu negativo. Nos mester haña un bon komprondementu di e amor di Dios i kultivá un apresio di kurason pa esei. Tambe nos tin ku profundisá nos amor p’e. Nos ta logra esaki pa medio di un estudio regular di e Palabra di Dios i meditá huntu ku orashon riba loke nos ta siña.

Por ehèmpel, Juan 3:16 ta bisa: “Dios a stima mundu asina tantu, ku el a duna su Yu unigénito.” E amor profundo ku Yehova tin pa e mundu di humanidat, i e manera ku el a trata hende den transkurso di tempu ta demostrá e amor ei. Ora nos ta meditá riba e ehèmpelnan di pasado, nos mester haña mas apresio pa Yehova i un amor mas profundo p’e, i esei ta yuda nos rechasá pensamentu robes òf negativo.

Konsiderá e manera ku Yehova a trata Abraham djis promé ku el a destruí Sodoma i Gomora. Abraham a puntra Yehova ocho biaha tokante Su huisio. Ningun momentu so Yehova a mustra ku e ta iritá òf fadá. Al kontrario, su kontestanan a trankilisá i konsolá Abraham. (Génesis 18:22-33) Despues, ora ku Dios a reskatá Lòt i su famia for di Sodoma, Lòt a pidié si e por a hui bai na un stat den bisindario en bes di bai den e serunan. Yehova a kontest’é: “Mira, mi ta konsedé bo e súplika aki tambe, pa no destruí e stat ku bo a papia di dje.” (Génesis 19:18-22) E relatonan aki ta pinta Yehova komo un gobernante eksigente, sin heful i outoritario? Nò. Nan ta mustra loke e realmente ta—un Soberano amoroso, bondadoso, miserikòrdioso i komprensivo.

E ehèmpelnan di Aaron, David i Manasés di Israel di antigwedat ta kontradisí e idea ku Dios ta gusta buska fout den hende i ku niun hende no ta bon p’e. Aaron tabata kulpabel di tres fayo serio. El a traha un bisé di oro; huntu ku su ruman muhé Miriam el a kritiká Moisés; i e no a santifiká i onra Dios na Meribá. Tòg Yehova a mira e bon den dje i a  permitié sigui sirbié komo sumo saserdote te na su morto.—Eksodo 32:3, 4; Numbernan 12:1, 2; 20:9-13.

Rei David a kometé piká grave durante su reinado. Esakinan a inkluí adulterio, traha kòmplòt pa laga mata un hende inosente i tene un senso ilegal. Sin embargo, Yehova a tuma nota di David su repentimentu i a pega lealmente na e aliansa di Reino dor di a permitié sirbi komo rei te na su morto.—2 Samuel 12:9; 1 Krónikanan 21:1-7.

Manasés, rei di Judea, a traha altar pa Baal, a pone su yunan pasa dor di kandela, a promové spiritismo i a konstruí altar religioso falsu den e pationan di e tèmpel. Ma despues di su repentimentu sinsero, Yehova a pordon’é, a libr’é for di koutiverio i a dun’é e reinado bèk. (2 Krónikanan 33:1-13) E akshonnan aki ta bini di un Dios pa kende niun hende no ta bon? Klaru ku nò!

E Akusadó Falsu Mes Ta Kulpabel

No mester sorprendé nos ku ta Satanas mes ta e personifikashon prinsipal di e karakterístikanan ku e ta akusá Yehova di dje. Satanas ta kruel i eksigente, i nos por mira esaki bon kla for di e práktika di sakrifisio di mucha relashoná ku adorashon falsu den pasado. E israelitanan apóstata tabata kima nan yu hòmbernan i nan yu muhénan den kandela—algu ku no a bin mes den Yehova su pensamentu.—Jeremias 7:31.

Ta Satanas ta gusta buska fout den hende, no Yehova. Revelashon 12:10 ta referí na Satanas komo “e akusadó di nos rumannan, ku ta akusá nan di dia i anochi dilanti di nos Dios.” Di otro banda, e salmista a kanta relashoná ku Yehova: “Si Abo, SEÑOR, tuma inikidatnan na kuenta, o Señor, ken lo por a keda para? Ma serka bo tin pordon.”—Salmo 130:3, 4.

Ora Lo No Tin Pensamentu Robes Mas

Angelnan lo mester a sinti un berdadero alivio ora Satanas e Diabel i su demoñonan a ser saká for di shelu! (Revelashon 12:7-9) Despues di esei, e spiritunan malbado aki no por tabatin ningun efekto mas riba e aktividatnan di Yehova su famia di angelnan den shelu.—Daniel 10:13.

E habitantenan di tera lo alegrá den futuro serkano. Pronto, un angel ku ta baha for di shelu ku e yabi di abismo i un kadena grandi den su man lo mara Satanas i su demoñonan i tira nan den e abismo di inaktividat. (Revelashon 20:1-3) Esta un alivio nos lo haña ora esei sosodé!

Miéntras tantu, nos tin ku tene kuidou ku pensamentu robes. Ki ora ku pensamentu robes òf negativo slùip drenta nos mente, nos tin ku rechasá nan dor di fiha nos mente riba e amor di Yehova. E ora ei ‘e pas di Dios ku ta surpasá tur komprondementu lo warda nos kurason i nos mente.’—Filipensenan 4:6, 7.

[Plachi na página 26]

Jòb a rechasá pensamentu negativo

[Plachi na página 28]

Lòt a haña sa ku Yehova ta un Soberano komprensivo