E Palabra di Yehova Ta Prosperá den “e Tera di Águila”

“E TERA di Águila.” Asina albanesnan ta yama nan pais den nan idioma. E pais aki, ku su kosta na Laman Adriátiko, ta situá riba e Península di Balkan, meimei di Gresia i eks-Yugoslavia. Ounke tin hopi teoria tokante orígen di e albanesnan, mayoria historiadó ta di akuerdo ku e albanesnan i nan idioma a bini for di e ilírikonan di antigwedat, kende nan kultura, segun The Encyclopædia Britannica, ta bai bèk te na aña 2000 promé ku nos era.

E bunitesa natural di Albania ta ekstendé for di e área yen di seru den nort pa e playanan ekstenso di santu blanku den sur na Laman Adriátiko. Ma e bunitesa di mas grandi ta sinta den su hendenan. Nan ta kariñoso i hospitalario, enérgiko i ekspresivo, hende ku ta siña lihé i ku ta ekspresá nan opinionnan ku hopi fervor i gestonan bibu.

Bishita di un Misionero Renombrá

Sin duda, e personalidat atraktivo di e hendenan i e bunita panorama di e pais a kapta atenshon di un biahero úniko hopi siglo pasá. Rònt di aña 56 di nos era, apòstel Pablo, kende  a realisá hopi biahe, a skirbi: “Te na Ilíriko mi a prediká e evangelio di Kristu kompletamente.” (Romanonan 15:19) E parti sur di Ilíriko ta korespondé ku loke awe ta e parti meimei i nort di Albania. Pablo a skirbi su karta for di Korinto, Gresia, sur di Ilíriko. E echo ku el a skirbi kon el a prediká kabalmente i yega “te na Ilíriko” ta indiká ku sea el a yega te na e frontera di Ilíriko òf el a drenta den e region mes. Sea kual sea, e lo a prediká den loke awe ta sur di Albania. Pues, nos por bisa ku e promé persona ku a prediká tokante e Reino di Dios na Albania tabata Pablo.

Siglonan a pasa. Imperionan a lanta i kai. Vários potensia stranhero a bini i bai for di e huki chikitu aki di Europa te ora Albania a bira un estado independiente na 1912. Rònt di un dékada despues, Albania a bolbe tende tokante Yehova su Reino.

Un Komienso Eksitante den Tempu Moderno

Den añanan ’20 di siglo pasá, algun imigrante albanes na Merka ku tabata asosiá ku e Studiantenan Internashonal di Beibel, manera Testigunan di Yehova tabata konosí e tempu ei, a regresá Albania pa kompartí loke nan a siña. Den nan tabatin Nasho Idrizi. Algun hende a reakshoná bon na e mensahe. Pa duna atenshon na e interes oumentante aki, na 1924 a asigná e ofisina di Rumania pa supervisá e trabou di prediká na Albania.

Un di e personanan ku a siña tokante Yehova na Albania den e añanan ei tabata Thanas Duli (Athan Doulis). El a kòrda ku “na 1925 tabatin tres kongregashon organisá na Albania, i tambe Studiantenan di Beibel isolá i personanan interesá aki i aya den henter e pais. E amor ku a eksistí entre nan tabata na kontraste grandi ku . . . e hendenan rònt di nan!” *

E falta di bon kaminda a pone ku tabata sumamente difísil pa bai di un lugá pa otro. Pero, publikadónan seloso a aseptá e reto. Por ehèmpel, na e kosta sur na Vlorë, Areti Pina a batisá na 1928 tempu ku e tabatin 18 aña. E tabata prediká na pia, subiendo i bahando serunan yen di baranka, ku Beibel den su man. E tabata pertenesé na un kongregashon fuerte na Vlorë na kuminsamentu di añanan ’30.

Na 1930, e sukursal na Atenas, Gresia, tabata dirigí e trabou di prediká na Albania. Na  1932, un superintendente biahero di Gresia a bishitá Albania pa animá i fortalesé e rumannan. E tempu ei mayoria di e personanan ku a siña e bèrdat di Beibel tabatin e speransa selestial. Nan reputashon komo personanan limpi i rekto a pone ku nan a gana rèspèt profundo di hende tur kaminda. E aktividat di e rumannan fiel aki a duna hopi fruta. Den kada un di e dos añanan, 1935 i 1936, nan a laga mas o ménos 6.500 literatura bíbliko na Albania.

Riba un dia, den e sentro di Vlorë, Nasho Idrizi a toka un di e diskursonan di J. F. Rutherford riba un tokadisko. E hendenan a sera nan negoshinan pa bin skucha Ruman Idrizi tradusí e diskurso na albanes. E selo di e promé maestronan inkansabel di Beibel ei a ser bendishoná. Pa 1940 tabatin 50 Testigu na Albania.

Un Pais Ateo

Na 1939, e fasistanan di Italia a okupá e pais. A revoká e rekonosementu legal di Testigunan di Yehova, i a prohibí nan trabou di prediká. Pronto despues, trupanan aleman a invadí e pais. Ora Segundo Guera Mundial a kaba, a lanta un lider militar karismátiko ku tabata yama Enver Hoxha. Su Partido Komunista a gana e elekshonnan di 1946, i el a bira promé minister. Nan a yama e añanan ku a sigui e tempu di liberashon, pero eseinan a nifiká nèt lo kontrali pa Yehova su pueblo.

Gradualmente, e gobièrnu a kuminsá bira ménos tolerante pa ku religion. Na armonia ku nan posishon neutral komo kristian, Testigunan di Yehova na Albania a nenga di karga arma i mete den polítika. (Isaias 2:2-4; Juan 15:17-19) Dor di esei, hopi di nan a ser enkarselá, sin kuminda òf e nesesidatnan básiko di bida. Den hopi kaso, nan ruman muhénan spiritual ku no a kai será, tabata laba nan paña i kushiná pa nan.

Sin Miedu Apesar di Persekushon

Den kuminsamentu di añanan ’40, Frosina Xheka, e tempu ei un teenager ku tabata biba den un pueblo banda di Përmet, a tende loke su ruman hòmbernan karnal mas bieu tabata siñando for di un Testigu sapaté ku yama Nasho Dori. * Outoridatnan tabata birando mas estrikto ku Testigunan di Yehova, pero pa disgustu di su mayornan, Frosina su fe a bira mas fuerte. “Nan tabata skonde mi sapatunan i batí mi si mi a bai un reunion kristian. Nan a purba kasa mi ku un inkrédulo. Ora mi a nenga, nan a saka mi for di kas na mal òrdu. Sneu tabata kai riba e dia ei. Nasho Dori a pidi Ruman Gole Flloko na Gjirokastër pa yuda mi. Nan a hasi areglo pa mi bai biba serka dje ku su famia. Mi ruman hòmbernan tabata den prizon pa dos aña pa motibu di nan posishon neutral. Despues ku nan a sali liber, mi a muda bai Vlorë pa biba serka nan.

Polisnan a purba obligá mi partisipá den aktividatnan  polítiko, pero mi a nenga. Nan a arestá mi, hiba mi den un kuarto i a rondoná mi. Un di nan a menasá mi: ‘Bo no sa kiko nos por hasi ku bo?’ Mi a kontest’é: ‘Boso por hasi solamente loke Yehova permití boso hasi.’ El a respondé mi na mal airu: ‘Bo mester ta loko! Bai for djaki!’”

E mesun spiritu leal ei a karakterisá e rumannan albanes atraves di e añanan ei. Pa 1957 nan a alkansá un máksimo di 75 publikadó di Reino. Na kuminsamentu di añanan ’60, e sede di Testigunan di Yehova a hasi areglo pa John Marks, un imigrante albanes na Merka, bishitá Tiranë pa yuda organisá e obra kristian. * Pero djis despues Luçi Xheka, Mihal Sveci, Leonidha Pope i otro rumannan den posishonnan di responsabilidat a ser mandá kampamentu di trabou fòrsá.

Lus na Final di e Tùnel

Promé ku 1967 Albania tabata kontra tur religion. Despues no a tolerá nan mas. Ni pastornan katóliko, ni òrtodòks ni mòslem no por a hasi nan seremonianan mas. Outoridatnan a sera misa- i moskénan òf a kombertí nan den sala di deporte, museo òf marshe. Ningun hende no tabatin mag di tin un Beibel, ni bisa públikamente ku nan ta kere den Dios.

Tabata práktikamente imposibel pa prediká i tene reunion. E Testigunan, riba nan mes, a hasi nan bèst pa sirbi Yehova, apesar ku nan tabata isolá for di otro. Den e añanan ’60 pa ’80, e kantidat di Testigu a baha konsiderablemente. Pero e poko ku a sobra tabata spiritualmente fuerte.

Na kabamentu di añanan ’80 tabatin masha poko kambio polítiko na Albania. Paña i kuminda tabata skars. E pueblo no tabata felis. E reformanan ku a afektá Europa Oriental a alkansá Albania na kuminsamentu di añanan ’90. Despues di 45 aña di e régimen diktatorial, un gobièrnu nobo a permití libertat religioso atrobe.

Bou di direkshon di e Kuerpo Gobernante di Testigunan di Yehova, e sukursalnan na Gresia i Oustria a kuminsá tuma kontakto mesora ku e rumannan albanes. Rumannan griego ku tabata sa albanes a trese algun literatura bíbliko resien tradusí na Tiranë i Berat. Ora e rumannan lokal ku tabata plamá anteriormente a topa e Testigunan di afó pa promé bes den hopi aña, nan kurason a yena ku goso.

Pioneronan Seloso di Otro Pais Ta Enkabesá e Obra

Na kuminsamentu di 1992, e Kuerpo Gobernante a hasi areglo pa Michael ku Linda DiGregorio, un pareha misionero ku antesedente albanes, muda bai Albania. Nan a buska drechi di e rumannan fiel di edat i a yuda nan bini huntu atrobe komo parti di un famia spiritual internashonal. Un grupo di 16 pionero spesial diligente, òf evangelisadó di tempu kompletu, di Italia, a yega na novèmber, huntu ku kuater pionero griego. Pa yuda nan siña albanes, a organisá un kurso di idioma.

E bida di tur dia no tabata fásil pa e pioneronan stranhero aki. Koriente tabata bai kada ratu. Wenter tabata friu i húmedo. E hendenan tabata para den rei pa oranan largu pa haña kuminda i otro nesesidatnan di bida. Pero e problema di mas grandi ku e rumannan a enfrentá tabata kon pa haña edifisionan sufisiente  grandi pa akomodá e gran kantidat di hende interesá ku tabata respondiendo na e bèrdat!

E pioneronan ku a lucha pa papia albanes a bin deskubrí ku un idioma ta djis un medio pa logra algu. Un maestro vèrsá den Beibel a bisa nan: “Nos no tin nodi konhugá verbo perfektamente pa produsí un sonrisa di kariño òf pa brasa nos rumannan. E albanesnan lo reakshoná mas lihé riba boso palabranan for di kurason, ku riba gramátika perfekto. No preokupá, nan lo komprondé.”

Despues di e promé kurso di idioma, e pioneronan a kuminsá traha na Berat, Durres, Gjirokastër, Shkodër, Tiranë i Vlorë. Pronto kongregashonnan a lanta manera padestul den e statnan ei. Areti Pina, e tempu ei ku su 80 i piku aña i kebrante di salú, tabata biba ainda na Vlorë. A manda dos pionero spesial aya pa prediká huntu ku Areti. E hendenan a keda asombrá kon e Testigunan di otro pais tabata papia albanes: “Si nos ke siña algu, e misioneronan di otro religionnan ta pone nos siña ingles òf italiano. Boso sí mester tin un amor genuino pa nos i un mensahe importante pasobra boso a tuma e molèster di siña albanes!” Areti a terminá su bida riba tera fielmente na yanüari 1994, aktivo den e trabou di prediká te den e último luna di su bida. E selo ku tantu e komo e pioneronan a demostrá a keda bendishoná. Na 1995 a restablesé un kongregashon na Vlorë. Awe, tin tres kongregashon progresivo ku ta hopi aktivo den e trabou di prediká den e stat portuario ei.

Na tur parti di e pais hende tabata sufri di hamber spiritual i tabatin masha poko prehuisio religioso. Nan tabata aseptá i lesa ansiosamente kualke literatura bíbliko ku nan a haña di e Testigunan. Hopi hóben a kuminsá studia Beibel i ta progresando rápidamente.

Mas ku 90 kongregashon i grupo den henter e pais ta sigui “wòrdu fortifiká den fe, i [ta] bira kada dia mas hopi.” (Echonan 16:5) Ainda e 3.513 Testigunan na Albania tin hopi trabou. Na mart 2005, 10.144 persona a asistí na e Konmemorashon di e morto di Kristu. Kòmbersashonnan ku hende hospitalario den e trabou di prediká a produsí mas ku 6.000 estudio di Beibel. Klaramente, míles di hende lo benefisiá di e Tradukshon di Mundu Nobo resien publiká na albanes. En bèrdat, Yehova su palabra ta prosperá den “e Tera di Águila” na Su onor i alabansa.

[Nota]

[Kuadro na página 20]

KONFLIKTO ÉTNIKO TA DISPARSÉ NA KÓSOVO!

Kósovo a bira un nòmber konosí na kabamentu di añanan ’90 tempu ku disputanan enkuanto teritorio i odio étniko ku rais profundo a hiba na guera i intervenshon internashonal.

Durante e guera na Balkan, hopi Testigu mester a hui bai na paisnan bisiña. Despues ku e guera a kaba, un grupo chikitu di nan a regresá Kósovo, kla pa pone man na obra. Pioneronan spesial di Albania i Italia a ofresé pa muda bai Kósovo pa yuda e 2.350.000 habitantenan einan. Aworakí tin kuater kongregashon i seis grupo aktivo, un total di rònt di 130 publikadó, ta sirbiendo Yehova den e teritorio aki.

Den lènte di 2003 e rumannan a tene un dia spesial di asamblea na Priština i tabatin 252 persona presente. Den nan tabatin personanan ku antesedente albanes, aleman, gitano, italiano i serbio. Na fin di e diskurso di boutismo, e oradó a hasi dos pregunta. Tres persona a lanta para pa kontestá ku un ‘sí’: un albanes di un grupo étniko, un gitano i un serbio.

Despues ku e presentenan a tende e ekspreshonnan simultáneo “Va!,” “Da!” i “Po!” for di e tres kandidatonan di boutismo aki, tur hende a kuminsá bati man masha duru. E kandidatonan a brasa otro. Nan a haña e kontesta p’e problemanan étniko profundo ku a asotá nan pais.

[Mapa na página 17]

(Pa e teksto den su formato kompleto, wak e publikashon)

Laman Mediteráneo

ITALIA

ALBANIA

GRESIA

[Plachi na página 18]

Testigunan hóben ta imitá e selo di esnan di mas edat

[Plachi na página 18]

Areti Pina a sirbi Yehova fielmente for di 1928 te na su morto na 1994

[Plachi na página 19]

E promé grupo di pionero di otro pais ku a asistí na un kurso di idioma

[Rekonosementu pa Potrèt na página 16]

Águila: © Brian K. Wheeler/VIREO