Historia di Bida

E Ehèmpel di Mi Mayornan A Fortalesé Mi

SEGUN E RELATO DI JANEZ REKELJ

Tabata aña 1958. Ami ku mi esposa Stanka tabata den serunan haltu di Alpen di Karawanken n’e frontera di Yugoslavia ku Oustria, den un intento pa hui bai Oustria. Esaki tabata peligroso pasobra patruyanan di frontera yugoslavo armá tabata determiná pa stroba hende di krusa. Dado momentu nos a haña nos konfrontá ku un abismo grandi nos dilanti. Nunka promé ni ami ni Stanka no a yega di mira e serunan n’e banda di Oustria. Nos a sigui direkshon ost te ora nos a yega na un bahada yen di baranka i greis. Mará ku un tapol ku nos tabatin, nos a slep baha e seru sin sa na unda nos lo a bai para.

LAGA mi konta kon nos a haña nos den e situashon aki i kon e ehèmpel fiel di mi mayornan a motivá mi pa keda leal na Yehova den tempu di difikultat.

Mi a lanta na Slovenia, lokual awe ta un pais chikitu meimei di Europa. E ta situá den e serunan di Alpen di Europa, ku Oustria na nort, Italia na wèst, Kroasia na sur i Hungria na ost di dje. Sin embargo, ora mi mayornan, Franc i Rozalija Rekelj, a nase, Slovenia tabata parti di e Imperio Oustria-Hungria. Na fin di Promé Guera Mundial, Slovenia a bira parti di un estado nobo yamá e Reino di e serbionan, kroatanan i slovenionan. Na 1929 nan a kambia nòmber di e pais pa Yugoslavia, ku ta nifiká literalmente “Sur Slavia.” Ami a nase dia 9 di yanüari di e mesun aña ei, den un área pafó di e pueblo di Podhom, banda di e lago pintoresko di Bled.

Mi mama a haña un kriansa katóliko estrikto.  Un di su tionan tabata pastor, i tres di su tantanan tabata sùr. E tabatin un deseo ferviente pa haña un Beibel, p’e les’é i komprond’é. Mi tata sí no tabatin muchu bon palabra pa religion. E papel ku religion a hunga den e Guera Grandi di 1914-18 tabatin e disgustá.

Kon Mi A Haña e Bèrdat

Poko tempu despues di e guera, un primu di mi mama, Janez Brajec, i su esposa, Ančka, a bira Studiantenan di Beibel, manera nan tabata yama Testigunan di Yehova den e tempu ayá. Den e periodo ei nan tabata biba na Oustria. For di rònt di 1936 bini ariba, Ančka a bin bishitá mi mama na vários okashon. El a duna mi mama un Beibel, lokual mi mama a lesa rápidamente, huntu ku e revistanan Toren di Vigilansia i otro publikashonnan slovenio basá riba Beibel. Finalmente, pa motibu ku Hitler a poderá di Oustria na 1938, Janez i Ančka a muda bai Slovenia bèk. Mi ta kòrda nan komo un pareha bon eduká, huisioso ku tabatin berdadero amor pa Yehova. Hopi bes nan tabata papia di e bèrdatnan di Beibel ku mi mama, lokual a motiv’é pa e dediká su bida na Yehova. El a batisá na 1938.

Mi mama a kousa un konmoshon den e área tempu ku el a stòp ku sierto kustumbernan ku no ta armonia ku Beibel, manera selebrashon di Pasku; tempu ku e no tabata kome bloedworst mas; i foral dia ku el a kohe tur e imágennan ku nos tabatin i a kima nan. Djis despues el a kuminsá haña oposishon. Mi mama su tantanan, e sùrnan, a disidí di skirbié pa purba konvens’é pa e bolbe bèk na Maria i na iglesia katóliko. Sin embargo, ora mi mama tabata skirbi nan i hasi nan preguntanan spesífiko tokante Beibel, e no tabata haña kontesta. Mi tawela tambe a opon’é fuertemente. Mi tawela no tabata mal hende, pero nos famia i e komunidat a pone un preshon grandi riba dje. Komo resultado, na vários okashon el a destruí literatura bíbliko di mi mama, pero nunka e no a mishi ku su Beibel. El a rog’é na rudia pa bai misa bèk. Asta el a bai asina leu di menasá mi mama ku un kuchú. Pero mi tata a splika mi tawela bon kla ku esei sí lo e no a tolerá.

Mi tata a sigui sostené mi mama su derecho pa lesa Beibel i pa skohe su mes religion. Na 1946 e tambe a batisá. Mirando kon Yehova a fortalesé mi mama pa defendé e bèrdat sin miedu apesar di oposishon i kon Yehova a rekompensá su fe, a motivá mi pa desaroyá mi propio relashon ku Dios. Mi a saka hopi benefisio tambe for di mi mama su kustumber di lesa na bos haltu pa mi for di Beibel i for di publikashonnan basá riba Beibel.

 Mi mama tabata papia hopi tambe ku su ruman muhé, Marija Repe, i despues di un tempu ami ku Tanchi Marija a batisá riba e mesun dia meimei di yüli 1942. Un ruman hòmber a bin duna un diskurso kòrtiku, i nos a batisá na nos kas den un tobo grandi di palu.

Trabou Fòrsá Durante Segundo Guera Mundial

Na 1942, meimei di Segundo Guera Mundial, Alemania i Italia a invadí Slovenia i a dividié entre nan mes i Hungria. Mi mayornan a nenga di djòin Volksbund, e organisashon di pueblo nazi. Ami a nenga di bisa “Heil Hitler” na skol. Aparentemente, mi mener di skol a informá outoridatnan di e situashon.

Nan a manda nos den un trein rumbo pa un kastel banda di e pueblo di Hüttenbach, Bavaria, ku tabata wòrdu usá komo un kampamentu di trabou fòrsá. Mi tata a hasi areglo pa mi traha i biba serka e panadero lokal i su famia. Durante e tempu ei mi a siña traha pan, lokual a resultá despues di tabata masha útil. Ku tempu, tur mi sobrá famianan (entre kua Tanchi Marija i su famia) a ser transferí pa e kampamentu na Gunzenhausen.

Na fin di e guera, mi tabata preparando pa djòin un grupo pa biaha bai kaminda mi mayornan tabata. E anochi promé ku mi mester a bai, mi tata a presentá inesperadamente. Mi no sa kiko lo a para di mi si mi a bai ku e grupo, ya ku no tabata trata aki di hende konfiabel. Atrobe mi a sinti e kuido amoroso di Yehova segun ku e tabata usa mi mayornan pa protehá mi i entrená mi. Ami ku mi tata a kana tres dia largu pa topa nos famia. Pa yüni 1945 nos tur a regresá kas bèk.

Despues di e guera, e komunistanan bou di e liderato di Presidente Josip Broz Tito a bini na poder na Yugoslavia. Konsekuentemente, e situashon pa Testigunan di Yehova a keda difísil.

Na 1948 un ruman a bini for di Oustria i a aseptá un invitashon pa kome serka nos. Tur kaminda ku el a bai, polis tabata siguié i arestá e rumannan ku el a bishitá. Nan a arestá mi tata tambe pa motibu ku el a brind’é hospitalidat i no a denunsi’é na polis, i komo konsekuensia di esei, mi tata a pasa dos aña den prizon. Tabata un tempu hopi difísil pa mi mama, no solamente pasobra mi tata tabata ousente, sino tambe pasobra e tabata sa ku ami ku mi ruman hòmber mas yòn pronto lo a haña nos mes ku e prueba di neutralidat.

Den Prizon na Masedonia

Na novèmber 1949 nan a manda yama mi pa drenta servisio militar. Mi a bai pa raportá i pa splika ku mi ta nenga di sirbi pa motibu di mi konsenshi. E outoridatnan no a ni skucha mi sino a pone mi riba un trein huntu ku e personanan reklutá rumbo pa Masedonia, na e otro banda di Yugoslavia.

Pa tres aña largu mi no tabatin kontakto ku mi famia ni ku e rumannan spiritual, i mi a keda sin niun literatura, ni sikiera un Beibel. Tabata hopi difísil. Mi a wòrdu sostené dor di meditá riba Yehova i e ehèmpel di su Yu, Hesukristu. E ehèmpel di mi mayornan tambe a fortalesé mi. Ademas, orashon konstante pa fortalesa a yuda mi evitá desesperashon.

Ku tempu nan a manda mi na un prizon na Idrizovo, banda di Skopje. Den e prizon aki, e prezunan tabatin vários tarea i nan tabata ehersé vários fishi. Na prinsipio, mi tabata traha den limpiesa i komo koerier entre e ofisinanan. Ounke hopi bes un prezu en partikular  kende ántes tabata miembro di polis sekreto tabata intimidá mi, mi tabatin un bon relashon di trabou ku tur otro hende, sea vigilante, prezu òf asta gerente di e fábrika di prizon.

Despues mi a haña sa ku tabatin mester di un panadero pa e panaderia di prizon. Un par di dia despues, e gerente a bini na momentu ku nan tabata kontrolá si tur prezu tabata presente. El a kana yega na e fila, para dilanti mi i puntra mi: “Panadero bo ta?” Mi di: “Sí, señor.” El a bisa mi: “Mañan mainta raportá n’e panaderia.” E prezu ku a trata mi malu tabata pasa vários biaha banda di e panaderia, pero e no por a hasi nada. Mi a traha einan di febrüari pa yüli di aña 1950.

Despues nan a transferí mi na e baraknan ku yama Volkoderi, parti zùit di Masedonia, banda di e Lago Prespa. For di e stat Otešovo ku ta keda eibanda mi por a manda karta pa mi famia. Ounke mi a traha huntu ku otro prezu den konstrukshon di kaya, mayoria biaha mi tabata traha den un panaderia, lokual tabata mas fásil pa mi. Na novèmber 1952 nan a laga mi liber.

Durante e tempu ku mi no tabata na Podhom, un kongregashon a ser formá den e área ei. Na prinsipio, e kongregashon tabata reuní den un penshon chikitu na Spodnje Gorje. Mas despues, mi tata a pone un kuarto disponibel den nos kas pa e kongregashon por a reuní aden. Mi tabata kontentu di por a djòin nan ora mi a regresá for di Masedonia. Tambe mi a reanudá amistat ku Stanka, kende mi a konosé promé ku mi a bai prizon. Dia 24 di aprel 1954 nos a kasa. Pero pronto lo a yega un fin na mi libertat.

Den Prizon na Maribor

Na sèptèmber 1954, nan a bolbe manda yama mi pa drenta servisio militar. E biaha aki, nan a sentensiá mi na mas ku tres aña i mei den un prizon na Maribor, ku ta situá den e parti ost di Slovenia. Asina ku mi a haña un chèns, mi a kumpra algun pèn ku papel. Mi a kuminsá skirbi tur loke mi por a kòrda—tekstonan di Beibel, sitanan for di E Toren di Vigilansia i ideanan for di otro publikashonnan kristian. Mi tabata lesa mi notanan i agregá otronan na mi ‘buki’ segun ku mi tabata kòrda mas. Na final di mi estadia den prizon, e buki tabata yen-yen i esaki a yuda mi keda enfoká riba e bèrdat i mantené mi mes spiritualmente fuerte. Orashon i meditashon tambe tabata yudansanan balioso pa mi fortalesa spiritual, lokual a duna mi mas kurashi pa kompartí e bèrdat ku otro hende.

E tempu ei nan a permití mi risibí ún karta pa luna i ún bishita pa luna di 15 minüt. Stanka tabata biaha henter anochi den trein pa yega prizon trempan pa bishitá mi, pa despues e por a biaha bai bèk riba e mesun dia. E bishitanan aki tabata un gran estímulo pa mi. Despues mi a pensa riba un plan pa yega na un Beibel. Ami ku Stanka tabata sinta dilanti otro na un mesa, huntu ku un wardadó di prezu asigná pa vigilá nos. Ora e wardadó di prezu no tabata wak, mi a hinka un karta den tas di Stanka pa pidié pone un Beibel den su tas e siguiente biaha ku e bin bishitá mi.

Stanka i mi mayornan a haña ku esaki tabata demasiado peligroso, p’esei nan a habri un ehemplar di e Skritura Griego Kristian for di otro i hinka su páginanan den algun pan di kokolishi. Den e manera aki mi a risibí e Beibel ku mi tabatin mester. Den e mesun manera mi a risibí tambe kopianan di E Toren di Vigilansia  ku Stanka a traha na man. Mesora mi tabata skirbi esakinan over ku mi mes handschrift i destruí e originalnan pa niun hende ku lo por a haña e artíkulonan no haña sa di unda mi a optené nan.

Pa motibu di mi predikashon persistente, otro prezunan tabata komentá ku lo mi a haña mi den problema sigur. Na un okashon, mi tabata den un kòmbersashon basta animá ku un otro prezu tokante Beibel. Nos a tende zonidu di yabi den slòt di porta, i un wardadó di prezu a kana drenta. Mesora mi a pensa ku nan lo a bai sera mi den kashòt. Pero no ta esei tabata e intenshon di e wardadó di prezu. El a tende mi papia i kier a djòin e kòmbersashon. Satisfecho ku e kontestanan ku el a haña riba su preguntanan, el a sali i lòk e porta di sèl su tras.

Durante e último luna di mi kastigu, e ofisial enkargá ku reformashon di prezu a elogiá mi pa a defendé e bèrdat firmemente. Mi a sinti ku esaki tabata un bunita rekompensa pa mi esfuersonan pa deklará e nòmber di Yehova. Na mei 1958, mi a bolbe haña mi libertat.

Huida pa Oustria, Despues Oustralia

Na ougùstùs 1958, despues ku mi mama tabata malu pa un tempu, el a bin fayesé. Anto un luna despues nan a manda yama mi pa di tres biaha pa drenta servisio militar. E anochi ei ami ku Stanka a tuma e desishon krusial ku a hiba nos na e eksperensia dramátiko na frontera, menshoná anteriormente. Sin bisa niun hende nada, nos a prepará dos rùgtas i un tapol i a sali via bentana, rumbo pa e frontera oustriako, djis parti wèst di Seru Stol. A parse ku Yehova a perkurá e salida pa nos ora el a mira ku nos tabatin mester di poko alivio.

E outoridatnan oustriako a manda nos na un kampo di refugiado banda di Salzburg. Durante nos estadia di seis luna einan, tur ora bai nos tabata huntu ku e Testigunan lokal, pues nos a pasa masha poko tempu den e kampamentu. Otro personanan den e kampamentu a keda asombrá kon lihé nos a haña amigu. Tabata durante e tempu aki ku nos a asistí na nos promé asamblea. Tambe pa promé biaha nos por a prediká libremente di kas pa kas. Dia nos mester a bai, tabata duru pa despedí di e amigunan stimá aki.

E outoridatnan oustriako a ofresé nos e posibilidat pa imigrá bai Oustralia. Nunka nos no a ni soña di yega asina leu. Nos a biaha ku trein bai Genoa, Italia, i di einan nos a subi un barku rumbo pa Oustralia. Finalmente nos a bai biba den e stat di Wollongong, New South Wales. Aki nos yu hòmber, Philip, a nase dia 30 di mart 1965.

Nos bida na Oustralia a habri hopi oportunidat di sirbishi, inkluso esun di prediká na otro hende ku a imigrá for di áreanan ku ántes tabata konosí komo Yugoslavia. Nos ta gradisí Yehova pa su bendishon, inkluso p’e echo ku nos por sirbié komo un famia uní. Philip ku su kasá, Susie, tin e privilegio di sirbi na e sukursal di Testigunan di Yehova na Oustralia, i asta nan a haña e oportunidat di pasa dos aña na e sukursal na Slovenia.

Apesar di e desafionan ku edat avansá i problema ku salú ta trese kuné, ami ku mi esposa ta sigui disfrutá di nos sirbishi na Yehova. Mi ta hopi gradisidu pa e magnífiko ehèmpel di mi mayornan! Esei ta sigui fortalesé mi i yuda mi hasi loke apòstel Pablo a bisa: ‘Regosihá den speransa, perseverá den tribulashon, dediká na orashon.’—Romanonan 12:12.

[Plachi na página 16, 17]

Mi mayornan na kabamentu di dékada di 1920

[Plachi na página 17]

Mi mama, na man drechi, huntu ku Ančka, kende a siñ’é e bèrdat

[Plachi na página 18]

Ami ku mi kasá, Stanka, djis despues ku nos a kasa

[Plachi na página 19]

E kongregashon ku tabata reuní den nos kas na 1955

[Plachi na página 20]

Ami ku mi esposa, nos yu Philip, i su kasá, Susie