Bo Ta Rekonosé e Señal di Hesus Su Presensia?

NINGUN hende no ke ta hopi malu ni haña nan diripiente den un desaster. Pa evitá e kalamidatnan ei, un persona sabí ta tuma nota di señalnan ku ta indiká peliger i ta aktua di akuerdo ku esakinan. Hesukristu a deskribí un sierto señal ku nos mester rekonosé. E señal ku el a papia di dje lo tabatin un impakto rònt mundu i lo a afektá humanidat kompletu, inkluyendo abo i bo famia.

Hesus a papia di e Reino di Dios ku lo eliminá maldat i hasi e tera un paradeis. Su disipelnan tabata kurioso pa sa tokante e asuntu aki i nan tabata ke sa na ki tempu e Reino ei lo a bini. Nan a puntr’é: “Kiko lo ta e señal di bo binida [“presensia,” NW] i di e fin di tempu?”—Mateo 24:3.

Hesus tabata sa ku despues di su morto i resurekshon, hopi aña lo a pasa promé ku lo el a ser entronisá den shelu komo e Rei Mesiániko pa goberná riba humanidat. Siendo ku Hesus su entronisashon lo tabata invisibel pa hende, el a duna un señal ku lo a yuda su siguidónan rekonosé su “presensia” i tambe “e fin di tempu.” E señal aki ta konsistí di vários rasgo ku huntu ta identifiká e tempu di Hesus su presensia.

E eskritornan di e Evangelio, esta, Mateo, Marko i Lukas, kada un, a registrá Hesus su kontesta kuidadosamente. (Mateo, kapítulo 24 i 25; Marko, kapítulo 13; Lukas, kapítulo 21) Tin otro eskritornan di Beibel ku a agregá detayenan na e señal. (2 Timoteo 3:1-5; 2 Pedro 3:3, 4; Revelashon 6:1-8; 11:18) Nos no tin sufisiente espasio den e artíkulo aki pa analisá tur e detayenan, pero nos lo konsiderá sinku karakterístika klave ku ta forma parti di e señal ku Hesus a menshoná. Lo bo ripará ku e konsiderashon aki ta signifikativo i importante pa abo personalmente.—Wak e kuadro na página 6.

“Kambio Ku A Trese un Era Nobo”

“Nashon lo lanta kontra nashon, i reino kontra reino.” (Mateo 24:7) E revista aleman Der Spiegel ta informá ku promé ku 1914 hende “a kere den un futuro maravioso ku mas libertat,  progreso i prosperidat.” Pero e aña ei tur kos a kambia. “E guera ku a kuminsá na ougùstùs 1914 i terminá na novèmber 1918 tabata un suseso dramátiko. El a trese un kambio históriko, el a separá un era bieu for di un era nobo,” segun e revista GEO. Mas ku 60 mion sòldá for di sinku kontinente a partisipá den e konflikto salbahe ei. Un averahe di mas o ménos 6.000 sòldá tabata ser matá tur dia. Desde e tempu ei, historiadónan di tur generashon i di tur ideologia polítiko a mira “e añanan 1914 pa 1918 komo añanan di kambio ku a trese un era nobo.”

Promé Guera Mundial a trese kambionan permanente pa sosiedat humano i a dirigí humanidat den e último dianan di e sistema di kosnan aki. E restu di e siglo ei tabata karakterisá pa mas guera, konfliktonan armá i terorismo. I kosnan no a bira mihó durante e promé añanan di e siglo aktual. Ademas di guera, mas rasgo di e señal a bira visibel.

Hamber, Pèst i Temblor

“Lo tin hamber.” (Mateo 24:7) Durante e promé guera mundial, hamber a asotá Europa, i for di e tempu ei skarsedat di kuminda a sigui afektá humanidat. Relashoná ku Rusia i Ukrania na 1933, historiadó Alan Bullock a skirbi ku “multitutnan grandi di hende morto di hamber tabata kana dual rònt e pais . . . Hendenan tabata bola kadavernan kantu di kaminda.” Na 1943 e periodista T. H. White tabata testigu di e hamber ku tabatin den e provinsia chines di Henan. El a skirbi: “Ora tin skarsedat di kuminda, kasi tur kos ta bira komibel pa hende; kosnan ku nan ta garna, kome i kombertí den energia pa e kurpa. Pero ta solamente hende ku ta na rant di morto por hinka den nan kabes pa kome algu ku te asina leu no tabata komibel.” Ta tristu pa bisa ku hamber na Afrika a bira algu kasi normal durante e último dékadanan aki. Ounke e tera ta produsí sufisiente kuminda pa tur hende, e Organisashon di Nashonnan Uní pa Kuminda i Agrikultura ta kalkulá ku 840 mion hende rònt mundu no tin kasi nada di kome.

“Pestilensia . . . na vários lugá.” (Lukas 21:11) E korant Süddeutsche Zeitung ta informá ku “segun kálkulo, grip spañó [malesa di kabouter] a mata entre 20 pa 50 mion hende na 1918, mas ku e plaga pretu òf promé guera mundial.” Desde e tempu ei un gran kantidat di hende a sufri di malesanan manera malaria, sende-paga, tuberkulósis, polio i kólera. I pasmá mundu ta mira kon AIDS ta plama ku un velosidat alarmante. Awor nos ta konfrontá e situashon frustrante den kua apesar di progreso asombroso den siensia médiko tòg tin malesa ku hende  no por kaba kuné. E situashon kontradiktorio aki ku te awor hende no por komprondé, ta yuda identifiká e tempu ekstraordinario ku nos ta biba aden.

“Temblor.” (Mateo 24:7) Durante e último 100 aña, temblor a kita bida di sentenáres di míles di hende. Segun un fuente, desde 1914 tabatin un promedio di 18 temblor pa aña ku e poder di kousa daño na edifisionan i habri tera. Anto rònt di un bes pa aña tabatin temblornan mas destruktivo ku sufisiente forsa pa destruí edifisionan kompletamente. Apesar di avansenan teknológiko, e kantidat di morto ta keda haltu pasobra hopi di e statnan ku ta kresiendo rápidamente ta situá den áreanan vulnerabel pa temblor.

Bon Notisia!

Mayoria di e rasgonan di e señal di e último dianan ta kousa angustia. Pero Hesus a papia di bon notisia tambe.

“E evangelio aki di e reino lo wòrdu prediká den henter mundu komo un testimonio na tur nashon.” (Mateo 24:14) E trabou ku Hesus mes a kuminsá, esta, e predikashon di e bon nobo di e Reino, lo a yega su kulminashon durante e último dianan. I esaki en bèrdat ta tumando lugá. Testigunan di Yehova ta prediká e mensahe di Beibel i ta eduká hende di bon kurason pa apliká loke nan ta siña den nan bida diario. Aktualmente mas ku seis mion Testigu ta prediká den 235 pais i den mas ku 400 idioma.

Tuma nota ku Hesus no a bisa ku tur aktividat di bida lo a stòp debí n’e situashonnan angustioso di mundu. E no a bisa tampoko ku lo tin ún rasgo di e señal ku lo afektá henter mundu. Mas bien, el a profetisá di hopi suseso ku huntu lo a forma un señal ku hende rònt mundu lo por identifiká.

En bes di enfoká riba susesonan individual, wak si bo no ta mira un patronchi, un señal ku ta konsistí di vários rasgo ku ta afektá mundu  kompletu. Loke ta sosodiendo ta afektá abo i bo famia. Pero kisas bo ta puntra, dikon tin asina poko hende ta ripará esei?

Interes Personal na Promé Lugá

“Prohibí pa landa,” “Vòltahe Haltu,” “Baha Velosidat.” Esakinan ta algun señal i spièrtamentu ku nos ta mira pero ku hopi bes nos ta ignorá. Dikon? Ta fásil pa nos wòrdu influensiá dor di loke nos ta pensa ta bon pa nos. Por ehèmpel, kisas nos ta sinti e nesesidat di kore mas duru ku lei ta permití, òf kisas nos tin masha gana di landa kaminda ta prohibí. Pero no ta sabí pa ignorá señal.

Por ehèmpel, avalanchanan den serunan di Alpen di Fransia, Italia, Oustria i Suisa sa kousa morto di turistanan ku ta ignorá e spièrtamentunan ku ta urgí nan pa ski solamente riba rutanan sigur. Segun Süddeutsche Zeitung, hopi turista ku ta ignorá e spièrtamentunan aki tin e lema di bida: Mester tin rísiko pa bo pasa prèt. Pero lamentablemente, ora hende ignorá spièrtamentu, e resultadonan por ta trágiko.

Ki motibu hende tin pa no hasi kaso di e señal ku Hesus a deskribí? Podisé golosidat tin nan siegá, apatia a hasi nan indiferente, insiguridat tin nan paralisá, rutina di bida tin nan kompletamente okupá òf miedu di pèrdè prestigio tin nan dominá. Akaso un di e motibunan aki ta pone ku abo ta ignorá e señal di Hesus su presensia? Lo no ta mas sabí pa rekonosé e señal i aktua di akuerdo kuné?

Bida den Paradeis Riba Tera

Un kantidat kresiente di hende ta hasi kaso di e señal di Hesus su presensia. Kristian, un yònkuman kasá na Alemania, a skirbi: “Tin momentunan difísil. Sin duda nos ta bibando den e ‘último dianan.’” E ku su kasá ta dediká hopi tempu papiando ku otro hende tokante e Reino Mesiániko. Frank ta biba na e mesun pais. E ku su kasá ta animá otro hende ku e bon notisia di Beibel. Frank a bisa: “Debí na e situashon di mundu, hopi hende ta ansioso pa sa kiko tin den futuro. Nos ta purba animá nan ku e profesianan bíbliko tokante un paradeis riba tera.” Asina Kristian ku Frank ta yuda kumpli ku un rasgo di e señal di Hesus, esta, e predikashon di e evangelio òf bon notisia di e Reino.—Mateo 24:14.

Ora e último dianan yega nan kulminashon, Hesus lo eliminá e sistema bieu aki i e hendenan ku ta apoy’é. E ora ei e Reino Mesiániko lo organisá trabounan ku lo kombertí e tera aki den e Paradeis ku Beibel a primintí. Humanidat lo ta liber di malesa i morto, i e mortonan lo ser resusitá pa biba riba tera. Esaki ta e futuro maravioso ku ta spera hende ku ta rekonosé e señal di tempunan. Lo no ta sabí di nos parti pa siña mas di e señal i haña sa kiko un persona tin ku hasi pa e por sobrebibí e fin di e sistema di kosnan aki? Esaki sigur-sigur mester ta un asuntu di sumo importansia pa tur hende.—Juan 17:3.

[Komentario na página 4]

Hesus a profetisá di vários suseso ku huntu lo a forma un señal ku hende rònt mundu lo por identifiká

[Komentario na página 6]

Bo ta mira un patronchi, un señal ku ta konsistí di vários rasgo ku ta afektá mundu kompletu?

[Kuadro/Plachinan na página 6]

KARAKTERÍSTIKANAN DI E ÚLTIMO DIANAN

Guera manera nunka promé.—Mateo 24:7; Revelashon 6:4

Hamber.—Mateo 24:7; Revelashon 6:5, 6, 8

Pèst.—Lukas 21:11; Revelashon 6:8

Oumento di maldat.—Mateo 24:12

Temblor.—Mateo 24:7

Tempunan trabahoso.—2 Timoteo 3:1

Amor eksesivo pa plaka.—2 Timoteo 3:2

Desobedensia na mayornan.—2 Timoteo 3:2

Falta di amor.—2 Timoteo 3:3

Stimadó di plaser mas ku stimadó di Dios.—2 Timoteo 3:4

Sin dominio propio.—2 Timoteo 3:3

Odiadó di loke ta bon.—2 Timoteo 3:3

No ta tuma nota dje peliger ku ta menasá.—Mateo 24:39

Bofonadónan ta rechasá prueba dje último dianan.—2 Pedro 3:3, 4

Predikashon mundial dje Reino di Dios.—Mateo 24:14

[Rekonosementu pa Potrèt na página 5]

Sòldánan di Guera Mundial I: Di e buki The World War—A Pictorial History, 1919; famia pober: AP Photo/Aijaz Rahi; víktima di polio: © WHO/P. Virot