Bo Konsenshi Ta Bon Entrená?

ABO a yega di bisa, “mi kurason ta bisa mi ku e no ta bon,” òf, “mi no por hasi loke bo ta manda mi hasi; algu den mi ta bisa mi ku e no ta bon”? Esei tabata e “bos” di bo konsenshi, e sentido interno di bon i malu, ku ta sea dispensá bo òf akusá bo. Sí, nos tur a nase ku un konsenshi.

Maske hende ta alehá for di Dios, tòg e tin e kapasidat general pa distinguí bon for di malu. Esei ta pasobra hende a ser kreá den imágen di Dios, pues te na sierto grado e ta reflehá e kualidatnan di Dios manera sabiduria i hustisia. (Génesis 1:26, 27) Relashoná ku esaki, apòstel Pablo a skirbi bou di inspirashon divino: “Ora paganonan, kendenan no tin lei, di naturalesa ta hasi e kosnan di lei, esakinan, ounke nan no tin lei, ta un lei pa nan mes, dor ku nan ta mustra e obra di lei ku ta skirbí den nan kurason, nan konsenshi dunando testimonio, i nan pensamentunan akusando òf defendiendo nan.” *—Romanonan 2:14, 15.

E don moral aki, heredá for di e promé hòmber, Adam, ta fungi komo un “lei,” òf regla di kondukta, den hende di tur rasa i nashonalidat. Ta trata aki di e kapasidat pa analisá nos mes i husga nos mes. (Romanonan 9:1) For di momentu ku Adam ku Eva a kibra e lei di Dios, nan a manifestá e fakultat aki dor di bai skonde. (Génesis 3:7, 8) Un otro ehèmpel di kon e konsenshi ta traha ta e manera ku Rei David a reakshoná ora el a realisá ku el a peka dor di a hasi un senso. Beibel ta bisa ku “David su kurason a kuminsá gòlpi’é.”—2 Samuel 24:1-10, NW.

E kapasidat pa wak nos mes i husga nos kondukta por motivá nos pa dal e paso importante di repentí den e forma ku ta agradá Dios. David a skirbi: “Miéntras ku mi a keda ketu, mi kurpa a para kaba na nada dor di mi kehamentu henter dia. Mi a atmití mi piká na bo, i mi inikidat mi no a skonde; mi a bisa: ‘Lo mi konfesá mi transgreshonnan na SEÑOR’; i bo a pordoná e kulpa di mi piká.” (Salmo 32:3, 5) Pues, un konsenshi ku ta traha por pone e pekadó akudí bèk na Dios, i yud’é rekonosé ku e mester di e pordon di Dios i sigui Su kamindanan.—Salmo 51:1-4, 9, 13-15.

Tambe nos konsenshi ta duna nos spièrtamentu òf guia ora nos tin ku tuma un desishon moral. Kisas ta e aspekto aki di konsenshi a duna Hosé e presentimentu ku tabata malu i moralmente inaseptabel pa kometé adulterio—un piká kontra Dios. Ta despues Yehova a inkluí un lei spesífiko kontra adulterio den e Dies Mandamentu ku el a duna Israel. (Génesis 39:1-9; Eksodo 20:14) Ta opvio anto ku nos por saka muchu mas benefisio ora nos konsenshi ta entrená pa guia nos i no djis pa husga nos. Bo konsenshi ta traha den e manera ei?

 Kon pa Train Nos Konsenshi pa Tuma Bon Desishon

Ounke nos a heredá e fakultat di konsenshi, lamentablemente e don aki ta defisiente. Maske humanidat a haña un kuminsamentu perfekto, “tur [hende] a peka i ta falta e gloria di Dios.” (Romanonan 3:23) Debí ku piká i imperfekshon a kontaminá nos, kisas nos konsenshi no ta un bon guia mas i podisé e no ta traha kompletamente mas manera tabata e intenshon original. (Romanonan 7:18-23) Ademas, faktornan eksterno por afektá nos konsenshi. Nos edukashon, nos kustumbernan lokal, nos kreensianan i e ambiente den kua nos ta biba por influensi’é. Klaru ku e inmoralidat i e degenerashon di normanan den e mundu aki no por ta e norma di un bon konsenshi.

P’esei, un kristian mester haña e yudansa adishonal di e normanan firme i hustu hañá den Beibel, e Palabra di Dios. Esakinan por guia nos konsenshi pa evaluá asuntunan korektamente i rektifiká nan. (2 Timoteo 3:16) Ora nos konsenshi ta entrená segun e normanan di Dios, e ta den mihó kondishon pa yuda nos evitá akshonnan ku ta perhudiká nos moralmente i ta kapasitá nos pa “diserní loke ta bon i loke ta malu.” (Hebreonan 5:14) Sin e normanan di Dios, kisas nos konsenshi no ta spièrta nos mes ora nos ta desviá den un mal rumbo. Beibel ta bisa: “Tin un kaminda ku ta parse bon den bista di hende, ma su fin ta e kaminda di morto.”—Proverbionan 16:25; 17:20.

Den algun área di bida, e Palabra di Dios ta duna guia i instrukshonnan spesífiko, i ta bon pa nos sigui nan. Di otro banda, tin hopi situashon pa kua no tin instrukshon spesífiko den Beibel. Esakinan por tin keber ku entre otro e tipo di trabou, kuido médiko, rekreo, paña di bisti i areglo personal ku nos ta skohe. No ta fásil pa sa kiko pa hasi den kada kaso i tuma e desishon korekto. Pa e motibu ei nos mester tin e aktitut di David, kende a pidi den orashon: “Hasi mi konosé bo kamindanan, o SEÑOR; siña mi bo bereanan. Guia mi den bo bèrdat i siña mi, pasobra ta abo ta e Dios di mi salbashon.” (Salmo 25:4, 5) Mas mihó nos komprondé e pensamentu- i kamindanan di Dios, mas mihó nos lo por evaluá nos sirkunstansianan ku eksaktitut i tuma desishon ku un konsenshi limpi.

P’esei, ora nos haña nos ku un pregunta òf un desishon, na promé lugá nos tin ku meditá riba e prinsipionan di Beibel ku lo por ta aplikabel. Algun di esakinan por ta: rèspèt  pa mayor i kabes di famia (Kolosensenan 3:18, 20); onrades den tur kos (Hebreonan 13:18); odia maldat (Salmo 97:10); buska pas (Romanonan 14:19); obedensia na outoridatnan establesí (Mateo 22:21; Romanonan 13:1-7); deboshon eksklusivo na Dios (Mateo 4:10); no ser parti di mundu (Juan 17:14); evitá mal asosiashon (1 Korintionan 15:33); modestia den bistí i areglo personal (1 Timoteo 2:9, 10); i no pone otro hende trompeká (Filipensenan 1:10, NW). Ora nos identifiká e prinsipio bíbliko en kuestion, esei por fortalesé nos konsenshi i yuda nos tuma e desishon korekto.

Skucha Bo Konsenshi

Pa nos konsenshi por ta un yudansa pa nos, nos tin ku hasi kaso di dje. Ta únikamente ora nos respondé mesora na e impulsonan di nos konsenshi bíblikamente entrená, nos ta benefisiá di dje. Nos por kompará e konsenshi entrená ku e lusnan di atvertensia di dashboard di un outo. Suponé ku e lus ku ta indiká ku ta falta zeta sende. Kiko lo pasa si nos no tuma medida mesora i sigui kore e outo? Nos por kousa daño serio na e motor. Meskos tambe, nos konsenshi, òf bos interno, por alertá nos ku un sierto rumbo òf akshon ta robes. Ora nos kompará nos norma- i balornan bíbliko ku algu ku nos a hasi òf ta pensa di hasi, un lus di atvertensia ta sende, meskos ku e lus di dashboard. Si nos hasi kaso di e spièrtamentu, esei no solamente lo yuda nos evitá e mal konsekuensianan di e akshon inkorekto sino tambe yuda nos konsenshi sigui traha na e manera korekto.

Kiko lo sosodé si nos skohe pa ignorá e spièrtamentu? Ku tempu, e konsenshi por kria kayo i pèrdè heful. Nos por kompará e efekto di ignorá e konsenshi konstantemente ku kimamentu di nos kueru ku un heru kayente. E sikatris ku no tin nèrvio mas ta pèrdè heful. (1 Timoteo 4:2) Un konsenshi asina no ta reakshoná mas ora nos kometé piká, ni e no ta spièrta nos pa evitá di bolbe kometé e mesun piká. Un konsenshi ku a kria kayo ta ignorá normanan di Beibel di bon i malu i p’esei e ta un konsenshi defisiente, kontaminá. Esun ku tin un konsenshi asina a ‘pèrdè tur heful [moral]’ i a alehá for di Dios. (Efesionan 4:17-19; Tito 1:15) Ki un resultado trágiko!

“Mantené un Bon Konsenshi”

Si nos ke mantené un bon konsenshi nos tin ku hasi esfuerso konstante. Apòstel Pablo a deklará: “Mi ta ehersé mi mes kontinuamente pa mi no ser konsiente di a kometé ningun piká kontra Dios ni kontra hende.” (Echonan 24:16, NW) Komo kristian, konstantemente  Pablo tabata analisá i korigí su proseder pa hasi sigur ku e no a kometé ningun piká kontra Dios. Pablo tabata sa ku finalmente ta Dios lo determiná si loke nos hasi ta bon òf malu. (Romanonan 14:10-12; 1 Korintionan 4:4) Pablo a bisa: “Tur kos ta habrí i bisto dilanti di wowo di esun ku nos tin di haber kuné.”—Hebreonan 4:13.

Pablo a hasi menshon tambe di no kometé piká kontra hende. Un bon ehèmpel di esaki ta su konseho n’e kristiannan di Korinto relashoná ku “komementu di kosnan sakrifiká na ídolo.” Su punto tabata ku asta ora un sierto akshon riba su mes kisas no ta kuestionabel for di e punto di bista di e Palabra di Dios, ta masha importante pa tene kuenta ku konsenshi di otro hende. Si nos no hasi esaki nos por ‘destruí nos rumannan [spiritualmente] pa kende Kristu a muri.’ Tambe nos por ruiná nos propio relashon ku Dios.—1 Korintionan 8:4, 11-13; 10:23, 24.

Pues, sigui entrená bo konsenshi i mantené un bon konsenshi. Ora bo ta tuma desishon, buska e guia di Dios. (Santiago 1:5) Studia e Palabra di Dios, i laga su prinsipionan moldia bo mente i kurason. (Proverbionan 2:3-5) Ora surgi asuntunan serio, konsultá ku kristiannan maduro pa hasi sigur ku bo tin e komprondementu korekto di e prinsipionan bíbliko enbolbí. (Proverbionan 12:15; Romanonan 14:1; Galationan 6:5) Konsiderá ki efekto bo desishon lo tin riba bo konsenshi, ki efekto lo e tin riba otronan, i riba tur kos, ki efekto lo e tin riba bo relashon ku Yehova.—1 Timoteo 1:5, 18, 19.

Nos konsenshi ta un don maravioso di nos amoroso Tata selestial, Yehova Dios. Dor di us’é na armonia ku e boluntat di Esun ku a duna nos e, nos lo hala mas serka nos Kreadó. Segun ku nos ta hasi esfuerso pa “mantené un bon konsenshi” den tur loke nos ta hasi, ta keda mas i mas bisto ku nos ta trahá den imágen di Dios.—1 Pedro 3:16; Kolosensenan 3:10.

[Nota]

[Plachi na página 13]

Bo konsenshi ta entrená pa guia bo i no djis pa husgá bo?

[Plachi na página 14]

Si nos ke tin un konsenshi bon entrená nos tin ku siña i apliká prinsipionan di Beibel

[Plachinan na página 15]

No ignorá e spièrtamentunan di bo konsenshi