Ki Klase di Edukashon Por Duna Bo Éksito den Bida?

BO A yega di haña bo den asina tantu problema ku bo a sinti komo si fuera bo ta hogando den un remolino di awa? Djis imaginá kuantu lo bo a sufri si bo a kometé un fayo ora di trata ku un òf mas di e problemanan ei! Niun hende no a nase ku e kapasidat pa resolvé tur problema, esta, pa semper tuma e desishonnan di mas sabí. P’esei edukashon ta nesesario. Unda bo por haña un edukashon ku ta prepará bo pa trata ku e problemanan di bida?

Hopi hende, chikitu i grandi, ta haña ku siñansa eskolar ta sumamente importante. Algun eksperto ta asta bisa ku nan “ta kere firmemente ku hamas lo bo por haña un [bon] trabou sin ku bo kaba universidat.” Pero tin algun nesesidat humano ku bo no por satisfasé ku solamente logronan material. Por ehèmpel, un estudio universitario ta yuda bo ser un bon mayor, kasá òf amigu? Al kontrario, hende respetá pa nan logronan akadémiko por desaroyá karakterístikanan di personalidat ku ta indeseabel, òf por frakasá den nan bida di famia òf asta kometé suisidio.

Algun ta akudí na religion pa haña guia, komo un fuente di edukashon, pero nan ta keda desepshoná pa motibu ku nan no ta haña yudansa práktiko pa enfrentá e difikultatnan di bida. Tuma por ehèmpel loke Emilia * di Mexico a bisa: “Diesinku aña pasá mi a sinti ku ami ku mi kasá simplemente no por a biba huntu mas. Tur ora bai nos tabata pleita. Mi no por a stòp e di bebe. Hopi bes mi tabatin ku sali laga mi yunan chikitu so na kas pa bai buska mi kasá. Mi tabata emoshonalmente agotá. Vários biaha mi a bai misa en buska di algu ku lo por a yuda mi haña un solushon. Ounke nan tabata usa Beibel de bes en kuando, nunka mi a tende un konseho ku a trata spesífikamente ku mi situashon; ningun hende no a aserká mi tampoko pa bisa mi kiko mi tabatin ku hasi. Sinta den misa un ratu i ripití un par di orashon no a satisfasé mi.” Kisas otronan ta keda desilushoná ora nan mira kon nan mes lidernan spiritual ta hiba un bida leu for di ehemplar. Dor di esei, hopi di nan ta pèrdè konfiansa den religion komo un fuente di edukashon pa logra éksito den bida.

P’esei, kisas bo ta puntra bo mes: ‘Ki klase di edukashon mi mester tin pa mi por tin éksito den bida?’ Kristianismo berdadero tin kontesta pa e pregunta importante aki? E siguiente artíkulo lo bai amplia riba esaki.

[Nota]