E Palabra di Yehova Ta Bibu

 Puntonan Sobresaliente di e Buki di Promé Krónikanan

A PASA rònt di 77 aña desde ku e hudiunan a regresá nan patria for di eksilio na Babilonia. E tèmpel ku gobernadó Zorobabel a rekonstruí a eksistí pa 55 aña kaba. E motibu prinsipal pakiko e hudiunan a regresá tabata pa restorá adorashon berdadero na Yerusalèm. Ma e pueblo no tabatin selo pa e adorashon di Yehova. Nan tabatin mester di hopi estímulo, i esei ta eksaktamente loke e buki bíbliko di Promé Krónikanan a ofresé.

Ku eksepshon di e registronan genealógiko, Promé Krónikanan ta abarká un periodo di mas o ménos 40 aña, for di e morto di Rei Saul te na e morto di Rei David. Esun ku lo a skirbi e buki aki na aña 460 promé ku nos era ta e saserdote Esdras. Promé Krónikanan ta di interes pa nos pasobra e ta duna nos un bon bista di e adorashon ku a tuma lugá n’e tèmpel i tambe e ta kontené detayenan di e liña di desendensia ku a hiba na e Mesias. Komo parti di e Palabra inspirá di Dios, su mensahe ta fortifiká nos fe i ta yuda nos komprondé Beibel mihó.—Hebreonan 4:12.

UN REGISTRO SIGNIFIKATIVO DI NÒMBER

(1 Krónikanan 1:1–9:44)

E registronan genealógiko detayá ku Esdras a kompilá tabata nesesario pa por lo ménos tres motibu: pa garantisá ku ta hòmbernan outorisá so a sirbi komo saserdote, pa a yuda determiná e herensia di tribu i pa a konserbá e registro di e liña di desendensia ku a hiba na e Mesias. E registro ta bai bèk den pasado di e hudiunan i ta yega te na e promé hòmber. Di Adam pa Noe a pasa dies generashon, i di Noe pa Abraham tambe a pasa dies generashon. Despues ku e relato menshoná e yu hòmbernan di Ismael, e yu hòmbernan di Abraham su konkubina Ketura i e yu hòmbernan di Esau, e ta enfoká riba e liña di desendensia di e 12 yu hòmbernan di Israel.—1 Krónikanan 2:1.

Esdras ta duna un relato ekstenso di e desendientenan di Huda pasobra ta nan a produsí e liña real di Rei David. Di Abraham pa David a pasa 14 generashon i di David pa e deportashon pa Babilonia tambe a pasa 14 generashon. (1 Krónikanan 1:27, 34; 2:1-15; 3:1-17; Mateo 1:17) Despues Esdras ta menshoná e desendientenan di e tribunan na banda ost di Riu Hordan, siguí pa e liña di desendensia di e yu hòmbernan di Leví. (1 Krónikanan 5:1-24; 6:1) Despues ta bini un resúmen di algun di e otro tribunan ku a keda parti wèst di Riu Hordan i di e liña di Benjamin en detaye. (1 Krónikanan 8:1) E nòmbernan di e promé habitantenan di Yerusalèm ku a bini bèk for di nan koutiverio na Babilonia tambe ta ser menshoná.—1 Krónikanan 9:1-16.

Kontesta Riba Pregunta Bíbliko:

1:18—Ken tabata tata di Sala—Kainán òf Arfaksad? (Lukas 3:35, 36) Arfaksad tabata tata di Sala. (Génesis 10:24; 11:12) Probablemente  e ekspreshon “Kainán” na Lukas 3:36 ta un deformashon di e palabra “kaldeo.” Si esei ta e kaso, anto e teksto original lo a bisa, “yu hòmber di e kaldeo Arfaksad.” Tambe ta eksistí e posibilidat ku e nòmbernan Kainán i Arfaksad ta referí na e mesun persona. Algu ku nos no por pasa por haltu ta e echo ku e ekspreshon “yu hòmber di Kainán” no ta aparesé den algun manuskrito.

2:15—David tabata e di shete yu di Isaí? Nò. Isaí tabatin ocho yu hòmber, i David tabata esun di mas chikitu. (1 Samuel 16:10, 11; 17:12) Tur kos ta mustra ku un di e yu hòmbernan di Isaí a muri sin ku e tabatin yu. Unabes e yu ei lo no tabatin ningun influensia riba e registronan genealógiko, Esdras a omití su nòmber.

3:17—Pakiko Lukas 3:27 ta bisa ku Salatiel, yu hòmber di Jekonias, ta yu di Neri? Jekonias tabata tata di Salatiel. Sin embargo, aparentemente Neri a duna Salatiel su yu muhé komo esposa. Lukas a referí na Neri su suegro komo Neri su yu hòmber meskos ku el a hasi den e kaso di Hosé, bisando ku Hosé ta yu hòmber di Elí, tata di Maria.—Lukas 3:23.

3:17-19—Kiko Zorobabel, Pedaias i Salatiel tabata di otro? Zorobabel tabata yu hòmber di Pedaias, kende tabata un ruman hòmber di Salatiel. Sin embargo, tin biaha Beibel ta yama Zorobabel yu di Salatiel. (Mateo 1:12; Lukas 3:27) Esei probablemente ta debí ku Pedaias a muri i Salatiel a kria Zorobabel. Òf por ta tambe ku Salatiel a muri sin laga yu atras; p’esei Pedaias a kasa ku biuda di Salatiel, i Zorobabel a nase komo promé yu di e union ei.—Deuteronomio 25:5-10.

5:1, 2—Kiko e echo ku Hosé a haña e derecho di primogénito a nifiká p’e? Esei a nifiká ku Hosé a risibí un porshon dòbel di e herensia. (Deuteronomio 21:17) Asina el a bira tata di dos tribu—Efrain i Manasés. Kada un di e otro yu hòmbernan di Israel tabata tata di un tribu so.

Lès pa Nos:

1:1–9:44. E genealogia di hende real ta proba ku henter e areglo di adorashon berdadero ta basá, no riba mito, sino riba echo.

4:9, 10. Yehova a kontestá e orashon ferviente di Jabes pa den un esfera pasífiko hasi su teritorio mas grandi pa esaki por a akomodá mas hende temeroso di Dios. Nos tambe tin ku pidi Yehova di kurason den orashon pa mas oumento segun ku nos ta partisipá ku entusiasmo den e obra di hasi disipel.

5:10, 18-22. Den e dianan di Rei Saul, e tribunan ost di Riu Hordan a derotá e hagarenonan ounke e últimonan aki tabata dos bes mas tantu ku e tribunan. Esaki ta debí ku e hòmbernan balente di e tribunan aki a konfia den Yehova i a akudí na dje pa yudansa. Laga nos tene pleno konfiansa den Yehova segun ku nos ta hiba nos guera spiritual kontra enemigunan ku ta muchu mas tantu ku nos.—Efesionan 6:10-17.

9:26, 27. E wardadónan-di-porta levita tabatin un funshon di hopi konfiansa. A enkargá nan ku e yabi di entrada pa e áreanan santu di e tèmpel. Nan a demostrá ku nan tabata konfiabel den e trabou di habri e portanan tur dia. Nos a haña e enkargo serio pa bai serka e hendenan den nos teritorio i yuda nan bini pa adorá Yehova. Awor, nos no mester demostrá di ta mes konfiabel ku e wardadónan-di-porta levita?

 DAVID A REINA KOMO REI

(1 Krónikanan 10:1–29:30)

E relato ta kuminsá ku e historia di Rei Saul i su tres yu hòmbernan ku a muri den bataya kontra e filisteonan na Seru Gilboa. David, yu di Isaí, a ser hasí rei riba e tribu di Huda. Hòmbernan for di tur tribu a bini Hebròn i a hasié rei riba henter Israel. (1 Krónikanan 11:1-3) Pronto despues di esei, el a kapturá Yerusalèm. Despues, e israelitanan a trese e arka di e pakto Yerusalèm “ku gritu i ku zonidu di kachu, ku . . . arpa i salterio [“instrumènt di kuèrdè,” NW].”—1 Krónikanan 15:28.

David a ekspresá su deseo pa konstruí un kas pa e Dios berdadero. Ounke Yehova a reservá e onor ei pa Salomon, el a sera un pakto ku David pa un Reino. Durante David su kampaña kontra e enemigunan di Israel, Yehova a dun’é un viktoria tras di otro. Un senso ilegal a resultá den morto di 70.000 israelita. Despues ku David a risibí instrukshon di un angel pa traha un altar pa Yehova, el a kumpra un lugá for di un jebuseo ku yama Ornan. David a kuminsá hasi “preparashonnan amplio” pa konstrukshon di un kas “sumamente magnífiko” pa Yehova na e sitio ei. (1 Krónikanan 22:5) David a organisá sirbishinan levítiko, deskribí aki den Promé Krónikanan ku mas detaye ku den kualke otro kaminda den e Skritura. E rei i e pueblo a duna kontribushonnan generoso pa e tèmpel. Despues di un reinado di 40 aña, David a muri “yen [“satisfecho,” NW] di dia, rikesa i onor; i su yu hòmber Salomon a [kuminsá] reina na su lugá.”—1 Krónikanan 29:28.

Kontesta Riba Pregunta Bíbliko:

11:11—Pakiko e kantidat di hende matá ta 300 i no 800 manera e ta ser menshoná den e relato paralelo na 2 Samuel 23:8? E kabesante di David su tres hòmbernan di mas balente tabata Jasobeam òf Joseb-basebet. E otro dos hòmbernan poderoso tabata Eleazar i Sama. (2 Samuel 23:8-11) E motibu pa e diferensia den e dos relatonan ta sinta den e echo ku probablemente nan ta referí na dos diferente hazaña realisá dor di e mesun persona.

11:20, 21—Kiko tabata Abisai su posishon na komparashon ku e tres hòmbernan prinsipal poderoso di David? Abisai no tabata un di e tres hòmbernan poderoso ku a sirbi David. Sin embargo, manera 2 Samuel 23:18 i 19 ta trese dilanti, e tabata e kabesante di 30 guerero i tabata mas onrá ku nan tur. Abisai tabatin e mesun reputashon ku e tres hòmbernan prinsipal poderoso pasobra el a realisá un akto poderoso paresido na esun di Jasobeam.

12:8—Den ki sentido e karanan di e guereronan gadita tabata manera “kara di leon”? E hòmbernan balente aki a tuma parti pa David den e desierto. Nan kabei a krese bira largu, i e bòshi di kabei ei a duna nan un aspekto feros, manera di leon.

13:5—Kiko ta e “Sihor di Egipto”? Siendo ku “Sihor” ta nifiká básikamente “riu” na hebreo, algun hende ta pensa ku e ekspreshon aki ta referí na un taki di Riu Nilo. Nan ta pensa ku “e Riu di Egipto” menshoná na Numbernan 34:5 tambe ta referí na e mesun “riu.” Sin embargo, na Numbernan 34:5 a usa un otro palabra hebreo ku por wòrdu tradusí mas korektamente komo “roi.” P’esei, aparentemente e “Sihor di Egipto” ta “e roi di Egipto”—un ravijn largu ku ta marka e frontera zùitwèst di e Tera Primintí.—Numbernan 34:2, 5; Génesis 15:18.

 16:30—Kiko nos tin ku komprondé for di e palabra “tembla” dilanti Yehova? Na hebreo e ekspreshon tradusí komo “tembla” ta nifiká literalmente “haña dolónan severo” i aki e ta ser usá figurativamente pa transmití e idea di temor respetuoso i rèspèt haltu pa Yehova.

16:1, 37-40; 21:29, 30; 22:19—Ki areglo pa adorashon tabata na vigor na Israel for di e tempu ku e Arka a ser hibá Yerusalèm te dia e tèmpel a ser konstruí? Dia David a trese e Arka Yerusalèm i a pon’é den e tènt ku el a laga traha, pa hopi aña e Arka no tabata den e tabernakel. Despues ku a hiba e Arka Yerusalèm, el a keda den e tènt einan. E tabernakel tabata na Gabaon, kaminda e Sumo Saserdote Zadok i su rumannan a efektuá e sakrifisionan preskribí den e Lei. E areglo aki a kontinuá te dia a kaba di traha e tèmpel di Yerusalèm. Ora e tèmpel tabata kla, a trese e tabernakel for di Gabaon pa Yerusalèm, i a pone e Arka den e Santísimo di e tèmpel.—1 Reinan 8:4, 6.

Lès pa Nos:

13:11. En bes di rabia i kulpa Yehova ora nos intentonan frakasá, nos mester analisá e situashon i purba mira kiko a kousa e fayo. Sin duda, David a hasi esei. El a siña for di su fayo i despues a logra trese e Arka Yerusalèm, usando e método korekto. *

14:10, 13-16; 22:17-19. Promé ku nos hasi kualke kos ku por afektá nos spiritualmente, semper nos mester aserká Yehova den orashon i buska su guia.

16:23-29. E adorashon di Yehova mester ta nos promé interes den bida.

18:3. Yehova ta e Kumplidó di su promesanan. Pa medio di David, el a kumpli ku su promesa di duna e desendientenan di Abraham henter e tera di Kánaan, ku ta ekstendé “for di e riu di Egipto te na e riu grandi, Riu Eufrates.”—Génesis 15:18; 1 Krónikanan 13:5.

21:13-15. Yehova a manda e angel pa stòp e plaga pasobra E tabatin duele di mira Su pueblo sufri. En bèrdat, “su miserikòrdianan ta masha grandi mes.” *

22:5, 9; 29:3-5, 14-16. Ounke David no a haña e enkargo pa konstruí e tèmpel di Yehova, el a manifestá un spiritu generoso. Kon bin? Pasobra el a realisá ku tur loke el a yega na dje tabata debí na e bondat di Yehova. E mesun sintimentunan di gratitut mester impulsá nos pa nos tambe tin un spiritu generoso.

24:7-18. Dia e angel di Yehova a presentá na Zakarias, tata di Juan Boutista, i anunsiá e binidero nasementu di Juan, e areglo di 24 divishon saserdotal ku David a instituí tabata na vigor. Komo miembro di “e divishon di Abias,” e tempu ei tabata Zakarias su turno pa sirbi na e tèmpel. (Lukas 1:5, 8, 9) Ta bon kla anto ku adorashon berdadero tin keber ku personahenan históriko, no mitológiko. Ora nos ta koperá lealmente ku “e esklabo fiel i prudente” en konekshon ku Yehova su adorashon bon organisá awe, nos ta haña hopi bendishon.—Mateo 24:45.

Sirbi Yehova “ku un Alma Gososo”

No ta registronan genealógiko so Promé Krónikanan ta kontené. E ta relatá tambe kon David a trese e arka di pakto Yerusalèm, e ta papia di su gran viktorianan, di e preparashon pa konstrukshon di e tèmpel i kon e divishonnan di sirbishi di e saserdotenan levita a ser establesé. Sin duda, tur loke Esdras a relatá den Promé Krónikanan lo mester a benefisiá e israelitanan, i yuda nan renobá nan selo pa e adorashon di Yehova na e tèmpel.

David a duna un bon ehèmpel dor di pone e adorashon di Yehova na promé lugá den su bida! En bes di buska privilegio spesial pa su mes, David a buska pa hasi e boluntat di Dios. Nos ta haña un bunita animashon pa apliká su konseho pa sirbi Yehova “ku un kurason kompletu i ku un alma gososo.”—1 Krónikanan 28:9, NW.

[Nota]

[Tabèl/Plachinan na página 8-11]

(Pa e teksto den su formato kompleto, wak e publikashon)

E generashonnan for di Adam te Noe (1,056 ana)

4026 promé ku nos era Adam

130 aña⇩

Sèt

105⇩

Enos

90⇩

Kainán

70⇩

Mahalaleel

65⇩

Jared

162⇩

Enok

65⇩

Matusalen

187⇩

Lamek

182⇩

2970 promé ku nos era NOE a nase

E generashonnan for di Noe te Abraham(952 aña)

2970 promé ku nos era NOE

502 aña⇩

Sèm

100⇩

E DILUVIO 2370 promé ku nos era

Arfaksad

35⇩

Sala

30⇩

Heber

34⇩

Peleg

30⇩

Reu

32⇩

Serug

30⇩

Nakor

29⇩

Taré

130⇩

2018 promé ku nos era ABRAHAM a nase

Di Abraham pa David: 14 generashon (911 aña)

2018 promé ku nos era Abraham

100 aña.

Isaak

60⇩

Jakòb

rònt di 88⇩

Huda

⇩

Fares

⇩

Hezron

⇩

Ram

⇩

Aminadab

⇩

Nason

⇩

Salmon

⇩

Boaz

⇩

Obed

⇩

Isaí

⇩

1107 promé ku nos era DAVID a nase