Sigui Kana Manera Hesukristu A Kana

“Esun ku bisa ku e ta permanesé den [Dios] mester kana na mesun manera ku [Hesus] a kana.”—1 JUAN 2:6.

1, 2. Kiko ta nifiká fiha bo wowo riba Hesus?

APÒSTEL Pablo a skirbi: “Ku perseveransia laga nos kore e kareda ku ta poní nos dilanti, fihando nos wowo riba Hesus, e outor i kumplidó [“Agente Prinsipal i Perfekshonadó,” NW] di fe.” (Hebreonan 12:1, 2) Si nos ke hiba un bida fiel, nos tin ku fiha nos wowo riba Hesukristu.

² E palabra di e idioma original pa ‘fiha bo wowo,’ manera e ta aparesé den e Skritura Griego Kristian, ta nifiká “dirigí bo atenshon sin distraishon,” “kita bo bista for di un kos pa wak un otro,” “konsentrá bo bista riba.” Un buki di referensia ta remarká: “Na momentu ku e koredó griego den e stadion kita su atenshon for di e pista i e meta ku e ta koriendo duru pa alkansá, i bira wak e multitutnan pará na banda, su velosidat ta baha. Meskos ta pasa ku kristiannan.” Distraishonnan por stroba nos progreso spiritual. Nos mester fiha nos bista riba Hesukristu. I kiko nos ta buska den e Agente Prinsipal? E ekspreshon griego tradusí komo “agente prinsipal” ta nifiká “lider prinsipal, esun ku ta hiba delantera den tur kos i di e forma ei pone e ehèmpel.” Fiha nos wowo riba Hesus ke men sigui su ehèmpel.

3, 4. (a) Pa nos kana manera Hesukristu a kana, kiko nos tin ku hasi? (b) Ki preguntanan meresé nos atenshon?

³ “Esun ku bisa ku e ta permanesé den [Dios] mester kana na mesun manera ku [Hesus] a kana,” segun Beibel. (1 Juan 2:6) Nos mester keda den union ku Dios dor di warda Hesus su mandamentunan meskos ku é a warda esnan di su Tata.—Juan 15:10.

⁴ P’esei, pa nos kana manera Hesus a kana, nos tin ku fiha nos atenshon riba dje komo e Lider Prinsipal i tambe sigui su pasonan ku sumo kuidou. E preguntanan importante pa konsiderá relashoná ku esaki ta: Kon Kristu ta guia nos awe? Segun ku nos ta imitá su manera di kana, ki efekto esei mester tin riba nos? Kiko ta e benefisionan di pega na e patronchi ku Hesukristu a establesé?

Kon Kristu Ta Dirigí Su Siguidónan

5. Promé ku Hesus a subi na shelu, kiko el a primintí su siguidónan?

⁵ Promé ku Hesukristu resusitá a subi na shelu el a aparesé na su disipelnan i a enkargá nan ku un trabou importante. El a bisa nan: “Bai i hasi tur e nashonnan disipel di mi.” Na e okashon ei  tambe e Lider Prinsipal a primintí nan ku lo e ta ku nan segun ku nan ta kumpli ku e enkargo aki, bisando: “Mi ta ku boso semper, te na fin di mundu.” (Mateo 28:19, 20) Den ki sentido Hesukristu ta huntu ku su siguidónan den e tempu aki di fin di mundu?

6, 7. Kon Hesus ta dirigí nos pa medio di spiritu santu?

⁶ Hesus a bisa: “Esun ku lo yuda boso, esta spiritu santu ku Tata lo manda den mi nòmber, lo siña boso tur kos i rekordá boso tur loke ami a bisa boso.” (Juan 14:26, BPK) E spiritu santu, mandá den nòmber di Hesus, ta guia nos i ta fortalesé nos awe. E ta iluminá nos spiritualmente i ta yuda nos komprondé “asta e profundidatnan di Dios.” (1 Korintionan 2:10) Ademas, e kualidatnan deboto di “amor, goso, pas, pasenshi, kariño, bondat, fieldat, mansedumbre, dominio propio” ta “fruta di e spiritu.” (Galationan 5:22, 23) Ku yudansa di spiritu santu, nos por kultivá e kualidatnan aki.

⁷ Segun ku nos ta studia e Skritura i hasi esfuerso pa apliká loke nos ta siña, Yehova su spiritu ta yuda nos haña mas sabiduria, disernimentu, komprondementu, konosementu, huisio i diskreshon. (Proverbionan 2:1-11) Ademas, spiritu santu ta yuda nos wanta tentashon i prueba. (1 Korintionan 10:13; 2 Korintionan 4:7; Filipensenan 4:13, NW) Beibel ta animá kristiannan pa ‘purifiká nan mes di tur impuresa di karni i spiritu, i asina perfekshoná nan santidat.’ (2 Korintionan 7:1) Nos por ègt biba segun Dios su rekisito di santidat, òf limpiesa, sin yudansa di spiritu santu? Un di e medionan ku Hesus ta usa pa guia nos awe ta spiritu santu, lokual Yehova Dios a outorisá su Yu pa usa.—Mateo 28:18.

8, 9. Kon Kristu ta usa “e esklabo fiel i prudente” pa dirigí e kongregashon?

⁸ Konsiderá un otro manera den kua Kristu ta dirigí e kongregashon djawe. Papiando di su presensia i di fin di mundu, Hesus a bisa: “Ken anto ta e esklabo fiel i prudente ku su shon a laga enkargá ku su kas pa duna nan nan kuminda na su debido tempu? Bendishoná ta e esklabo ei, ku su shon ta haña ta hasi asina ora ku e bin. Di bèrdat mi ta bisa boso ku e lo lag’é keda na enkargo di tur su propiedatnan.”—Mateo 24:3, 45-47.

⁹ E “shon” ta Hesukristu. E “esklabo” ta e grupo di kristiannan ungí riba tera. E klase di esklabo aki a haña e enkargo pa kuida Hesus su interesnan riba tera i pa perkurá alimento spiritual na su debido tempu. Un grupo chikitu di superintendente kapas for di entre e “esklabo fiel i prudente” kolektivo ta forma e Kuerpo Gobernante, i nan ta sirbi komo representante di e klase di esklabo. Nan ta dirigí e obra mundial di prediká e Reino i e suministro di alimento spiritual na ora. Pues Kristu ta dirigí e kongregashon pa medio di e “esklabo fiel i prudente” ungí ku spiritu i su Kuerpo Gobernante.

10. Ki aktitut nos mester tin pa ku e ansianonan, i dikon?

¹⁰ Un otro manifestashon di e liderato di Kristu ta e ‘donnan den hende,’ esta, ansiano òf superintendente kristian. El a duna esakinan “pa ekipá e santunan pa e trabou di sirbishi, pa edifiká e kurpa di Kristu.” (Efesionan 4:8, 11, 12) En konekshon ku nan, Hebreonan 13:7 ta bisa: “Kòrda riba esnan ku a guia boso, ku a papia e palabra di Dios ku boso; i konsiderando e resultado di nan kondukta, imitá nan fe.” E ansianonan ta hiba delantera den e kongregashon. Ya ku nan ta imitá Kristu Hesus, nan fe ta bira algu digno pa imitá. (1 Korintionan 11:1) Nos por mustra nos gratitut pa e areglo di ansiano dor di ta obediente i sumiso na e ‘donnan den hende’ aki.—Hebreonan 13:17.

11. Ki medio Kristu ta usa pa dirigí su siguidónan awe, i kiko ta nifiká kana manera el a kana?

¹¹ Sí, Hesukristu ta dirigí su siguidónan  awe pa medio di spiritu santu, “e esklabo fiel i prudente” i ansianonan di kongregashon. Pa nos por kana manera Kristu a kana nos tin ku komprondé su manera di dirigí nos, anto someté nos mes na esei. Tambe nos tin ku imitá su manera di kana. Apòstel Pedro a skirbi: “Boso a wòrdu yamá pa e propósito aki, komo ku Kristu tambe a sufri pa boso, lagando un ehèmpel pa boso, pa boso sigui den su pasonan.” (1 Pedro 2:21) Ki efekto siguimentu di e ehèmpel perfekto di Hesus mester tin riba nos?

Ser Rasonabel Ora di Ehersé Outoridat

12. Ki aspekto di Kristu su ehèmpel ta di interes partikular pa e ansianonan di e kongregashon?

¹² Ounke Hesus a risibí mas outoridat ku kualke otro hende for di su Tata, e tabata rasonabel den e manera ku el a ehersé esaki. Tur miembro di e kongregashon—foral ansianonan—mester “laga tur hende sa ku [nan] ta rasonabel.” (Filipensenan 4:5; 1 Timoteo 3:2, 3, NW) Siendo ku ansianonan tin sierto outoridat den e kongregashon, ta esensial pa nan sigui e pasonan di Kristu ora nan ta ehersé e outoridat aki.

13, 14. Kon ansianonan por imitá Kristu ora nan ta animá otro hende pa sirbi Dios?

¹³ Hesus a tene kuenta ku e limitashonnan di su disipelnan. E no a eksigí mas di loke nan por a duna. (Juan 16:12) Sin pone preshon riba nan, Hesus a animá su siguidónan pa “hasi tur esfuerso” pa kumpli ku e boluntat di Dios. (Lukas 13:24) El a hasi esaki dor di guia nan i motivá nan. Meskos tambe, awe ansianonan kristian no ta fòrsa otro hende pa sirbi Dios dor di laga nan sinti nan kulpabel si nan no ta hasiendo esei. Mas bien, nan ta animá nan pa sirbi Yehova motivá pa amor pa Dios, pa Hesus i pa nan próhimo.—Mateo 22:37-39.

¹⁴ Hesus no a hasi mal uso di e outoridat konfiá na dje dor di kontrolá bida di hende. Tampoko e no a fiha normanan inalkansabel ni establesé yen di regla. Su sistema tabata pa motivá otro hende dor di alkansá nan kurason ku e prinsipionan tras di e leinan duná mediante Moisés. (Mateo 5:27, 28) Ansianonan tin ku imitá Hesukristu dor di no establesé reglanan arbitrario ni insistí riba nan opinionnan personal. Den asuntunan di bistí i areglo personal òf rekreo i dibertishon, ansianonan ta purba alkansá kurason dor di usa prinsipionan di e Palabra di Dios, manera esnan na Mikeas 6:8, 1 Korintionan 10:31-33 i 1 Timoteo 2:9, 10.

Mustra Konsiderashon i Pordoná

15. Kon Hesus a reakshoná riba e fayonan di su disipelnan?

¹⁵ Kristu a laga un ehèmpel pa nos sigui den e manera ku el a trata ku e fayonan di su disipelnan. Tuma por ehèmpel dos insidente ku a tuma lugá riba e último anochi di su bida riba tera komo hende. Despues ku nan a yega Getsemané, Hesus a “hiba Pedro i Santiago i Juan huntu kuné” i a bisa nan pa ‘keda vigilá.’ Anto “el a bai un poko mas leu for di nan, i a tira su kurpa abou na suela, i a hasi orashon.” Ora el a bini bèk, el “a haña nan ta drumi.” Kon Hesus a reakshoná? El a bisa: “E spiritu ta boluntario, ma e karni ta débil.” (Marko 14:32-38) En bes di rous Pedro, Santiago i Juan, el a mustra  konsiderashon! Riba e mesun anochi ei, Pedro a nenga Hesus tres bes. (Marko 14:66-72) Kon Hesus a trata Pedro despues di esei? “Señor a resusitá i a aparesé na Simon [Pedro].” (Lukas 24:34) Beibel ta bisa ku “el a aparesé na Sefas, despues na e diesdosnan.” (1 Korintionan 15:5) En bes di karga renkor, Hesus a pordoná e apòstel repentí i a fortales’é. Ku tempu, Hesus a konfia Pedro ku responsabilidatnan grandi.—Echonan 2:14; 8:14-17; 10:44, 45.

16. Kon nos por kana manera Hesus a kana ora nos rumannan di fe faya ku nos òf trata nos malu?

¹⁶ Ora nos rumannan di fe faya ku nos òf trata nos malu pa motibu di imperfekshon humano, nos tambe no mester mustra konsiderashon i pordoná meskos ku Hesus? Pedro a urgi su rumannan di fe: “Boso tur sea di akuerdo ku otro, teniendo kompashon ku otro, stimando manera ruman, i sea miserikòrdioso i humilde den spiritu, no pagando malu ku malu òf insulto ku insulto, ma mas bien dunando un bendishon.” (1 Pedro 3:8, 9) Kiko nos lo hasi ora un otro persona no trata nos manera Hesus lo a trata nos, por ehèmpel, dor di no mustra konsiderashon òf pordoná? Asta e ora ei nos sí mester purba imitá Hesus i reakshoná manera e lo a reakshoná.—1 Juan 3:16.

Pone Interesnan di Reino na Promé Lugá

17. Kiko ta mustra ku Hesus a pone hasimentu di e boluntat di Dios na promé lugá den su bida?

¹⁷ Tin un manera mas ku nos tin ku kana manera Hesukristu a kana. Algu ku a okupá un lugá hopi importante den e bida di Hesus ta e obra di deklará e bon nobo di e Reino di Dios. Despues ku Hesus a prediká na un muhé samaritano banda di e stat di Sikar na Samaria, el a bisa su disipelnan: “Mi kuminda ta pa hasi e boluntat di esun ku a manda mi, i pa kumpli ku su trabou.” (Juan 4:34) Hasimentu di e boluntat di su Tata a sostené Hesus; e tabata mes nutritivo, satisfasiente i refreskante p’e ku kuminda. No tin nada ku por duna nos bida mas nifikashon i satisfakshon ku imitá Hesus dor di keda enfoká riba hasimentu di Dios su boluntat.

18. Ki bendishon mayornan ta risibí ora nan animá nan yunan pa sigui e sirbishi di tempu kompletu?

¹⁸ Ora mayornan ta animá nan yunan pa kuminsá e sirbishi di tempu kompletu, tantu nan komo nan yunan ta risibí hopi bendishon. Un tata a animá su dos yu hòmbernan ohochi for di tempu ku nan tabata chikitu pa pone e meta di traha pionero. Despues ku e ohochinan a kaba nan edukashon seglar, nan a bira pionero. Pensando bèk riba e goso ku e tata aki a eksperensiá komo resultado di esei, el a skirbi: “Nos muchanan no a desapuntá nos. Nos por bisa ku un kurason gradisidu: ‘Yunan ta un herensia di Yehova.’” (Salmo 127:3) I kon e sirbishi di tempu kompletu ta benefisiá e yunan? Un mama di sinku yu a bisa: “E trabou di pionero a yuda tur mi yunan desaroyá un relashon muchu mas íntimo ku Yehova, a mehorá nan kustumbernan di estudio personal, a yuda nan siña manehá nan tempu na un manera sabí i a yuda nan siña pone kosnan spiritual na promé lugá den nan bida. Ounke nan tur tabatin ku hasi hopi ahuste, ningun di nan tin duele di e rumbo ku nan a skohe den bida.”

19. Ki plannan pa futuro ta sabí pa hóbennan konsiderá?

 ¹⁹ Hóbennan, kiko ta boso plannan pa futuro? Boso ta buska pa sobresalí den un òf otro karera profeshonal? Òf boso ta trahando riba un karera den e sirbishi di tempu kompletu? Pablo ta animá boso pa “mira bon kon boso ta kana, no manera hende bobo, ma manera hende sabí, hasiendo bon uso di boso tempu, pasobra e dianan ta malu.” Anto e ta agregá: “P’esei anto, no sea bobo, ma komprondé kiko ta e boluntat di Señor.”—Efesionan 5:15-17.

Ser Leal

20, 21. Den ki sentido Hesus tabata leal, i kon nos por imitá su lealtat?

²⁰ Pa nos kana manera Hesus a kana, nos tin ku imitá su lealtat. En konekshon ku Hesus su lealtat, Beibel ta deklará: “Ounke ku e tabata eksistí den e forma di Dios, [e] no a konsiderá igualdat ku Dios algu pa tene na dje, ma a bandoná su mes gloria, tumando forma di un sirbidó, siendo trahá den e semehansa di hende. I hañando su mes den kondishon di hende, el a humiá su mes dor di bira obedesidu te na morto,” sí morto na un staka di tormento. Hesus a sostené e soberania di Yehova lealmente dor di someté su mes na e boluntat di Dios p’e. El a bira obedesidu te na morto na un staka di tormento. Nos mester tin e mesun “aktitut” aki i someté nos mes lealmente pa hasi e boluntat di Dios.—Filipensenan 2:5-8.

²¹ Hesus tabata fiel tambe na su apòstelnan. Apesar di nan debilidat- i imperfekshonnan, Hesus a stima nan “te na fin.” (Juan 13:1) Di igual manera, nos no mester laga e imperfekshonnan di nos rumannan pone nos adoptá un aktitut krítiko.

Pega na e Ehèmpel Ku Hesus A Establesé

22, 23. Kiko ta e benefisionan di pega na e ehèmpel ku Hesus a establesé?

²² Klaru ku komo hende imperfekto, nos no por kana presis den e pasonan di nos Ehèmpel perfekto. Sin embargo, loke sí nos por hasi ta sigui su pasonan ku sumo kuidou. Pa nos hasi esei nos tin ku komprondé i someté nos na Kristu su manera di dirigí i pega na e ehèmpel ku el a pone.

²³ Komo imitadó di Kristu nos ta haña hopi bendishon. Nos bida ta haña mas nifikashon i satisfakshon pasobra nos ta enfoká riba hasi e boluntat di Dios i no esun di nos mes. (Juan 5:30; 6:38) Nos tin un bon konsenshi. Nos manera di kana ta bira ehemplar. Hesus a invitá tur hende ku tabata kansá i kargá pa bini serka dje i haña refreskamentu pa nan alma. (Mateo 11:28-30) Ora nos sigui e ehèmpel di Hesus, nos tambe por refreská otro hende pa medio di nos asosiashon. P’esei, laga nos sigui kana manera Hesus a kana.

Bo Ta Kòrda?

• Kon Kristu ta dirigí su siguidónan awe?

• Kon ansianonan por sigui e liderato di Kristu ora nan ta ehersé e outoridat ku Dios a duna nan?

• Kon nos por sigui e ehèmpel di Hesus ora nos ta trata ku e fayonan di otro hende?

• Kon hóbennan por pone interesnan di Reino na promé lugá?

[Preguntanan di Estudio]

[Plachi na página 23]

Ansianonan kristian ta yuda nos sigui e liderato di Kristu

[Plachi na página 24, 25]

Hóbennan, ki plan boso ta trahando pa hiba un bida kristian yen di satisfakshon?