Kultivá Berdadero Humildat
Kultivá Berdadero Humildat
“Bo ta salba un pueblo humilde.”—2 SAMUEL 22:28, BPK.
1, 2. Kiko hopi gobernante di mundu tabatin en komun?
E PIRAMITNAN di Egipto ta duna evidensia di e hòmbernan ku un tempu a goberná e pais ei. Otronan ku a laga nan marka den historia tabata Senakerib di Asiria, Alexander e Grandi di Gresia i Julio Cesar di Roma. Tur e gobernantenan ei tabatin algu en komun. Nan no tabata konosí komo hòmbernan ku a desplegá berdadero humildat.—Mateo 20:25, 26.
2 Bo ta kere ku kualke un di nan tabatin e kustumber di buska den su reino pa haña e siudadanonan humilde ku tabatin mester di konsuelo? Bo ta kere ku nan lo tabata bishitá siudadanonan abatí den nan kasnan modesto pa lanta nan ánimo? Klaru ku nò! Nan aktitut pa ku kriaturanan humano di kondishon humilde ta hopi diferente for di esun di e Gobernante Supremo di universo, Yehova Dios!
E Ehèmpel di Mas Grandi di Humildat
3. Kon e Gobernante Supremo ta trata su súpditonan humano?
3 Yehova su gloria i grandesa ta inskudriñabel, pero “[su] wowo . . . ta move bai bin dor di henter tera, pa e por sostené fuertemente esnan ku nan kurason ta kompletamente di dje.” (2 Krónikanan 16:9) I kiko Yehova ta hasi ora e haña hende humilde ku ta rindié adorashon pero ku ta abatí pa motibu di vários prueba? Den un sentido, e “ta biba” ku hende asina pa medio di su spiritu santu “pa rebibá spiritu di e hende kibrá i pa rebibá kurason di e humilde.” (Isaias 57:15) Den e forma ei su adoradónan rebibá ta mihó prepará pa sigui sirbié ku un kurason gososo. Esta un Dios humilde!
4, 5. (a) Kon e salmista a mira Dios su manera di goberná? (b) Kiko e echo ku Dios ta “humiá su mes” p’e “lanta hende pober for di stòf” ta nifiká?
4 Ningun otro persona den universo a humiá su mes na e mesun grado ku e Señor Soberano pa por yuda hende pekadó. E salmista a skirbi: “SEÑOR ta halsá riba tur nashon; su gloria ta mas haltu ku e shelunan. Ken ta manera SEÑOR nos Dios, kende ta sintá riba trono den haltura, kende ta humiá su mes pa mira e kosnan ku ta den shelu i riba tera? E ta lanta hende pober for di stòf, i ta lanta esnan den nesesidat for di e lugá di benta sushi.”—Salmo 113:4-7.
5 Tuma nota di e palabranan “humiá su mes.” Mustra humildat por enserá baha na nivel di un persona ku tin un nivel sosial mas abou òf baha for di bo posishon òf dignidat pa trata un persona ku tin un posishon inferior. Pues, loke Beibel ta deklará na Salmo 113:6 ta nifiká ku Dios ta humiá su mes òf ta baha na nivel di hende pa trata ku nan. Esei ta pinta un bunita kuadro di nos Dios humilde ku ta duna atenshon amoroso na e nesesidatnan di su adoradónan humano imperfekto.—2 Samuel 22:36.
Dikon Hesus Tabata Humilde
6. Kiko tabata Yehova su akto di mas grandi di humildat?
6 E akto di mas grandi di humildat i amor ku Dios a efektuá ta ora el a manda su Yu primogénito stimá nase riba tera i krese komo hende pa salba humanidat. (Juan 3:16) Hesus a siña nos e bèrdat tokante su Tata selestial i despues a entregá su bida humano perfekto pa kita “piká di mundu.” (Juan 1:29; 18:37) Hesus, komo un refleho perfekto di su Tata, inkluso di Su humildat, tabata dispuesto pa hasi loke Dios a pidié. Esei tabata e ehèmpel di mas grandi di humildat i amor ku un kriatura di Dios a yega di pone. No ta tur hende a apresiá Hesus su humildat. Su enemigunan a konsider’é asta komo e hende ‘di rango mas abou.’ (Daniel 4:17, NW) Apòstel Pablo sí a realisá ku su rumannan di fe mester imitá Hesus i p’esei nan mester ta humilde den nan trato ku otro.—1 Korintionan 11:1; Filipensenan 2:3, 4.
7, 8. (a) Kon Hesus a siña pa ta humilde? (b) Ki invitashon Hesus a ekstendé na hende ku por a bira su disipel?
7 Pablo a enfatisá e ehèmpel sobresaliente di Hesus dor di skirbi: “Laga tin den boso e aktitut aki ku tabatin tambe den Kristu Hesus, kende, ounke ku e tabata eksistí den e forma di Dios, no a konsiderá igualdat ku Dios algu pa tene na dje, ma a bandoná su mes gloria, tumando forma di un sirbidó, siendo trahá den e semehansa di hende. I hañando su mes den kondishon di hende, el a humiá su mes dor di bira obedesidu te na morto” riba un staka di tormento.—Filipensenan 2:5-8.
8 Kisas bo ta puntra bo mes: ‘Kon Hesus a siña pa ta humilde?’ Esei ta un benefisio maravioso ku el a saka komo resultado di su asosiashon íntimo ku su Tata selestial pa un tempu hopi largu, durante kua el a sirbi komo Dios su “trahadó eksperto” den e kreashon di tur kos. (Proverbionan 8:30) Despues di e rebelion den Edén, e Primogénito di Dios por a opservá e manera humilde ku su Tata a trata ku hende pekadó. P’esei, tempu ku Hesus tabata riba tera, el a reflehá e humildat di su Tata i a ekstendé e siguiente invitashon na hende: “Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma.”—Mateo 11:29; Juan 14:9.
9. (a) Kiko Hesus a haña asina interesante tokante mucha? (b) Usando un mucha chikitu, ki lès Hesus a siña su siguidónan?
9 Pa motibu ku Hesus tabata berdaderamente humilde, mucha chikitu no tabatin miedu di dje. Mas bien, nan a sinti nan atraí na dje. I Hesus di su parti, a mustra kariño na e muchanan i a presta atenshon na nan. (Marko 10:13-16) Kiko Hesus a haña asina interesante tokante mucha? Sin duda nan tabatin kualidatnan deseabel ku algun di su disipelnan adulto no a desplegá tur ora. Ta un echo establesí ku mucha chikitu ta mira hende grandi komo superior na nan. Bo por mira esaki na e hopi preguntanan ku nan ta hasi. Sí, kompará ku hopi adulto, ta mas fásil pa siña mucha, i nan no tin mes tantu tendensia pa sinti nan orguyoso. Na un okashon, Hesus a mustra riba un mucha chikitu i a bisa Su siguidónan: “Si boso no kombertí i bira manera mucha, boso lo no drenta e reino di shelu.” Anto el a agregá: “Esun anto ku humiá su mes manera e mucha aki ta esun di mas grandi den e reino di shelu.” (Mateo 18:3, 4) Hesus a deklará e regla: “Ken ku halsa su mes lo wòrdu humiá, i ken ku humiá su mes lo wòrdu halsá.”—Lukas 14:11; 18:14; Mateo 23:12.
10. Ki preguntanan nos lo konsiderá?
10 E bèrdat ei ta lanta preguntanan importante. Pa nos por haña bida eterno nos mester kultivá entre otro berdadero humildat, pero pakiko tin biaha ta difísil pa kristiannan ta humilde? Pakiko ta un reto pa nos guli nos orguyo manda abou, na moda di papia, i reakshoná ku humildat ora nos haña nos ku prueba? I kiko lo yuda nos logra kultivá berdadero humildat?—Santiago 4:6, 10.
Pakiko Ta Difísil pa Ta Humilde
11. Pakiko no ta un sorpresa ku nos ta lucha pa ta humilde?
11 Si bo ta luchando pa ta humilde, bo no ta so den e lucha aki. Na 1920, e revista aki a papia tokante e konseho di Beibel ku hende mester ta humilde. El a bisa: “Pues ora nos mira kuantu balor Señor ta duna na humildat, tur su berdadero disipelnan mester sinti nan animá pa kultivá e kualidat aki tur dia.” Pero despues e revista a rekonosé frankamente: “I tòg, ku tur e konseho bíbliko aki, imperfekshon di hende ta pone ku esnan ku ta bira sirbidó di Señor i ku ta disidí di kore e kareda aki, aparentemente ta haña nan enfrentá ku mas problema i ku mas kontratempu den e asuntu aki ku den kualke otro.” Esei ta resaltá un di e motibunan pakiko kristiannan berdadero tin ku lucha pa nan ta humilde: komo hende pekadó nos ta anhelá pa risibí un gloria inapropiá. Esei ta pasobra nos ta desendiente di un pareha pekaminoso, Adam ku Eva, kendenan a sede na nan anhelonan egoista.—Romanonan 5:12.
12, 13. (a) Kon e mundu aki ta stroba un kristian pa ta humilde? (b) Ken ta hasi nos lucha pa kultivá humildat asta mas difísil?
12 Un otro motibu pakiko kisas ta difísil pa desplegá humildat ta ku nos ta biba den un mundu ku ta stimulá hende pa purba di ta superior na otronan. Un di e metanan komun di e mundu aki ta anhelo pa satisfasé “e deseo di karni [pekaminoso] i e deseo di wowo i e orguyo di bida.” (1 Juan 2:16) En bes di laga e deseonan mundano ei dominá nan, Hesus su disipelnan mester mantené nan wowo simpel i enfoká riba hasimentu di e boluntat di Dios.—Mateo 6:22-24, 31-33; 1 Juan 2:17.
13 Un di tres motibu pakiko ta difísil pa kultivá i desplegá humildat ta ku esun ku a originá e aktitut di un kurason halsá, Satanas e Diabel, ta gobernando e mundu aki. (2 Korintionan 4:4; 1 Timoteo 3:6) Satanas ta fomentá su mal karakterístikanan. Por ehèmpel, el a buska manera di pone Hesus ador’é a kambio di “tur e reinonan di mundu i nan gloria.” Pero Hesus, humilde manera semper, a rechasá e oferta di e Diabel mesora. (Mateo 4:8, 10) Di mes manera, Satanas ta tenta kristiannan pa buska gloria pa nan mes. En bes di esei, kristiannan humilde ta trata pa sigui e ehèmpel di Hesus dor di duna onor i alabansa na Dios.—Marko 10:17, 18.
Kultivá i Desplegá Berdadero Humildat
14. Kiko ta “humildat falsu”?
14 Den apòstel Pablo su karta na e kolosensenan, el a spièrta nan kontra hende ku ta fingi di ta humilde djis pa impreshoná otronan. Pablo a deskribí esaki komo un “humildat falsu.” Esnan ku ta djis fingi ku nan ta humilde no ta hende spiritual. Mas bien, nan ta desplegá un aktitut “hinchá” [NW] ku orguyo ku ta reda nan. (Kolosensenan 2:18, 23) Hesus a mustra riba algun ehèmpel di e humildat falsu ei. El a kondená e fariseonan pa nan orashonnan hasí den públiko i pa e manera ku nan a yuna ku kara tristu i fingí djis pa hende mira nan. Na kontraste, pa nos orashonnan personal por tin balor den bista di Dios, nan mester ta ekspresá ku humildat.—Mateo 6:5, 6, 16.
15. (a) Kiko nos por hasi pa kultivá humildat di mente? (b) Menshoná algun bon ehèmpel di humildat.
15 Algu ku por yuda kristiannan kultivá berdadero humildat di mente ta ora nan ta enfoká riba e mihó ehèmpelnan di humildat: Yehova Dios i Hesukristu. Pa logra esaki, kristiannan mester tin un estudio regular di Beibel i di e material di estudio ku “e esklabo fiel i prudente” ta perkurá. (Mateo 24:45) Un estudio asina ta masha importante pa superintendentenan kristian, “pa [nan] kurason no halsa su mes riba [nan] rumannan.” (Deuteronomio 17:19, 20 NW; 1 Pedro 5:1-3) Meditá riba e vários ehèmpelnan di personanan ku a ser bendishoná pa nan aktitut humilde, manera Ruth, Ana, Elisabèt i hopi otro mas. (Ruth 1:16, 17; 1 Samuel 1:11, 20; Lukas 1:41-43) Pensa tambe riba e hopi ehèmpelnan ekselente di hòmbernan prominente ku a keda humilde den sirbishi di Yehova manera David, Josias, Juan Boutista i apòstel Pablo. (2 Krónikanan 34:1, 2, 19, 26-28; Salmo 131:1; Juan 1:26, 27; 3:26-30; Echonan 21:20-26; 1 Korintionan 15:9) I kiko di e tantísimo ehèmpelnan aktual di humildat ku nos ta haña den e kongregashon kristian? Ora kristiannan berdadero reflekshoná riba e ehèmpelnan aki, nan lo ser yudá pa kultivá “humildat pa ku otro.”—1 Pedro 5:5.
16. Kon e ministerio kristian ta yuda nos pa ta humilde?
16 Un otro kos ku por yuda nos pa ta humilde ta partisipashon regular den e ministerio kristian. Humildat mental por yuda nos ser mas efektivo ora nos ta aserká e hendenan ku nos topa den e trabou di kas pa kas i na otro lugá. Esaki ta spesialmente e kaso ora doñonan di kas na promé instante reakshoná ku apatia òf ku mal manera riba e mensahe di Reino. Hopi bes nan ta kuestioná nos kreensianan, i humildat por yuda e kristian sigui kontestá pregunta “ku un genio suave i rèspèt profundo.” (1 Pedro 3:15, NW) Sirbidónan humilde di Dios a muda bai teritorionan nobo i a yuda hende di diferente kultura i nivel di bida. Ku humildat e sirbidónan ei lo tin ku enfrentá e reto di siña un idioma nobo pa nan por duna mas yudansa na e hendenan ku nan ke papia kuné tokante e bon nobo. Nan meresé nos elogio!—Mateo 28:19, 20.
17. Ki responsabilidatnan kristian ta rekerí humildat?
17 Hopi ruman ta kumpliendo humildemente ku nan debernan kristian, poniendo interes di otronan riba esnan di nan mes. Por ehèmpel, pa un tata kristian saka tempu for di su asuntunan personal pa prepará i dirigí un estudio di Beibel efikas ku su yunan, e mester ta humilde. Humildat ta yuda yunan tambe pa, maske nan mayornan ta imperfekto, onra nan i obedesé nan. (Efesionan 6:1-4) Esposanan ku tin kasá no kreyente i ku ta purba gana nan kasá pa medio di nan “kondukta puru i respetuoso,” ta haña nan hopi bes den situashonnan ku ta rekerí humildat. (1 Pedro 3:1, 2) Humildat i amor inegoista ta birtutnan di hopi balor tambe ora nos ta perkurá amorosamente pa e nesesidatnan di nos mayornan enfermo òf di edat avansá.—1 Timoteo 5:4.
Humildat Ta Resolvé Problema
18. Kon humildat por yuda nos resolvé problema?
18 Tur hende ku ta sirbi Dios ta imperfekto. (Santiago 3:2) De bes en kuando por surgi un desakuerdo entre dos kristian. Kisas un di nan tin un motibu válido pa keha kontra e otro. Por lo general, por resolvé e situashonnan ei dor di apliká e konseho aki: ‘Boso soportá otro i pordoná otro, si un di boso tin un keho kontra un otro; meskos ku SEÑOR a pordoná boso, asina boso tambe mester hasi.’ (Kolosensenan 3:13) Nos tin ku atmití sí ku no ta fásil pa sigui e konseho aki, pero humildat lo yuda bo pon’é na práktika.
19. Kiko nos mester kòrda ora nos ta papia ku un persona ku a faya ku nos?
19 Tin biaha un kristian por pensa ku e motibu válido ku e tin pa keha ta muchu serio pa pas’é por haltu. E ora ei humildat lo yud’é aserká e persona ku supuestamente a faya kuné ku e meta pa restorá pas. (Mateo 18:15) Un di e motibunan pakiko tin biaha problema no sa kaba entre dos kristian ta ku un di nan òf podisé tur dos ta muchu orguyoso pa atmití nan falta. Òf kisas esun ku ta tuma e inisiativa pa aserká e otro ta hasi esei ku un tono arogante. Di otro banda, un aktitut berdaderamente humilde lo kontribuí grandemente pa resolvé hopi desakuerdo.
20, 21. Kiko ta un di e yudansanan di mas grandi pa ta humilde?
20 Un paso klave pa desaroyá humildat ta pa resa pidi Dios su yudansa i spiritu. Pero kòrda, “Dios . . . ta duna grasia [inkluso su spiritu santu] na e humildenan.” (Santiago 4:6) Pues si bo tin un desakuerdo ku un otro ruman di fe, pidi Yehova yuda bo atmití humildemente kualke kulpa menor òf mayor di bo parti. Si ta abo ta e víktima i esun ku a faya ku bo pidi despensa di kurason, pordon’é humildemente. Si bo ta haña ku esaki ta difísil pa hasi, pidi Yehova den orashon p’e yuda bo eliminá kualke rastro di un kurason halsá.
21 Ora nos ta komprondé e hopi benefisionan ku humildat ta trese kuné, esei mester motivá nos pa kultivá i mantené e kualidat presioso aki. Pa logra esei, nos tin ehèmpelnan maravioso den Yehova Dios i Hesukristu! Nunka lubidá e garantia divino: “E rekompensa di humildat i e temor di SEÑOR ta rikesa, onor i bida.”—Proverbionan 22:4.
Puntonan pa Meditá Ariba
• Ken ta e mihó ehèmpelnan di humildat?
• Pakiko ta difísil pa kultivá humildat?
• Kiko por yuda nos pa ta humilde?
• Pakiko ta asina importante pa keda humilde?
[Preguntanan di Estudio]
[Plachi na página 26]
Hesus tabata berdaderamente humilde
[Plachi na página 28]
Mundu ta stimulá hende pa purba di ta superior na otro
[Rekonosementu]
Potrèt di WHO di L. Almasi/K. Hemzǒ
[Plachi na página 29]
Humildat ta yuda nos aserká e hendenan den sirbishi
[Plachinan na página 30]
Hopi bes nos por resolvé un desakuerdo dor di ta humilde i pas’é por haltu den un spiritu di amor
[Plachinan na página 31]
Kristiannan ta mustra humildat den hopi manera