Interpretashon di Señal Ta un Asuntu Serio!

“Na promé instante mi a pensa ku ta djis un tiki doló di kabes nos yu hòmber Andreas tabatin. Pero el a pèrdè apetit i tabatin keintura haltu. Su doló di kabes a bira pió, i mi a kuminsá preokupá. Ora mi kasá a bini kas, nos a bai dòkter ku Andreas. E dòkter a chèk e síntomanan i mesora el a manda Andreas hospital. E problema tabata mas serio ku un doló di kabes. Andreas tabatin meningítis. El a haña tratamentu i no a dura mashá ku e tabata bon di salú atrobe.”—Gertrud, un mama na Alemania.

PROBABLEMENTE hopi mayor a yega di pasa den e eksperensia di Gertrud. Nan ta opservá sierto señalnan ku ta indiká ku nan yu lo por ta malu. Ounke no ta tur malesa ta serio, mayornan no por permití nan mes e luho di ignorá síntomanan di malesa ku nan yunan ta manifestá. Si un mayor dal e pasonan nesesario ora e opservá e señalnan, esaki por hasi un diferensia grandi. Pues, e ta un asuntu serio.

Esaki ta sierto tambe den asuntunan ku no tin keber ku nos salú. Un bon ehèmpel di esaki ta e desaster di tsunami ku a tuma lugá na desèmber 2004 den áreanan rònt di Oséano Indio. Organisashonnan gubernamental na lugánan manera Oustralia i Hawai a detektá e temblor fuerte den e parti nort di Sumatra i a premirá e konsekuensianan peligroso ku esaki lo por tabatin. Sin embargo, no tabatin ningun sistema organisá pa e hendenan ku tabata den e zona di peliger haña spièrtamentu te pa nan reakshoná riba esaki. Komo resultado di esei mas ku 220.000 hende a pèrdè nan bida.

Señalnan Hopi Mas Importante

Tempu Hesukristu tabata riba tera, el a duna su oyentenan un lès den opservá señal i aktua di akuerdo ku nan. E tabata papia di algu hopi mas importante. Beibel ta informá: “E fariseonan i saduseonan a bin, i pa pon’é na prueba nan a pidié pa mustra nan un señal for di shelu. Ma el a kontestá i a bisa nan: ‘Ora bira tardi boso ta bisa: “Ta bai tin bon tempu, pasobra shelu ta kòrá.” I mainta: “Awe ta bai tin mal tempu, pasobra shelu ta kòrá i tur tapá ku nubia skur.” Boso sa kon pa distinguí [òf,  “interpretá,” NW] e aspekto di shelu, ma boso no por distinguí [òf, “interpretá,” NW] e señalnan di e tempunan?’”—Mateo 16:1-3.

Dor di menshoná “e señalnan di e tempunan,” Hesus a indiká ku su oyentenan hudiu den e promé siglo mester tabata konsiente di e urgensia di e tempu ku nan tabata biba aden. E sistema di kosnan hudiu tabata serka di bai eksperensiá un katástrofe ku lo a afektá nan tur. Un par di dia promé ku Hesus su morto, el a papia ku su disipelnan tokante un otro señal: e señal di su presensia. Loke el a bisa nan na e okashon ei ta di vital importansia pa tur hende awe.