“Esnan Ku Ta Baha Bai Laman den Barku”

UN ESTATUA di bròns di un piskadó na timon, tratando pa stür su barku den un tormenta, ta para ku kara pa e haf di Gloucester, Massachusetts, Merka. E estatua ta un konmemorashon di e míles di piskadónan di Gloucester ku, segun informenan, a muri riba laman. Na pia di e estatua i riba un plakat banda di dje tin e palabranan di Salmo 107:23 i 24: “Esnan ku ta baha bai laman den barku, ku ta hasi negoshi riba awanan grandi, eseinan ta mira e obranan di SEÑOR, i su maravianan den e profundidat.”

Piskamentu riba e bankinan di santu [áreanan riku na piská] den Oséano Atlántiko ta un negoshi peligroso. Segun informe, atraves di añanan 5.368 hende hòmber di Gloucester, ku awor tin un poblashon di rònt di 30.000 hende, a pèrdè nan bida ora nan tabata piska riba laman. E plakat konmemorativo ta bisa: “Algun a wòrdu sorprendí pa e bientunan feros i olanan inmenso di un tormenta katastrófiko for di nortost. Otronan a haña nan morto ora nan tabata nan so den un boto chikitu ku a pèrdè for di e golèt [barku di bela di dos mast] ku a hiba nan na e bankinan di santu. Algun boto a dal den otro durante tormenta i a senk, ku resultado trágiko. Tin boto ku a dal den otro barku ku tabata krusando i bai fondo di laman.”

E estatua ta para komo un testigu tristu di e afan i peligernan ku piskadónan a pasa aden pa hopi siglo. Imaginá e lágrimanan di desesperashon dramá pa esposo-, tata-, ruman- i yunan pèrdí. Pero Yehova Dios no ta lubidá e biudanan, e huérfanonan òf esnan ku a pèrdè nan bida riba laman. Apòstel Juan a señalá na e futuro desaroyo aki: “Laman a entregá e mortonan ku tabata den dje, i morto i Hades a entregá e mortonan ku tabata den nan.” (Revelashon 20:13) Ora e personanan ku a “baha bai laman den barku” wòrdu resusitá, en bèrdat nan lo mira e maravioso “obranan di Señor.”