Yudansa pa Trata ku Nos Emoshonnan

TA PARSE ku emoshonnan negativo ta dominá bo de bes en kuando? Bo ta rabia, sinti bo tristu òf frustrá lihé? Bo sa sinti ku ansiedatnan di bida ta kaba ku bo? Kiko lo por yuda?

Reakshonnan emoshonal ta un parti integral di bida humano. Ora nos tin nan bon kontrolá, nan ta hasi bida interesante. Sin embargo, Beibel ta atmití ku “opreshon ta hasi un hende sabí bira loko.” (Eklesiastés 7:7) Ta ken no ta ser afektá emoshonalmente dor di loke ta sosodé rònt di dje, den un mundu yen di violensia i aksidente? Sin embargo, e Skritura ta bisa tambe: “No tin nada mihó pa hende ku gosa den su aktividatnan.” (Eklesiastés 3:22) P’esei, pa hasi bida mas plasentero, nos tin ku siña alegrá nos mes dor di kultivá emoshonnan positivo. Kon nos por kultivá emoshonnan benefisioso i frena esnan negativo?

Dor di tuma medidanan práktiko hopi bes nos por mengua e intensidat di nos emoshonnan negativo. Por ehèmpel, ora nos ta angustiá pa motibu di asuntunan ku no ta den nos man, lo no ta mihó pa nos kambia nos rutina òf ambiente en bes di sinta karga nos mente ku preokupashon? Loke podisé por trese un poko alivio i duna nos un grado di felisidat ta dal un kaminata trankil, skucha músika trankilisante, hasi ehersisio vigoroso òf hasi un akto di bondat pa un persona den nesesidat.—Echonan 20:35.

Sin embargo, e mihó manera pa deshasí di pensamentunan negativo ta dor di pone nos konfiansa den e Kreadó. Ora pensamentunan negativo ta persistí, nos tin ku hasi orashon i ‘tira tur nos preokupashon riba Dios.’ (1 Pedro 5:6, 7) Beibel ta duna nos e garantia aki: “SEÑOR ta serka di e hende di kurason kibrá  . . Hopi ta e aflikshonnan di e hustu, ma SEÑOR ta libr’é for di nan tur.” (Salmo 34:18, 19) Kon nos por tin e konfiansa ku Dios ta ‘Esun ku lo yuda nos i libra nos’? (Salmo 40:17) Nos por haña e konfiansa ei dor di studia Beibel i reflekshoná riba e ehèmpelnan bibu ku ta reflehá Dios su interes personal den e bienestar di su sirbidónan.