Kristianismo Ta Plama Entre Hudiunan di Promé Siglo

UN REUNION importante a tuma lugá na Yerusalèm rònt di aña 49 di nos era. Juan, Pedro i Santiago, mitar ruman di Hesus, ‘kendenan a wòrdu konsiderá pilar’ di e kongregashon kristian, tabata presente. E otro dosnan menshoná na nòmber ku a asistí na e reunion tabata apòstel Pablo i su kompañero Barnabas. Den e reunion ei nan a papia riba kon pa dividí e teritorio inmenso pa e trabou di prediká. Pablo a splika: “Nan a duna ami i Barnabas e man drechi di komunion, pa nos bai serka e paganonan i nan serka esnan sirkunsidá.”—Galationan 2:1, 9. *

Kon nos mester komprondé e akuerdo aki? E teritorio den kua mester a prediká e bon nobo a ser dividí den hudiu i prosélito na un banda i hende no-hudiu n’e otro banda? Òf e akuerdo tabata mas bien un divishon geográfiko di e teritorio? Pa haña un posibel kontesta, nos mester tin algun informashon históriko tokante e Diáspora, esta, hudiunan ku tabata biba pafó di Palestina.

E Mundu Hudiu den Promé Siglo

Kuantu hudiu tabata biba den e Diáspora den promé siglo? Ta parse ku hopi erudito ta di akuerdo ku e publikashon Atlas of the Jewish World: “Ta difísil pa yega na sifranan konkreto, pero segun kálkulonan rasonabel, djis promé ku aña 70 di nos era tabatin dos mion i mei hudiu na Judea i hopi mas ku kuater mion den e diáspora romano. . . . Probablemente e hudiunan a representá mas o ménos 10 porshento di henter e poblashon di e imperio, i den e lugánan kaminda tabatin mas konsentrashon [di hudiu], den e statnan di e provinsianan oriental, un 25 porshento òf mas di e habitantenan lo tabata hudiu.”

E sentronan prinsipal tabata na Siria, Asia Menor, Babilonia i Egipto, den ost, ku komunidatnan mas chikitu na Europa. Algun di e promé kristiannan hudiu bon konosí, manera Barnabas di Cyprus, Prisila i Akila di Ponto i despues Roma, Apolos di Alehandria i Pablo di Tarso, tabata biba pafó di Israel.—Echonan 4:36; 18:2, 24; 22:3.

E komunidatnan di e Diáspora tabatin hopi relashon ku nan patria. Muestra di esei tabata e belasting anual ku nan a manda pa e tèmpel na Yerusalèm; den e forma ei nan a partisipá den e bida i adorashon di tèmpel. Relashoná ku esaki, e erudito John Barclay a remarká: “Tin sufisiente evidensia di ku e komunidatnan di e Diáspora a efektuá kabalmente e kolekshon di plaka aki, komplementá ku donashonnan adishonal di e rikunan.”

Un otro konekshon tabata e míles i míles di peregrinonan ku tabata bai Yerusalèm tur aña pa e fiestanan. E relato na Echonan 2:9-11 tokante Pentekòste di aña 33 ta ilustrá esaki. E peregrinonan hudiu presente a bini for di Partia, Media, Elam, Mesopotamia, Kapadosia,  Ponto, Asia, Frigia, Pamfilia, Egipto, Libia, Roma, Kreta i Arabia.

E lidernan di e tèmpel na Yerusalèm tabata komuniká por eskrito ku e hudiunan den e Diáspora. Por ehèmpel, ta un echo establesí ku Gamaliel, e maestro di lei menshoná na Echonan 5:34, tabata manda karta pa Babilonia i otro parti di mundu. Ora apòstel Pablo a yega Roma komo prezu rònt di aña 59, “e lidernan di e hudiunan” a bis’é: “Nos no a risibí ningun karta for di Judea tokante di bo, ni ningun di e rumannan no a bini aki, ni a trese notisia, ni a papia nada malu di bo.” Esaki ta indiká ku nan tabata risibí karta i informenan regularmente for di nan patria.—Echonan 28:17, 21.

E Beibel di e hudiunan di e Diáspora tabata un tradukshon griego di e Skritura Hebreo konosí komo e Septuaginta. Un buki di referensia ta deklará: “Ta rasonabel pa konkluí ku nan tabata lesa i rekonosé e LXX [Septuaginta] den henter e diáspora komo e Beibel hudiu òf ‘santu eskrito’ di e diáspora.” E promé kristiannan tabata usa e mesun tradukshon ampliamente den nan siñansa.

E miembronan di e kuerpo gobernante kristian na Yerusalèm tabata bon na altura di e sirkunstansianan ei. Ya kaba e bon nobo a yega n’e hudiunan di e Diáspora na Siria, inkluyendo Damasko i Antiokia, i el a yega asta mas leu ku e lugánan ei. (Echonan 9:19, 20; 11:19; 15:23, 41; Galationan 1:21) Na e reunion na aña 49, aparentemente e presentenan tabata planiando pa e trabounan ku nan tabatin nan dilanti. Laga nos konsiderá e pasashinan di Beibel ku ta duna nos un idea di e ekspanshon ku tabatin bou di e hudiu- i prosélitonan.

E Biahenan di Pablo i e Hudiunan den e Diáspora

E asignashon original di apòstel Pablo tabata “pa hiba [Hesukristu su] nòmber na e paganonan i reinan i e yunan di Israel.” * (Echonan 9:15) Despues di e reunion na Yerusalèm, Pablo a sigui trata pa alkansá e hudiunan di e Diáspora na unda ku el a bai. (Mira e kuadro na página 14.) Esaki ta indiká ku e akuerdo tokante teritorio probablemente tabata basá riba un divishon geográfiko. Pablo i Barnabas a ekspandé nan trabou komo misionero den direkshon wèst, i e otronan a sirbi e tera natal di e hudiunan i e komunidatnan grandi di hudiu den e mundu oriental.

Ora Pablo i su kompañeronan a kuminsá nan di dos biahe komo misionero for di Antiokia di Siria, nan a haña instrukshon pa bai direkshon wèst atraves di Asia Menor i yega te Troas. Djei nan a krusa bai Masedonia pasobra nan a konkluí ku “Dios a yama [nan] pa prediká evangelio na [e masedonionan].” Despues, kongregashonnan kristian a lanta den otro statnan europeo, inkluso Atenas i Korinto.—Echonan 15:40, 41; 16:6-10; 17:1–18:18.

Rònt di aña 56, na fin di su di tres biahe komo misionero, Pablo a plania pa biaha bai mas leu den direkshon wèst i ekspandé e teritorio ku nan a asign’é na e reunion di Yerusalèm. El a skirbi: “Di mi parti, mi ta ansioso pa prediká e evangelio na boso tambe ku ta na Roma,” i “lo mi pasa via boso bai Spaña.” (Romanonan 1:15; 15:24, 28) Pero kiko di e komunidatnan grandi di e Diáspora den ost?

Komunidatnan Hudiu den Ost

Durante e promé siglo di nos era, Egipto tabata e komunidat mas grandi di e Diáspora, spesialmente den su kapital, Alehandria. E sentro di komersio i kultura aki tabatin un poblashon di sientos di míles di hudiu, ku snoanan plamá rònt e stat. Segun Filo, un hudiu di Alehandria, e tempu ei na henter Egipto tabatin por lo ménos un mion hudiu. Un kantidat basta grandi di nan a establesé nan mes tambe na e pais bisiña, Libia, den e stat di Sirene i bisindario.

Algun hudiu ku a bira kristian tabata di e áreanan aki. Nos ta lesa di “Apolos, nasí na Alehandria,” “hòmbernan di Cyprus i Sirene” i  “Lucio di Sirene” kende a sostené e kongregashon na Antiokia di Siria. (Echonan 2:10; 11:19, 20; 13:1; 18:24) Ku eksepshon di e testimonio ku e evangelisadó kristian Felipe a duna e eunuko etiopio, Beibel no ta duna mas detaye tokante e trabou di e kristiannan di promé siglo na Egipto i bisindario.—Echonan 8:26-39.

Babilonia, ku su ekstenshonnan na Partia, Media i Elam, tabata un otro sentro importante. Un historiadó a bisa ku “tur teritorio den e sabana di Tigris i Eufrates, for di Armenia te na e Golfo Pérsiko, i tambe den direkshon nortost te na Laman Kaspio, i den direkshon ost te na Media, tabatin poblashonnan hudiu.” E Encyclopaedia Judaica ta kalkulá ku tabata trata aki di 800.000 hudiu òf asta mas. E historiadó hudiu di promé siglo, Hosefo, a konta ku míles i míles di hudiu di Babilonia tabata biaha pa Yerusalèm pa e fiestanan anual.

Algun di e peregrinonan ku a bini for di Babilonia a batisá na Pentekòste di aña 33? Nos no sa, pero entre e hudiunan ku a tende e diskurso di apòstel Pedro riba e dia ei tabatin algun di Mesopotamia. (Echonan 2:9) Loke sí nos sa ta ku apòstel Pedro tabata na Babilonia rònt di aña 62 pa 64. Durante su estadia einan, el a skirbi su promé karta i posiblemente e di dos tambe. (1 Pedro 5:13) Opviamente, Babilonia ku su poblashon grandi di hudiu a wòrdu konsiderá komo parti di e teritorio asigná na Pedro, Juan i Santiago den e reunion na kua e karta dirigí n’e galationan ta referí.

E Kongregashon di Yerusalèm i e Hudiunan den e Diáspora

Santiago, kende tambe a asistí na e reunion kaminda e teritorionan a ser menshoná, a sirbi komo superintendente den e kongregashon di Yerusalèm. (Echonan 12:12, 17; 15:13; Galationan 1:18, 19) Na Pentekòste di aña 33, e tabata presente ora míles di bishitantenan hudiu di e Diáspora a aseptá e bon nobo i a batisá.—Echonan 1:14; 2:1, 41.

E tempu ei i despues míles i míles di hudiu tabata bini pa e fiestanan anual. E stat a yena  ku demasiado hende, i bishitantenan tabatin ku keda den e pueblitonan den bisindario òf kamper den tènt. Segun e Encyclopaedia Judaica, ademas di topa ku nan amigunan, e peregrinonan tabata drenta e tèmpel pa rindi adorashon, ofresé sakrifisio i partisipá den e estudio di e Tora.

Sin duda, Santiago i e otro miembronan di e kongregashon di Yerusalèm a probechá di e oportunidatnan aki pa duna testimonio na e hudiunan di e Diáspora. Podisé e apòstelnan a hasi esei ku hopi diskreshon durante e periodo ku a lanta e “persekushon grandi kontra e iglesia di Yerusalèm” komo resultado di e morto di Esteban. (Echonan 8:1) E registro ta indiká ku tantu promé komo despues di e suseso aki, e entusiasmo di e kristiannan aki pa prediká a resultá den oumento kontinuo.—Echonan 5:42; 8:4; 9:31.

Kiko Nos Por Siña?

E promé kristiannan a ègt hasi un esfuerso sinsero pa bai tur kaminda ku e hudiunan tabata biba. Rònt di e mesun tempu ei, Pablo i su kompañeronan a trata pa alkansá e hendenan no-hudiu den e teritorio europeo. Nan a kumpli ku e instrukshon di despedida ku Hesus a duna su siguidónan pa hasi hende di “tur e nashonnan” disipel di dje.—Mateo 28:19, 20.

Nos por siña for di nan ehèmpel e importansia di prediká den un forma organisá pa nos por haña e sosten di Yehova su spiritu. Tambe nos por mira e bentahanan di buska esnan ku tin rèspèt pa e Palabra di Dios, foral den teritorionan kaminda tin poko Testigu di Yehova. Tin algun área di e teritorio asigná na boso kongregashon ku ta mas produktivo ku otro? Kisas ta benefisioso pa kubri esakinan ku mas frekuensia. Tin evenementonan públiko den e bisindario ku ta habri oportunidat pa duna testimonio? E ora ei kisas por hasi un esfuerso spesial pa duna testimonio informal i riba kaya.

Nos ta benefisiá no solamente dor di lesa den Beibel tokante e promé kristiannan sino tambe dor di familiarisá nos mes ku algun di e detayenan históriko i geográfiko. Un medio ku nos por usa pa amplia nos komprondementu ta e foyeto “Mira e Tera Bunita,” ku su vários mapa- i potrètnan.

[Nota]

[Tabèl na página 14]

APÒSTEL PABLO SU INTERES DEN E HUDIUNAN DEN E DIÁSPORA

PROMÉ KU E REUNION NA YERUSALÈM NA AÑA 49 DI NOS ERA

Echonan 9:19, 20 Damasko — “el a kuminsá proklamá . . . den e snoanan”

Echonan 9:29 Yerusalèm — “e tabata papia . . . ku e hudiunan griego”

Echonan 13:5 Salamina, Cyprus — “a kuminsá proklamá e palabra di Dios den e snoanan di e hudiunan”

Echonan 13:14 Antiokia di Pisidia — ‘drentando den snoa’

Echonan 14:1 Ikonio — “a bai . . . den snoa di e hudiunan”

DESPUES DI E REUNION NA YERUSALÈM NA AÑA 49 DI NOS ERA

Echonan 16:14 Filipos — “Lidia, . . . un adoradó di Dios”

Echonan 17:1 Tesalónika — “un snoa di e hudiunan”

Echonan 17:10 Berea — “snoa di e hudiunan”

Echonan 17:17 Atenas — “rasoná den snoa ku e hudiunan”

Echonan 18:4, NW Korinto — “duna diskurso den e snoa”

Echonan 18:19 Efeso — “a bai den snoa i tabata rasoná ku e hudiunan”

Echonan 19:8 Efeso — “el a bai den snoa i a sigui papia ku tur frankesa pa tres luna”

Echonan 28:17 Roma — “a yama e lidernan di e hudiunan huntu”

[Mapa na página 15]

(Pa e teksto den su formato kompleto, wak e publikashon)

E hudiunan ku a tende e bon nobo na Pentekòste di aña 33 a bini for di un área ekstenso

ILÍRIKO

ITALIA

Roma

MASEDONIA

GRESIA

Atenas

KRETA

Sirene

LIBIA

BITINIA

GALASIA

ASIA

FRIGIA

PAMFILIA

CYPRUS

EGIPTO

ETIOPIA

PONTO

KAPADOSIA

SILISIA

MESOPOTAMIA

SIRIA

SAMARIA

Yerusalèm

JUDEA

MEDIA

Babilonia

ELAM

ARABIA

PARTIA

[Awanan]

Laman Mediteráneo

Laman Pretu

Laman Kòrá

Golfo Pérsiko