Yehova Lo No Bandoná Bo Nunka

E KRISTIANNAN na Hudea a haña nan ku oposishon feros, i nan tabatin ku lucha ku e punto di bista materialista di e hendenan rònt di nan. Pa animá nan, apòstel Pablo a sita e palabranan ku Yehova a dirigí na e israelitanan ora nan a drenta e Tera Primintí. Pablo a skirbi: “Nunka lo mi no bandoná bo, i nunka lo mi no laga bo desampará.” (Hebreonan 13:5; Deuteronomio 31:6) Sin duda, e promesa aki a fortalesé e kristiannan hebreo di promé siglo.

E mesun promesa aki mester fortifiká nos pa enfrentá e ansiedatnan ku bida den e “tempunan trabahoso” aki ta trese kuné. (2 Timoteo 3:1) Si nos konfia den Yehova i aktua di akuerdo ku esei, lo e sostené nos asta den e sirkunstansianan di mas difísil. Pa mira kon Yehova por kumpli ku e promesa aki, laga nos konsiderá e ehèmpel di ora un hende pèrdè su trabou diripiente.

Konfrontá ku Kambionan Diripiente

E kantidat di hende desempleá ta kresiendo rònt mundu. Segun un revista polako, desempleo ta ser konsiderá komo “un di e problemanan sosio-ekonómiko di mas difísil.” Nashonnan industrialisá no ta un eksepshon. Por ehèmpel, na 2004, asta bou di e miembronan di e Organisashon pa Koperashon i Desaroyo Ekonómiko, desempleo a “oumentá na mas ku 32 mion hende, alkansando un nivel mas haltu ku durante e Gran Depreshon di añanan ’30 di siglo pasá.” Na Polonia, e Ofisina Sentral di Estadístika a indiká ku na desèmber 2003 tabatin tres mion hende desempleá, ku “ta representá 18 porshento di siudadano ku tin edat pa traha.” Un fuente a bisa ku desempleo bou di e poblashon afrikano na Sur Afrika a alkansá 47,8 porshento na 2002!

Hopi hende, inkluso sirbidónan di Yehova, ta kore peliger di pèrdè trabou òf haña retiro inesperadamente. Kualke un di nos por haña nos ku “tempu i suseso imprevisto.” (Eklesiastés 9:11, NW) Nos por haña nos ta ekspresá e palabranan di e salmista David: “E angustianan di mi kurason ta oumentá.” (Salmo 25:17) Lo bo por enfrentá e sirkunstansianan desfaborabel ei? Nan lo por afektá bo bienestar emoshonal, spiritual i material. Si bo  pèrdè trabou, lo bo por logra lanta bèk riba pia?

Kon pa Trata ku e Strès Emoshonal

“Ta mas doloroso ora un hòmber pèrdè trabou” pasobra por lo general ta nan ta e ‘kostwinner’ di famia, segun e sikólogo Janusz Wietrzyński. El a bisa ku esaki por pone e hòmber pasa den kambionan drástiko di emoshon, di rabia pa resignashon. Un tata ku a haña retiro por pèrdè su dignidat i kuminsá “pleita ku su famia.”

Adam, un tata kristian di dos yu, a splika kon el a sinti ora el a pèrdè su trabou: “Mi a bira un hende ku ta kla pa iritá; tur kos tabata molestiá mi. Asta anochi tur loke mi tabata soña ta tokante trabou i kon pa perkurá pa mi yunan i kasá, kende tambe a haña su retiro diripiente.” Ora Ryszard ku Mariola, un pareha kasá ku un yu, a pèrdè nan fuente di entrada, ainda nan tabata pagando un fiansa grandi na banko. E esposa a konta: “Mi tabatin un preokupashon konstante; mi konsenshi tabata bisa mi ku nos a kometé un fayo di buska e fiansa ei. Tur ora mi tabata pensa ku ta mi falta.” Den situashonnan asina nos por rabia fásilmente, bira anshá òf amargá, i nos emoshonnan por kaba ku nos. P’esei kon nos por kontrolá e emoshonnan negativo ku por lanta den nos?

Beibel ta duna konseho práktiko riba kon nos por mantené un aktitut positivo. Apòstel Pablo a konsehá: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Hesukristu.” (Filipensenan 4:6, 7) Dor di aserká Yehova den orashon, nos por haña “e pas di Dios,” un trankilidat mental basá riba nos fe den dje. E kasá di Adam, Irena, a bisa: “Den nos orashonnan, nos a konta Yehova tokante nos situashon i kon nos lo por a simplifiká nos bida asta mas. Mi kasá, kende sa ta mas inkliná pa preokupá, a kuminsá sinti ku un solushon ta na kaminda.”

Si abo pèrdè trabou inesperadamente, bo ta den un bon posishon pa apliká e spièrtamentu ku Hesukristu a duna den e Sermon Riba Seru: “No preokupá boso mes pa boso bida, kiko boso lo kome òf kiko boso lo bebe; tampoko pa boso kurpa, kiko boso lo bisti. . . . Ma buska promé e reino di Dios i Su hustisia, i tur e kosnan aki lo wòrdu añadí na boso.” (Mateo 6:25, 33) Pa Ryszard ku Mariola por a dil ku nan emoshonnan, nan a apliká e konseho aki. “Semper mi esposo a konsolá mi i a enfatisá ku Yehova lo no bandoná nos,” segun Mariola. Su kasá a agregá: “Dor di hasi orashon huntu kontinuamente, nos a hala mas serka Dios i mas serka otro, i esei a duna nos e konsuelo nesesario.”

E spiritu santu di Dios tambe lo yuda nos den nos lucha. E dominio propio ku e spiritu por produsí den nos, por yuda nos keda kalmu i trankil. (Galationan 5:22, 23) Kisas no ta fásil, pero e ta posibel sí, pasobra Hesus a primintí ku e “Tata selestial lo duna e spiritu santu na esnan ku pidié.”—Lukas 11:13; 1 Juan 5:14, 15.

 No Neglishá Bo Nesesidatnan Spiritual

Un pèrdida inesperá di trabou, na promé instante, por preokupá asta e kristian di mas balansá, pero nos no mester neglishá nos nesesidatnan spiritual. Tuma por ehèmpel Moisés di 40 aña, kende su bida a kambia kompletamente ora el a pèrdè su posishon den e aristokrasia i mester a bira un wardadó di karné, un trabou ku e egipsionan a despresiá. (Génesis 46:34) Moisés tabatin ku ahustá na su sirkunstansianan nobo. Pa e siguiente 40 añanan, el a laga Yehova moldi’é i prepar’é pa e tareanan nobo ku e tabatin su dilanti. (Eksodo 2:11-22; Echonan 7:29, 30; Hebreonan 11:24-26) Apesar di e difikultatnan ku el a enfrentá, Moisés a mantené su enfoke riba kosnan spiritual, dispuesto pa aseptá e entrenamentu di Yehova. Nunka laga sirkunstansianan desfaborabel pone nos pèrdè nos balornan spiritual!

Ounke e pèrdida di trabou inesperá por ta algu troumátiko, esei ta un bon oportunidat pa fortalesé nos relashon ku Yehova Dios i su pueblo. Esei ta loke Adam, menshoná anteriormente, a sinti. El a bisa: “Ora tantu ami komo mi kasá a pèrdè nos trabou, e idea di stòp di bai reunion kristian òf baha nos partisipashon den e trabou di prediká no a pasa mes den nos mente. E punto di bista ei a protehá nos pa no bira demasiado preokupá pa e dia di mañan.” Ryszard a kompartí e opinion ei: “Si no tabata pa e reunionnan i e ministerio, nos lo no por a dil ku e situashon; preokupashon lo a kaba ku nos sigur. Kòmbersashonnan spiritual ku otro hende ta edifikante, pasobra nan ta dirigí nos atenshon na nan nesesidatnan i no na esnan di nos.”—Filipensenan 2:4.

 Sí, en bes di preokupá tokante trabou, purba usa e tempu èkstra pa aktividatnan spiritual: hasi estudio personal, partisipá den aktividatnan di kongregashon òf amplia bo ministerio. En bes di hiba un ‘bida di desempleado,’ sin nada di hasi, lo bo ‘abundá den e trabou di Señor’—algu ku lo resultá den goso tantu pa bo komo pa tur persona sinsero ku ta respondé na e mensahe di Reino ku bo ta prediká.—1 Korintionan 15:58.

Kumpli ku e Nesesidatnan Material di Bo Famia

Sin embargo, nutrishon spiritual lo no yena un stoma bashí. Ta bon pa nos kòrda riba e siguiente prinsipio: “Si un hende no proveé pa su mes hendenan, i spesialmente pa esnan di su kas, el a nenga e fe i ta pió ku un inkrédulo.” (1 Timoteo 5:8) Adam a bisa: “Maske e rumannan den kongregashon ta kla pa yuda ku nos nesesidatnan físiko, komo kristian nos tin un obligashon pa buska trabou.” Nos por konta riba e sosten di Yehova i di su pueblo, pero nos no mester lubidá nunka ku nos tin ku tuma inisiativa pa haña un trabou.

Ki inisiativa? Adam a bisa: “No sinta man krusá i warda pa Dios yuda bo, en espera di un milager. Ora bo ta buska trabou, no duda pa identifiká bo mes komo Testigu di Yehova. Por lo general, doñonan di trabou ta duna balor na esei.” Ryszard a duna e siguiente konseho: “Papia ku ken ku bo konosé tokante oportunidat di trabou, sigui averiguá na instansianan di intermediashon di empleo, lesa avisonan manera: ‘Nos ta buska un hende muhé pa kuida un persona desabilitá’; òf, ‘Trabou temporal: limpia i kuida kurá.’ Sigui buska! No sea muchu selektivo, ni ora bo haña algu ‘ku no ta na bo nivel’ òf algu ku no ta kumpli ku bo aspirashonnan.”

Sí, ‘Yehova ta yuda nos.’ Lo e “no bandoná bo, i nunka lo [e] no laga bo desampará.” (Hebreonan 13:5, 6) Bo no tin nodi di ta demasiado preokupá. E salmista David a skirbi: “Pone bo bida den man di SEÑOR, konfia den dje; lo e aktua.” (Salmo 37:5, BPK) ‘Pone nos bida den man di SEÑOR’ ta nifiká konfia den Yehova i sigui su kaminda, asta ora sirkunstansianan no ta mustra muchu faborabel pa nos.

Adam ku Irena a logra sostené nan mes dor di laba bentana i limpia trapi i dor di ta ‘zuinig’ ora di kumpra kos. Tambe nan tabata bishitá un ofisina di intermediashon di empleo regularmente. Irena a bisa: “Yudansa tabata bini nèt ora nos tabatin mester di dje.” Su esposo a agregá: “Ku tempu nos a bin ripará ku e kosnan ku nos tabata pidi den nos orashonnan no nesesariamente tabata kuadra ku e boluntat di Dios. Esaki a siña nos konfia den su sabiduria i no aktua segun nos mes komprondementu. Ta mihó warda trankil riba e solushon di Dios.”—Santiago 1:4.

Ryszard ku Mariola a tuma vários trabou iregular pero rònt di e mesun tempu ei nan a kuminsá prediká den teritorionan kaminda tabatin mas nesesidat. Ryszard a bisa: “Nos tabata haña trabou nèt na e momentunan ku nos no a sobra nada di kome. Nos a nenga di tuma trabou ku ta paga bon pero ku lo a interferí ku nos responsabilidatnan teokrátiko. Nos a preferá di spera riba Yehova.” Nan ta kere ku ta Yehova a maniobrá kosnan di tal manera ku nan por a hür un flèt bastante ekonómiko i ku finalmente Ryszard a haña un trabou.

Kisas ta duru pa bo pèrdè bo fuente di entrada, pero pakiko no mir’é komo un oportunidat pa bo eksperensiá personalmente ku Yehova hamas lo bandoná bo? Yehova ta perkurá pa bo. (1 Pedro 5:6, 7) El a primintí pa medio di profeta Isaias: “No desmayá, pasobra mi ta bo Dios. Lo mi fortalesé bo, sí, lo mi yuda bo.” (Isaias 41:10) Nunka laga un insidente inesperá, ni un retiro for di trabou, paralisá bo. Hasi tur loke bo por, anto laga sobrá den man di Yehova. Spera riba Yehova “den silensio,” esta, sin keha tokante bo situashon den bida. (Lamentashon 3:26) Lo e bendishoná bo rikamente.—Jeremias 17:7.

[Plachi na página 9]

Usa e tempu pa aktividatnan spiritual

[Plachinan na página 10]

Siña ekonomisá, i ora di buska trabou, no sea muchu selektivo